Faatomuaga

Ina ua fesiligia Peresitene Russell M. Nelson pe faapefea ona fesoasoani ia i latou o e mafatia i vaisu, sa ia tali mai, “Aoao i latou i lo latou faasinomaga ma lo latou faamoemoega” (i le Tad R. Callister, “Our Identity and Our Destiny” [faigalotu a le Iunivesite o Polika Iaga, 14 Aok., 2012], speeches.byu.edu). O i tatou taitoatasi o se atalii/afafine o le Atua agaalofa. Ua tatou iloa e alofa o Ia ia i tatou ma o loo tausia ma le mataalia i tatou.

Matou te le’i mafaufau faapena i taimi uma. O nisi o i matou sa talitonu sa le o i ai o Ia iina. O nisi o i matou sa le manatu lava i soo se itu. O nisi o i matou sa talitonu sa i ai o Ia iina ae sa ita tele o Ia pe le fiafia foi ia i matou e fesoasoani mai ai. Mo le toetoe o i matou uma lava, o le le malamalama i la matou sootaga ma le Atua na taitai atu ai i se papupuni lea na taofia ai i matou mai le liliu atu ia te Ia mo se fesoasoani. Nai lo o lea, na matou liliu atu i fualaau faasāina po o amioga e fesoasoani iā i matou e feagai ai ma lu’itau o le olaga. E tele ina matou ulu atu i taamilosaga lē lelei. Sa matou faatinoina, lea na oo atu ai i lagona o le tausalaina ma le maasiasi, ma o lenei mea na taitai atu ai i le faatinoina atili e ufiufi ai le tiga o nei lagona. O le malamalama i lo matou faasinomaga ma le faamoemoega o ni fanau a le Atua na faamamanaina ai i matou e motusi nei taamilosaga.

Sa matou aoaoina foi le eseesega i le va o le tausalaina ma le maasiasi. O le lagona tausalaina o se lagona leaga lea i se mea ua tatou faia, ma o le maasiasi o le lagona leaga lea i le ituaiga tagata o loo tatou i ai. Na faamalamalama mai e Elder David A. Bednar le taua o le tausalaina i le ala lenei: “O le tausalaina i o tatou agaga o le tiga lea i o tatou tino—o se lapataiga i tulaga lamatia ma se puipuiga mai le faaleagaina faaopoopo” (“Matou te Talitonu i le Mama,” Liahona, Me 2013, 44). A o lei toe manuia, o le toatele o i matou na lagonaina le maasiasi, ma faaiuina ai ua matou nutimomoia e faavavau ma ua le agavaa mo le alofa mai le Atua po o soo se tasi.

Ae peitai, o le taimi lava na matou vaai ai i lo matou natura paia ma tautino atu lo matou manaomia o le fesoasoani mai le lagi e toe faaleleia ai mai vaisu, na amata ona matou vaai ia i matou lava e pei ona silasila mai Iesu Keriso ia i matou: o alii ma tamaitai mama’i faaleagaga o loo taumafai ia faamaloloina e ala i Lona alofa tunoa nai lo alii ma tamaitai leaga o loo taumafai ia lava le lelei e maua ai Lona alofa.

Matou te valaaulia outou e faataitai le talitonu o oe o le atalii/afafine o le Atua ma e alofa o Ia ia te oe e tusa lava po o le a sau mea na fai. E ui e moni e faatapulaa e filifiliga leaga o tatou avanoa, ae e lē mafai lava ona suia lo tatou taua i le Atua. E alofa o Ia ia i tatou aua o i tatou o Ana fanau, e le ona o a tatou filifiliga: “E ui lava tatou te le atoatoa, ae e alofa atoatoa le Atua ia i tatou. E ui lava tatou te le atoatoa, ae e alofa atoatoa o Ia ia i tatou. E ui atonu tatou te lagonaina le leiloloa ma le leai o se tapasa, ae o le alofa o le Atua e siomia atoatoa ai i tatou” (Dieter F. Uchtdorf, “O Le Alofa o le Atua,” Liahona, Nov. 2009, 22).

