“Laasaga 6: Ia matuai saunia e aveeseina e le Atua vaivaiga uma o o tatou tagata,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 6,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 6: Ia matuai saunia e aveeseina e le Atua vaivaiga uma o o tatou tagata.

4:4

Mataupu Faavae Autu: Liua o le Loto

O le toatele o i matou na maua le manuia ma le faamalologa e ala i le laasaga 5. Sa matou maofa ma faafetai mo le suiga o i matou lava. O le toatele o matou sa iloa na tau le malosi ma na seasea ona toe tofotofoina i matou e mea sa fai ma vaisu. O nisi o i matou na amata ona vaaia faamanuiaga o le toe faaleleia. Sa matou lagonaina uma lava le latalata atili atu i le Tama Faalelagi ma maua ai le filemu sili atu i o matou olaga. O na suiga tetele, na mafaufau ai nisi o i matou pe na pau lea o le mea na tatau ona matou faia. Ae sa matou manaomia pea nisi faamalologa e faaauau ai ma faatumauina lo matou toe manuia.

Sa matou matauina o le lē toe faia o se mea na atili iloa ai o matou vaivaiga. Talu ai ua matou lē toe faaaogāina vaisu e sola ese ai, sa mafai ai ona matou iloa manino atili o matou faafitauli. Sa matou taumafai e pulea o matou manatu ma lagona le lelei, ae peitai sa faaauau pea ona manu ae, ma faaatuatuvaleina ai ma lamatia ai o matou olaga fou i le toe faaleleia. Sa faaosoosoina i matou e faaaoga a matou amioga ua fai ma vaisu ma le loto faapito e taumafai ai e pulea o matou vaivaiga ma taulimaina le atuatuvale e pei ona sa matou faia i o matou taimi ua tuanai.

O i latou sa malamalama i taunuuga faaleagaga o le toe faaleleia sa uunaia i matou ia iloa e ui i le matagofie o suiga uma ua agai atu i ai o matou olaga, ae o loo tele nisi faamanuiaga a Iesu Keriso mo i tatou. Sa fesoasoani isi ia matou iloa afai matou te mananao ia le gata ina aloese mai mea ua fai ma a matou vaisu, ae ia le toe i ai foi se manao e toe foi i ai, e tatau ona matou oo i se suiga o le loto. O lenei manao mo se suiga o le loto o le faamoemoega lea o le laasaga 6.

Atonu e te mafaufau pe faapefea ona e ausia se suiga faapena. O le laasaga 6, e pei lava o isi laasaga na muamua atu, atonu e pei o se luitau lofituina. Aua nei faalotovaivaia oe i nei lagona. E ui lava i se tiga e i ai, atonu e ao lava ona e ioeina, e pei ona matou faia, o le iloaina ma le ta’uta’u atu o ou uiga vaivai i laasaga 4 ma le 5, e le faapea ai ua tatou saunia e lafoai ese. Atonu tatou te pipii pea i o tatou ala tuai a o tatou taumafai e taulimaina le atuatuvale.

O le mea e sili ona faamaualaloina e faailoa atu o le, atonu o loo tatou taumafai e suia i tatou lava e aunoa ma le fesoasoani a le Atua. O le laasaga 6 e manaomia ai lo tatou faamatuu atu i le Atua o toega uma o le faamaualuga ma le loto malosi. E pei o le laasaga 1 ma le 2, o le laasaga 6 e manaomia ai le faaauau pea ona faamaualaloina i tatou lava ma tautino lo tatou manaomia o le mana togiola ma le faaliliuina o Keriso. Aua, o Lana taulaga togiola na mafai ai e i matou ona galulue i laasaga taitasi e oo mai i lenei tulaga. E leai se tuusaunoaga o le laasaga 6.

A o tatou o mai ia Keriso ma ole atu mo se fesoasoani i lenei laasaga, o le a leai so tatou faagaulemalie. Afai tatou te faatuatuaina o Ia ma onosai i le faagasologa, o le a le pine ona tatou vaai lea ua suia le faamaualuga i le lotomaualalo. O le a Ia faatalitali ma le onosai mo i tatou ia tatou vaivai i a tatou taumafaiga e sui na o i tatou e aunoa ma se fesoasoani. O le taimi lava tatou te liliu atu ai ia te Ia, o le a tatou toe molimauina ai Lona alofa ma le mana. Nai lo le pipii atu i mamanu tuai o amioga, e mafai ona tatou maua se mafaufau matala a o fautuaina lemu mai e le Agaga se auala e sili atu ona lelei e ola ai. O lo tatou popole i suiga o le a faaitiitia pe a tatou iloaina e malamalama Iesu Keriso i tiga ma galuega fita e manaomia ai. E toe tupu lenei mea i le aluga o taimi ma e eseese mo i tatou taitoatasi. O se gaoioiga lenei o le tuuina atu pea o o tatou loto i le Alii. O se faagasologa, nai lo na o se mea e tupu i se taimi e tasi.

