Susa Young Gates nge Joseph F. Smith

Susa Young Gates e reb i fak Brigham Young ni bpin. Ni gargeleg u utah me il’aal u rom. Ri ba’adag e miyol, nge pigpig ulan e Galasia rok’ Somoel.

Gidii’en Got, 3:9–10, 64

Napan ni il’aal Susa, me yibi m’ar ni rib gel. Me fith ni ngan pi’ e meybil ko priesthood ngak. Ulan fare meybil, me yoeg Somoel ngak Susa ni ba’adag ni nge pi’ e ayuw ko muruwel ko temple.

Gidii’en Got, 3:193–94

Tomurren fare meybil, me gol Susa. Bo’or e ngiyal’ ni fil mornga’agen e cheppin e tabinaew rok’ ni kakrom. Napan nra pir’eg mornga’agen reb e tabinaew rok’ ni dawri tawfe, me yean nga temple nge tawfe nifan ngoraed. Ri ba’adag nima weliy ngak e gidii’ mornga’agen fare muruwel nifan ko chep ko tabinaew. Machane dariy fan ni aram rogon, ya bo’or e gidii’ ni dabun ni nge motoyil ko biney.

Gidii’en Got, 3:194–95, 206

Borran riy, me yean Susa nge guy Joseph F. Smith, ni’ir e President ko Galasia. Ke m’ar President Smith nike bukun e wik ngay. Manang Susa ni kari kirbaen’ ya ke yim’ reb i fak nib pagal. Ma kube kirbaen’ ko boech ban’en nibe buchbuch u dakean e fayleng, ni woed e maal nge m’ar ni bo’or mit.

Gidii’en Got, 3:197–99, 205–6

Napan ni yibi par Susa nga but’ nga charen President Smith, make falfalaen’ ni nge non ngak. Me yoeg ngak Susa ni Got e ke pi’ ngak reb e thogthog ni rib mangil. Ko mornga’agen fare toffen e ya’el. Biney nikan thogthog nag ngak e kan yoloey ko babyor. Me pi’ President Smith ngak Susa me yoeg ngak ni nge be’eg mornga’agen.

Gidii’en Got, 3:206–7

Susa ni be’eg fare babyor. Fare babyor e ke yoeg ni Yesus Kristus e yaen nga toffen e ya’el. Ke pi’ Adam nge Eva, nge ku boech e pumo’on nge bpin nib yul’yul’ ni nge machib ngak fapi ya’el ni daniyag ni ngar thapeged fare gospel ko napan ni kiyaed fos. Yaed be ayuweg e pi ya’el ney ni ngeyag ni gidii’ e tawfe nifan ngoraed ulan e temple.

Doctrine and Covenants 138:11–19, 29–48; Gidii’en Got, 3:206–7

Ke ggin Susa ngay napan ni be’eg fare thothog nikan pi’ ngak President Smith. Me sminmin President Smith ngak. Me ga’ar, “Susa”, “rib mangil e muruwel ni gabe rrin’.” Me yoeg ngak ni riba’adag e mich rok’ ngak Somoel.

Gidii’en Got, 3:206

Susu ni yoloey mornga’agen e biney nikan thogthog nag ngalan e babyor rok’. Ni yoeg, “Oh, kari pi’ e gapas e biney ngog!” Dabkiyag ni nge son ni nge yoeg mornga’agen e biney ngak fapi tafagar rok’ nge boech e members ko Galasia. Manang ni fare thogthog nikan pi’ ngak President Smith era ayuweg Gidii’en Got ngar uned ko muruwel ko temple nifan ko gidii’ nibay ko toffen e ya’el.

Gidii’en Got, 3:207