“Laasaga 11: Saili e ala i le tatalo ma le mafaufau loloto ia iloa le finagalo o le Alii ia maua le malosi e faatinoina ai,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 11,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 11: Saili e ala i le tatalo ma mafaufauga loloto ina ia iloa le finagalo o le Alii ia maua le malosi e faatinoina ai.

5:13

Mataupu Faavae Autu: Faaaliga Patino

I le laasaga 11 matou te faia se tautinoga i aso taitasi, e saili ia iloa le finagalo o le Alii, ma tatalo ia maua le malosi e faatino ai. Na matou iloa ai e finagalo le Atua e fetalai mai ia i matou ma e mafai ona matou aoao pe faapefea ona faalogo ia te Ia. Na saunoa mai Peresitene Russell M. Nelson: “E finagalo moni ea le Atua e talanoa mai ia te oe? Ioe!” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96). O le faamoemoega o lenei laasaga o le faaleleia atili lea o o tatou tomai e faalogo ai ia Iesu Keriso, maua faaaliga patino, ma maua le mana e faatautaia ai o tatou olaga e tusa ai. O lenei manaoga mo faaaliga patino e matua eseese lava mai faanaunauga sa matou oo i ai ina ua matou sē i mea na fai ma a matou vaisu.

I aso ua mavae sa matou manatu ai o le faamoemoe, olioli, filemu, ma le faamalieina o le a sau mai punavai faalelalolagi e pei o le ava malosi, fualaau faasaina, tuinanau, taumafa le maloloina, po o isi amioga soona fai ua fai ma vaisu. O la matou mamanu o le aloese lea mai lagona lē lelei e ala i le faagagaseina o na mea i a matou vaisu. O nisi o i matou sa taumafai e faatumu le gaogao ii i o matou olaga i soo se mea lava vagana ai le Atua. I le aluga o taimi sa matou iloa ai o soo se aafiaga lelei o a matou vaisu o ni vaifofo taufaasese mo se taimi puupuu, ma le taufaasese lea na matou le maua ai se mea.

O le sailia o faaaliga o se laasaga taua lea i le ausiaina o le toe faaleleia tumau. Na saunoa Peresitene Nelson “Ou te uunaia outou ia faateleina o outou tomai faaleagaga o i ai nei e maua ai faaaliga faaletagata lava ia, aua ua folafola mai e le Alii e faapea ‘afai e te [saili] mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau’ [Mataupu Faavae ma Feagaiga 42:61]” (“Faaaliga mo le Ekalesia, Faaaliga mo o Tatou Olaga,” 95).

Ua amata ona matou talisapaia lo matou manaomia o le Faaola, o Iesu Keriso, ma malamalama i Lana matafaioi i o matou olaga. O nisi o i matou sa lagonaina le faavalevalea ma le le saunia a o matou tatalo, ae sa amata ona matou tatalo i le Tama i le suafa o Iesu Keriso mo se sootaga vavalalata ma Ia. Ua tatou iloa e tele atu mea e mafai ona tatou faia ma Ia nai lo se isi lava taimi e mafai ai e aunoa ma Ia. Sa amata ona matou aoaoina o le toe faaleleia e le na o vaisu po o le faautauta e taulai atu i ai; e aofia ai le valaauliaina o le taitaiga a le Alii i vaega uma o o tatou olaga.

O le tatalo, mafaufau loloto, ma le suesueina o tusitusiga paia e taua i le o mai ia Keriso. E mafai ona latou fesoasoani ia i tatou e faalogo i Lona siufofoga ma maua le mana e faataunuu ai Lona finagalo. Tatou te taumafai e tatalo ma le lotomaualalo, ma le iloaina o loo tatou faalagolago i le taitaiga paia ma le malosi a le Alii. Tatou te tutu ma mafaufau loloto i le aso atoa, ma taumafai e faafilemu o tatou mafaufau ma faalogo i le leo filemu ma le itiiti. Tatou te suesue i tusitusiga paia, aemaise lava le Tusi a Mamona, aua ua molimau mai ai i le naunautaiga o le Alii e tuuina mai ia i tatou le taitaiga ma le mana. A o tatou faia nei mea, tatou te oo i faaaliga patino ma maua faamanuiaga o le “[maua] pea o lona Agaga e faatasi ma [i tatou]” e taialaina, taitai, ma faamafanafanaina i tatou (Moronae 4:3).

