Laasaga 8: Fai se lisi tusitusia o tagata uma ua tatou faamanu’alia ma ia loto e faia se faaleleiga ma i latou.

Ae matou te lei toe fausia ni sootaga, sa manaomia ona matou faailoaina ma faia se lisi o na sootaga na faaleagaina. Sa matou faaaogaina a matou suesuega po o iloiloga mai le laasaga 4 e saunia ai a matou lisi. A o matou iloiloina ma le agaga tatalo a matou suesuega, sa fesoasoani le Agaga ia i matou e faailoa mai sootaga sa matou faaleagaina. O i matou o e na faia se siata ina ua matou galulue i le laasaga 4 na faigofie atu ona iloa nei tagata ma faalapotopotoga (tagai i le faaopoopoga mo se faataitaiga o se siata).

Sa matou iloaina o taiala nei sa aoga a o matou faia a matou lisi. Sa matou fesili ifo ia i matou lava, “O i ai se tasi i lo’u olaga, ua tuanai po o le taimi nei, ou te lagona ai le matamuli, fememea’i, po o le maasiasi?” Tusi o latou igoa ma tetee le tofotofoga e tauamiotonuina o matou lagona pe faia ni ‘alofaga o a tatou amioga le lelei ia i latou. Sa matou faaaofia ai tagata sa matou faamoemoe e faatiga ma tagata sa matou le faamoemoe e faatiga i ai. Sa matou faaaofia ai tagata ua maliliu ma tagata sa matou le iloa pe faapefea ona faafesootai. Sa matou taulai atu i nei tulaga faapitoa ina ua matou galulue i le laasaga 9. A o matou galulue i le laasaga 8, sa matou taulai atu i le lototele i lo matou faamaoni.

Sa matou taumafai e aua nei tuua ni mea laiti. Sa matou mafaufau ma le faamaoni i le faatiga sa matou faatupuina i isi ao matou nopia’i i a matou vaisu, e tusa pe matou te lei matua inaina ia i latou. Sa matou lisiina e pele ma uo na matou faatama’iaina ona o le faatautee, le faatuatuaina, ita, faitio, le onosai, le faamaoni, ma le le faamamaluina. Afai na matou faaopoopo atu i avega a se isi tagata i soo se itu, sa matou faaaofia ai nei tagata i a matou lisi. Sa matou taumafai e lisi tagata uma sa aafia i pepelo sa matou ta’u atu, o folafolaga sa matou solia, ma auala sa matou faaseseina pe faaaoga ai i latou. Sa matou mafaufau i tagata matou te lei faamagaloina, ma sa matou faaopoopoina foi i a matou lisi.

Ina ua uma ona matou lisiina tagata uma na matou faamanu’aliaina, sa matou faaopoopo se isi igoa se tasi i le lisi—o i matou lava. A matou nopia’i i a matou vaisu, sa matou faamanualia i matou lava faapea ma isi. O le auala sili e mafai ona tatou faia ai ni suiga ia i tatou lava o le ola lea i le toe faaleleia mai vaisu. E mafai ona fesoasoani le Atua ia i tatou e faamagalo i tatou lava ma faia ni suiga. A o matou lagonaina le alofa ma le faamagaloga a le Atua, sa suia o matou lagona o le maasiasi i se naunautaiga e faia ni suiga.

Ina ua uma ona fai a matou lisi, sa manaomia ona matou naunau e faia ni suiga. O le toatele o i matou na iloaina e le mafai ona matou lisiina tagata ma faalapotopotoga na matou faaleagaina e aunoa ma le faalavelaveina i lo matou faatautee ia i latou o e na faaleagaina foi i matou. E masani ona paulia tagata i taamilosaga matautia o le feitaga’i. Ina ia motusia nei taamilosaga, e tatau lava ona i ai se tasi e naunau e faamagalo atu.

