“Laasaga 9: Soo se mea e mafai ai, ia faia se faaleleiga tuusa’o i tagata uma na tatou faamanu’alia,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 9,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 9: Soo se mea e mafai ai, ia faia se faaleleiga tuusa’o i tagata uma na tatou faamanu’alia.

6:1

Mataupu Faavae Autu: Fai ni Suiga

Ao matou faagasolo atu i le Laasaga 9, sa matou saunia e saili le faamagaloga. E pei o atalii salamo o Mosaea, o e na feoai solo, “ma le vilivilitai e toe faalelei manua uma sa latou faia” (Mosaea 27:35), sa tatou naunau e fai ni suiga. Ae a o matou feagai ma le laasaga 9, sa matou iloa e le mafai ona faatino o matou manaoga, seiloga e faamanuiaina i matou e le Atua i Lona Agaga. Sa matou manaomia le lototele, faautautaga lelei, magafagafa, faaeteete ma le taimi talafeagai. O le toatele o i matou sa le’i mauaina nei uiga auau mama i lena taimi. Sa matou iloaina o le laasaga 9, o le a toe tofotofoina ai o matou naunautaiga ia faamaualalo i matou lava ma saili se fesoasoani ma le alofa tunoa o le Alii.

Ona o o matou aafiaga i lenei faagasologa luitauina, ua matou ofoina atu ai ni nai fautuaga. E matua taua le aua nei o tatou mateletele pe faatamala a o taumafai e faia se suiga. E tutusa foi le taua le aua nei o tatou faatuutuu. E toatele tagata ua toe faaleleia, ae ua toe aafia foi ina ua latou faatagaina le fefe e taofia i latou mai le faia o ni suiga. E tatau ona tatou tatalo mo le taitaiga a le Alii i le taimi ma le auala e faia ai ni suiga. E le gata i lea, e aoga le talanoa i o tatou tagata lagolago, taitai o le Ekalesia, po o isi tatou te faatuatuaina.

O nisi taimi atonu e tofotofoina i tatou e ‘aloese mai le feiloai atu i se tagata o loo ia tatou lisi. E ui lea, matou te fautuaina ia e tetee atu i lenei tofotofoga, vagana, o i ai se noataga faaletulafono e taofia ai oe mai le feiloai atu i se tasi. Pe a tatou lotomaualalo ma faamaoni ma faia ni taumafaiga talafeagai e feiloai patino ai, e mafai ona tatou toe faaleleia sootaga ua faaleagaina. Tatou te faailoa atu i tagata o loo tatou agai atu e faia se faaleleiga. Tatou te aloaia o latou manao pe a latou faaali mai e sili ai le aua le talanoaina le mataupu. Afai latou te tuu mai ia i tatou le avanoa e faatoese ai, ia faapupuu ma ia fitoitonu i le tulaga. Tatou te faaeteete ia aua nei faia ni ‘alofaga pe faasesēina tagata tatou te faalatalata atu i ai. O le faamoemoega o le faia o ni suiga e le o le tauamiotonuina lea o a tatou amioga po o le faitioina o tagata; o le faamoemoega o le tautino atu lea o a tatou mea sese, faatoese atu, ma faia ni faaleleiga i soo se taimi e mafai ai. Aua le finau ma tagata, e tusa lava pe le manaia pe taliaina a latou tali. Tatou te faalatalata atu ma le lotomaualalo i tagata taitoatasi ma ofo atu le faaleleiga, ae le o le tauamiotonuina.

Atonu e matuā faigata lava ona faatoese atu mo ni gaoioiga faapitoa. Mo se faataitaiga, atonu e tatau ona e talanoa i ni mataupu e i ai ni uiga faaletulafono, e pei o le gaoi po o le sauaina. Atonu e tofotofoina i tatou e le taofiofi, faia o ‘alofaga pe ‘aloese mai le faia o suiga. Tatou te saili ma le agaga tatalo se fautuaga faale-ekalesia pe faapolofesa ae tatou te lei faia se gaoioiga i nei ituaiga o tulaga ogaoga.