Na i’u ina matou naunau e taofia ina ua oo ina sili atu le tuga o le tiga o le faafitauli nai lo le tiga o le fofō. Pe ua e oo i lena tulaga? Afai e leai ma o loo faaauau pea lou tagofia o mea ua fai ma vaisu, o le a e oo lava i lena tulaga aua o mea ua fai ma vaisu o se faafitauli e alualu pea i luma. O se faama’i faataumaoi e aveesea ai lo tatou malosi e gaoioi ai e pei ona masani ai.

I le taimi muamua, o le tumau i le mafaufau lelei sa foliga mai sa matuā faigatā lava mo i matou. Ae a o faaauau pea ona matou faalogo mai isi o e na mauaina le toafilemu ma le faautauta sa matou sailia, sa amata ona matou talitonu e mafai foi ona matou toe manuia.

Ae matou te lei amataina le faagasologa o le toe faaleleia, sa matou manaomia muamua le manao e toe faaleleia (tagai Alema 32:27). O le saoloto mai vaisu e amata i se ‘aloiafi itiiti o le naunau. Afai e itiiti lou naunautai ma e le tutusa i le taimi nei, aua le popole. A o e faia se faatinoga, o le a tuputupu ae! Sa matou aoaoina o se tasi o faatinoga sili ona mamana e mafai ona matou faia o le tatalo ma ole atu i le Atua e faateleina lo matou naunau e aloese mai ai.

Afai e te le’i mauaina le manao e amata ona toe faaleleia, e mafai ona e faailoa atu lou lē naunau ma mafaufau i le tau o lau vaisu. Fai se lisi o mea e taua ia te oe. Manatu i au sootaga ma aiga ma uo, o le lua sootaga ma le Atua, lou malosi faaleagaga, lou gafatia e fesoasoani ma faamanuia i isi, lou ola maloloina. Ona e vaai lea i feteenaiga o mea e te talitonu ma faamoemoe i ai ma au amioga. Manatunatu pe faapefea ona luitauina e au amioga ia mea e te faatauaina. Tatalo ia fesoasoani le Alii ia te oe ia e vaai ia oe lava ma lou olaga e pei ona Ia silasila mai i ai—i ou gafatia paia uma—ma mea e lamatia ai oe i mea ua fai ma au vaisu.

O le iloa lelei o mea ua e maumaua e ala i lou faananau i au vaisu o le a fesoasoani ia te oe ia maua le manao e taofia loa. Afai e te maua na o sina faanaunauga itiiti, o le a e maua le avanoa e amata ai. Ma a o e agai i luma i laasaga o lenei polokalama ma vaaia suiga e oo mai i lou olaga, o le a faateleina lou manao.

Manatua: E faalagolago i le natura o le mea ua fai ma au vaisu, atonu e manaomia ona e sailia se togafitiga faafomai ae e te lei amataina lou toe faaleleia. Faamolemole ia feutagai ma se tagata tomai faapitoa faafomai.

O le malaga agai i le toe manuia ma le faamalologa e umi ma faigata, ae tatou te le faia na o i tatou. O le ola ai i le toe faaleleia e manaomia ai le faamaoni a’ia’i. O le faafitia, taufaasese o le tagata lava ia, ma le faaesea e faigata ai ona ausia le alualu i luma tumau ma le mausali i le toe faaleleia. E taua mo i tatou le faaaogaina o le lagolago a isi i se taimi vave lava. E toatele tagata ua naunau e savavali faatasi ma i tatou ma fesoasoani ia i tatou. Na aoao mai Peresitene Spencer W. Kimball: “E silafia i tatou uma e le Atua, ma na te leoleoina i tatou. Ae masani ona Ia faataunuu mea tatou te manaomia, e ala mai i se tasi tagata” (Aoaoga a Peresitene o le Ekalesia: Spencer W. Kimball [2011], 82).

