Fakahoko Hoʻo Taumuʻa Fakafaifekaú

Tau pehē ʻoku ʻi ai hao kaungāmeʻa ʻoku ʻikai ko ha mēmipa ʻo e Siasí. ʻI he fehuʻi atu ʻe hoʻo kaungāmeʻá pe ko e hā hoʻo palani ki he ʻaho ní, ʻokú ke talaange te ke ʻalu ki ha kalasi teuteu ngāue fakafaifekau. Pea toe fehuʻi atu ho kaungāmeʻá, “Ko e hā ʻoku fai ʻe he kau faifekaú?”

Lau ʻa e “Ko Hoʻo Taumuʻá” (Malanga ʻAki ʻEku Ongoongoleleí, 1) pea mo e fakamatala ko ʻeni meia ʻEletā D. Toti Kulisitofasoní.

Kātaki kae ʻoua naʻá ke tukunoaʻi ʻa e vahe 1 ʻo e Malanga ʻAki ʻEku Ongoongoleleí mo hono fehuʻi “Ko e hā ʻeku taumuʻa ʻi heʻeku hoko ko e faifekaú?” Fakatōkakano ʻa e taumuʻa ʻo e ʻomi ʻa e kakaí kia Kalaisi ʻo fakafou ʻi he ngaahi tefitoʻi moʻoni mo e ngaahi ouau ʻo e ongoongolelei kuo fakafoki maí, pea ʻe mahino kiate koe, ko hono vahevahe ʻo e ongoongoleleí ʻoku ʻikai ko ha polokalama ia; ko ha ngāue—ko e ngāue ʻa e Tamaí, ʻAló, pea mo e Laumālie Māʻoniʻoní. (D. Todd Christofferson, “ʻUhinga ʻOku Tau Vahevahe Ai e Ongoongoleleí,” Liahona, ʻAokosi 2014, 36)

Aleaʻi ʻa e founga ʻe lava ke faitokonia ai ʻe he fakatōkakano ʻo e taumuʻa ko ʻení ʻa e meʻa ko ʻení:

• Founga hoʻo teuteu ke ngāue fakafaifekaú

• Hoʻo ngaahi tōʻonga ko e faifekaú

Lau ʻa e “Ko Ho Tufakanga ke Akoʻi e Ongoongolelei ʻo Sīsū Kalaisi Kuo Fakafoki Maí” (Malanga ʻAki ʻEku Ongoongoleleí, 1–2). ʻI hoʻo akó, fakaʻilongaʻi ʻa e:

1. Ngaahi ʻuhinga ʻoku tau fakaafeʻi ai ʻa e niʻihi kehé ke haʻu kia Sīsū Kalaisí.

2. Meʻa te tau lava ʻo fai ke tokoniʻi ʻa e niʻihi kehé ke nau haʻu kia Sīsū Kalaisi.

• Kuo founga fēfē hano ʻomai ʻe he muimui ki he Fakamoʻuí ha “fiefia, ʻamanaki lelei, nonga, mo ha taumuʻa lahi ange” (peesi 2) kiate koe pe kakai ʻokú ke ʻiló?

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení pe fakakaukau pē ʻaʻau.

• Hoko atu hono ako maʻuloto e taumuʻa ʻa e faifekaú. Fakamatalaʻi ia mei hoʻo manatú ki ha mēmipa ʻo e fāmilí pe ha kaungāmeʻa. Fakakaukau ki he meʻa kuó ke ʻosi fai pe te ke lava ʻo kamata fakahoko, ko ha konga ʻo e taumuʻa ʻa e faifekaú.

• ʻAlu ki he peesi “Vahevahe ʻo e Ongoongoleleí” ʻi he ChurchofJesusChrist.org. Kumi ha ngaahi fakakaukau ʻe lava ʻo tokoni atu ke ke vahevahe ʻa e ongoongoleleí mo e niʻihi kehé.

• Fakakaukau ʻi he faʻa lotu ki ha taha ʻokú ke fie tokoniʻi ke ofi ange kia Sīsū Kalaisi mo ne aʻusia ʻa e ngaahi tāpuaki ʻo ʻEne ongoongoleleí. Fakapapauʻi ʻa e meʻa te ke fai ke tokoniʻi ai kinautolú (hangē ko ʻení, “Te u lotua ʻa e tokotahá ni pea fakaafeʻi ia ki he lotú ʻi he Sāpate ko ʻení”).

ʻOku mālohi fau ʻa e tokāteline haohaoa ʻa Kalaisí. ʻOkú ne liliu ʻa e moʻui ʻa e taha kotoa ʻoku mahino ki ai mo feinga ke ne fakahoko ia ʻi heʻene moʻuí. (“Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 6)

• Kapau ʻe ʻeke atu ʻe ha taha pe ko e hā ʻa e tokāteline ʻa Kalaisí, ko e hā te ke talaangé?

Kumi ʻa e konga ʻi he vahe 1 ʻo e Malanga ʻAki ʻEku Ongoongoleleí ʻoku ui “Ko e Ongoongolelei ʻo Kalaisí mo e Tokāteline ʻa Kalaisí.” Lau ʻa e ʻuluaki palakalafi ʻe tolú mo e fakamatala meia Hailame Sāmitá (peesi 6). Kumi ʻa e tali ki he ongo fehuʻi ko ʻení:

• Ko e hā ʻa e tokāteline ʻa Kalaisí?

