Ako Fakataukei Hono 7
Meʻa ke Fai ʻi he Ongoʻi Taʻefeʻungá
ʻE lava ke angamaheni pē ʻetau ongoʻi taʻefeʻunga ʻi he taimi ʻoku tau foua ai ha ngaahi tūkunga foʻou pe faingataʻá. Ko e tokanga taha ki he meʻa te tau lava ʻo mapuleʻí ko ha founga ia ke tokoniʻi ai kitautolu ke tau ikunaʻi ʻa e ngaahi ongoʻi taʻefeʻungá.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakamatalaʻi ange ko e taimi ʻoku fai ai ha ngaahi meʻa foʻoú, ʻoku angamaheni pē ke te ongoʻi taʻefeʻunga. Te ke lava ʻo ʻomi ha sīpinga mei hoʻo moʻuí ʻi he taimi naʻá ke ongoʻi taʻefeʻunga aí.
-
Ko e hā ha tūkunga kimuí ni naʻá ne tataki koe ke ke ongoʻi taʻefeʻungá?
-
Ko e hā ha meʻa naʻá ke fai naʻe ʻaonga pe ʻikai ʻaonga kiate koe?
-
Ko e hā ʻoku mahuʻinga ai ke tau falala ki he ʻEikí ʻi he taimi ʻoku tau ongoʻi taʻefeʻunga aí? (vakai, Filipai 4:13; ʻAlamā 26:12)
Taki fealēleaʻakí: Lau fakataha ʻa e palakalafi ko ʻení. (Te ke lava foki ʻo fakaafeʻi e kau akó ke nau kumi mo fakaʻilongaʻi ʻa e palakalafi ko ʻení ʻi he peesi 32 ʻo e Ko e Fakaangaanga ki he Moʻui Fakafaifekaú.)
ʻOua te ke feinga ke puleʻi ʻa e meʻa ʻoku ʻikai ke ke lava ʻo mapuleʻí. Ko e feinga ko ia ke puleʻi e meʻa ʻoku ʻikai ke ke lava ʻo mapuleʻí te ne ʻai ke ke ongoʻi ʻoku lahi ange ʻa e ʻikai ke ke lava ʻo mapuleʻi e ngaahi meʻá, ʻo fakalahi ai hoʻo loto-hohaʻá. Tuku taha ho iví ki he ngaahi meʻa te ke lava ʻo fai ha meʻa ki aí. (Ko e Fakaangaanga ki he Moʻui Fakafaifekaú [2013], 32)
-
ʻOkú ke pehē ʻe tokoniʻi fēfē kitautolu ʻe he tokanga taha ki he meʻa te tau lava ʻo mapuleʻí ke tau ikunaʻi ʻa e ngaahi ongoʻi taʻefeʻungá?
Fakatātaaʻi
Taki fealēleaʻakí: Ke tokoni ki he kau mēmipa ʻo e kalasí ke nau ako e founga ke tokanga taha ai ki he meʻa te nau lava ʻo mapuleʻí, vakaiʻi fakataha e ngaahi sīpinga ko ʻení.
Te mou lava ʻo aleaʻi ʻa e ʻuhinga ʻe ʻikai lava ai ke mapuleʻi ʻe ha taha ʻa e ngaahi sīpinga ʻi he kōlomu toʻohemá. Kimuʻa pea vahevahe ʻa e ngaahi tali ʻi he kōlomu toʻomataʻú, fakaafeʻi e kau akó ke vakai pe te nau lava ʻo fakakaukau ʻiate kinautolu pē ki he ngaahi talí.
|
ʻIkai lava ʻo mapuleʻi |
Lava ʻo Mapuleʻi |
|---|---|
|
“ʻOku ou fie hoko ko ha tokotaha lelei, ka ʻoku ou faʻa ongoʻi loto-foʻi koeʻuhí ko ʻeku ngaahi fehalākí.” |
“Te u lava ʻo fai hoku lelei tahá pea ʻiloʻi ʻoku ou faʻa tōnounou he taimi ʻe niʻihi. ʻI heʻeku fakatomala fakaʻahó pea mo e tokoni ʻa e Fakamoʻuí, te u lava māmālie ai ʻo anga faka-Kalaisi ange.” |
|
“ʻOku ʻikai ke u ʻiloʻi pe ʻe ʻi ai nai ha taimi te u teitei lava ai ʻo lea ʻaki ʻa e lea fakafonuá ʻo lelei tatau mo hoku hoá.” |
“Te u lava ʻo ako fakamātoato ʻa e lea fakafonuá ʻi he ʻaho kotoa pē pea fekumi ʻi he faʻa lotu ki he tokoni ʻa e ʻOtuá.” |
Ako Fakahoko
Taki fealēleaʻakí: Fakaʻaliʻali ʻa e ngaahi sīpinga kehe ko ʻení pea ʻoange ha taimi ki he kau mēmipa ʻo e kalasí ke nau akoako fakahoko ia mo honau hoá. ʻE lava foki ke fakakaukau e kau akó ki ha ngaahi sīpinga kehekehe mei he ngaahi sīpinga ʻoku ʻoatú.
|
ʻIkai lava ʻo mapuleʻi |
Lava ʻo mapuleʻi |
|---|---|
|
“ʻOku ʻikai ke tokolahi hoku ngaahi kaungāmeʻá ʻo hangē ko e kakai kehé.” | |
|
“ʻOku ou ongoʻi lōmekina ʻi he fakakaukau ki he ngāue fakafaifekaú. ʻOku hangē ia ha ngāue faingataʻá, te u ʻofa ki hoku fāmilí mo e ngaahi kaungāmeʻá, pea ʻoku lahi fau mo e ngaahi meʻa ʻoku ʻikai ʻilo ʻe ala hokó.” | |
|
“Kuo tokoni ʻa e kau faifekau kehé ke papitaiso ha kakai tokolahi ange ʻo laka ange ʻiate au. ʻOku ou fifili pe kuo ʻikai ʻaonga koā ʻeku ngāue fakafaifekaú.” |
Fakaʻaongaʻí
Taki fealēleaʻakí: Tokoni ki he kau akó ke nau fakakaukau ki he founga te nau lava ai ʻo fakaʻaongaʻi ʻa e taukei ko ʻení ʻi heʻenau moʻuí ʻaki hono vahevahe ʻa e fakaafe ko ʻení:
ʻI he uike hoko maí, tuku ha taimi ke fakatokangaʻi ai e taimi te ke ala ongoʻi taʻefeʻunga aí. Hili iá, kole leva ki he Tamai Hēvaní ke tokoni atu ke ke tokanga taha ki he meʻa te ke lava ʻo mapuleʻí.