Mo le toatele o i matou, o le manatu o le mauaina o faaaliga patino sa faigata ona sa matou talitonu sa matou lē agavaa mo le alofa o le Atua. I o matou vaisu, a le o lo matou manatu e le lava le popole o le Tama Faalelagi ma Iesu Keriso e fesootai mai ai ia i matou pe ua matou lē mauaina le aia tatau e maua ai faaaliga ona o o matou taimi ua tuanai. O nisi o i matou sa manatu matou te lei mauaina lava se faaaliga patino. Sa matou tatalo pe mafaufau loloto, ma sa foliga mai e leai se mea na tupu. Matou te lei lagonaina se mea faapitoa pe mauaina foi ni tali iloagofie. Ina ua tupu lenei mea, sa oo mai lo matou auala tuai o le mafaufau: “Atonu e fesoasoani le Atua i isi, ae na te le fesoasoani mai ia te au.”

O le toatele o i matou o loo tauivi pea ma nei lagona. Ae a o matou iloaina Lona alofa ma le alofa mutimutivale, sa nutipalaina nei talitonuga sese. O lo matou talitonuga e lava lona alofa ia i matou e fesootai mai ai ia i matou e mafai ona faateleina a o matou faaaogaina le laasaga 11 i o matou olaga.

O lo tatou galueaiina o le laasaga 11 e manaomia ai lo tatou faatuatua o le a Ia tali mai ia i tatou, ma e mafai ona tatou aoao ia iloa Lona siufofoga. Atonu e le vave ona tupu pe i se faailoga faavavega mai le lagi. Ae e mafai ona tatou faalogo ma onosai. Tatou te faalogo uma lava ia te Ia i ni auala eseese. O nisi taimi tatou te le maua ai se taitaiga patino i le taimi lava lena. E le faapea ai la e le alofa o Ia ia i tatou. Ae, atonu o lona uiga e finagalo o Ia ia tatou aoao e faatuatuaina o Ia ma faaaoga upumoni ua uma ona Ia tuuina mai ia i tatou. O lo tatou faatuatuaina o Ia e fesoasoani ia i tatou ia naunau e faatalitali ia te Ia ma tuputupu ae i le tomai e faalogo ai i Lona siufofoga (mo nisi faamatalaga, tagai Richard G. Scott, “Learning to Recognize Answers to Prayer,” Ensign, Nov. 1989, 30).

E tele taimi e tali mai ai le Alii i a tatou talosaga e ala mai i isi tagata. Na aoao mai Peresitene Spencer W. Kimball: “E silafia i tatou uma e le Atua, ma na te leoleoina i tatou. Ae e masani lava e auala mai i se isi tagata na te faafetaiaia ai o tatou manaoga” (“Small Acts of Service,” Ensign, Tes. 1974, 5). E taua mo i tatou le fesootai atu i isi, aemaise lava i latou o loo i a tatou polokalama lagolago. E mafai ona tatou faalogoina Lona siufofoga e ala mai i o tatou taitai o le Ekalesia, tagata o aiga, ma uo faapea foi ma le faitauina o tusitusiga paia, suesueina o lauga o le konafesi, ma le faalogologo i musika paia. E mafai foi ona tatou maua musumusuga ma le taitaiga e le aunoa a o tatou auai i fonotaga o le toe faaleleia ma galulue i laasaga o le toe faaleleia faatasi ma a tatou tagata lagolago.

O le faaleleia o lo tatou gafatia e saili ma maua faaaliga e manaomia ai le faataitai ma le onosai. “Ina ia mautinoa, atonu e i ai taimi e te lagonaina ai e peisea’i o loo tapunia le lagi. Ae ou te folafola atu a e faaauau pea ona usiusitai, faaalia le lotofaafetai mo faamanuiaga uma ua foai atu e le Alii ia te oe, ma afai e te faamamaluina ma le onosai le taimi a le Alii, o le a foai atu ia te oe le poto ma le malamalama o loo e sailia. O faamanuiaga uma o loo i ai i le Alii mo oe—e oo lava i vavega—o le a mulimuli mai. O le mea lena o le a faia e faaaliga patino mo outou” (Russell M. Nelson, “Faaaliga mo le Ekalesia, Faaaliga mo o Tatou Olaga,” 95–96).

