“Laasaga 7: Ole atu ma le lotomaualalo i le Tama Faalelagi e aveese o tatou vaivaiga,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 7,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 7: Ole atu ma le lotomaualalo i le Tama Faalelagi e aveese o tatou vaivaiga.

4:19

Mataupu Faavae Autu: Lotomaualalo

O laasaga uma na muamua atu ua saunia ai i tatou mo lenei laasaga. O le laasaga 1 na fesoasoani ia i matou ia lotomaualalo ma tautino atu leai so matou malosiaga i o matou vaisu. O laasaga 2 ma le 3 na fesoasoani ia i matou ia lava le faatuatua ma le talitonuga i le Alii e ole atu ai ia te Ia mo se fesoasoani. O a matou suesuega po o iloiloga mai le laasaga 4 na fesoasoani ia i matou e vaai manino atili ai i o matou uiga ma amioga. O le galueaiina o le laasaga 5 na faaalia ai lo matou lototele e faamaoni ai i le Atua, i matou lava, ma se isi tagata. O le laasaga 6 na fesoasoani ia i matou ia saunia ma naunau e lafoai o matou vaivaiga. Ua tatou saunia nei e fai le laasaga 7. Tatou te taulai atu i le “FAAPEFEA” o le galueaiina o laasaga taitasi: ia lotomaualalo, tatala le mafaufau, ma naunau.

E manaomia e laasaga uma le lotomaualalo, ae sili atu le matua faaalia manino i le laasaga 7: “Ia ole atu ma le lotomaualalo i le Tama Faalelagi e aveese o tatou vaivaiga.” A o matou galulue i nai laasaga muamua i le toe faaleleia, sa matou aoaoina e tusa lava po o le a le malosi matou te taumafai ai na o i matou, e le mafai ona matou suia pe maua se toe faaleleia e aunoa ma le fesoasoani a le Alii. E leai se eseesega o lenei laasaga. Faamaoni i le Faatuatua e faamatalaina ai le lotomaualalo faapenei: “O le lotomaualalo o le iloa lea ma le agaga faafetai o lou faalagolago i le Alii—ia malamalama o loo e manaomia pea Lana lagolago” (Faamaoni i le Faatuatua: O Se Tusitaiala o le Talalelei [2004],86).

O nisi o i matou na amata ona toe foi i o matou ala tuai ma taumafai e sui e i matou lava. Ae a o matou iloaina le tele o o matou sese ma vaivaiga, sa matou aoaoina ai e tatau ona matou faalagolago i le Alii mo Lana fesoasoani e suia ai. I le galuaiina o le laasaga 7, sa le’i faapafalaina i matou mai le galuega lea sa tatau ona matou faia. Sa tatau ona matou onosai ma “fetaomi atu i luma ma le faamaoni ia Keriso” (2 Nifae 31:20). Sa matou manaomia ni faamanatu faifai pea e liliu atu ai i le Atua ma ole atu mo Lana fesoasoani.

Sa matou mafaufau pe faapefea ona tupu nei vavega mo i matou. Sa eseese mo i tatou taitoatasi, ae e i ai se tulaga e tutusa ai. E seasea lava ona oo tagata i ni suiga matautia ma faafuasei i o latou uiga; o le faagasologa faifai malie o laasaga 6 ma le 7 e masani lava ona oo mai i le ala na faamatalaina e Elder David A. Bednar:

“O i tatou o tagata o le Ekalesia e foliga e faamamafaina tele faaaliga faaleagaga ofoofogia ma le matautia, tatou te ono le patipatia ai ma oo ai lava ina le amanaiaina le mamanu masani e faataunuuina ai e le Agaga Paia Lana galuega, … [lea e ala] i uunaiga iti ma”(“O Le Agaga o Faaaliga,” Liahona, Me 2011, 88).

Pe a tatou filifili e gauai atu i le Atua ma faaogatusa o tatou loto ma Lona finagalo, o o tatou aso e tumu i taimi laiti lea e valaaulia ai e Ia i tatou e tutu i a tatou tali tuai, ma le tali atu ae faalagolago i Lona mana e fesoasoani ai, siitia ai, ma alofa. Na aoao mai Sister Rebecca L. Craven: “Aua le lotovaivai. O le suia, o se faagasologa i le olaga atoa. … I a tatou tauiviga e suia, e onosai le Alii ia i tatou” (“Tuu ma Oe le Sui,” Liahona, Nov. 2020, 59).

