Tokoni‘i ʻa e Kakaí ke Nau Fakahoko mo Tauhi ʻa e Ngaahi Tukupaá

ʻOku toutou akoʻi mai ʻe he kau tamaioʻeiki ʻa e ʻEikí kuo fakamafaiʻí ko e taha ʻo e ngaahi tefitoʻi taumuʻa ʻo ʻetau moʻui fakamatelié ke liliu fakalaumālie pea liliu ʻo fakafou ʻi he Fakalelei ʻa Sīsū Kalaisí. (“Ye Must Be Born Again,” Ensign pe Liahona, May 2007, 19–20)

• ʻOkú ke pehē ko e hā ʻoku hoko ai ʻa e liliu fakalaumālié, pe uluí, ko e taha ʻo e ngaahi tefitoʻi taumuʻa ʻo hotau kuonga ʻi he māmaní?

Fakakakato ʻa e ʻekitivitī ako ko ʻení. Fakaʻilongaʻi ʻa e meʻa ʻokú ke ako fekauʻaki mo e (1) ʻuhinga ʻo e ului ki he ʻEikí mo e (2) founga ʻo e hoko ʻa e uluí.

1. Lau ʻa e konga ʻoku ui ko e “Fakatomala, Tukupā mo Ului” ʻi he vahe 11 ʻo e Malanga ʻAki ʻEku Ongoongoleleí (peesi 229–20).

2. Ako ha potufolofola ʻe ua pe lahi ange mei he ngaahi potufolofola ko ʻení: Sione 3:3–5; Mōsaia 5:2; Mōsaia 27:25–26; ʻAlamā 5:12–14.

• ʻOku fekauʻaki fēfē ʻa e fakatomalá, tukupaá, mo e ngaahi fuakavá mo e uluí?

• ʻOkú ke pehē ko e hā ʻoku toki lava ai pē ʻa e uluí ʻo fakafou ʻia Sīsū Kalaisi mo ʻEne Fakaleleí?

• Ko e hā kuó ne tokoniʻi koe ke fakaloloto hoʻo ului kia Sīsū Kalaisí?

Fili ha taha ʻo e ngaahi tūkunga ko ʻení. Teuteu ha tali ki he tokotaha ʻi he tūkungá ʻaki hano tali ʻa e ngaahi fehuʻi ʻi laló.

1. Kuo teʻeki ke teitei kau ʻa Kilisitina ia ki ha siasi. Kuó ne ongoʻi kimuí ni mai ha holi ke toe ofi ange ki he ʻOtuá. ʻOku fifili ai pē ʻe kamatá ʻi fē.

2. ʻOku lolotonga akoʻi ʻa ʻAisake ʻe he ongo faifekaú. Lolotonga ha taha ʻo e ngaahi lēsoní, naʻe akoʻi ai ʻe he ongo faifekaú kia ʻAisake ʻoku kau ʻi he fakatomalá ʻa e tafoki ki he ʻOtuá pea sītuʻa mei heʻetau ngaahi angahalá. Naʻe tali ange ʻe ʻAisake ʻaki ʻene pehē, “ʻOku ʻikai ke u fakapapauʻi pe te u lava ʻo fai ia. Ko hoku anga pē ʻeni ʻoʻokú.”

3. ʻOku fakatokangaʻi ʻe Sesimani ha kakai ʻoku hangē ʻoku faingofua ange ʻenau tauhi ʻa e ngaahi fuakavá mo maʻu ha fakamoʻoni mālohi ange ʻiate ia. ʻOkú ne ongoʻi loto-foʻi ʻi he taimi ʻokú ne fakafehoanaki ai ia ki he kakai kehé.

• Ko e hā te ke lava ʻo vahevahe mei he folofolá pe Malanga ʻAki ʻEku Ongoongoleleí ʻe lava ʻo tokoni?

• Ko e hā te ke lava ʻo akoʻi fekauʻaki mo e Tamai Hēvaní mo Sīsū Kalaisi?