O le sailia o le fesoasoani mai le Atua ma isi o le a le gata ina maua ai le faamalosiauga tatou te manaomia e faaauau ai le malaga ae o le a fesoasoani foi ia i tatou e manatua ai ua tatou agavaa mo se fesoasoani. Pe a e fesili mo se fesoasoani, e ono faate’ia oe i le tele o le alofa ma le taliaina e te maua. O le tele o lou fesootai atu i isi, o le tele foi lena o avanoa o le a e maua e maua ai le alofa ma le lagolago i le iloaina o le faamalologa moni ma le toe faaleleia.

Mafaufau i punavai eseese o le lagolagosua o loo avanoa mo oe ma le auala e mafai ona e aapa atu ai mo se fesoasoani. Matou te fautuaina le sailia ma le galulue faatasi ma se tagata e lagolagoina o le ua manuia i le faaaogaina o laasaga e 12. E le tofia lava se tagata e lagolagoina. Matou te fautuaina outou e mafaufau ma le agaga tatalo po o ai e te ono talosagaina e avea ma ou lagolago i se taimi vave lava. O se nofoaga sili e maua ai se tagata lagolago o le fonotaga lea mo le toe faaleleia. O fonotaga mo le toe faaleleia o se nofoaga saogalemu mo i tatou e faasoa atu ai ma aoao ai e uiga i le toe faaleleia.

O isi punavai taua o le lagolago e aofia ai tagata o le aiga, uo, taitai o le Ekalesia, ma fomai. O le punavai sili o le lagolago o le Tama Faalelagi. O le filifili po o ai tatou te talosagaina ma po o afea tatou te ole atu ai mo se lagolago o se faaiuga patino a le tagata lava ia. I nisi tulaga, atonu e le saogalemu pe aoga mo i tatou le talanoa atu pe talosaga atu mo se fesoasoani mai ni tagata patino o le aiga po o ni uo. Ae peitai, e taua lo tatou mauaina o le tele o le lagolagosua mai le tele o punavai e mafai ai. Mo nisi faamatalaga, faamolemole toe iloilo le vaega “Lagolago i le Toe Faaleleia” o loo maua i le faaopoopoga o lenei taiala.

Atonu tatou te maasiasi pe mamā foi e talosaga atu mo se lagolago mai isi. Atonu tatou te le mananao i se isi tagata e iloa o tatou faafitauli po o sese. Atonu tatou te le mananao e avea ma se avega mamafa pe atonu foi e le o lagonaina e pei ua tatou agavaa mo se fesoasoani. Ae ua tatou iloaina e faamanuiaina tagata pe a tatou ole atu mo la latou fesoasoani. O le laasaga lona 12 e faatatau i le auauna atu ma le fesoasoani atu i isi. Pe a auauna atu i latou o loo toe faaleleia i isi, e faamalolosia i latou i lo latou lava toe faaleleia.

“Toe tepa i tua, ma manatua sa e faamaonia atu lou agavaa i lou muai olaga. O oe o se atalii po o se afafine toa o le Atua, faatasi ai ma Lana fesoasoani, e mafai ona e manumalo i taua a lenei lalolagi pa’ū. Sa e faia muamua, ma e mafai ona e toe faia.

“Vaai i luma. O ou faafitauli ma faanoanoaga e moni lava, ae o le a le tumau e faavavau” (Neil L. Andersen, “Manu’a,” Liahona, Nov. 2018, 85; faaopoopo le faamamafa).

• O le toe tepa i tua, o a taua ua uma ona ou tauina ma manumalo ai?

  Fatu se Faamatalaga

• O anafea na ou maua ai le fesoasoani mai le Alii i lo’u olaga?

  Fatu se Faamatalaga

“I le Ekalesia atoa ou te faalogo ai i le toatele o loo tauivi ma lenei faafitauli: ‘E le lava lo’u lelei.’ ‘Ou te vaivai.’ ‘O le a ou le gafataulimaina lava.’…

“… I le avea ai ma fanau a le Atua, e le tatau ona tatou faalumaina ma fai upu malolosi ia i tatou lava, e peisea’i a tatou faasalaina i tatou lava o le a avea ai i tatou ma tagata e finagalo le Atua e avea ai i tatou. Leai!” (Jeffrey R. Holland, “Ia Atoatoa Ona Lelei o La Outou Amio—I Le Iuga,” Liahona, Nov. 2017, 40).