Pe o o tatou vaisu o le ava malosi, fualaau faasaina, taaloga faitupe, tuinanau faalefeusuaiga, mamanu o le taumafa e faatamaia ai le tagata lava ia, soona faaalu ma le le mafaufau, po o isi amioga ua fai ma vaisu po o mea ua tatou faaaogaina e taulima ai le atuatuvale i le olaga, o le a “fesoasoani mai le Faaola ia i tatou e tusa ma [o tatou] vaivaiga” (Alema 7:12). A o tatou naunau e sui e ala i le o mai ia Iesu Keriso, tatou te iloaina Lona mana faamalolo.

A o galulue i lenei laasaga, o le toatele o i matou na iloa ai e tatau ona matou tauivi e tetee ese le faanaunauga e lagona le maasiasi. O le vaai atu i o matou vaivaiga na aumaia ai lagona e le lava lo matou lelei pe ua matou toe toilalo foi. Ae o le galueaiina o laasaga ma le o mai ia Keriso na tuuina mai ai ia i matou se auala fou e vaai ai ia i matou lava. Sa matou lagonaina le alofa o le Atua mo i matou o Ona atalii ma afafine pele. O lenei alofa na fesoasoani ia i matou e tetee ese atu ai lagona o le maasiasi ma le alofa ia i matou lava.

Sa amata ona matou vaai i o matou faaletonu ma vaivaiga o ni avanoa e ole atu ai ma le lotomaualalo mo le fesoasoani a le Atua e agai ai i luma i la matou malaga o le toe faaleleia.

Laasaga o Faatinoga

O se polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o le “galueaiina o laasaga.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e manaomia e fai ai le isi laasaga i lo tatou toe faaleleia.

Ole atu i le Atua e fai mea e le mafai ona tatou faia mo i tatou lava

E faapefea ona tatou ola i le laasaga 7 i aso taitasi? Tatou te tutu i le ao i taimi e toe foi mai ai lo tatou loto faaletagata lava ia, pe o le taimi foi tatou te vaaia ai o tatou vaivaiga. I nei taimi, tatou te faamatuu atu ai ma faalogo. Tatou te manatua e leai so tatou malosiaga e suia ai i tatou lava e aunoa ma se fesoasoani, ma tatou te talitonu e mafai e le Alii ona suia i tatou. Ona tatou agai lea i luma ma faalagolago ia te Ia. Tatou te lafoaia mea e le mafai ona tatou faia, ma tatou te ole atu i le Atua e fesoasoani mai ia i tatou.

E mana’omia ai le liliu atu i le Atua i le tatalo. “E tofu i tatou taitoatasi ma faafitauli e le mafai ona tatou foia ma vaivaiga e le mafai ona tatou faatoilaloina e aunoa ma le aapa atu e ala i le tatalo i se punavai maualuga atu o le malosi” (James E. Faust, “O Le Maea Faaola o le Tatalo,” Liahona, Iulai 2002, 59).

Pe a tatou tatalo ma le anoa ma le faamoemoe, e mafai ona tatou maua le alofa o le Atua. Pe a tatou faatagaina i tatou lava i se taimi ma se nofoaga filemu e fesootai ai ma le paia, e mafai ona tatou fausia ma faamalolosia a tatou sootaga ma le Atua. E ala i le tausia o se tatalo faigofie i o tatou loto, e pei o le, “Le Alii e, o le a se mea e te finagalo ou te faia?” (Galuega 9:6) po o le “Ia faia lou finagalo” (Mataupu Faavae ma Feagaiga 109:44), o le a tatou manatua pea lo tatou faalagolago atoa i le Alii. O lo tatou alofa i le Atua ma Lona alofa mo i tatou o le a fesoasoani ia i tatou e fausia ai se sootaga lea e mafai ona tatou tuuina atu ai i tatou lava.

Suesue i tatalo o le faamanatuga.

O tatalo o le faamanatuga o ni faailoaga matagofie ia o le lotomaualalo ma le faamoemoe i tua atu o le laasaga 7. Ua tatou maua le avanoa e aai ai ma feinu i le faamanatuga i vaiaso taitasi ma mafaufau loloto i upu o tatalo o le faamanatuga.