I nisi tulaga, atonu e lē mafai ona tatou faia ni suiga tuusa’o. Atonu ua maliu le tagata, pe tatou te le iloa foi le mea o loo nofo ai. I tulaga faapenei, e mafai lava ona tatou faia tuusa’o se faaleleiga. E mafai ona tatou tusia se tusi e faaali atu ai lo tatou faanoanoa ma lo tatou manao mo se faaleleiga, e tusa pe le mafai ona tiliva le tusi. E mafai ona tatou su’ea se tasi e faamanatu mai ai ia i tatou lena tagata ma faia se mea e fesoasoani ai ia te ia, pe mafai foi ona tatou faia se mea e le faailoaina e fesoasoani ai i se tagata o le aiga o lea tagata.

I nisi o tulaga, atonu na tatou faia ni mea leaga e lē mafai ona tatou toe faaleleia. Na aoao mai Elder Neil L. Andersen:

“E tele mea sese e le mafai ona faasa’oina e lē sa faamanu’aina pe faatiga, ma o loo i ai tiga ma mafatiaga e le mafai ona toe faaleleia atoatoa. Ae aua lava nei e faaleaogaina le faaleleiga agalelei e mafai ona e faia, le mafatiaga e mafai ona e faamāmāina, e ui lava o le alofa, mama, amiolelei, faatuatuaina, ma le faaaloalo atonu e le mafai ona toefuatai mai e aunoa ma le faasalavei a le Alii. … Mo nisi agasala, e na o le pau le ala e faia ai le faaleleiga atonu e oo mai i le faamanuiaina o olaga o isi ma avea ai ma se meafaigaluega i aao o le Alii e aumai ai lona agalelei ma le alofa tunoa i isi” (The Divine Gift of Forgiveness [2019], 218, 221).

Mai le taimi tatou te filifili ai e faaaoga nei mataupu faavae moni e avea ma se ala fou o o tatou olaga, ua amata ona tatou faia ni suiga. Tatou te suia le ala tatou te ola ai, ma a o tatou ola i le toe faaleleia, e faamanuiaina ai tagata uma o loo siomia ai i tatou.

Atonu e i ai tulaga e tiga ai le faalatalata atu i se isi tagata e faia ni faasa’oga mo lena tagata pe faatama’ia ai foi. Afai e te manatu o le mea lena e ono oo i ai, talatalanoa ma lou tagata lagolago po o se faufautua faatuatuaina. O lenei laasaga o le toe faaleleia e le tatau lava ona toe faatupuina ai se isi faatamaiaga po o se faanoanoaga i isi.

A mavae le faia o suiga mo le tele o a tatou gaoioiga ua te’a, atonu o i ai pea se tagata se toatasi pe toalua tatou te lagonaina e le mafai ona tatou fesagai. E toatele tatou e feagai ma lena mea moni. Matou te fautuaina e te liliu atu i le Alii i le tatalo faamaoni. Afai o i ai pea ia te oe le fefe po o le ita i se isi, atonu e sili ai le tolopo o le lua feiloaiga. E mafai ona tatou faatoilaloina lagona le lelei e ala i le tatalo mo le alofa mama e vaai ai i le tagata e pei ona silasila mai le Alii ia te ia. E mafai ona tatou vaavaai i ni mafuaaga lelei o le a aoga ai le toe faaleleia ma le faaleleiga. Afai tatou te faia ia mea ma le onosai, e mafai, ma o le a tuuina mai e le Alii—i Lana lava ala ma i Lana lava taimi—le avanoa faavavega e sailia ai le faamagaloga mai tagata uma o ia tatou lisi.

I nisi tulaga, o le a lē, pe lē mafai foi e le tagata ona faamagaloina i tatou. Atonu e faamagalo i tatou e isi tagata ae latou te le mananao e faalelei pe faia se sootaga ma i tatou. E ui atonu e faavaivailoto pe tiga lenei mea mo i tatou, ae e taua le faaaloalo i o latou lagona ma faamamaluina la latou faitalia. O le laasaga 9 e faatatau i le faia o la tatou vaega e faia ai ni suiga. O lenei laasaga e le manaomia ai le isi tagata e faamagalo pe faalelei ma i tatou. A o tatou faia la tatou vaega i le faia o se taumafaiga faamaoni e faia ni suiga, ua tatou galueaiina le laasaga 9 ma agai i luma i la tatou malaga o le toe faaleleia.