A o fusia o tatou loto e le faagasologa o le o mai ia Keriso, o o tatou talitonuga sese sa fafagaina o tatou mafaufauga ma lagona lē lelei o le a suia e le upu moni. O le a tatou tuputupu ae i le malosi a o faaauau pea ona tatou suesue ma faaaoga le afioga a le Atua. E ala mai i molimau a isi, o le a fesoasoani ai le Alii ia iloa tatou te le o mamao ese ma Lona mana e faamalolo ai. O le manao e tuuaia isi pe fetuunai lo tatou ala e aluese ai mai lenei faagasologa faigata o le a suia i le manao ia tali atu ia te Ia ma gauai atu i Lona finagalo. Sa folafola mai e le Alii e ala mai i le perofeta o Esekielu, “Ou te avatu foi ia te outou le loto fou, ma ou tuu i totonu ia te outou le agaga fou: ou te aveesea le loto maaa ai o outou tino” (Esekielu 36:26).

E finagalo le Faaola e faamanuia i tatou ma suia o tatou natura. A o tatou faatagaina o Ia e faia lena mea, o le a tatou lotogatasi atili ai ma Ia, e pei lava ona Ia lotogatasi ma le Tama Faalelagi. E finagalo le Faaola e tuuina mai ia i tatou le malologa mai le faaesea ma le fefe lea na saofaga i o tatou vaisu. E finagalo o Ia e faamanuia i tatou i Lona alofa tunoa ma le mana o loo avanoa mo i tatou e ala i Lana taulaga togiola.

A o tatou gauai atu i uunaiga a le Agaga ma vaavaai atu i le Atua mo le faaolataga e le gata mai vaisu ae mai vaivaiga o uiga, o le a Ia suia o tatou uiga ma amioga pe afai tatou te naunau i ai. O se manaoga tuputupu ae ia faapaiaina e le Atua o le a e saunia ai mo se suiga i o tatou lava natura. Na faamatalaina e Peresitene Ezra Taft Benson lenei suiga faapenei:

“E galue le Alii mai totonu i fafo. E galue le lalolagi mai fafo i totonu. E aveese e le lalolagi tagata mai tulaga eleelea. E aveese e Keriso tulaga eleelea mai tagata, ona latou aveese ai lea o i latou lava mai tulaga eleelea. E suia e le lalolagi [tagata] e ala i le suia o lo latou siosiomaga. E suia e Keriso [tagata], ona latou suia ai lea o lo latou siosiomaga. E mamanu e le lalolagi amioga a tagata, ae o Keriso e mafai ona suia le natura o le tagata. …

“Talosia ia faatalitonuina i tatou o Iesu o le Keriso, filifili e mulimuli ia te Ia, ia suia mo Ia, taialaina e Ia, musuia e Ia, ma toe fanaufouina” (“Born of God,” Ensign, Nov. 1985, 6–7).

Laasaga o Faatinoga

O se polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o “laasaga e galueaiina.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e manaomia e fai ai le isi laasaga i lo tatou toe faaleleia.

Ia naunau e sui e ala i le mana o le Atua

Ina ua matou faatoa iloa le laasaga 6, sa fai mai nisi o i matou, “Ioe ua ou saunia mo le Atua e aveese o’u vaivaiga!” Sa matou lagonaina le faatoilaloina i le tele o a matou taumafaiga lē manuia e faatoilalo na o i matou o matou vaivaiga. Ae peitai, a o matou mafaufau loloto ma mauaina manatu faaalia mai o matou tagata lagolago, sa matou iloaina sa sili atu lo matou mumusu e lafoai o matou vaivaiga nai lo le mea sa matou mafaufauina.

Na fesoasoani le Agaga Paia ma isi ia i matou e iloa ai e masani ona matou faaaogaina o matou vaivaiga e fai ma auala e puipuia ai po o ni auala e faaleleia ai o matou manatu faapito. Mo se faata’ita’iga, o nisi o i matou na faaaogā le ita ma le lagona o le sili atu pe a matou lagona le faamata’uina. Sa matou fiafia e lagona le sa’o e ui lava sa masani ona matou sese.