Ina ua matou ta’uta’u atu ma le faamaoni o matou faalogona lē lelei, na fesoasoani le Atua iā i matou e aveesea le taamilosaga o le ita. Sa Ia faaali mai ia i matou e tatau ona matou faamagalo atu i isi e pei lava ona Ia faamagaloina i matou. I le faataoto i le tagata na faamagaloina ana aitalafu uma ae sa le manao e faamagalo atu i isi, sa fetalai atu lona alii ia te ia, “Na au faamagaloina atu au mea uma ua ia te oe, ina ua e aioi mai ia te au: e le tatau ea ona e … alofa atu i lou uso a auauna, e pei o au foi na ou alofa atu ia te oe?” (Mataio 18:32–33).

A o matou tauivi ina ia naunau e faia ni suiga i tagata na faatiga ia i matou, sa matou aioi atu mo le alofa tunoa o Keriso e fesoasoani ia i matou e tuuina atu ia i latou le alofa mutimutivale lava lea e tasi ua Ia tuuina mai ia i matou. Sa matou taliaina le fautuaga a le Faaola e tatalo mo lo latou manuia ma talosagaina i latou ia maua faamanuiaga uma matou te mananao ai mo i matou lava (tagai Mataio 5:44).

A o matou galulue i le laasaga 8, sa matou taumafai e manatua o lenei laasaga e le o se gaoioiga i le faalumaina o soo se tasi—a le o i matou lava po o isi. Ua faaalia mai i o matou aafiaga e faapea, e sii e le Faaola avega o le tausalaina ma le maasiasi a o matou vaai faamaoni i a matou sootaga faaletonu ma la matou vaega i ai. I le laasaga 8, na amata ai ona matou fesootai ia i matou lava, isi, ma le olaga i se loto fou. Sa amata ona matou lagonaina le filemu i o matou olaga nai lo finauga ma manatu lē lelei.

Na oo ina matou naunau e taofi le faamasinoina o tagata i le amioletonu ae faia ni iloiloga o o latou olaga ma mea sese. Na oo ina matou naunau e taofi le faaitiitia o a matou lava amioga le lelei po o le faia o ni ‘alofaga mo na amioga. O le naunau e fai ni suiga, na matou lagonaina ai le toafilemu i le iloa ua faafiafiaina le Tama Faalelagi i a matou taumafaiga. Na fesoasoani le laasaga ia i matou e faia faatinoga e mafai ai e le Faaola ona faasaoloto i matou mai a matou mea sese ua tuanai. O le naunau e faia ni suiga na saunia ai i matou e galulue i le laasaga 9.

Sa taialaina i matou e o matou tagata lagolago a o matou saunia a matou lisi, ma sa matou toe iloa ai e taua tele le tusitusi. O le toatele o i matou na faaaogaina le otootoga lenei e fesoasoani e faafaigofie ai le faagasologa ae mautu.

Muamua, i le faaaogaina o a matou suesuega mai le laasaga 4, sa matou lisiina ai tagata po o faalapotopotoga sa manaomia ona matou faafesootaia.

I autafa o faamatalaga taitasi, sa matou tuuina i ai se mafuaaga puupuu mo le manaomia ona faia o ni suiga.

Ona, e pei ona taialaina ai e le Agaga, sa matou faia ai se fuafuaga e faafesootai tagata o loo i a matou lisi, pe i le fesootai patino, i le telefoni, po o le tusi po o le imeli. Sa matou iloiloina a matou fuafuaga faatasi ma a matou tagata lagolago po o faufautua faatuatuaina.

Mulimuli ane, na matou faaaofia ai se aso e tulimata’ia. Sa matou tuua se avanoa e lipoti mai ai le aso na matou faafesootaia ai le tagata ma taunuuga o le fesootaiga. (O le siata i le faaopoopoga o se meafaigaluega aoga.)

