Ngaahi Kalasi ʻo e Ongoongoleleí
Lēsoni 10: Kumi ki he Ngaahi ʻUlungaanga Faka-Kalaisí

Lēsoni 10

Fekumi ki he Ngaahi ʻUlungaanga Faka-Kalaisí

Malanga ʻAki ʻEku Ongoongoleleí, Vahe 6

kau toutai tangatá

“Ko ha founga mahuʻinga ʻe taha ke kumi ai kia Sīsuú ke feinga faivelenga ke ako kiate Ia mo hoko ʻo tatau ange mo Ia” (Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí [2023], 140). ʻE lava ke tokoniʻi kitautolu ʻe he feinga ke fakatupulaki ʻa e ngaahi ʻulungaanga ʻo Sīsū Kalaisí ke tau vahevahe lelei ange ai ʻa e ongoongolelei ʻa e Fakamoʻuí. ʻI he tokoni ʻa e Fakamoʻuí, te tau lava māmālie ai ke fakatupulaki ʻa e ngaahi ʻulungaanga ʻokú ne tokoniʻi ke tau hoko ʻo tatau ange mo Iá.

Vakaiʻi mo Muimuiʻi

Taki fealēleaʻakí: Fakaafeʻi ʻa e kau akó ke nau fakakaukau ki haʻanau ngaahi feinga kimuí ni ke fakaʻaongaʻi ʻa e meʻa ʻoku nau ako ʻi he kalasi ko ʻení. Te ke ala fakaafeʻi kinautolu ke vahevahe ha niʻihi ʻo ʻenau ngaahi ngāué mo hanau hoa pe fakakātoa ko ha kalasi.

‘Ekitivitī Ako ʻOku Fokotuʻu Atú

Te u lava fēfē ke hoko ʻo tatau age mo e Fakamoʻuí?

Ako

Taki fealēleaʻakí: Fakaʻaliʻali ha ngaahi ʻīmisi ʻo e Fakamoʻuí, hangē ko ʻení. Fakaafeʻi ʻa e kau akó ke vahevahe ʻa e ngaahi ʻulungaanga faka-Kalaisi ʻoku nau fakatokangaʻi ʻi he ngaahi ʻīmisi ko ʻení. Te mou lava foki ʻo mamata ʻi he “Ngaahi ʻUlungaanga Faka-Kalaisí” (2:53; ChurchofJesusChrist.org) ke tokoni ke fakatokangaʻi ʻe he kau mēmipa ʻo e kalasí ʻa e ngaahi sīpinga ʻo e ʻulungaanga ʻo e Fakamoʻuí.

ko e ngāue ʻa e Fakamoʻuí
ko e ngāue ʻa e Fakamoʻuí 2
ko e ngāue ʻa e Fakamoʻuí 3

  • Ko e hā ha niʻihi ʻo e ngaahi ʻulungaanga ʻo e Fakamoʻuí ʻokú ke saiʻia taha ai? Ko e hā hono ʻuhingá?

Taki fealēleaʻakí: Fakamatalaʻi ange ʻe maʻu ʻe he kau mēmipa ʻo e kalasí ʻi he lēsoni ko ʻení ha faingamālie ke ako ki he mahuʻinga ʻo e fekumi ki he ngaahi ʻulungaanga faka-Kalaisí ʻi he ngāue fakafaifekaú. Fakaafeʻi kinautolu ke kole ha fakahinohino mei he Laumālie Māʻoniʻoní ke nau ʻiloʻi pe ko e fē ʻa e ngaahi ʻulungaanga ʻe finangalo ʻa e ʻEikí ke nau feinga ke fakatupulaki ʻi heʻenau moʻuí. Vahevahe ʻa e ngaahi fakahinohino ko ʻení:

Lau ʻa e “Talateú” mo e “Kumi ki he Sīsū ko ʻEní” ʻi he vahe 6 ʻo e Malanga ʻAki ʻEku Ongoongoleleí (peesi 139–40). Fakaʻilongaʻi ʻa e ngaahi tāpuaki ʻoku fekauʻaki mo hono fakatupulaki ʻo e ngaahi ʻulungaanga faka-Kalaisí.

Taki fealēleaʻakí: Te ke lava foki ʻo fakakaukau ke ako fakataha mo e Tokāteline mo e Ngaahi Fuakava 4 hangē ko hono fakamatalaʻi ʻi he puha “Ako Fakafoʻituituí” (Malanga ʻAki ʻEku Ongoongoleleí, 140).

Fakaafeʻi ʻa e kau mēmipa ʻo e kalasí ke nau fakamatalaʻi ʻa e meʻa naʻe makehe kiate kinautolu ʻi he meʻa naʻa nau akó. ʻE lava ke fakaʻaongaʻi ʻa e ngaahi fehuʻi ko ʻení ʻi he fealēleaʻakí ni:

  • ʻE lava fēfē ke tokoniʻi koe ʻe he feinga ke tatau ange mo Sīsū Kalaisí ke ke hoko ko ha faifekau lelei ange?