Laasaga o Faatinoga

O le polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o le “galueaiina o laasaga.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e manaomia e fai ai le isi laasaga i lo tatou toe faaleleia.

O mai ia Iesu Keriso e ala i le tatalo, anapogi, ma le mafaufau loloto

Mo i tatou e itiiti se poto masani i le tatalo, o upu a Elder Richard G. Scott e faamalosiau: “Aua le popole i ou lagona faavalevalea ua faaalia. Tau lava o le talanoa atu i lou Tama. E faafofoga mai o Ia i tatalo uma ma tali mai i Lana ala” (“Aoao e Iloa Tali i Tatalo,” Liahona, Ian. 1989, 31). Sa fesoasoani foi le toe iloiloina o vaega o le tatalo. Tatou te talanoa atu i le Tama Faalelagi i lona suafa, ta’u atu ia te Ia mea tatou te faafetai ai, ole atu mo faamanuiaga tatou te manaomia, ona faaiu lea i le suafa o Iesu Keriso. Tatou tootutuli pe afai e mafai e lo tatou malosi faaletino. Tatou te tatalo, e masani ona leotele, i le Tama, ma saili Lana taitaiga e ala i le Agaga Paia (tagai Roma 8:26). E le tatau ona tatou faaaogaina gagana faafaleupolu. E mafai ona tatou faamaoni ma faasoa atu o tatou loto i le Tama Faalelagi.

O le toatele o i matou na aoao ia vave ona ala ma faaalu se taimi i se nofoaga filemu mo suesuega ma tatalo. Matou te faatulagaina se taimi mo le tatalo ma le mafaufau loloto, e masani lava i le taeao. O le taimi lea, e mafai ona e faamuamua ai le Atua, ae lei aga atu i se isi tagata po o se isi lava mea o le aso. Ona tatou suesue lea, faaaoga mau ma aoaoga a perofeta o ona po nei e taialaina o tatou manatunatuga loloto. E mafai ona avea le anapogi ma se meafaigaluega mamana e faaopoopo atu i lenei taumafaiga. Ona tatou faalogo lea i o tatou loto ma mafaufau e taumafai e faalogo pe lagona o Ia. Tatou te tusia i lalo o tatou mafaufauga ma uunaiga a o tatou tatalo ma mafaufau loloto.

A faaiuina lenei taimi taua faalilolilo, tatou te le taofia ai le tatalo. O le tatalo lemu, i le taele o o tatou loto ma mafaufau, o le a avea ma ala tatou te mafaufau ai i le aso atoa. Tatou te fefautuaai ma le Alii a o tatou fegalegaleai ma isi, faia faaiuga, ma taulimaina lagona ma faaosoosoga. Tatou te valaaulia pea ma saili Lona Agaga ia faatasi ma i tatou, ina ia mafai ona taialaina i tatou e fai le mea sa’o (tagai Salamo 46:1; Alema 37:36–37; 3 Nifae 20:1).

Mafaufau loloto i le le gaoiā ma le filemu

O le toatele o i tatou ua iloa e fesoasoani le mafaufau loloto a o tatou sailia faaaliga ma le taitaiga mai le Alii. Tatou te saili mo se nofoaga filemu, e leai ni mea faalavefau. Na saunoa mai Peresitene Russell M. Nelson, “O le taimi filemu o le taimi paia lea” (“O Mea Ua Tatou Aoaoina ma O Le a Le Faagaloina Lava,” Liahona, Me 2021, 80). Atonu e fesoasoani le oo atu i se tulaga toafimalie. Tatou te faamamaina o tatou mafaufau ma malolo. Tatou te fai ni nai manava faifailemu ma le loloto.