E faigata ona ole atu mo se faamagaloga mai tagata o e na faatiga ia i tatou. Afai e te tauivi ma lenei mea, atonu e te iloa e aoga le tusia muamua o se lisi o tagata e manaomia ona e faamagaloina; ona tusi lea o se lisi o tagata e manaomia ona e ole atu i ai mo se faamagaloga. Atonu e te ofo i le iloaina o nisi o igoa o loo i ai i lisi uma e lua.

E tatau ona tatou onosai ia i tatou lava a o tatou galulue ma le agaga tatalo e faamagalo atu i tagata na tatou lisiina. Na aoao mai Peresitene James E. Faust: “O le toatele o i tatou e manaomia se taimi e taulima ai le feagai ma le tiga ma le maliu. E tele mafuaaga e mafai ona tatou maua e tolopo ai le faamagalo atu. O se tasi o nei mafuaaga o le faatalitali mo le tagata na sesē ia salamo muamua [ma faalelei mai ia i tatou] ae tatou te le’i faamagalo atu i ai. Ae o lena faatuatuai e afua ai ona tatou le maua le filemu ma le fiafia e mafai ona avea mo tatou. O le saga mafaufau pea i le tiga ua leva ona te’a e le aumaia ai se fiafia. Afai e mafai ona tatou maua le faamagaloga i o tatou loto mo i latou o e sa faatiga ma faamanualia i tatou, o le a siitia lo tatou lagona tauleleia faapea foi le olaga solo lelei” (“OLe Mana Faamalolo o le Faamagalo Atu,” Liahona, Me 2007, 68).

O le faamagalo atu i se tasi e le faapea ai tatou te le amanaiaina a latou filifiliga leaga pe faatagaina i latou e faia se mea leaga ia i tatou. Ae o le faamagalo atu e mafai ai ona tatou agai i luma faaleagaga, faalelagona, ma le faaletino. E pei lava ona nofo pologa i latou o e na faaleagaina i tatou, o lo tatou le naunau e faamagalo i latou e mafai foi ona saisaitia ai i tatou. A o tatou faamagalo atu, tatou te tuua lagona e i ai le mana e “faaleagaina, pala, ma iu ai ina faaumatia” (Thomas S. Monson, “Tina Natia,” Liahona, Iulai 2002, 20). O le faamagalo atu e fesoasoani foi ia i tatou ia maua le Agaga ia sili atu ona tele ma faaauau ai pea i le ala o le avea ma soo. E pei ona faamanatu mai e Peresitene Dieter F. Uchtdorf, o le au Peresitene Sili i lena taimi, “Ua tumu le lagi ia i latou o e tutusa i lenei mea: Ua faamagaloina i latou. Ma latou te faamagalo atu” (“OLe e Alofa Atu e Alofaina Mai,” Liahona, Me 2012, 77)

E ui atonu e te fefe e pei ona matou faia ni suiga, ae matou te molimau atu faapea, faatasi ai ma le fesoasoani a le Faaola, e mafai ona e naunau e feiloai i tagata o loo i lau lisi pe a tulai mai le avanoa. Sa matou saunia e faia ni suiga e ala i le tatalo mo le lototele e ola ai i le faatuatua i le Atua, ae le o le fefe i mea e ono faia pe fai mai ai tagata. Ma sa matou taumafai e mulimuli i mataupu faavae o le talalelei nai lo le maasiasi po o le fefe. O se tasi o mataupu faavae mamana na fesoasoani ia i matou o le alofa mama, “o le alofa mama o Keriso” (Moronae 7:47).

A o lei uia le laasaga 8, o le toatele o i matou sa faateia i le lagonaina o le alofa o Iesu Keriso e ui lava i o matou tulaga le atoatoa uma. O lenei alofa mai ia te Ia na mafua ai ona matou lagonaina le alofa tele mo Ia ma tuuina mai ai ia i matou se manao e mulimuli ia te Ia. A o matou taumafai i le mea sili matou te mafaia e mulimuli ai ia te Ia, sa faatumulia i matou i Lona alofa mo i matou lava ma isi. Sa matou tatalo mo le alofa mama, ma i le aluga o taimi sa matou naunau atili ai e faamagalo atu i tagata ma faia ni suiga. Sa matou mauaina foi se fuataga sili atu o le alofa ma le faamagalo atu ia i matou lava. Sa matou ole atu i le Atua e faamaluluina loto o tagata o loo i a matou lisi i le alofa mama ia i matou, ma sa matou tatalo mo le malosi e talia ai soo se taunuuga.

