Laasaga 5: Ta’utino ia i tatou lava, i lo tatou Tama Faalelagi i le suafa o Iesu Keriso, i taitai perisitua e tatau ai, ma se isi uso a tagata le natura moni o o tatou sese.

Sa fautuaina e Alema lona atalii o Korianetona e “faailoa atu [ona] sese ma [le] mea sese na [ia faia]” (Alema 39:13). O lenei fautuaga e mafai ona avea o se taiala ma se musumusuga mo le laasaga 5 e galueaiina. O le laasaga lenei e aofia ai le faasoaina atu o a tatou suesuega mai le laasaga 4 i se isi tagata, e masani lava o se tagata lagolago, o se tasi foi na uia le faagasologa ma e mafai ona fesoasoani ia i tatou e faasoa atu i se auala faamaoni ma le maeaea. Afai e le o avanoa se tagata lagolago, filifili ma le agaga tatalo se isi tagata faatuatuaina, e sili atu se tagata ua mauaa lelei i le toe faaleleia. Aloese mai soo se tasi e te masalomia e ono tuuina atu se taitaiga le talafeagai, tuuina atu ni faamatalaga sese, pe faigata foi ona faatumauina le talitonuga. Matou te fautuaina foi le faaeteete i le faasoaina atu o a tatou suesuega i tagata vavalalata o le aiga. E taua le feutagai ma o tatou epikopo po o fomai e filifili ai po o afea e faailoa atu ai a tatou amioga i se toalua ina ia mafai ai ona taofia le toe faamanualia o i latou.

Na aoao mai Iesu Keriso o le ta’uta’u atu o se vaega taua o le faagasologa o le salamo: “O le mea lenei e mafai ai ona outou iloa pe salamo se tagata i ana agasala—faauta, e ta’uta’u atu e ia” (Mataupu Faavae ma Feagaiga 58:43). O le mea lea, tatou te ta’uta’u atu ai a tatou agasala i lo tatou Tama Faalelagi i le suafa o Iesu Keriso ma saili Lana faamagaloga. E le gata i lea, e tatau ona tatou ta’uta’u atu a tatou solitulafono e sili atu ona ogaoga i se epikopo po o se peresitene o le paranesi. Afai e te le o mautinoa po o le a le mea e ta’uta’u atu, faalogo i lou lotofuatiaifo ma ia mafaufau i agasala faalefeusuaiga po o isi amioga lē mamā. Pe a i ai se masalosalo, ia manatua le valaaulia e “o mai nei ma tatou filifili faatasi” (Isaia 1:18) ma talanoaina au fesili ma lou taitai perisitua.

“E ui e na o le Alii e faamagaloina agasala, ae o nei taitai perisitua latou te faia se matafaioi taua lava i le faagasologa o le salamo. O le a latou le faalauaiteleina le tautauina atu o au agasala ma o le a fesoasoani atu ia te oe i le faagasologa o lou salamo. Ia e matuai faamaoni ia i latou. Afai e te tautau na o se vaega o mea sese laiti, o le a e le mafai lava ona e foia se solitulafono matuia e te lei faailoa atu. O le vave ona e amataina o lenei faagasologa, o le vave foi lena ona e maua o le filemu ma le olioli lea e maua mai i le vavega o le faamagalo atu” (True to the Faith: A Gospel Reference [2004], 134).

O le salamo ma le ta’uta’u atu o le faamatalaga e aumaia ai le filemu i o tatou olaga. Na faamatala e Elder Quentin L. Cook lenei filemu i le faapea mai: “Pe a i ai se soligatulafono tele, e manaomia le ta’uta’u atu ina ia aumaia ai le filemu. Atonu e leai se mea e faatusalia le filemu e maua mai e se tagata agasala ua faamatuu atu lana avega i le Alii ma maua ai faamanuiaga o le Togiola” (“Filemu Patino: O Le Taui o le Amiotonu,” Liahona, Me 2013, 32).

O nisi taimi e faaauau ai pea ona faataitai e tagata i fonotaga o le toe faaleleia po o isi tulaga, a latou agasala ma vaivaiga. E ui lava latou te ta’uta’u atu pea a latou mea sese, ae latou te le maua lava le filemu. Aua le faafenumiaia le laasaga 5 ma se manao soona fai e mafaufau ai pea i mea e le lelei. O le faamoemoega o le laasaga 5 o le faafeagai tonu lea. Tatou te galueaiina le laasaga 5 ia le pipiimau i mea tatou te ta’uta’u atu ae ia lafoa’i.