• E mafai faapefea ona ou aoao mai a’u mea sese a o manatua pea lo’u taua o se atalii/afafine o le Atua?

  Fatu se Faamatalaga

• O a ni o’u manatu e uiga i le faaaogaina e Peresitene Holland o le upu i le iuga i le ulutala o lana lauga?

  Fatu se Faamatalaga

“Ma ua latou vaaia i latou lava i lo latou lava tulaga faaletino, ua maualalo lava nai lo le efuefu o le eleele. Ma sa latou alalaga uma leotele i le leo e tasi, fai mai: E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamāina o matou loto; ona ua matou talitonu ia Iesu Keriso, le Alo o le Atua, o lē na foafoaina le lagi ma le fogeleele, ma mea uma lava; o lē o le a afio mai i lalo i totonu o le fanauga a tagata”(Mosaea 4:2).

O le faagasologa o le toe faaleleia e tupu pe a tatou taulai atu i le fofō nai lo le faafitauli. A tatou faamalolosia la tatou sootaga ma Iesu Keriso, o le a Ia tuuina mai ia i tatou le mana ma le filemu tatou te manaomia e ola ai i le toe faaleleia.

• O le a la’u sootaga ma Iesu Keriso? Pe ou te faatuatuaina o Ia e fesoasoani mai ia te au?

  Fatu se Faamatalaga

• Pe a ou iloaina o’u lava vaivaiga, pe o ia te au le lototele e liliu atu ai i lo’u Faaola mo Lona mana togiola? Aisea pe aisea e leai ai? Afai e leai, o le a faapefea ona ou amata?

  Fatu se Faamatalaga

“Ua faauigaina e tusitusiga paia le aoaoga faavae a Keriso o se faatinoga o le faatuatua ia Iesu Keriso ma Lana Togiola, salamo, ia papatisoina, mauaina o le meaalofa o le Agaga Paia, ma tumau e oo i le iuga [tagai 2 Nifae 31].

“Ua fatuina e le Togiola a Keriso tulaga ia e mafai ai ona tatou faalagolago ai ‘i galuega, ma le alofa mutimutivale, ma le alofa tunoa o le Mesia Paia’ [2 Nifae 2:8], ‘ia atoatoa ia [Keriso]’ [Moronae 10:32], maua mea lelei uma, ma maua le ola e faavavau.

“O le aoaoga faavae a Keriso i le isi itu o le auala—na o le pau lea o le auala—e mafai ai ona tatou maua faamanuiaga uma ua avanoa mo i tatou e ala i le Togiola a Iesu” (Brian K. Ashton, “O Le Mataupu Faavae a Keriso,” Liahona, Nov. 2016, 106).

• O laasaga e 12 o le toe faaleleia o nisi taimi e ta’ua o “laasaga pepe” aua o ni la’a iti auaua’i i le faagasologa o le faaaogaina o le aoaoga faavae a Iesu Keriso i le faafitauli o vaisu. E mafai faapefea e le faia o nei “laasaga pepe” ona fesoasoani ia te au e maua ai faamanuiaga o le Togiola a Iesu Keriso?

  Fatu se Faamatalaga

“A o e aveese lau taulaiga mai mea faalavefau o le lalolagi, o nisi o na mea e foliga mai e taua ia te oe i le taimi nei o le a faaitiitia le taua. O le a manaomia ona e fai atu leai i nisi mea, e ui e foliga mai e le afaina. Pe a e malaga ai ma faaauau lenei faagasologa i le olaga atoa o le faapaiaina o lou olaga i le Alii, o suiga i lau vaai, lagona, ma le malosiaga faaleagaga o le a e maofa ai!” (Russell M. Nelson, “O Oa Faaleagaga,” Liahona, Nov. 2019, 77)

O lenei folafolaga, na faia e se perofeta a le Atua, ua otooto mai ai suiga ofoofogia e mafai ona maua pe a sui atu la tatou taulaiga i le Alii.

