“Laasaga 3: Filifili e liliu atu o tatou loto ma o tatou olaga i le tausiga a le Atua, le Tama Faavavau, ma Lona Alo, o Iesu Keriso,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 3,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 3: Filifili e liliu atu o tatou loto ma o tatou olaga i le tausiga a le Atua le Tama Faavavau, ma Lona Alo o Iesu Keriso.

5:29

Mataupu Faavae Autu: Faalagolago i le Atua

Laasaga 3 o le faiga o faaiuga. I uluai laasaga e lua, sa matou faailoa ai mea e mafai ona matou faia mo i matou lava ma mea sa matou manaomia e faia e le Atua mo i matou. I le laasaga 3, sa folasia mai ai ia i matou le mea e tasi e mafai ona matou faia mo le Atua. E mafai ona matou filifili e tatala atu i matou lava ia te Ia ma tuu atu o matou olaga atoa—taimi ua tuanai, taimi nei ma le lumanai—ma o matou loto ia te Ia. O le laasaga 3 o se faatinoga o le faitalia. O le filifiliga aupito sili lea ona taua tatou te faia i lenei olaga.

O le saunoaga lenei a Elder Neal A. Maxwell e uiga i lenei faaiuga aupito taua: “O le gauai atu o le loto o se tagata, o le mea moni o le mea tulaga ese lea e tasi e tatau ona tatou tuuina i luga o le fatafaitaulaga a le Atua. O se aoaoga faavae faigata, ae e moni. O isi mea e tele tatou te tuuina atu i le Atua, e tusa lava pe o le a le mananaia ia i tatou, o mea moni ia ua uma ona Ia tuuina mai ia i tatou, ma ua Ia nonoina mai ia i tatou. Ae a amata ona gauai atu i tatou lava e ala i le tuu o o tatou loto ae fai le finagalo o le Atua, ua tatou tuuina atu moni se mea ia te Ia” (“Insights from My Life,” Ensign, Aug. 2000, 9).

Sa faamatala e Peresitene Boyd K. Packer lana filifiliga e tuuina atu lona loto i le Atua ma le saolotoga na tuuina atu ia te ia e lena faaiuga: “Atonu o le mea aupito sili na maua i lo’u olaga, e aunoa ma se fesiligia o le tautinoga silisili, na oo mai ina ua iu ina ou maua le talitonuga i le Atua o le a ou nonoina atu pe tuuina atu lo’u faitalia ia te ia—e aunoa ma le faamalosia po o le uunaiga. … I se isi itu, … o le ave o le faitalia a se tagata … ma faapea atu, ‘O le a ou faia e pei ona e faatonu mai,’ ae mulimuli ane iloa ai, o le faia faapea, ua e maua uma ai” (Obedience, Brigham Young University Speeches of the Year [Tes. 7, 1971], 4).

Ina ua matou faatoa auai i fonotaga o le toe faaleleia, atonu sa matou lagonaina le uunaia pe faamalosia foi i matou e isi ina ia i ai iina. Ae ina ia galue i le laasaga 3, sa tatau ona matou filifili e faatino mo i matou lava. Sa matou iloaina o le faia o se suiga o o matou olaga o a matou lava ia faaiuga. Sa le faatatau i mea sa mafaufau i ai pe mananao i ai o matou aiga ma uo. Sa tatau ona matou naunau e nonofo ai pea i le toe faaleleia tusa po o a manatu po o filifiliga a se isi tagata.

A o matou galulue i le laasaga 3, sa matou aoao ai faapea, o le toe faalelei, o taunuuga o taumafaiga a le Alii nai lo a matou lava. Sa Ia faia vavega ina ua matou valaauliaina o Ia i o matou olaga. Sa matou filifili e faataga le Atua e toe faaleleia ma togiola i matou. Sa tonu ia i matou e tuu atu ia te Ia e taitaia o matou olaga, ma le manatua, na Ia faamamaluina e le aunoa a matou filifiliga. Sa matou tuuina o matou ola i Ona aao ina ua matou filifili e faaauau lenei polokalama o le toe faaleleia faaleagaga.

Sa matou lagonaina le matau i mea e lei mailoa ina ua matou uia lenei Laasaga. O le a se mea o le a tupu pe a matou faamaulaloina i matou lava ma faamatuu atoa atu o matou ola ma loto i le tausiga a le Atua? Mo le toatele o i tatou, sa matuai faigata o tatou olaga ao laiti, ma sa tatou matatau i le toe vaivai e faapei o tamaiti laiti. Ona o aafiaga ua tuanai, sa matou talitonu ai o le tautino atu i le toe faaleleia e toetoe lava a le mafai. Sa matou vaaia isi tagata o solia le tele o tautinoga, ma sa tele naua foi mea sa matou solia. Ae sa tonu ia i matou e taumafai mea na fautuaina mai e a matou uo ua toe manuia: “Aua le faaaogaina. O i fonotaga. Fesili mo se fesoasoani.” O e na savalia laasaga o le toe faaleleia sa muamua atu ia i matou, na valaaulia i matou e faataitai i lenei ala fou e ola ai. Sa latou faatalitali ma le onosai mo i matou ia naunau e faaava teisi le faitotoa mo le Atua.