Laasaga o Faatinoga

O se polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o le “galueaiina o laasaga.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e tatau ai e fai ai le isi laasaga i lo tatou toe faaleleia.

Faalatalata atu i isi

I le laasaga 8, sa matou faia ai ni lisi ma mafaufau ma le agaga tatalo po o afea ma pe faapefea ona faalatalata atu i tagata o loo i a matou lisi. Sa matou talanoaina a matou fuafuaga ma a matou tagata lagolago po o faufautua faatuatuaina, ona matou saunia lea mo le laasaga 9—e faafesootai tagata o loo i a matou lisi (pe a mafai ma talafeagai). Pe a tatou faafesootaia tagata e faia ni suiga, tatou te le tau faia ni auiliiliga tele e uiga i o tatou vaisu. Ae e tatau ona lava faamatalaga e faasoa atu e fesoasoani ai ia i latou ia malamalama lelei ai i le mafuaaga e tatau ai ona tatou talanoa ma i latou.

Tatou te faailoa o tatou sese ma fesili po o le a se mea e mafai ona tatou faia e faasa’o ai. E pule i latou pe latou te faamagalo i tatou pe leai. O tagata tatou te faalatalata atu i ai atonu e i ai ni fesili e talafeagai mo i tatou e taliina. Manatua e tali a latou fesili i se ala o le a le toe faaleagaina ai le mafutaga. Afai e i ai ni ou masalosaloga, tau lava o le ta’u atu ia i latou e te manao e toe mafaufau i lenei mea ma o le a toe foi mai i ai. Ona mafai lea ona e talanoaina ma lou lagolago po o le faufautua faatuatuaina le auala ma le taimi e tali ai nei fesili.

Atonu o nisi taimi tatou te ootia ai i le taimi o lenei faagasologa. Tatou te tatalo ma ole atu mo le fesoasoani a le Alii ina ia tumau ai le to’a ma taulai atu i le faamoemoega o la tatou asiasiga. Atonu e faaosoosoina i tatou e tauamiotonuina pe faamatala a tatou faatinoga e ala i le aumaia pe taulai atu i se mea na faia e se isi tagata, ae e tatau ona tatou teena lenei faaosoosoga. E tatau ona tumau lo tatou taulai atu i le faia o ni suiga mo a tatou faatinoga.

Tatou te talanoaina mea e mafai ona tatou faia se faaleleiga ma le tagata na tatou sese ai. Mo se faataitaiga, afai e manaomia ona tatou faia se faaleleiga e ala i le toe totogiina o le tupe, e mafai e le tagata ona faamagalo le aitalafu, fesili atu mo le aofaiga autu, pe fesili mo se tului. Atonu tatou te le manaomia ona ausia o latou faamoemoega; ae peitai, e taua le malamalama i mea e lagona e le tagata e tatau ona tatou faia e toe faaleleia ai, ma e tatau ona tatou mafaufau ma le agaga tatalo i ai.

A uma ona faia ni suiga, o le a tatou faatumuina koluma mulimuli e lua i le siata na tatou fatuina i le laasaga 4 (tagai i le faaopoopoga mo se faataitaiga o se siata). Tatou te taina i totonu le aso o fesootaiga taitasi, o suiga na tatou faia, ma taunuuga. Ona tatou talanoaina lea o taunuuga ma a tatou tagata e lagolago. Tatou te faailoa o loo tatou finau e fai mea uma tatou te mafaia ina ia ogatasi ma tagata o loo i a tatou lisi. Ua tatou faia le mea sili e faasa’o ai mea, ma e mafai ona tatou faatuatuaina le Alii e faamalolo mea e le mafai ona tatou faamaloloina. E oo mai le filemu e ala i la tatou sootaga ma le Alii. O isi tagata e i ai lo latou faitalia e tali atu ai e pei ona latou mananao ai.

