Laasaga 4: Faia se suesuega tusitusia lelei ma le lototele o o tatou lava tagata.

O le laasaga lenei tatou te amata ai ona faaaoga lo tatou faatuatua e ala i a tatou galuega (tagai Iakopo 2:17–18). Mo le toatele o i tatou, o le laasaga sili lea ona faigata. Atonu e luitauina, tiga, ma lofituina, ma atonu tatou te lagona e tatau ona tatou tali atu mo mea uma i o tatou taimi ua tuanai. Peita’i, o le tusiaina o a tatou suesuega e lē tatau ona avea o se galuega e lē mafai ona fai. E mafai ona tatou nonofo i lalo, tatalo, ma amata ona tusitusi, e tusa lava pe na o le tasi le fesili po o se mea e tupu i le taimi e tatou te tusi i ai.

Faamolemole toe faamanatu faataitaiga ma mataupu faavae o loo i le faaopoopoga (mo se faataitaiga, o le pepa o galuega). E mafai ona tatou faaaogaina se tasi o nei faataitaiga e fai ma mamanu e fesoasoani ia i tatou e amata ai. Afai tatou te soona faafaigataina lenei faagasologa, e sili atu ona faigata ia i tatou ona amata pe alualu i luma. O lea la, pe a tusia la tatou uluai suesuega, atonu e sili atu ona faafaigofie mea uma. E mafai lava ona tatou toe foi i ai a o faaauau pea ona tatou galulue i laasaga. Faamolemole ia galulue faatasi ma lau tagata lagolagoina a o e tusia lau suesuega. E faamanuiaina i tatou e le Atua a o tatou faia lenei galuega, ma o le a tatou le faanoanoa ai lava.

“Aua e pei ona manatu o ia i lona loto, ua faapea lava o ia” (Faataoto 23:7).

O le toatele o i matou na manatu o o matou vaisu o se faafitauli faaletino. Sa matou ofo i le iloaina o o matou mafaufauga, lagona, ma talitonuga o faapogai ia o a matou amioga ua fai ma vaisu. O le tuufaatasiga faigata o o tatou faiai, tino, ma uiga faaalia, o le mea lea e foliga mai tatou to’alia ai. Ua oo ina matou iloa o a matou amioga ua fai ma vaisu e le o o matou faafitauli autu ae o se vaifofo faataumaoi i o matou faafitauli moni.

• E mafai faapefea e lenei vaaiga e uiga i a’u vaisu ona fesoasoani ia te au e agai ai i luma i le tusiaina o la’u suesuega?

  Fatu se Faamatalaga

I tusitusiga paia, tatou te vaaia ai le tele o valaaulia e vaai toto’a, ma le faamaoni ia i tatou lava. O loo maua se faataitaiga matagofie i le Alema 5:14. Na fesiligia e le perofeta o Alema fesili nei o le suesuega: “Pe na fananau mai ea outou faaleagaga i le Atua? Ua outou maua ea ona foliga i o outou mata? Ua oo ea lenei liuga tele i o outou loto?” Matou te fautuaina le suesueina o le vaega o totoe o le Alema mataupu e 5 mo nisi faataitaiga o fesili o le suesuega e mafai ona tatou fesili ifo ai ia i tatou lava.

O le faia o se suesuega po o se iloiloga o mea o loo tatou i ai nei e mafai ona fesoasoani tele. Mo se faataitaiga, o se pisinisi e le masani ona faia ni suegaoloa o ana aseta ma aitalafu e masani ona le ola. O le faia o suegaoloa o se avanoa lea mo e anaina pisinisi e fuafua ai ma le faamaoni po o le a le mea e taua ma e tatau ona teuina ma po o le a foi le mea e leaga ma e tatau ona lafoai. Afai e pauu atu le au faipisinisi i le mailei o le le faamaoni ma faavaleaina i latou lava e uiga i le natura moni o le suegaoloa, o le a le mafai ona latou faia ni faaiuga sa’o e uiga i le taua o a latou oloa.

E faapena fo’i ona tāua mo i tatou le vaai faamaoni i o tatou olaga ma uiga.

• A o ou tatalo ma ole atu i le Atua e fesoasoani mai ia te au ia ou faamaoni, o le a se mea ua aoao mai e le Agaga Paia ia te au e uiga i lo’u faanaunauga e faafitia le moni o lo’u tulaga ma siomaga?

  Fatu se Faamatalaga

• Na faapefea ona ou faavaleaina au lava ia e uiga i o’u vaivaiga?

  Fatu se Faamatalaga

• Na faapefea ona ou le iloaina lo’u taua moni ma lo’u malosi?

  Fatu se Faamatalaga

“Ma pe a ou fia olioli, e oi loʼu loto ona o aʼu agasala; e ui i lea, ua ou iloa lē ua ou faalagolago i ai” (2 Nifae 4:19).

A o faia a matou suesuega, sa i ai taimi na oi ai o matou loto ona o a matou agasala ma tiga atonu na matou feagai.

• E mafai faapefea e le faatuatuaina o le Atua ona fesoasoani ia te au a o ou faamaeaina la’u suesuega ma feagai ai ma au agasala ma tiga?

