Iloaina ma le Taliaina o le Tagata Fou

O se tagata fou o se tagata e fou i fonotaga mo le toe faaleleia. E masani lava o ia o se tagata i le amataga o le suiga, o se tagata e toe foi mai pe a toe oo mai, po o se uo po o se tagata o le aiga o se tasi o loo tauivi ma vaisu. Soo se tasi tatou te le iloaina atonu o se tagata fou, ma ona o nai uluai fonotaga e auai ai tagata fou e masani ona taua tele, e faapitoa lava le taua o le taumafai ia lagona e nei tagata le toafimalie ma le taliaina.

O tagata fou e masani ona lē mautonu ma fefefe. Manatua e manaomia le lototele tele mo tagata taitoatasi e tautino atu ai o loo latou auai i amioga faataumaoi, e le mafai ona pulea o latou olaga, ma latou te manaomia le fesoasoani. E manaomia ai foi le lototele mo uo po o tagata o le aiga e talanoa ai e uiga i aafiaga o vaisu i olaga o e pele ia i latou ma i o latou lava olaga. O la tatou sini o le fesoasoani lea i tagata fou e mananao e toe foi mai.

Ua ia i tatou le tiutetauave e fatu ai se siosiomaga talileleia, taliaina a o lei faia, i le taimi, ma pe a maea fonotaga taitasi. Ia talitonu o le a taialaina e le Agaga tagata fou i le faagasologa o suiga. Ia manatua o tagata fou e masani ona lagona le lofituina, o lea ia alofa ma agamalu i lau auala. O le alofa, lagolago, ma le faamalosiauga o elemene taua ia o le lagonaina o le taliaina ma le faaaofia ai.

Ua tatou mauaina le taitaiga mai le Ekalesia e faapea, o sauniga o le toe faaleleia e mo i latou e 18 tausaga ma matutua atu. Afai e i lalo ifo o le 18 tausaga le tagata, fautuaina i latou e feutagai ma o latou matua, epikopo, ma le soifua maloloina faalemafaufau po o le tagata e tuuina atu le soifua maloloina faaletino mo isi filifiliga e ono faamaonia le aoga. Afai latou te mananao i se faamalamalamaga auiliili atu, fautuaina i latou e faafesootai le pule o le ofisa o le Tautua mo Aiga i le lotoifale. A uma ona e faailoa atu ia i latou le tulafono, afai e faaauau pea ona latou auai, aua le toe faamanatu atua ia i latou le tulafono ma aua nei faia se mea e faamalosia ai le tulafono.

E ono aoga fautuaga nei a o e aapa atu i tagata fou a o lei faia ma pe a uma fonotaga:

1. Pe a faafeiloai atu i se tasi e te le iloaina, faailoa atu oe lava ma fesili atu pe na auai muamua o ia i se fonotaga o le toe faaleleia.

2. Faamautinoa atu i tagata fou ua latou i ai i se nofoaga saogalemu. Faamalamalama atu tatou te mulimuli i le mataupu faavae o le le faalauaiteleina ma e na o lo latou faaaogaina lava o o latou igoa muamua. Ia faailoa atu fo’i iā i latou, afai latou te lē fiafia e faitau pe faasoa i fonotaga, e mafai ona latou faalogologo.

3. Ia tuu atu i tagata fou e faasoa mai na o mea latou te mananao i ai. Ia iloa e masani ona latou lagona le le mautonu i le faamatala atu o le mafuaaga ua latou auai ai i fonotaga.

4. Fautua atu i tagata fou e faalogologo mo mea e tutusa ai i latou ma isi tagata auai. O tagata fou o le a lagonaina le naunau e toe foi i fonotaga pe a mafai ona latou fesootai atu ia i latou o loo faasoa atu. Faamalamalama atu ona o a tatou fonotaga e tatala atu i tagata taitoatasi o e mafatia i ituaiga eseese o amioga faataumaoi, atonu e le tutusa aafiaga o tagata o le vaega i taimi uma ae e masani ona oo i lagona faapena, e pei foi o i latou o e ua aafia o latou olaga i filifiliga po o amioga a isi. Valaaulia tagata fou e nonofo pe a uma le fonotaga pe afai e i ai ni a latou fesili.

5. Ia talitonu o le a malamalama tagata fou i le polokalama e aunoa ma le faalogo i vaega uma o le polokalama. Faaali atu i tagata fou le Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia po o le Taiala Lagolago: Fesoasoani mo Taitoalua ma Aiga o i Latou o loo Toe Faaleleia ma fautuaina i latou e faaaoga nei punaoa (o loo maua i le Potutusi o le Talalelei i le vaega o le “Vaisu” o le Fesoasoani i le Olaga). Faamalamalama atu i tagata fou e faapea, e ala i le faalogo i le Agaga, auai i sauniga, ma suesue i le taiala, atonu o le a mafai ai ona latou malamalama lelei ma faaaoga mataupu faavae ma faiga masani e taitai atu ai i suiga.

6. Faailoa atu tagata fou i le tagata e faatautaia. E manatua e tagata e faatautaia le tulaga o le sau i le uluai fonotaga. O i latou o ni faataitaiga i tagata auai ma e mafai ona molimau patino atu i le auala na aumaia ai e le polokalama suiga i o latou olaga.

7. Afai e i ai ni faafitauli e faatatau i tagata fou o loo faasoa mai o latou aafiaga, ia agamalu i le mea e mafai ai i lau tali. O le tele o faafitauli ma fesili e sili atu ona lelei le talanoaina pe a uma le fonotaga nai lo le taimi o le fonotaga. A o faagasolo taimi, o le a malamalama le tagata fou i le feavata’i o le fonotaga.

8. Faasoa atu i tagata fou o e o ni tagata o le aiga po o e pele ia i latou o loo tauivi ma le faaaogaina o ponokalafi po o le faaaogaina o fualaau faasaina, o loo maua fonotaga a le vaega lagolago a le toalua ma aiga.

9. A uma le fonotaga, faafetai patino lava i tagata fou ua o mai mo le auai.

10. Manatua o tagata fou o se faamanuiaga lea i le vaega. O tagata fou e tuuina atu avanoa faifai pea e auauna atu ai, lagolago, ma aoao mai le tasi i le isi.