O nisi o i matou na tuuina i matou lava i lalo ma faaitiitia o matou natura paia ina ia taofia ai isi mai le faatiga ia i matou. Sa matou manatu afai e mafai ona matou faatiga muamua i matou lava, o lona uiga o soo se tasi lava na faamaualaloina i matou ua na ona oo lava i le faaiuga lava lea e tasi ua uma ona matou ausia.

Ae o nei tali lē lelei i luitau na oo mai i o matou vaivaiga, ae le o o matou malosiaga. Sa matou fefefe afai matou te lafoaia o matou vaivaiga, o le a sili atu ona matou vaivai. Ae a o matou faatagaina le Atua e aveese o matou vaivaiga ma galulue faatasi ma o tatou lagolago, sa matou iloa ai le popole tele o le Atua mo i matou.

Matou te valaaulia outou ina ia ala ae i lo outou taua moni ma tuu lo outou talitonuga i le tausiga a le Atua nai lo o outou lava puipuiga.

Saili fesootaiga ma isi i le toe faaleleia ma i le lotu

A o matou fiafia atili i isi tagata ua toe faaleleia, sa amata ona matou iloa sa sili atu lo latou pei o i matou nai lo le mea sa matou manatu i ai. A o matou faasoa atu a matou tala ma faalogologo i isi tagata o faasoa mai a latou tala, sa faatupulaia lo matou agaalofa. Sa amata ona matou iloaina le tulaga masani o fanau uma a le Atua ma lagonaina le tele o lagona i le aiga o siomia ai i matou. Sa valaaulia i matou e aiga, uo, ma taitai o le Ekalesia e toe foi mai i le lotu pe faamalosia a matou tautinoga o i ai nei. Nai lo le teenaina po o le faia o ni ‘alofaga, sa tonu ia i matou e auai i le lotu. Sa faasolosolo malie ona matou iloaina o le tele o mea sa matou fiafia i ai e uiga i fonotaga o le toe faaleleia o se vaega foi o le tapuaiga i le lotu.

Ina ua matou papatiso e toaitiiti i matou sa malamalama i le faagasologa umi o le liua moni. Ae peitai, sa faamalamalama manino mai e Peresitene Marion G. Romney: “I se tasi ua matua liua atoatoa faamaoni, o le manao i mea e feteenai ma le talalelei a Iesu Keriso ua matua mate lava. Ae ua suia i le alofa i le Atua, ma se naunautaiga moni tumau e tausia ana poloaiga” (i le Conference Report, Guatemala Area Conference 1977, 8).

A o tatou oo i le vavega faifai pea o le toe faaleleia—muamua mai amioga faataumaoi o le tagofia o mea ua fai ma vaisu sosoo ai ma vaivaiga o amioga—o le a tatou oo i le liua moni. O le a tatou ala mai tatou iloa e i tatou lava e pei o le atalii faamaumau oa “ona atamai ai lea o ia” (Luka 15:17).

Suesue ma Malamalama

O mau o loo mulimuli mai ma saunoaga mai taitai o le Ekalesia e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. E tatau ona tatou manatua ia faamaoni ma patino i a tatou tusitusiga ina ia aoga tele mo i tatou.

Lafoai ese au agasala uma

“Sa fai mai le tupu … [O] le a se mea ou te faia ina ia mafai ai ona fanauina o a’u i la le Atua, ina ia seia ese ai i fafo lenei agaga leaga mai lo’u fatafata, ma ou maua ai lona Agaga, ina ia mafai ona faatumuina o a’u i le olioli?… O le a ou tuu atu mea uma ua ou maua … ina ia mafai ona ou maua lenei olioli tele. …

“Sa ifo i lalo le tupu i luma o le Alii, i luga o ona tulivae; ioe, ua fao lava o ia i luga o le eleele, ma alaga ma le malosi,, fai mai:

“Le Atua e … o le alafoai ese au agasala uma ina ia ou iloa oe, ina ia mafai ona faatuina o a’u mai le oti, ma faaolaina i le aso gataaga” (Alema 22:15, 17–18).

Toe faitau ma le faaeteete nei fuaiupu. O a ni faafitauli, e aofia ai uiga ma lagona, e taofia ai au mai le lafoaia o “au agasala uma” ma le mauaina atoatoa o le Agaga?

Auai i le faaaumeaga a le Ekalesia

“Ma o lenei, ona o le feagaiga ua outou faia, o le a taʼua ai outou o le fanau a Keriso, o ona atalii, ma ona afafine; ona faauta, o le asō ua fanauina ai e ia outou faaleagaga; ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine” (Mosaea 5:7).

A o tatou tauave i o tatou luga le suafa o Keriso ma faamalosia e Lona Agaga, ua amata ona tatou faailoaina i tatou lava faatasi ma le Au Paia—o uso ma tuafafine o e ua papatisoina ma ulufale i totonu o Lona aiga i le fogaeleele.