• Ko e hā ha fakaafe te ke lava ʻo fakahoko?

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• Hiki ʻa e talanoa hoʻo ului fakafoʻituituí pe ko hoʻo ului lolotongá. Fakakau ai ha ngaahi founga pau kuo tākiekina ai ʻe he ʻOtuá ʻa e ngaahi liliu ʻi hoʻo moʻuí.

• Fehuʻi ki ha kaungāmeʻa pe mēmipa ʻo e fāmilí fekauʻaki mo e founga ʻo ʻenau ului kia Sīsū Kalaisí.

• Hiki ha founga ʻe tolu te ke lava ʻo kumi ai ha tokoni meia Sīsū Kalaisi ke fakamālohia hoʻo ului fakafoʻituituí.

• Ko e hā ha fakaafe naʻá ke maʻu mo fakahoko kuo tokoni atu ke ke haʻu ʻo ofi ange kia Sīsū Kalaisi?

• Naʻe mei kehe fēfē nai ʻeni kiate koe kapau naʻe ʻikai ke fakahoko atu ʻa e fakaafe ko ʻení?

Ako ki he founga fakahoko ʻo e ngaahi fakaafé ʻaki hano ako ʻo e ngaahi meʻa ko ʻeni ʻi he vahe 11 ʻo e Malanga ʻAki ʻEku Ongoongoleleí:

1. Ko e ongo palakalafi mo e ngaahi meʻa mahuʻinga ʻi he ʻuluʻi tohi “Fai ha Ngaahi Fakaafé” (peesi 230)

2. “Ngaahi Tefitoʻi Moʻoni ki he Fakahoko ʻo e Fakaafé” (peesi 231)

• Ko e hā naʻá ke ako fekauʻaki mo e mahuʻinga hono fakahoko ʻo e ngaahi fakaafé ʻi heʻetau vahevahe ʻa e ongoongolelei ʻo Sīsū Kalaisí?

• Ko e hā ha ngaahi sīpinga ʻo e ngaahi fakaafe te tau lava ʻo fai ke tokoniʻi e niʻihi kehé ke nau haʻu kia Kalaisí?

ʻOku laungeau ʻa e ngaahi fakaafe te tau lava ke fakaaʻu atu ki he niʻihi kehé. Te tau lava ʻo fakaafeʻi ʻa e niʻihi kehé ke nau “omi ʻo mamata” ʻi ha houalotu sākalamēniti, pe ko ha ʻekitivitī fakauooti, pe ko ha vitiō ʻi he ʻinitanetí ʻokú ne fakamatalaʻi ʻa e ongoongolelei ʻo Sīsū Kalaisí. ʻE lava ke hoko ʻa e “omi ʻo mamatá” ko ha fakaafe ke lau ʻa e Tohi ʻa Molomoná pe ʻaʻahi ki ha temipale foʻou lolotonga ʻa e open house kimuʻa pea fakatapuí. (“ʻOfa, Vahevahe, Fakaafe,” LiahonaMē 2022, 86)

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• Ako fakahoko hoʻo fakaafé ki ha mēmipa ʻo e fāmilí pe kaungāmeʻa ʻi tuʻa ʻi he kalasí.

• Vakaiʻi ʻa e konga “Ko Hono Vahevahe ʻo e Ongoongoleleí” ʻi he Gospel Library pea kumi ha ngaahi sīpinga ʻo ha ngaahi fakaafe te ke lava ʻo fakahoko ki ho fāmilí pe ngaahi kaungāmeʻá. Fakahoko ʻa e meʻa ʻokú ke ongoʻi ʻoku ueʻi koe ke ke fakahokó.

• Fakaafeʻi ha kaungāmeʻa ke mo ō ki he lotú pe ʻekivitī ʻa e siasí. Fakaʻaongaʻi ʻa e ngaahi fakahinohino naʻá ke akoakó ʻi hoʻo fakaafeʻi kinautolú.