Ina ua matou faamaeaina ma le faamaoni ma le maeaea lelei le laasaga 5, sa leai ma se isi lava mea na matou toe natia. Sa matou faaaliali atu lo matou naunau e “lafoaiina [a matou] agasala uma” (Alema 22:18) ina ia mafai ona matou maua se malamalama sili atu i le alofa o le Atua, le alofa ma le lagolago a le toatele o tagata lelei o e alolofa ia i matou.

“O au le Alii, ou te faamagaloina agasala a e ta’uta’u a latou agasala i o’u luma ma ole mai ia faamagaloina” (Mataupu Faavae ma Feagaiga 64:7).

• E faapefea ona fesoasoani ia te oe le ta’uta’u atu o au agasala i le Atua e faia ai ni suiga lelei i lo’u olaga? E faapefea ona ou maua ai le lototele ma le malosi e ta’uta’u atu ai i se isi tagata?

  Fatu se Faamatalaga

“Aua nei faatagaina se tasi e faalauiloa atu lona lava amiotonu; … vave ona ia ta’uta’u atu ana agasala, ona faamagaloina ai lea o ia, ma o le a ia fua mai ai ni fua se tele” (Joseph Smith, in History, 1838–1856 [Manuscript History of the Church], volume C-1 Addenda, 46, josephsmithpapers.org).

• O se tasi o mea e sili ona mananao i ai i latou o loo tauivi ma le tagofia o mea ua fai ma vaisu o se naunau tele ia latou foliga lelei i isi. E faapefea ona taofia a’u e lenei manao mai le faaleleia ma le “aumaia o ni fua e tele atu” po o galuega lelei?

  Fatu se Faamatalaga

• E faapefea ona suia la’u amio pe afai ou te popole tele i le auala e silasila mai ai le Atua ia te au?

  Fatu se Faamatalaga

“Ai se agasala mai ia te au, o ia lena e te faamasino i ai e tusa ma agasala ua faia e ia; afai foi e faaali e ia ana agasala i luma o oe ma a’u, ma ua salamo faamaoni i lona loto, o ia lena e te faamagaloina, ou te faamagaloina foi o ia” (Mosaea 26:29).

Pe a ta’uta’u atu a tatou agasala, e tatau ona tatou faamaoni a’ia’i.

• Ia mafaufau pe faapefea ona faavaivaia le faamaoni o au taumafaiga ona o le le ta’uta’uina atu o nisi o vaega o au agasala. O le a se vaega o la’u suesuega po o la’u iloiloga, pe afai e i ai, pe o faaosoosoina a’u e nana?

  Fatu se Faamatalaga

• O le a se mea ou te maua i le nanaina o lenei vaega o la’u iloiloga? O le a sa’u mea o le a leiloa?

  Fatu se Faamatalaga

• E mafai faapefea e Iesu Keriso ona faamanuiaina lo’u olaga pe afai ou te ta’uta’u atu muamua mea e sili ona faigata ma tuuina atu ia te Ia?

  Fatu se Faamatalaga

“O lenei lava tausaga ua faailoatinoina ai ia te i latou lo latou sese ma ua latou faaali atu a latou agasala” (3 Nifae 1:25).

• O lenei fuaiupu o se faataitaiga o tagata sa le faatuatuai le ta’uta’u atu o o latou sese i le taimi lava na latou iloa ai. O a penefiti o le ta’uta’u atu o a’u agasala i le taimi lava ou te iloaina ai?

  Fatu se Faamatalaga

• O a ni aafiaga leaga pe afai ou te faatuai ona ta’uta’u atu a’u agasala?

  Fatu se Faamatalaga

“Ana le aoga ia te oe po ua ou le tautala i au agasala e faaatuatuvale ai lou loto” (Alema 39:7).

Atonu e fai mai nisi tagata o laasaga 4 ma le 5 e taulai tele atu i mea le lelei ma na o le faaopoopo atu i le atuatuvale o le toe faaleleia. I lenei fuaiupu, ua tatou aoao ai o le nofouta i o tatou vaivaiga ma le feagai ai ma a tatou mea sese o le a fesoasoani ia i tatou i le toe faaleleia.

• O a ni ala e mafai e le laasaga 4 ma le 5 ona aveese lo’u atuatuvale ae aumaia ia te a’u le toafilemu sili atu?

  Fatu se Faamatalaga

O le mea lenei e mafai ai ona outou iloa pe afai ua salamo se tagata i ana agasala—faauta, e ta’uta’u atu e ia ma lafoaia” (Mataupu Faavae ma Feagaiga 58:43).

• “O le lafoaia o se mea o lona uiga o le tiai ese po o le matuai lafoai atoa. E faapefea e le ta’uta’u atu o a’u agasala ona faaalia ai lo’u manao e lafoai o’u ala tuai?

  Fatu se Faamatalaga