  Fatu se Faamatalaga

“Ia e faatuatua ia Ieova ma lou loto atoa; ae aua le faalagolago i lou lava atamai. “Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6).

E mafai ona fesoasoani se suesuega ia i tatou e iloa ai le ata atoa. E fesoasoani ia i tatou ia iloa o tatou mafaufauga, lagona, ma amioga faapea foi ma e ua aafia ona o a tatou filifiliga. O le lua o filo masani i le tele o a matou suesuega o le fefe ma le soona faalagolago ia te oe lava. O le tautinoga na matou faia i le laasaga 3 o le faatuatuaina lea o le Atua ma lenei faagasologa o le toe faaleleia. O a tatou suesuega o le isi laasaga lea o le toe faaleleia ma o le a tatou maua ai ni manatu mautu e uiga i le auala e faaauau ai.

• E faapefea ona ese lo’u olaga ma filifiliga pe afai ou te lafoaia le faamaualuga ae filifili e faalagolago ma faatuatuaina le Atua?

  Fatu se Faamatalaga

• O le a so’u musuā e uiga i le agai i luma i la’u tautinoga e liliu atu lo’u olaga ma o le a tuuina atu i le tausiga a le Atua?

  Fatu se Faamatalaga

• Pe a ou ole atu i le Atua pe o le a Ia tausia au i laasaga taitasi o lo’u toe faaleleia, o le a le tali ou te maua i lo’u loto ma lo’u mafaufau e ala i le Agaga Paia? Ia manatua o le auala e tausia ai i tatou e le Atua atonu e ese mai mea tatou te filifili mo i tatou lava.

  Fatu se Faamatalaga

“O nisi taimi e oo mai ma’i faaleagaga ona o se taunuuga o le agasala po o manu’aga tau lagona. O nisi taimi e sausau malie ai lava le lafotuina faaleagaga lea e faafaigata ai ona tatou iloaina le mea o loo tupu. E pei o atufola o papa e faaputuputu, e faapena tiga ma faanoanoaga faaleagaga e mafai ona fatufatu i le aluga o taimi, ma mamafatu ai i o tatou agaga seia oo ina a toetoe lava lematatalia le mamafa tele. …

“Ae e le faapea la e moni tofotofoga faaleagaga ona le mafai ai lea ona foiaina.

“E mafai ona faamaloloina i tatou faaleagaga.

“E oo lava i manua loloto faaleagaga—ioe, e oo lava ia i latou e foliga mai e le mafai ona fofoina—e mafai ona faamaloloina” (Dieter F. Uchtdorf, “O E Tauaveina le Malamalama Faalelagi,” Liahona, Nov. 2017, 78).

Mafaufau i mea e tolu e sili ona leaga ua e faia i lou olaga. Pe na e latalata atu i le Faaola ma Lona Agaga ina ua e faia na mea? Afai e pei oe o le mea sa matou i ai, e te lei tatala atu i Lona Agaga. E toatele ua toe faamalolosia ua ta’ua lenei motusia o le “ma’i faaleagaga.”

• Pe a ou nopia’i i amioga ua fai ma vaisu ma amioga sese, pe o ou ma’i faaleagaga ea? Aisea pe aisea e leai ai?

  Fatu se Faamatalaga

O se vaega tele o a tatou suesuega o le faamaumauina lea o o tatou ita. E aofia ai le ita na tatou teuina mo tagata, faalapotopotoga, ma isi mea na tatou lagonaina na faaleagaina ai i tatou pe na le tonu foi le taulimaina o i tatou. O le faatumauina o le ita ua avea ma se tasi o malosiaga sili ona oona ma leaga i o tatou vaisu. Tatou te faatautee atu ai i isi ma taitai atu ai i tatou i le lagonaina o le tauamiotonuina i a tatou lava filifiliga faataumaoi po o le lē mafaufau.

Sa matou maua le fesoasoani faalelagi e vaai ai i isi i se malamalama fou, ma le alofa a o matou faia le filifiliga ma le iloa e tatalo mo i latou ma ole atu i le Atua e faamanuia i latou i faamanuiaga uma tatou te sailia mo i tatou lava. “O le ofoina atu o le faamagaloga e mafai ona moomia ai se lototele ma le lotomaualalo. E mafai foi ona alu ai se taimi. E moomia ai ona tatou tuu lo tatou faatuatua ma le faalagolago i le Alii a o tatou tauaveina foi le tiutetauave mo lagona o o tatou loto. O iinei o loo taoto ai le taua ma le mana o lo tatou faitalia” (Amy A. Wright, “E Faamalolo e Keriso Mea ua Nutimomoia,” Liahona, Me 2022, 82).

• Pe mafai ona ou filifili e fai se vaaiga fou e uiga i tagata ou te inoino i ai? Pe mafai ea e i latou, e pei o au, ona mama’i faaleagaga ma vavaeeseina mai le Atua ina ua latou faia se mea sese ia te au?

  Fatu se Faamatalaga

• Afai ou te tauivi ma lenei mea, e mafai faapefea ona ou suia la’u auala e tatalo ai mo nei tagata?

  Fatu se Faamatalaga