• O a ni faatinoga i aso taitasi o le a ou faia e taulai atu ai ia Iesu Keriso?

  Fatu se Faamatalaga

• O a mea faalavefau faalelalolagi o le a ou fai atu i ai e leai, ma le faatuatuaga o le a “māui atu i le faamuamua”?

  Fatu se Faamatalaga

“Ma sa fetalai mai le Alii ia [Alema]: Aua e te ofo e ao i le fanauga uma a tagata, ioe, o tane ma fafine, o atunuu uma, ituaiga, gagana eseese ma nuu, ona toe fanauina; ioe, fananauina i le Atua, ma suia mai lo latou tulaga faaletino ma paʼū, i se tulaga o le amiotonu, ua togiolaina e le Atua, ma avea ma ona atalii ma afafine”(Mosaea 27:25).

• O lo’u naunautaiga e sui o le ki lea i le togiolaina mai lo’u “tulaga pau.” Pe o i ai so’u manao e aloese mai la’u vaisu? Pe ou te lagona le le naunau? Afai e sa’o, aisea?

  Fatu se Faamatalaga

• E oo mai le naunautaiga pe a ou mafaufau i mea ua taugata ia te au ma isi ona o a’u vaisu. O a tau o le mea ua fai ma a’u vaisu?

  Fatu se Faamatalaga

• O le a le tau o lo’u ola maloloina?

  Fatu se Faamatalaga

• O le a le tau i lo’u aiga? o a’u sootaga? o lo’u tomai e fesoasoani ai i isi?

  Fatu se Faamatalaga

• E aafia faapefea la ma sootaga ma le Atua ona o le mea ua fai ma a’u vaisu?

  Fatu se Faamatalaga

“I le avea ai ma soo o Keriso, e le faapea o le a le oo ai ni luitau ma tofotofoga i o tatou olaga. E tela ona manaomia i tatou e faia ni mea faigata lea afai tatou te taumafai e fai na o i tatou o le a lofituina ma atonu e le mafai. A o tatou taliaina le valaaulia a le Faaola e ’o mai ia te au’ [Mataio 11:28], o le a Ia saunia le lagolago, faamafanafanaga, ma le filemu e tatau ai” (John A. McCune, “O Mai ia Keriso—Ola o se Au Paia o Aso e Gata Ai,” Liahona, Me 2020, 36).

• Ua saunia e le Faaola le lagolago e tatau ai, faamafanafanaga, ma le filemu e faia ai mea lofituina pe le mafai foi. E mafai faapefea ona ou maua le lagolago ma le faamafanafanaga ua Ia folafola mai?

  Fatu se Faamatalaga

• Pe foliga mai e lofituina le toe faaleleia pe atonu foi e le mafai pe afai ou te taumafai na o au?

  Fatu se Faamatalaga

• E faapefea e le iloaina e leai se tasi e faasaoina mai tofotofoga i o latou olaga ma tatou te manaomia uma lava le lagolago ona fesoasoani ia te au e lafoai ai lo’u musu e aapa atu i isi mo se fesoasoani?

  Fatu se Faamatalaga

• Pe na ou tatalo ea po o ai e talosagaina e avea ma a’u lagolago? Pe na i ai ni igoa na oo mai i lo’u mafaufau?

  Fatu se Faamatalaga

“E faapena foi e ala i le alofa tunoa o le Alii, ona maua e tagata taitoatasi, e ala i le faatuatua i le Togiola o Iesu Keriso ma le salamo i a latou agasala, maua le malosi ma le fesoasoani e fai ai galuega lelei, ia semanu e le mafai ona latou tausisia pe ana tuu e fai i a latou lava ala. O lenei alofa tunoa, o se mana gafatia lea e mafai ai e alii ma tamaitai ona maua le ola e faavavau ma le faaeaga pe a uma ona latou faia mea sili latou te mafaia.”

• Sa i ai taimi na mafai ai ona ou lafoaia la’u vaisu mo sina taimi. E mafai faapefea ona ou tumau i le saoloto mai vaisu, e tusa lava pe ou te atuatuvale pe lotovaivai?

  Fatu se Faamatalaga