A o matou tatalo mo le alofa mama, o le toatele o i matou sa iloa e aoga le filifilia o se tagata mai la matou lisi ma tootuli ma le loto i ai ma tatalo mo lena tagata i aso taitasi mo le lua vaiaso. O a matou lisi o suiga na fesoasoani ia i matou e faapatino ai i a matou tatalo i le Tama Faalelagi e uiga i o matou lagona e lei foiaina. A o matou tatalo—e tusa lava pe sa lagona le le faamaoni i le taimi muamua—sa iu lava ina faamanuiaina i matou i le agaalofa faavavega. E oo lava i tulaga ogaoga, ua faamanuiaina e le Atua tagata o e na tatalo mo le alofa mama ina ia faamagalo atu ma faia ni faasa’oga.

“Ou te tautala atu ai ia te outou o e o le ekalesia, outou o soo agamalu o Keriso, ma outou ua outou maua le faamoemoe ua lava e mafai ai ona outou ulu atu i le malologa o le Atua, mai le taimi nei i luma seia oo ina outou malolo ai faatasi ma ia i le lagi.

“Ma o lenei o’u uso e, ua ou matauina nei mea ia te outou ona o lo outou savavali ma le filemu faatasi ma le fanauga a tagata” (Moronae 7:3–4).

I uluai Laasaga e 7, sa matou amataina ai se faagasologa o le avea ma soo faatupu filemu o Keriso. Afai ua tatou faalelei ma le Alii, ua tatou saunia lelei e faalelei ma isi.

• E faapefea e le galue faasolosolo i laasaga o le toe faaleleia ona fesoasoani ia te au e avea ai ma se soo faatupu filemu o Keriso?

  Fatu se Faamatalaga

• O a nisi faatinoga ou te manaomia ina ia ou faalelei ai ma tagata i lo’u olaga?

  Fatu se Faamatalaga

“E leai se fefe i le alofa; a o le alofa atoatoa e faateaeseina ai le fefe, aua o le mea tiga le fefe. O le ua fefe e le faaatoatoaina o ia i le alofa.

“Ua tatou alolofa i le [Atua] aua na ia muai alofa mai ia te i tatou” (1 loane 4:18–19).

• E mafai faapefea ona ou faatuatuaina le alofa atoatoa o le Atua mo au ma le tagata o loo ou sailia mai ai le faamagaloga?

  Fatu se Faamatalaga

• E mafai faapefea e le iloaina e alofa le Atua ia te au ma Ana fanau uma ona faamalosia la’u faaiuga e faia le toe faaleleia i soo se taimi e mafai ai?

  Fatu se Faamatalaga

“Aua tou te faamasino atu, ona le faamasinoina mai ai lea o outou, aua tou te faasala, ona le faasalaina mai ai lea o outou; ia outou faamagaloina atu, e faamagaloina mai ai outou:

“Ia outou foai atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi ma luluina, ma tumu ma solo i tua. Aua o le fua tou te fuaina atu ai, e fuaina mai ai ia te outou” (Luka 6:37–38).

E ui lava atonu tatou te fefefe i teena e nisi tagata a tatou taumafaiga e faalelei ma i latou, aua le avea lenei fefe e tutaia ai tatou mai le tuuina o i latou i a tatou lisi ma saunia e aapa atu ia i latou. E sili mamao atu faamanuiaga o le a tatou mauaina nai lo le tiga.