O le isi tatou te mafaufau ma manatunatu loloto i mea e taua ia i tatou ma faalogo i manatu e oo mai i o tatou mafaufau. E mafai ona tatou mafaufau i luitau o loo tatou feagai, aemaise lava i lo tatou toe faaleleia po o sootaga. E mafai ona tatou mafaufau i fuaiupu o tusitusiga paia po o le lauga o le konafesi aoao o loo tatou suesueina. E mafai lava ona tatou mafaufau i le aso o i luma atu ma le itu tatou te manaomia. E mafai foi ona tatou faamaumauina manatu e oo mai i o tatou mafaufau i se api talaaga mo le manino sili atu. A maea lenei taimi toafilemu, tatou te faaauau pea ona saili le taitaiga ma le mana o le Alii i le aso atoa a o tatou taumafai e “vaavaai atu ia te Ia i manatu uma lava” (Mataupu Faavae ma Feagaiga 6:36).

Na aoao mai Peresitene M. Russell Ballard: “E taua le filemu ma faalogo ma mulimuli i le Agaga. Ua tele naua mea faalavefau e tosina ai la tatou gauai atu, nai lo o se isi lava taimi i le talafaasolopito o le lalolagi. E manaomia e tagata uma le taimi e manatunatu ma mafaufau loloto ai. … E tatou te manaomia uma lava se taimi e fesili ifo ai ia i tatou lava ni fesili pe i ai se faatalanoaga patino masani ma i tatou lava. E masani ona tatou pisi tele, ma e matua leotele le lalolagi ma e faigata ai ona faalogo i upu faalelagi ’ia filemu, ma iloa o A’u o le Atua’ [Salamo 46:10]” (“Ia Filemu, ma Iloa O A’u o le Atua” [faigalotu a le Ofisa o Aoga a le Ekalesia mo talavou matutua, 4 Me, 2014], broadcasts.ChurchofJesusChrist.org).

Suesue ma Malamalama

O mau nei ma saunoaga mai taitai o le Ekalesia e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. E tatau ona tatou manatua ia faamaoni ma patino a tatou tusitusiga ina ia tele se aoga mo i tatou.

Faalatalata atu i le Alii

“Ia faalatalata mai ia te a’u, ona ou faalatalata atu ai lea ia te outou; ia saili ia te au ma le filifiliga, ona outou maua ai lea o a’u; ole mai, ona outou maua ai lea; ia tuitui mai, ona toina ai lea ia te outou” (Mataupu Faavae ma Feagaiga 88:63).

E faaaloalogia e le Alii o tatou manao ma lo tatou faitalia. Na te tuu mai pea tatou te filifili e faalatalata atu ia te Ia e aunoa ma le tau faamalosia. E faalatalata mai o Ia ia i tatou pe a tatou valaaulia o Ia e faia lena mea.

E faapefea ona ou faalatalata atu ia te Ia i le asō?

Faaali atu le agaga faafetai

“Ia tatalo e le aunoa. “la outou faafetai i mea uma lava: aua o le finagalo lea o le Atua e faatatau ia te outou ia Iesu Keriso. Aua tou te tineia le Agaga” (1 Tesalonia 5:17–19).

A tatou manatua e faaalia le loto faafetai mo mea uma i o tatou olaga, e oo i mea e te le malamalama i ai, o le a mafai ona e faatumauina le fesootaiga faifai pea ma le Atua lea sa taua e Paulo “[o le tatalo] e le aunoa.” Taumafai e faafetai atu i le Atua i le aso atoa.

E faapefea ona aafia lo’u latalata i le Agaga i lenei faiga?

Fiafia i afioga a le Atua

“E tautala mai agelu i le mana o le Agaga Paia; o le mea lea ua latou fetalai mai ai i le afioga a Keriso. O le mea lea na ou fai atu ai ia te outou, ia outou fiafia i le afioga a Keriso; aua faauta, e faaalia mai ia te outou i le afioga a Keriso mea uma tou te faia” (2 Nifae 32:3).

I lenei fuaiupu, ua aoao mai Nifae afai tatou te taumamafa i afioga a Keriso, o le a taitaia i tatou e nei upu i mea uma tatou te manao ia iloa ma faia. Vaai faalemafaufau pe mata e faapei le savavali ma talanoa ma Iesu Keriso i le aso atoa.

O le a so’u lagona pe a ou mafaufau loloto i lenei ata?