Matou te fautuaina le faitauina o le Moronae 4:3; 5:2 ma faaaoga ma le lotomaualalo nei upu paia i lou lava leo e faapea: “Le Atua e, le Tama Faavavau, [ou te] ole atu ia te oe i le suafa o lou Alo, o Iesu Keriso, ia e faamanuia ma faapaiaina lenei areto i [lo’u agaga a o o’u] ‘ai ai; ina ia [ou] ‘ai e faamanatu ai le tino o lou Alo, ma molimau atu ia te oe, le Atua e, le Tama Faavavau, ua [ou] naunau e tauave i [o’u] luga le suafa o lou Alo, ma manatua pea o ia, ma tausi i ana poloaiga na ia tuuina mai ia te [au], ina ia [ou] maua pea lona Agaga e faatasi ma [au]” (Moronae 4:3).

A tatou mafaufau i tatalo o le faamanatuga i lenei auala, e mafai ona tatou faalatalata atili atu i le Faaola ma se loto momomo ma se agaga salamo. A tatou mafaufau i o tatou vaivaiga po o soo se mea sese atonu na tatou faia, ona mafai lea ona liliu atu o tatou loto ia te Ia. E mafai ona tatou ole atu ia te Ia e fesoasoani mai ia i tatou ia salamo, ia lelei atili, ma aveese nei vaivaiga.

Suesue ma Malamalama

O mau o loo mulimuli mai ma saunoaga mai taitai o le Ekalesia atonu e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. E tatau ona tatou manatua ia faamaoni ma patino i a tatou tusitusiga ina ia tele se aoga mo i tatou.

Ua lava ma totoe Lona alofa tunoa.

“Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga, ina ia faalotomaualalo ai i latou; ma ua lava lo’u alofa tunoa mo tagata uma o e e latou te faalotomaualaloina i latou lava i o’u luma; aua afai latou te faalotomaualaloina i latou lava i o’u luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27).

O lo tatou i ai i le tino ma le le atoatoa, ua mafai ai ona tatou oo i le tele o vaivaiga. I lenei fuaiupu, o loo faamalamalama mai ai e le Alii Lana mafuaaga ua faataga ai tatou ia o’o i le faaletino ma fetaiai ma ia vaivaiga e fesoasoani ai ia tatou lotomaualalo. Ae ia matau, tatou te filifili e faamaulalo i tatou lava.

O le a le uiga ia te au o le fasifuaitau “ua lava lo’u alofa tunoa mo tagata uma”?
Pe o ia te au le faatuatua ua lava le alofa tunoa o le Alii mo au?
O le a le uiga o le faamaualalo o a’u lava i luma o le Alii?
Lisi nisi o ou vaivaiga. Tusi ai i autafa ia malosiaga e ono avea ai i latou pe a outou mai ia Keriso.

Filifili e lotomaualalo.

“E pei ona ou fai atu ia te outou, talu ai ona ua faamalosia outou ia outou lotomaualalalo ua outou manuia ai, pe tou te le manatu ea ua sili atu le manuia o i latou o e ua latou faalotomaualalaloina moni i latou lava ona o le afioga?” (Alema 32:14).

O le toatele o i matou sa o mai i fonotaga mo le toe faaleleia ona o le le mautonu, sa faaosofia i matou e taunuuga o mea ua fai ma vaisu. Sa faamalosia i matou ia lotomaualalo. Peita’i, o le lotomaualalo o loo faamatalaina i lenei laasaga o se mea e tuu i le faitalia. O le taunuuga o a tatou lava fililifiga e faamaulalo i tatou lava.

Na faapefea ona suia o’u lagona o le lotomaualalo talu mai ona amata lo’u toe faaleleia?

Faatumulia i le olioli

“Na latou iloa foi i latou lava i o latou tuinanau, ua le tusa i latou ma le efuefu o le eleele. Ma sa latou alalaga uma leotele i le leo e tasi, fai mai: E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamāina o matou loto; ona ua matou talitonu ia Iesu Keriso, le Alo o le Atua, o lē na foafoaina le lagi ma le fogeleele, ma mea uma lava; o lē o le a afio mai i lalo i totonu o le fanauga a tagata.

“Ma ua oo ina ua uma ona latou fai atu nei upu, ua oo mai le Agaga o le Atua ia te i latou, ma ua faatumuina i latou i le olioli, ona ua maua le faamagaloina o a latou agasala, ma ua filemu i o latou loto fuatiaifo ona o lo latou faatuatua tele ia Iesu Keriso, o le afio mai” (Mosaea 4:2–3).