• Ko e hā ka feinga ai ha taha ʻoku teuteu ke ngāue fakafaifekau ke mahino mo ne moʻui ʻaki ʻa e tokāteline ʻa Kalaisí?

Ako lahi ange ki he tokāteline ʻa Kalaisí ʻaki haʻo ako ʻa e ngaahi konga ko ʻení mei he vahe 1 ʻo e Malanga ʻAki ʻEku Ongoongoleleí (peesi 7–9):

• “Tui kia Sīsū Kalaisi”

• “Fakatomalá”

• “Papitaisó”

• “Hilifakinimá mo e Meʻafoaki ʻo e Laumālie Māʻoniʻoní”

• “Kātaki ki he Ngataʻangá” (Ako foki ʻa e 2 Nīfai 31:19–20.)

Fakaʻilongaʻi ʻa e ngaahi foʻi lea mo e ngaahi kupuʻi lea mahuʻingá ʻi hoʻo akó. Fakakaukau ke lau ha niʻihi ʻo e ngaahi potufolofola ʻoku fekauʻaki mo e kongá. Teuteu ke vahevahe ʻa e meʻa naʻá ke akó.

Fakamatalaʻi fakanounou ʻa e konga ʻo e tokāteline ʻa Kalaisí naʻá ke akó. ʻE lava ke ke fakakau ʻa e ngaahi meʻa ko ʻení ʻi hoʻo fakamatalá:

1. Ko ha fakamatala fakanounou ʻo e meʻa naʻá ke akó

2. Founga ʻoku tokoniʻi ai ʻe he konga ko ʻeni ʻo e tokāteliné ʻa e kakaí ke nau haʻu kia Kalaisi pea maʻu Hono mālohi faifakamoʻuí

3. Founga kuo faitāpuekina ai koe pe ha taha ʻokú ke ʻiloʻi ʻe he muimui ki he konga ko ʻeni ʻo e tokāteline ʻo Kalaisí

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení pe fakakaukau pē ʻaʻau.

• Ako ʻa e 2 Nīfai 31, ʻo kumi e ngaahi akonaki ʻa Nīfai kau ki he tokāteline ʻa Kalaisí.

• Feinga ke ʻiloʻi ha ʻelemēniti ʻo e tokāteline ʻa Kalaisí ʻokú ke loto ke fakakau kakato ange ʻi hoʻo moʻuí. Fakakaukauʻi ʻa e founga te ke fakahoko ai iá.

• ʻE lava fēfē ke ʻilo ʻe ha taha ko ha faifekau lavameʻa kinautolu?

1. Lau ʻa e ʻuluaki palakalafi ʻe hiva ʻo e “Ko ha Faifekau Lavameʻá” ʻi he vahe 1 ʻo e Malanga ʻAki ʻEku Ongoongoleleí (peesi 14-15). Valivali pe fakaʻilongaʻi ʻa e ngaahi ʻulungaanga ʻo e kau faifekau lavameʻá. Fakaʻilongaʻi ʻa e ngaahi meʻa ʻoku ʻikai mahuʻinga ki he lavameʻá ʻi ha founga kehe (hangē ko ha lanu kehe pe founga ʻo hono laineʻí).

2. Vakaiʻi ʻa e ngaahi fakakaukau ʻoku lisi ʻi lalo ʻi he peesi 15. Fili ha potufolofola ʻe ua pe lahi ange ke lau, ʻo kumi ʻa e meʻa ʻoku nau akoʻi fekauʻaki mo e hoko ko ha faifekau lavameʻá.

Tau pehē ʻokú ke maʻu ha pōpoaki mei ha kaungāmeʻa ʻoku lolotonga ngāue fakafaifekau taimi kakato. ʻOku nau ongoʻi hangē ʻoku ʻikai ke nau hoko ko ha faifekaú koeʻuhí he kuo teʻeki papitaiso ha taha ia kuo nau akoʻi pea kuo teʻeki ai ke nau maʻu ha tuʻunga fakatakimuʻa. ʻOku kamata ke nau ongoʻi hangē ʻoku nau maumauʻi honau taimí.

• Makatuʻunga ʻi he meʻa naʻá ke ako mei he “Ko ha Faifekau Lavameʻá” ʻi he vahe 1 ʻo e Malanga ʻAki ʻEku Ongoongoleleí (peesi 14–15), tokoni ki ho kaungāmeʻá ke lelei ʻene fakakaukau fekauʻaki mo hono ʻuhinga ʻo e hoko ko ha faifekau lavameʻá.

• Fakamatalaʻi ʻa e founga ʻe lava ai ʻe he tokanga lahi ange kia Sīsū Kalaisí ʻo liliu e ngaahi ongo ho kaungāmeʻá ki heʻenau ngāue fakafaifekaú.

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení pe fakakaukau pē ʻaʻau.

• Fakakaukau ki ha taha ʻokú ke ʻiloʻi ʻoku lolotonga ngāue fakafaifekau. ʻĪmeili pe tohi kiate kinautolu ʻo fakamatalaʻi fakanounou ʻa e meʻa naʻá ke ako he ʻahó ni fekauʻaki mo e hoko ko ha faifekau lavameʻá. Te ke lava foki ʻo ʻeke ki he faifekaú pe ko e hā e meʻa ne nau ʻilo ʻokú ne ʻai ke nau lavameʻá.

• Fakakaukau ki ha meʻa te ke lava ʻo fai he taimí ni ke ke teuteu ke hoko ko ha faifekau lavameʻa ʻi he kahaʻú.