Mauaina o faaaliga patino

“Sa fetalai le Faaola, ‘O le a ou tau atu ia te oe i lou mafaufau ma lou loto, e ala i le Agaga Paia’ (MF&F 8:2, faaopoopo le faatusilima). … O se musumusuga i le mafaufau e matua patino lava. O upu auiliili e mafai ona faalogoina pe lagonaina ma tusia e pei lava faatonuga sa faalauina mai. O se fesootaiga i le loto o se uunaiga lautele lea” (Richard G. Scott, “Fesoasoani i Isi ina Ia Taitaia Faaleagaga” [lauga na tuuina atu i le Church Educational System Symposium, Aok. 11, 1998], 3–4).

A o faateleina lo tatou malamalama i faaaliga faaletagata lava ia, o le a tele ina tatou iloaina ma i ni ala eseese se tele.

Na faapefea ona ou maua uunaiga ma faaaliga mai le Alii?

“Ou te fai atu ia te outou, [o nei mea ua ou tautala atu ai] ua faailoa mai i latou ia te a’u e ala i le Agaga Paia o le Atua. Faauta, sa ou anapogi ma tatalo i aso e tele ina ia mafai ona ou iloa nei mea mo au lava ia. Ma o lenei ua ou iloa mo a’u lava ia ua moni nei mea; ona o le Alii le Atua na ia faailoa mai nei mea ia te a’u e ala mai i Lona Agaga Paia; ma o le agaga lea o faaaliga ua ia te au” (Alema 5:46).

O le anapogi i le ala ua faauuina ai e le Alii e mafai ona aumaia ai le mana tele lea semanu tatou te le mauaina (tagai Mataio 17:14–21). O le mea moni, e mafai ona tatou anapogi faapitoa ina ia manumalo ai i vaisu. Na aoao mai Isaia, “E le o lenei ea le anapogi ou te loto i ai? ina ia tatalaina fusi na faia i le amio leaga, e tatala fusi o le amo, e tuuina atu ia saoloto ē ua faasauaina, ma ia outou gausia amo uma lava?” (Isaia 58:6).

Na faapefea e le anapogi ma le tatalo ona faateleina lo’u gafatia e maua ai faaaliga?

“O le manatu e faapea o le faitauina o tusitusiga paia e mafai ona oo atu ai i musumusuga ma faaaliga e tatalaina le faitotoa i le mea moni faapea, e le o faatapulaaina mau i mea sa faatatau i ai ina ua tusia, ae ua aofia ai foi ma mea ua faatatau i ai lena mau i le tagata faitau i aso nei. Ma le isi foi, o le faitauina o tusitusiga paia e mafai foi ona oo atu ai i faaaliga i aso nei e uiga i se isi lava mea e finagalo le Alii e fetalai mai ai i le tagata faitau i lea taimi. Tatou te le o soona faia se faamatalaga pe a tatou faapea o tusitusiga paia e mafai ona avea ma Urima ma Tumema e fesoasoani ia i tatou taitoatasi i le mauaina o faaaliga faaletagata lava ia” (Dallin H. Oaks, “Faitauina o Tusitusiga Paia ma Faaaliga,” Ensign, Jan. 1995, 8).

O le a’oa’o i le gagana o tusitusiga paia e tali tutusa lava ma le a’oa’oina o se gagana ese. O le ala sili e a’oa’o ai o le faatofu o i tatou i ai—e faitau ma a’oa’o i ai i aso uma.

O anafea na ou maua ai se faaaliga mai se fuaitau o mau?

Maua fautuaga mai le Alii

“Aua tou te saili e fautuaina le Alii, a ia outou talia fautuaga mai lona aao. Aua faauta, ua outou iloa lava,ua fautua mai o la i le poto, ma le faamasinotonu, ma le alofa mutimutivale tele, i luga o ana galuega uma” (lakopo 4:10).

Atonu sa le aoga a tatou tatalo i aso ua mavae ona o le tele o taimi sa tatou faatonu ai le Alii—e ta’u atu ia te la mea sa tatou mananao i ai—nai lo le sailia o Lona finagalo e faatatau i a tatou filifiliga ma amioga.

Pe na ou maua se aafiaga talu ai nei i le tatalo? Afai na i ai, pe sa faatumulia i au faatonuga i le Alii, pe mai le Alii?
Pe o o’u naunau ea e faalogo ma talia Ana fautuaga?