Lēsoni 13
Laka Atu Ki Muʻa ʻi he Tui
ʻOku fakataumuʻa ʻa e lēsoni ko ʻení ke tokoni ki he kau akó ke nau vakaiʻi ʻa ʻenau fakalakalaká mo e tupulakí ʻi heʻenau hoko ko e kau ākonga ʻa Sīsū Kalaisí ʻi he lolotonga ʻenau kau ʻi he kalasi Teuteu Ngāue Fakafaifekaú.
Vakaiʻi mo Muimuiʻi
Taki fealēleaʻakí: Fakaafeʻi ʻa e kau akó ke nau fakakaukau ki haʻanau ngaahi feinga kimuí ni ke fakaʻaongaʻi ʻa e meʻa ʻoku nau ako ʻi he kalasi ko ʻení. Te ke ala fakaafeʻi kinautolu ke vahevahe ha niʻihi ʻo ʻenau ngaahi ngāué mo hanau hoa pe fakakātoa ko ha kalasi.
‘Ekitivitī Ako ʻOku Fokotuʻu Atú
Fakakaukau ki he tupulaki fakalaumālié
Taki fealēleaʻakí: Te ke lava ʻo fakaʻaliʻali ha ngaahi fakatātā ʻo Sīsū Kalaisi ʻoku lotu mo e lau ʻe Siosefa Sāmita ʻo e Tohi Tapú. Fakaafeʻi ʻa e kau akó ke nau fakalaulauloto ki he ngaahi ʻīmisí ʻi heʻenau lau ʻa e Maʻake 1:35; Luke 6:12; mo e Siosefa Sāmita—Hisitōlia 1:12–13. Poupouʻi kinautolu ke nau kumi ha pōpoaki angamaheni ʻi he ngaahi veesi ko ʻení.
-
Ko e hā e lau ʻa e folofolá ki he meʻa naʻe fakatou fakahoko ʻe he Fakamoʻuí mo Siosefa Sāmita ke na tupulaki fakalaumālie aí?
-
Naʻe liliu fēfē ʻa e moʻui ʻa Siosefa Sāmitá ʻe heʻene fakakaukau ki he meʻa naʻé ne lau ʻi he Sēmisi 1:5?
Taki fealēleaʻakí: Fakamatalaʻi ange ʻe lava ke tokoniʻi kitautolu ʻe he tuku ha taimi ke fakalaulauloto mo fakakaukau ai ʻi he faʻa lotu ki heʻetau fakalakalaka fakalaumālié, ke tau maʻu ha fakahinohino mei he ʻEikí.
Te ke lava ʻo tokoni ke fakahoko ʻeni ʻe he kau mēmipa ʻo e kalasí ʻaki haʻo tā ha fōtunga ʻe tolu ʻi he palakipoé pea fakahingoa kinautolu ko e Kamataʻanga ʻo e Kalasí, ʻAhó ni, mo e Māhina ʻe Ono mei he ʻAhó ni. Peá ke toki vahevahe ange ʻa e ngaahi fakahinohino ʻi laló:
Fakakaukau ki hoʻo tupulaki fakalaumālie talu mei hoʻo kamata ʻi he kalasi ko ʻení. ʻIkai ngata ai, fakakaukau ki he fakalakalaka ʻoku kei fiemaʻu ke ke fakahokó. Hiki hoʻo ngaahi fakakaukaú mo e ngaahi ueʻi fakalaumālié. ʻE lava ke tokoni ʻa e ngaahi fehuʻi hangē ko ʻení:
Fakakaukau ki he kuohilí
-
ʻI hono fakafehoanaki ki hoʻo mateuteu kimuʻa peá ke fakahoko ʻa e kalasi ko ʻení, ko e hā ha ngaahi founga ʻokú ke ongoʻi mateuteu lelei ange ai he taimí ni ke ngāue fakafaifekau pe vahevahe ʻa e ongoongoleleí mo e niʻihi kehé?
-
Kuo faitokonia fēfeeʻi koe ʻi hono ako e Malanga ʻAki ʻEku Ongoongoleleí?
-
Kuo liliu fēfē hoʻo fengāueʻaki mo e Tamai Hēvaní mo Sīsū Kalaisí?
-
Ko e hā ha ngaahi aʻusia ʻi he lolotonga ʻo e kalasí pe mavahe mei ai, kuo ʻaonga kiate koe?
Laka kimuʻa
-
Ko e hā ʻokú ke kei fie fakahoko ke hoko atu hoʻo teuteu ki he ngāue fakafaifekaú? Ko e hā ʻokú ke ongoʻi ko hoʻo sitepu hono hoko ia ʻoku totonu ke ke aʻusia ʻi he ngaahi taumuʻa ko ʻení?
-
Ko hai ʻokú ke fie tokoni ki ai ke ofi ange ki he Tamai Hēvaní mo Sīsū Kalaisí? Ko e hā te ke fakahoko ke tokoni kiate kinautolú?
Taki fealēleaʻakí: Fakaafeʻi ʻa e kau akó ke nau aleaʻi ha ngaahi tali ʻoku nau ongoʻi fiemālie ke vahevahe mo ha hoa pe kiʻi kulupu. ʻE lava ʻo hoko foki ʻeni ko ha taimi lelei ke fakaafeʻi ai e kau mēmipa ʻo e kalasí te nau loto ki aí, ke nau vahevahe ʻenau fakamoʻoni kia Sīsū Kalaisí mo ʻEne ongoongoleleí, mo e kalasí.
Fakakaukau ke fakaʻosi ʻaki hano vahevahe ange ʻa e fakamatala ko ʻeni naʻe fai ʻe ʻEletā Tēvita A. Petinaá:
Te ke lava ʻo fakatupulaki hoʻo holi ke tokoni ki he ʻOtuá, pea te ke lava ʻo kamata ke fakakaukau hangē ko e kau faifaifekaú, ke lau ʻa e meʻa ʻoku lau ʻe he kau faifekaú, lotu hangē ko e kau faifekaú, mo ongoʻi hangē ko e ongo ʻa e kau faifekaú. Te ke lava ʻo fakaʻehiʻehi mei he ngaahi ivi tākiekina fakamāmani ʻokú ne fakatupu e mavahe atu ʻa e Laumālie Māʻoniʻoní, pea te ke lava ʻo tupulaki ʻi he falala ki hono ʻiloʻi mo tali e ngaahi ueʻi fakalaumālié. ʻI he ʻotu laine ki he ʻotu laine mo e ʻotu lea ki he ʻotu lea, ko e siʻi ʻi heni pea siʻi ʻi hena, te ke lava māmālie pē ʻo hoko ko e faifekau koē ʻokú ke fakaʻānaua ki aí pea mo e faifekau ʻoku ʻamanaki mai ki ai ʻa e Fakamoʻuí. (“Becoming a Missionary,” Liahona, Nov. 2005, 46)
Taki fealēleaʻakí: Fakahaaʻi hoʻo ʻofa kiate kinautolu ʻoku kaú, hoʻo fakamoʻoni ki he Fakamoʻuí, mo hoʻo ngaahi ongo fekauʻaki mo e mahuʻinga ʻo hono malangaʻi ʻEne ongoongoleleí. Poupouʻi ʻa e kau akó ke nau laka atu ki muʻa ʻi he tui ʻi heʻenau teuteú, koeʻuhí ke nau lava ʻo hoko ko e kau faifekau mo e kau ākonga ʻe finangalo ki ai ʻa e ʻEikí.