A o ou iloa lelei atili o’u uso a tagata o le Au Paia, ua faapefea ona ou naunau atili e auai i le faaaumeaina o le Ekalesia?

Ia iloa le togiola

“Ona o le tagata natura o se fili i le Atua, ma sa faapea lava mai le pau o Atamu, ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, ua usiusitai, agamalu, lotomaualalo, onosa’i, ma tumu i le alofa” (Mosaea 3:19).

O le toatele o tatou ua avea ma Au Paia i le na o le igoa i le papatisoga ma faaalu aso o o tatou olaga e tauivi e “tuu ese le tagata natura” ma galueaiina uiga o loo lisiina i lenei fuaiupu.

Na faapefea ona saunia au e lenei tauiviga e talia, e na o le Togiola a Keriso—i le tasi ma lesu Keriso ma le Tama Faalelagi— e mafai ai ona ou maua le togiolaina?

O Mai ia Keriso

Na aoao mai Elder Richard G. Scott: “Po o le a lava le pogai o faigata ma pe na faapefea foi ona e maua le toomaga—e ala i se fomai tomai faapitoa o le mafaufau, fomai, taitai perisitua, uo, se matua popole, po o se pele—e tusa pe faapefea ona e amata, o na fofo o le a le mafai lava ona maua ai se tali atoatoa. O le faamalologa faaiu e oo mai i le faatuatua ia lesu Keriso ma Ana aoaoga, faatasi ai ma se loto momomo ma se agaga salamo ma usiustai i Ana poloaiga” (“To Be Healed,” Ensign, May 1994, 9).

E leai se aofaiga o le lagolago po o le faaaumea—e oo lava i vaega o le toe faaleleia po o faapotopotoga o le Ekalesia—o le a aumaia le faaolataga. Atonu e lagolago ma faamanuiaina i tatou e isi tagata i la tatou malaga, ae mulimuli ane e tatau ona tatou o mai ia Keriso lava Ia.

Na faapefea ona amata la’u malaga o le toe faaleleia?
O ai sa avea ma meafaigaluega i le fesoasoani ia te a’u e alu i luga o le ala i le salamo ma le toe faaleleia? Na faapefea ona faasino atu ai au i le Faaola e ala i la latou faataitaiga?
O a ni mea ua ou aoaoina e uiga i le Faaola sa fesoasoani pe uunaia lo’u naunau po o lo’u gafatia e suia a’u amioga?

Ia onosai i le faagasologa

“O outou o ni fanau laiti, ma e le mafai ona outou gafatia mea uma i le taimi nei; e ao ina outou tutupu ae i le malosi faaleagaga ma le malamalama o le upu moni.

“Aua le matatau, le fanau iti e, ona o outou o a au, ma ua ou manumalo i le lalolagi, …

“Ma e leai so i latou o e ua tuuina mai e lo’u Tama ia te a’u e leiloa” (Mataupu Faavae ma Feagaiga 50:40–42).

O nisi taimi tatou te le onosai pe lotovaivai ai e faapea o le toe faaleleia o se faagasologa e le uma. Ua faaalia i nei fuaiupu le onosai o Iesu Keriso ma lo tatou Tama Faalelagi ia i tatou o ni “fanau laiti.” Faatatau nei fuaiupu ia te oe lava i le tusiaina, o loo tautala atu e patino ia te oe lava ia.

E faapefea ona faamalosia a’u e folafolaga o loo i lenei mau pe a oo ia te a’u le faavaivai?

Maua le fesoasoani mai ia Iesu Keriso

“O’u uso pele e, pe a uma ona outou i ai i lenei ala lauitiiti ma le vaapiapi, ou te fesili atu, pe ua uma ona outou faia mea uma? Faauta, ou te fai atu ia te outou, E leai; ona tou te lē oo mai iinei pe a na lē seanoa le afioga a Keriso faatasi ma le faatuatua lē mafaamaluelueina ia te ia, ma le faalagolago atoa i galuega a ia o lē ua malosi aoao e laveai.

“O le mea lea, e tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tamā: O le a outou maua le ola e faavavau” (2 Nifae 31:19–20).

E faapefea ona fesoasoani Iesu Keriso ia te au i le ala sa’o ma le vaapiapi?
E faapefea e lo’u alofa tuputupu ae mo le Atua ma mo isi ona aveese mai a’u mai i a’u vaisu, fesoasoani e faaauau ona ou le toe tagofia mea ua fai ma vaisu, ma toefuatai mai lo’u faamoemoe mo le ola faavavau?