  • Ko e hā ha fatongia ʻoku fakahoko ʻe he Fakamoʻuí ʻi hono tokoniʻi koe ke ke hoko ʻo tatau ange mo Iá?

Taki Fealēleaʻakí: ʻI hoʻomou aleaʻi ʻa e ngaahi fehuʻi kimuʻá, fakakaukau ke fakaafeʻi ʻa e kau akó ke nau lau ʻa e konga “Ngaahi Meʻafoaki mei he ʻOtuá” mo e “Ko ha Founga Māmālie” (Malanga ʻAki ʻEku Ongoongoleleí, 140). Fakaafeʻi ke nau kumi ʻa e ngaahi foʻi lea pe ngaahi kupuʻi lea ʻi he ngaahi konga ko ʻení ʻe tokoni ke mahino lelei ange ai kiate kinautolu ʻa e fiemaʻu kenau falala ki he Fakamoʻuí ʻi hono fakatupulaki ʻo e ngaahi ʻulungaanga faka-Kalaisí.

  • Ko e hā kuo tokoni atu ke ke fakalakalaka ke tatau ange mo e Fakamoʻuí?

Akoakó

Taki fealēleaʻakí: ʻOku fakataumuʻa ʻa e konga ko ʻeni ʻo e lēsoní ke tokoni ki he kau akó ke nau fakapapauʻi pe ko e fē ʻi he ngaahi ʻulungaanga ʻo e Fakamoʻuí ʻoku nau fie fakatupulakí. Fakaʻaliʻali e ngaahi fakahinohino ko ʻení.

  1. Fakakakato ʻa e “ʻEkitivitī ʻUlungāangá” ʻi he ngataʻanga ʻo e vahe ʻo e Malanga ʻAki ʻEku Ongoongoleleí (peesi 153–56).

  2. Fakatatau mo hoʻomou ngaahi talí, fili ha ʻulungaanga faka-Kalaisi ʻokú mou fiemaʻu ke mahino mo fakatupulaki lelei ange.

  3. Kumi pea mo ako ʻa e konga ʻi he ʻulungaanga kuó ke fili ʻi he vahe 6 ʻo e Malanga ʻAki ʻEku Ongoongoleleí.

Taki fealēleaʻakí: Ka hili ha taimi feʻunga, pea fakaafeʻi ʻa e kau mēmipa ʻo e kalasí ke nau vahevahe mo ha hoa ʻa e ʻulungaanga ne nau fili ke akó, fakataha mo ha fakamatala nounou ki he meʻa ne nau akó.

Fokotuʻu ha taumuʻa

Taki fealēleaʻakí: ʻOange ha taimi ki he kau mēmipa ʻo e kalasí ke nau fakakaukau ki he meʻa kuo nau akó pea fokotuʻu ha ngaahi taumuʻa. Te ke lava ʻo fakaʻaliʻali ange ʻeni kiate kinautolu:

Faʻu ha palani ki he founga te ke feinga ai ke fakatupulaki ʻa e ʻulungaanga faka-Kalaisi naʻá ke akó. Te ke lava ʻo fakaʻaongaʻi ʻa e ngaahi fokotuʻu ʻi he ʻuluʻi tohi “Ko ha Sīpinga ke Anga Faka-Kalaisi Lahi Angé” (Malanga ʻAki ʻEku Ongoongoleleí, 150) ke tokoni atu. ʻOua te ke hohaʻa kapau ʻoku ʻikai ke ke haohaoa ʻi he ʻulungaanga ko ʻení. Hokohoko atu hoʻo feingá pea ʻe tokoniʻi koe ʻe he Fakamoʻuí.

Ko ʻeku taumuʻá

  • Te u … (ngāue te ke faí).

  • Te u lavaʻi ʻeku taumuʻá ʻaki … (ha kiʻi palani faingofua).

Taki fealēleaʻakí: Kapau ʻoku maʻu ʻe he kau akó ha kulupu ʻo honau toʻú ke vahevahe ʻenau ngaahi tukupaá ʻi he toenga ʻo e kalasí, ʻoange ha taimi ke nau vahevahe ai ʻa e founga te nau fepoupouaki pe fefakamanatuʻaki ai kimuʻa ʻi he kalasi hokó.

Taimi Hono Hokó

Taki fealēleaʻakí: Kapau ʻokú ke mateuteu ke akoʻi ʻa e lēsoni 11 ʻi he kalasi hokó, fakakaukau ke fakaafeʻi ʻa e kau mēmipa ʻo e kalasí ke nau ako ʻa e vahe 11 ʻo e Malanga ʻAki ʻEku Ongoongoleleí ʻi he teuteú. Mahalo te ke fie ʻave ha fakamanatu kiate kinautolu.