Ia iloa faamanuiaga o le toe faaleleia

A o matou aoina mai le lototele e faia ai ni suiga, o se tulaga faamalosiau le iloiloina o faamanuiaga na matou maua mai le galueaiina o laasaga e oo mai i le taimi lenei. Sa amata ona matou iloaina o faamanuiaga o le toe faaleleia sa sili atu nai lo mea sa matou faamoemoeina. Matou te fautua atu ia amata sau lisi o suiga i lou olaga. O nisi nei o suiga na matou matauina ia i matou lava a o matou oo mai i le taimi lenei i o matou toe manuia:

Tatou te lagonaina le alofa atoatoa o le Atua mo i tatou.
Tatou te lagonaina le olioli fou, fiafia, ma le saolotoga i o tatou olaga.
Tatou te malamalama i tagata, sootaga, ma tulaga ma se vaaiga loloto atu ma ua faateleina le agaalofa i isi.
Ua ia i tatou se taitaiga ma se faamoemoega fou mo o tatou olaga.
Tatou te lagonaina le taliaina loloto ma le alofa mo i tatou lava ma isi.
Tatou te faaitiitia lo tatou mafaufau ia i tatou lava ae taulai atili atu i le auauna atu i tagata o e manaomia la tatou fesoasoani.
Tatou te lagona le malosi ma le patino o le Togiola e le gata a Iesu Keriso.
Ua tele atu lo tatou faamoemoe ma le faatuatua mo lo tatou lumanai e faavavau.
Ua itiiti lo tatou fefe i le olaga ma tulaga tautupe.
Tatou te lagona le faamagaloina, ma e mafai ona faigofie ona tatou faamagalo atu i isi.
Tatou te talitonu faatasi ai ma le mana o le Atua, e mafai ona tatou faia mea e le mafai ona tatou faia na o i tatou.

Suesue ma Malamalama

O mau o loo mulimuli mai ma saunoaga mai taitai o le Ekalesia e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. E tatau ona tatou manatua ia faamaoni ma patino a tatou tusitusiga ina ia tele se aoga mo tatou.

Faatosina isi mo le lelei

“Ua faapea mai le Agaga o le Atua ia te au: Ina poloai atu ia i lau fanau ia amiolelei, nei latou taitai ese loto o tagata e toatele i le malaia, o le mea lea ou te poloai atu ai ia te oe, lou atalii e, ma le mata’u i le Atua, ia e aloalosa i au amioletonu;

“la e liliu mai i le Atua ma lou manatu atoa, ma lou loto atoa, ma lou malosi atoa, ina ia e le toe taitaieseina loto o tagata ia amioleaga, ae sili ona e toe foi atu ia te’i latou ma tautau atu ou sese ma faaiu lena leaga na e faia” (Alema 39:12–13).

O se tasi o taunuuga sili ona leaga o a tatou amioga ua fai ma vaisu, o le, e mafai ona tatou tosinaina isi e atia’e vaisu e i latou lava.

O ai i lo’u olaga na ou faatosinaina faapea?
E tusa ai ma aoaoga a Alema i nei fuaiupu, o fea e mafai ona ou maua ai le lototele e faia ai ni suiga i nei tagata?

Ia faatauanauina, ae lē o le faamalosia

“O se fia sau, e mafai ona sau ma inu fua i le vai o le ola; a o se le fia sau, e le faatauanauina o ia, pe a oo foi i le aso gataaga, e toe tuuina atu ia te ia e tusa ma ana galuega” (Alema 42:27).

E tele mafuaaga mamana e galueaiina ai le laasaga 9, ae e le tatau lava ona utia i tatou i le fetuutuunai po o le pepelo e faapea e leai so tatou ‘alofaga. O le Polokalama o le Toe Faaleleia Mai mMa ua Fai ma Vaisu o se polokalama e faatauanau, ae le o le faamalosia.

Pe ou te lagona le faatauanauina po o le faamalosia e faia ni suiga?
E tusa ai ma lenei fuaiupu, o a nisi o mafuaaga e ono faatauanauina ai au?

Saunia e feiloai ma le Atua

“O lou manao ia outou o mai, ae le toe faamaa’a o outou loto, aua faauta, o ona po nei, ma le aso lenei o lo outou olataga; o le mea foi lea, afai tou te salamo, ae le faamaa’a o outou loto, e faataunuuina loa ai ia te outou le ala sili o le togiola.

“Aua faauta, e tatau i tagata ona sauniuni i lenei olaga e fetaiai ma le Atua. loe, faauta, o le aso o lenei olaga, o le aso lea e tatau ona fai ai e tagata a latou galuega” (Alema 34:31–32).

