Pi Tamicheg Muguy ko fapi Plates ko Babyor ku Mormon

Jopseh, Emma, nge Oliver era ul’ul’ gaed i pilyegthin ko fapi plate nib gold u toffen Smith u Pennsylvania. Machane bo’or e gidii’ ulan e binaew roraed ni ba’aag ni nge talegraed. Oliver e bay reb e tafagar rok’ ni fithingin i David Whitmer nima par u New York. Oliver e fith ngak David ko fa’an nrayag ni ngar badra pired ko tabinaew rok’ Whitmer ni ngeyag ni ngar mu’niged fare pilyegthin.

Saints, 1:68

David nge tabinaew rok’ e magaraen’raed ko biney. Ra feked Joseph, Emma, nge Oliver ngalan e tabinaew roraed. Arame chiney e yag nira muruwel gaed u fithik’ e gapas ni yaed be pilyeg fapi thin. Bo’or e gidii’ ni’i par ulan fare tabinaew rok’ Whitmer. Biney e be yipfan ni bo’or e muruwel ni rib tu’uf ni ngan rrin’, nibe gel nag e tomal nga dakean e chitiningin David, i Mary.

Saints, 1:68–70

Reb e rran, nibe muruwel Mary, me yib fare angel Moroni ngabi m’ug ngak. Me yoeg ni manang ni fapi muruwel nibe rrin’ nib gel e ba alamrin ngak. Ma ba’adag ni nge ayuweg ni nge gelnag e mich rok’. Me bing bangi kabang me gerngiy fapi plate nib gold nga butt’. Me pithiig fapi payg riy me dag ngak Mary fapi yoel nibay riy. Me micheg ngak Mary ni yira tawa’ath nag.

Saints, 1:70–71

Boech e gidii’ e dani michuwaen’ ngay nib riyul’ fapi plate. Joseph e ke fol ko fare motochiyel rok’ Somoel ni dabi dag fapi plate ngak be’. Somoel e yoeg nira pag dalip ni’ ni ngar micheged fapi plate. David Whitmer, Martin Harris, nge Oliver Cowdery nikar fithed ni fa’an nrayag ni ngar manged fapi tamicheg. Somoel e ke yoeg ni rayag.

Doctrine and Covenants 5:11–12; 17; Saints, 1:73

Joseph, Martin, Oliver, nge David ni ranod ngalan e luuway. Ra ragbug gaed nga butt’ mi yaed meybil be’ nge migid be’ ni yaed be fith ngak Got ko fa’an nrayag ni ngar guyed fapi plate, machane dariy ban’en ni buch.

Saints, 1:73

Martin Harris nike thamiy ni bachan e danur fulweg taban e meybil roraed ni bachan ir. Martin nike chuw, ma tin nike magay era ul’ulgaed ko meybil.

Saints, 1:73

Me yibi m’ug ba angel u fithik’ e tomilang ni rib gel ra’en. Me yibi dag ngak Oliver nge David fapi plates nib gold nge fapi yoel nibay riy. Mi yaed rung’ag laman Got ni yoeg ni Joseph e ke pilyeg e thin ko fapi plates u dakean gelngin Got ma fapi pilyegthin riy e ba mat’aw. Maki yoeg Got ni rayag ni ngar roged ngak e gidii’ ni gubin e pin’en nikar guyed makar rung’aged.

“Fare Mich Ko Fa Dalip I Gidiiʼ Ni Michriy”; Saints, 1:73–74

Joseph nibe sapnag Martin. I’ir e kube meybil. Me un Joseph ngak ko meybil. Fani yib e angel ngabi m’ug me dag fapi plates ngak Martin, ni woed rogon nike rrin’ ngak Oliver nge David.

Saints, 1:74

Bin migid ngay, me yean Joseph nge gay e galibithir rok’, ni yow bay rok’ Mary Whitmer ni yaed be fingich. Me yoeg ngorow ni kari falfalaen’ ni bachan boech e gidii’ nike guy fapi plates. Ma arame chiney nibay e pi tamicheg ney e rayag ni ngar roged ngak e gidii’ ni Joseph e be yoeg e tin nib riyul’. Martin e yoeg ko gidii’ ni gubin nike falfalfaen’ ngay nike pag Got ni nge mang reb fapi tamicheg.

Saints, 1:74–75

In e rran nga tomuren, me yoeg Somoel ngak Joseph ni nge dag fapi plates nib gold ngak meruk e gidii’—chitamangin, l’agruw i walagen ni pumo’on, aningeg i walagen David ni pumo’on, nge figirngin walagen David ni pumo’on. Yag nra koled fapi plates mi yaed pithig fapi payg riy. Yaed manang ni fapi plates e rib riyul’.

“Fare Mich Ko Fapi Meruk I Gidiiʼ Ni Michriy”; Saints, 1:75

Fare pilyegthin ko Fare Babyor ku Mormon e kan mu’nag e chiney. Joseph e fulweg fapi plates nib gold ngak angel Moroni. Arame chiney e ke taw ko ngiyal’ riy ni ngan print nag boech e kopy ko fare babyor ni ngeyag ni be’eg e gidii’ me fil mornga’agen Yesus Kristus.

Saints, 1:75–76

Ba tolang pilwon ni ngan print nag fare Babyor ku Mormon. Martin Harris e pi’ bang e butt’ ni toffen ni ngeyag ni pi’ pilwon. Ke rrin’ e biney ni bachan e manang ni fare Babyor ku Mormon ab riyul’. Gubin e kopy ko fare babyor e bay e mich rok’ Martin riy nge boech fapi tamicheg nifan ngak e gidii’ ni gubin ni ngar be’eged. Pi tamicheg ney e dairy bi’id makar fekyathin niged e mich roraed.

Doctrine and Covenants 19:26–27, 34–35; Saints, 1:76–78