Ako Fakataukei Hono 4
Fai ha Ngaahi Fehuʻi ʻOku Ueʻi Fakalaumālié
ʻOku faʻa fai ʻe he kau faifekaú ha ngaahi fehuʻi ki he niʻihi ʻoku nau akoʻí. ʻE ala tokoni hono ʻeke e ngaahi fehuʻi leleí ki he kau faifekaú ke “mahino … ʻa e ngaahi tokanga, hohaʻa, mo e ngaahi fehuʻi ʻa e kakaí. ʻE lava ke fakaafeʻi ʻe he ngaahi fehuʻi leleí ʻa e Laumālié ke tokoni ke ako ʻa e kakaí” (Malanga ʻAki ʻEku Ongoongoleleí [2023], 215).
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Vahevahe ʻa e ngaahi fakahinohino ko ʻení ke fakafeʻiloaki ʻa e tefito ʻo hono ʻeke ha ngaahi fehuʻí:
Lau ʻa e ngaahi palakalafi mo e tēpile ʻi lalo ʻi he ʻuluʻitohi “Fai ha Ngaahi Fehuʻí” ʻi he vahe 10 ʻo e Malanga ʻAki ʻEku Ongoongoleleí (peesi 215–16). Kumi e fatongia ʻoku fakahoko ʻe he ngaahi fehuʻi leleí ʻi hono vahevahe ʻo e ongoongoleleí.
-
Ko e hā e ʻuhinga ʻoku mahuʻinga ai ke ʻeke ʻe he kau faifekaú ha ngaahi fehuʻi lelei ʻi heʻenau akoʻí?
Taki fealēleaʻakí: Fakamatalaʻi ange ʻoku ʻi ai ha faʻahinga fehuʻi ʻe niʻihi ʻoku lelei ange ia ʻi ha ngaahi fehuʻi kehe. Vahevahe ʻa e ngaahi fakahinohino ko ʻení ke tokoni ki he kau mēmipa ʻo e kalasí ke nau ako e ngaahi fakahinohino ki hono ʻeke ha ngaahi fehuʻi leleí:
Lau ʻa e ʻuluaki poini ʻe fitu ʻi he “Fakaʻehiʻehi mei he Ngaahi Fehuʻi Taʻeʻaonga pe Tōtuʻá” (Malanga ʻAki ʻEku Ongoongoleleí, 217). Kumi ha ngaahi fakahinohino ʻe ala tokoni atu ke ke ako ke ʻeke ha ngaahi fehuʻi ʻoku ʻaongá.
Fakatātaaʻi
Taki fealēleaʻakí: Fakaʻaliʻali ki he kau akó ha ngaahi sīpinga ʻe niʻihi ʻo e founga ke liliu ai e ngaahi fehuʻi ʻoku ʻikai fuʻu ʻaongá ki ha ngaahi fehuʻi ʻoku ola leleí. Fakakaukau ke fakaʻaongaʻi ʻa e ngaahi sīpinga ʻi he tēpile ko ʻení. Ki ha ngaahi sīpinga lahi ange, vakai ki he lisi ʻo e ngaahi fehuʻi ʻoku ʻikai faʻa ola leleí ʻi he peesi 217 ʻo e Malanga ʻAki ʻEku Ongoongoleleí.
|
Fehuʻi ʻoku ʻikai faʻa ola leleí |
Fehuʻi ʻoku ola lelei angé |
|---|---|
|
Ko hai ʻa e ʻuluaki palōfitá? (Mahalo he ʻikai ke ʻilo ʻe he tokotahá ʻa e talí |
ʻE tokoni fēfē nai ki hoʻo moʻuí kapau naʻá ke ʻiloʻi naʻe uiuiʻi ʻe he ʻOtuá ha kau palōfita he ʻahó ni? (Fehuʻi e ngaahi fakakaukau mo e ngaahi ongo ʻa e tokotahá.) |
|
ʻE tokoniʻi fēfē kitautolu ʻe heʻetau tauhi hotau sinó ke maʻá ke tau maʻu ai e Laumālié mo fakahaaʻi ʻoku tau loto-fiemālie ke muimui ki ha palōfita ʻa e ʻOtuá? (ʻOku lahi ange ʻa e fakakaukaú ia ʻi he tahá.) |
ʻOkú ke pehē ʻe tākiekina fēfē hotau vā fetuʻutaki mo e ʻOtuá ʻi hono tauhi hotau sinó ke maʻá? (Tokanga taha ki ha foʻi fakakaukau pē ʻe taha.) |
Ako Fakahoko
Taki fealēleaʻakí: ʻE lava ke ngāue fakataha ʻa e kau akó mo hanau hoa ke fakakakato ʻa e ʻekitivitī ko ʻení.
Lau ʻa e ngaahi sīpinga kehe mei he lisi ʻo e ngaahi fehuʻi ʻoku ʻikai faʻa ola leleí ʻi he vahe 10 ʻo e Malanga ʻAki ʻEku Ongoongoleleí (peesi 217). Fili ha fehuʻi ʻe ua pe tolu mei he ngaahi fehuʻi ko ʻení pea ngāue fakataha ke faʻu ha ngaahi fehuʻi ʻe ola lelei angé.
Taki fealēleaʻakí: Hili e ʻosi ʻa e kalasí, fakaafeʻi ha niʻihi ke nau vahevahe ha ngaahi sīpinga ʻo e ngaahi fehuʻi lelei ange ne nau faʻú.
Kapau ʻoku toe lahi e taimí, te ke lava ʻo fakaafeʻi e kau akó ke nau toutou fai ʻa e ʻekitivitī akoako ko ʻení mo e ngaahi fehuʻi kehe mei he lisi ʻo e ngaahi fehuʻi ʻoku ʻikai faʻa ola leleí ʻi he Malanga ʻAki ʻEku Ongoongoleleí.
Fakaʻaongaʻí
Taki fealēleaʻakí: Fakakaukau ke fakaʻaliʻali ʻa e ngaahi meʻá ni ke tokoni ki he kau akó ke nau fakakaukau ki he founga te nau lava ai ʻo fakaʻaongaʻi e taukei ko ʻení:
Fakakaukau ki he founga te ke lava ai ʻo fakaʻaongaʻi ʻa e meʻa kuó ke ako fekauʻaki mo hono ʻeke ha ngaahi fehuʻi leleí lolotonga e uike ʻe taha pe ua ka hokó. Hangē ko ʻení, te ke lava ʻo:
-
Fekumi ki ha ngaahi fehuʻi lelei ʻi ha ngaahi lēsoni ʻe niʻihi mei he Haʻu, ʻo Muimui ʻIate Aú.
-
Kapau ʻe vavé ni haʻo akoʻi ha lēsoni, teuteuʻi ha ngaahi fehuʻi lelei te ke ala ʻeke ʻi hoʻo akoʻí.