O le a se mea ou te ausia pe a ou faamaluluina lo’u loto ma faia ni suiga?
E faapefea ona faatuputeleina lo’u naunau e faia suiga pe a ou iloa o loo ou sauniuni foi e fetaiai ma le Atua?

Toaga i le Ekalesia

“Ma o [Alema le Itiiti ma atalii o Mosaea] ua latou malaga solo i le nuu uma … ua vilivilitai lava e faalelei mea leaga uma na latou faia i le ekalesia. Ua faaali atu foi a latou agasala uma, ma ua talai atu mea uma na latou vaaia, ua faamatala foi perofetaga ma tusi ia te i latou uma o e na fia faalogo ia te i latou” (Mosaea 27:35).

E toatele tagata ua le toe o mai i le lotu ona o mea ua fai ma vaisu. O nisi tagata e faaaogaina sese o isi e faamaonia ai le faatapulaaina o le aafia ai i le Ekalesia.

O le a so’u aafiaga i le toaga ai i Le Ekalesia a lesu Keriso o le Au Paia o Aso e Gata Ai?
Na faapefea ona fesoasoani lo’u latalata atili i le Faaola e ala i lo’u toe faaleleia na lagona ai le toefaatasia ma Lana Ekalesia?
E faapefea ona avea le toaga i le Ekalesia ma fesoasoani ia te au i le faia o suiga ma toe faaleleia atoatoa ai?

Faaleleiga e faia ma le naunautai

“E tatau ona e toe aveina atu i le mea sili e te mafaia ai mea uma na gaoia, faatamaia po o le faaleagaina. O le toe faaleleiga e faia ma le naunautai o se faamaoniga mausali lea i le Alii ua e tautino e faia mea uma e te mafaia e te salamo ai” (Richard G. Scott, “Finding Forgiveness,” Ensign, May 1995, 76).

E faapefea ona avea le faia o suiga ma faamaoniga e le gata i le Alii ae faapea foi a’u ma isi, ua ou tuuto atu i se olaga faamaulalo ma le faamaoni?

O faamoemoega o o tatou loto.

“O ia o le e salamo ma faia poloaiga a le Alii o le a faamagaloina” (Mataupu Faavae ma Feagaiga 1:32).

I le faia o suiga, tatou te ono feagai ma ni tagata o e o le a le faamagalo ia i tatou. Atonu o loo maa’a pea o latou loto faasaga ia i tatou, pe latou te le talitonuina o tatou faamoemoega.

E faapefea ona fesoasoani le iloa o loo malamalama le Alii i vilivilitaiga moni o lo’u loto, ma o le a Ia talia la’u taulaga e salamo ma fai se faaleleiga, e tusa lava pe le malamalama i ai isi tagata?

O le mea e mafai ona faia e le Faaola mo i tatou

“E le mafai e tagata ona faamagalo a latou lava agasala; e le mafai ona latou faamamaina i latou lava mai taunuuga o a latou agasala. E mafai e tagata ona taofia le toe faia o agasala ma fai le mea tonu i le lumanai, ma o lea o a latou amioga e taliaina i luma o le Alii ma tatau ai mo le iloiloina. Ae o ai na te faaleleia mea sese na latou faia ia i latou lava ma isi, lea e foliga mai e faigata ia i latou ona lipeaina e i latou lava? O le togiola a lesu Keriso o le a faamamaina ai agasala a le ua salamo; e ui lava ina mumu ulaula ia agasala, o le a sinasina e pei o fulu mamoe. O le folafolaga lenei ua tuuina atu ia te outou” (Joseph F. Smith, in Conference Report, Oct. 1899, 41).

A o e faia suiga, aua le lotovaivai i manatu e pei o le, “E le mafai lenei mea! E leai se mea e mafai ona ou faaleleia ai se mea sese ua ou faia i lenei tagata.” E ui lava atonu e moni lena mea, ae mafaufau i le mana o lesu Keriso e toe faaleleia na mea e le mafai ona e faaleleia. E tatau ona tatou faatuatuaina o le a faia e Iesu Keriso mea e le mafai ona tatou faia.

E mafai faapefea ona ou faaali atu i le Alii ou te faatuatuaina o Ia? E faapefea ona ou faateleina lena faatuatuaga?