Sa faia e le nuu o le Tupu o Peniamina le ituaiga tatalo sa matou faia a o matou galulue i le laasaga 7. Sa latou lagona le toafilemu ma le olioli ina ua oo ifo le Agaga o le Alii i o latou luga ma tuuina atu ia i latou le faamagaloga o a latou agasala.

O a ni aafiaga na ou maua ina ua ou lagonaina le filemu ma le olioli?
O le a se lagona o le mauaina o le filemu ma le olioli i lo’u olaga i aso uma?

Usitai i poloaiga

“Ina tumau ia o outou ia te a’u, o a’u foi ia te outou. Faapei o le lala e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau ia te a’u.

“O a’u nei o le vine, o la outou: O lē tumau ia te au, ma a’u ia te ia, o ia lava e fua tele mai; aua e le mafaia e outou ona fai o se mea e tasi pe a a’u le i ai.

“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.

“Ua ou fai atu nei mea ia te outou, ina ia tumau ai loʼu olioli ia te outou, ma ia atoatoa foi lo outou olioli” (Ioane 15:4–5, 10–11).

O le a le uiga ia te au afai ou te tausia poloaiga a le Faaola, “[O le a] ou tumau i [Lona] alofa?” (fuaiupu 10).
E tusa ai ma nei fuaiupu, o a nisi o faamanuiaga folafolaina o le tumau ai ia te Ia?
O a ni ou lagona i le taimi nei i le tausia o poloaiga?
E faapefea ona avea le tausia o poloaiga o se faailoaga o lo’u alofa i le Atua?

alofa o le Atua

“Pe a tatou faamuamua le Atua, o le a tatitia mea uma i o latou tulaga e tatau ai pe aveesea foi mai o tatou olaga. O lo tatou alolofa i le Alii o le a pulea mea o loo manaomia mai lo tatou alofa, o mea o loo manaomia mai ai o tatou taimi, o mea tatou te fiafia i ai o loo tuliloaina, ma le faatulagaga o a tatou mea e faamuamua” (Ezra Taft Benson, “O Le Poloaiga Sili—Alofa i le Atua,” Ensign, May 1988, 4).

O le iloa o le alofa mutimutivale ma le agalelei o le Atua e oo mai nei, atonu ua amata ona tatou lagona ai le alofa o le Atua—ia te la ma le alofa mai ia te la.

Pe ua ou lagonaina ea le faateleina o le alofa a o ou galue i laasaga? Afai o lea, aisea?
Na faapefea ona fesoasoani le galueaiina o le laasaga 7 ia te au e toe faaogatusa ai mea ou te faamuamua ma faamuamua le Atua i lo’u olaga?

Tauave i o tatou lava luga le suafa o Keriso

“Ma o lenei, ona o le feagaiga ua outou faia, o le a taʼua ai outou o le fanau a Keriso, o ona atalii, ma ona afafine; …

“… Ou te manao ai ia outou ave i o outou luga le suafa o Keriso, outou uma ua ulu atu i le feagaiga a le Atua o le a outou usiusitai e oo i le iuga o o outou ola. …

“O le na te faia nei mea, e maua o ia i le itu taumatau o le Atua, aua e iloa e ia le igoa e valaauina ai o ia, aua e valaauina o ia i le suafa o Kersio” (Mosaea 5:7–9).

O le a le uiga o le valaauina i le suafa o Keriso ma fai ma Ona sui?
O le a se mea e tatau ona ou faia ina ia maua ai i le itu taumatau o le Atua?
O le a le mea ou te osifeagaiga e fai pe a papatisoina a’u ma ou ‘ai ma inu i le faamanatuga? (Tagai Mosaea 5:7–9; 18:8–10, 13; Mataupu Faavae ma Feagaiga 20:77, 79.)
O le a so’u lagona pe a ou mafaufau i le naunautaiga o le Faaola e tuuina mai ia te au Lona suafa e faafesuiai ma le osia o se feagaiga ma Ia e usiusitai ma auauna atu ia te Ia, lea e aofia ai le lafoaia o o’u vaivaiga?

Faamatuu atu o tatou vaivaiga

“O se tapuaiga e le manaomia le ositaulagaina o mea uma, e le i ai lava se mana e lava e maua ai le faatuatua e manaomia mo le ola ma le faaolataga” (Lectures on Faith [1985], 69).

O nisi e faitau i nei upu ma manatu o “mea uma” e faatatau i meatotino uma. E faapefea i le faamatuuina atu o o’u vaivaiga uma i le Alii, ona faateleina lo’u malamalama i le uiga o le ositaulagaina o mea uma?