Faamatalaga Tamuli

A o tatou oo mai i le faaiuga o lenei taiala, matou te molimau atu tatou te lei oo i le faaiuga o lenei malaga paia. Ina ua matou faatoa o mai i fonotaga o le toe faaleleia, sa matou vaai faalemafaufau i le vavega silisili o le a matou oo i ai o lo tatou toe manuia mai vaisu. O i matou o e ua oo i lenei faamanuiaga ua iloa e tele atu isi mea—tele isi galuega e fai ma le tele o vavega ma le alofa tunoa e oo i ai. “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia” (1 Korinito 2:9).

O i matou o e ua uia nei laasaga ma o loo maua le faamoemoe o le toe faaleleia ma tatalo ina ia faamanuiaina foi outou i le toe faaleleia atoatoa, e aofia ai faamanuiaga faaopoopo o le auai atoatoa i le Ekalesia. O le mama ma le mafaufau lelei o le amataga lea o le taliaina o mea uma ua i ai i le Alii mo i tatou.

O nisi o i matou e auai i le polokalama, manatu ua faamaloloina i tatou, ua le toe auai, ona toe foi lea i tua. O isi ua maua le toe faaleleia ae ua le toe maua faamanuiaga o le toaaga atoatoa i le Ekalesia. Ua matou iloaina o se toe faaleleia maeaea e aofia ai le sailia o se paleni ma se fesootaiga i le va o laasaga e 12 o le toe faaleleia ma le talalelei a Iesu Keriso.

Ua avea i matou ma tagata fou ia Keriso, ma o lea, e mafai ai ona avea i matou ma meafaigaluega mamana e fesoasoani ai i le Alii i itu uma e lua o le veli (tagai i le 2 Korinito 5:17). Matou te molimau atu i le malosi faaopoopo tatou te maua a o faaauau pea ona tatou faatinoina nei mataupu faavae o le talalelei i vaega uma o o tatou olaga, e aofia ai lo tatou toaaga i le Ekalesia. O mataupu faavae tatou te faaaogaina i le toe faaleleia, lesona tatou te aoaoina, ma aafiaga tatou te maua e fesoasoani ia i tatou e o mai atoatoa ai ia Keriso ma taitai atu ai i tatou e galulue e tusa ai ma le fuafuaga a le Alii. Ua avea i tatou ma tagata “auai ma le naunautai” o Le Ekalesia a Iesu Keriso o le Au Paia o Aso e Gata Ai (Mataupu Faavae ma Feagaiga 58:27).

Ua faamanuiaina i matou e le Alii a o matou faaaogaina meafaigaluega ua fautuaina mai i lenei taiala. Ae peitai, o le Ekalesia a Iesu Keriso o le faleteuoloa lea o meafaigaluega uma e manaomia mo i tatou e faatumauina ai lo tatou faautauta ma tuputupu ae ai ma agai i luma i le ala o le feagaiga. A o tatou faaiuina lenei taiala, matou te valaaulia tagata auai uma i le Polokalama a le Ekalesia o le Toe Faaleleia Mai Vaisu ina ia “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (2 Nifae 31:20). A o tatou faia faapea, e tuuina mai ia i tatou le mea silisili o folafolaga uma a le Alii: “O le a outou maua le ola e faavavau” (fuaiupu 20).

I le faaiuga, matou te tuu atu la matou molimau e faapea, o loo i ai le faamoemoe mo le toe faaleleia e ala mai i le Faaola o Iesu Keriso ma nei mataupu faavae. Sa matou auai i le talalelei ma uia nei laasaga, ma ua matou iloa e aoga. Matou te valaaulia outou e tatalo mo le manao ma le naunautai e faaauau lenei galuega, ma faatagaina le alofa tunoa e le gata o Iesu Keriso e faaatoatoa ai lou toe faaleleia. Ia faamanuia oe e le Atua i lau malaga.