“O le latalata lava o lo tatou o atu i lo tatou Tama Faalelagi, o le tele foi lea o lo tatou mafuli atu e vaavaai ma le agalelei i agaga ua fano—tatou te lagona lo tatou mananao e fafa i latou i o tatou tauau, ma tiai a latou agasala i o tatou tua. … Afai tou te mananao ia alofa mutimutivale le Atua ia te outou, ia alofa mutimutivale le tasi i le isi” (Iosefa Samita, i le History, 1838–1856 [Manuscript History of the Church], voluma C-1 Addenda, 74, josephsmithpapers.org).

• O i tatou uma o ni agaga lē atoatoa o loo manaomia le alofa mutimutivale o Iesu Keriso. E faapefea ona fesoasoani le iloa faapea o le galueaiina o le laasaga 8, ua ou tatalaina ai le faitotoa e maua ai le alofa mutimutivale ma le alofa tunoa o Iesu Keriso?

  Fatu se Faamatalaga

“Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo’u uso ia te a’u, ma ou faamagalo ia te ia? seia atu fitu ea?

“Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu” (Mataio 18:21–22).

E faigofie atu ona faamagalo atu ma ole atu mo se faamagaloga mo se mea sese se tasi nai lo le faamagalo atu pe ole atu mo se faamagaloga mo se tulaga ua leva ona tumu i le tele o soligatulafono. Mafaufau i sootaga ua tuanai po o le taimi nei ma tulaga ua leva ona i ai e manaomia ona e faamagalo atu pe ole atu mo se faamagaloga.

• E faapefea ona ou maua le malosi e faamagalo ma saili ai le faamagaloga?

  Fatu se Faamatalaga

• E faapefea ona avea lesu Keriso ma faataitaiga sili o le mafai ona faamagalo atu isi tagata? E mafai faapefea e Lana faataitaiga ona fesoasoani ia te au e faamagalo atu i isi tagata?

  Fatu se Faamatalaga

“Ou te fai atu ai ia te outou, e tatau ona outou faamagalo i le tasi; ona o ia o le e le faamagalo atu i lona uso i ana agasala e tu tausalaina o ia i luma o le Alii; aua e tumau ia te ia le agasala tele atu.

“O Au, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” (Mataupu Faavae ma Feagaiga 64:9–10).

Na aoao mai Iesu o le lē faamagalo atu i isi o se agasala e sili atu nai lo le ulua’i soligatulafono.

• E faapefea ona tutusa le musu e faamagalo oe lava po o se isi, ma le faafitia o le Togiola a le Faaola?

  Fatu se Faamatalaga

• E faapefea ona faaleagaina oe faaletino, faalelagona, ma faaleagaga e le inoino ma le ita?

  Fatu se Faamatalaga

Sa faamalamalama e le Perofeta o Iosefa Samita o le agalelei e taitai atu ai i le salamo ma le faamagaloga:

“E leai se mea e sili atu ona aoga e tatai ai se tagata e lafoai le agasala i lo le taitai o i latou, ma vaavaai i latou ma le faapelepele. A faaalia e tagata se agalelei faatauvaa ma le alofa ia te au, Oka se mana na te faia i lo’u mafaufau, ae o lona faafeagai e matele ina fatufatuai ai lagona le lelei uma ma fa’atu ai le mafaufau o le tagata” (Joseph Smith, in History, 1838–1856 [Manuscript of the Church], volume C-1 Addenda, 74, josephsmithpapers.org).

• Pe o o’u naunau ea e avea ma le tagata e motusia le faataamilosaga o le inoino ma le faatiga?

  Fatu se Faamatalaga

• Na faapefea ona musuia pe faaosofia tagata na faaalia le agalelei ma le alofa ia te au ia ese a’u faatinoga?

  Fatu se Faamatalaga

• O a ni auala e ono suia ai sootaga faigata i lo’u olaga a o ou taulimaina isi tagata i le alofa ma le agalelei?

  Fatu se Faamatalaga