O loo tuuina mai foi e Iesu Keriso lea lava valaaulia: “Ou te tu i le puipui ma tuitui atu: ai se tasi e faalogo mai i lou leo, ma tatala mai le puipui, ou te ulufale atu ia te ia, ma te talisua foi ma ia” (Faaaliga 3:20).

I le taimi muamua, sa popole, ma motumotu a matou taumafaiga. Sa matou avatu pea ia Iesu Keriso lo matou faatuatuaga, ona toe aveesea mai foi lea. Sa matou popole ne’i toasa o Ia i lo matou femoumouai ma aveese ai Lana lagolago ma Lona alofa mai ia i matou. Peitai e le’i toasa o Ia.

Sa faifai malie ona matou tuu atu i le Alii e faaalia Lona mana faamalolo ma le saogalemu o le mulimuli i Ona ala. Sa tofu iloa e i matou taitoatasi ua le gata i le lafoai o le tagofia o mea ua fai ma vaisu, ae na tatau foi ona liliu atoa atu o matou loto ma olaga i le Atua. A o matou faia o lea, sa matou iloa Lona faapalepale ma le taliaina o a matou taumafaiga vaivai e gauai atu ia te Ia i mea uma.

O lo matou mafaia ona tetee atu i faaosoosoga ua taula nei i le gauai atu ma le lotomaualalo i le finagalo o le Atua. Ua faaali atu lo matou manaomia o le mana ua maua e ala i le Togiola a le Faaola, ma ua amata ona matou lagona lena mana i totonu ia i matou, ua puipuia ai i matou i se isi faaosoosoga e sosoo mai. Na matou aoao e talia le olaga i tuutuuga a le Alii.

O le gauai atu i le Atua e mafai ona faigata mo i tatou. E manaomia ai ona tatou toe tuuto atu i Lona finagalo i aso taitasi, ma i nisi taimi o itula taitasi pe mai lea taimi i lea taimi. A o tatou naunau e fai faapea, tatou te maua le alofa tunoa po o le mana e mafai ai, ona tatou faia o mea e le mafai ona tatou faia mo i tatou lava.

O le faaauau pea ona gauai atu i le finagalo o le Atua e faaitiitia ai le popolevale ma aumaia ai le uiga sili atu i o tatou olaga. E faaitiitia lo tatou ita i mea laiti sa masani ona faalavelave ia i tatou. Tatou te talia tiutetauave mo a tatou amioga. Tatou te taulimaina isi e faapei ona taulimaina ai i latou e le Faaola. E tatalaina o tatou mata, o tatou mafaufau ma o tatou loto i le mea moni e faapea, o le olaga nei e faigata ma o le a i ai pea le gafatia e aumaia ai ia i tatou le faanoanoa ma le le fiafia faapea foi le fiafia.

O aso taitasi tatou te faafouina ai la tatou tautinoga e gauai atu i le finagalo o le Atua. O le uiga lea o le faamatalaga a le toatele pe a fai mai, “E tasi le aso i le taimi.” Ua matou filifili e lafoai le loto faapito ma le sailia o le tagata lava ia lea sa avea ma pogai o a matou vaisu. Ma ua matou filifili e olioli i se isi aso o le toafilemu ma le malosi lea e oo mai i le faalagolago i le Atua ma Lona agalelei, mana, ma le alofa.

O laasaga 1, 2, ma le 3 e fesoasoani ia i tatou ia malamalama ai i le auala e faaaoga ai le faatuatua. O se tasi o faailoga sili ona manino o le galueaiina o le laasaga 3 o le, ua lava lo tatou naunau e faatuatuaina le Atua e faaauau ai i le isi laasaga.

Laasaga o Faatinoga

O le polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o le “galueaiina o laasaga.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e manaomia e fai ai le isi laasaga i lo tatou toe faaleleia.

Filifili e faatuatuaina ma usiusitai i le Atua

O upu nei—na sii mai le “Tatalo Toafimalie” a Reinhold Niebuhr—e mafai ona fesoasoani ia i tatou a o tatou filifili e faalagolago ma usitai i le Atua, “Le Atua e, aumai ia te au le toafimalie e talia ai mea e le mafai ona ou suia, le lototele e suia ai mea ou te mafaia, ma le poto e iloa ai eseesega.” O upu nei e ogatusa matagofie ma upu a le Perofeta o Iosefa Samita i le Mataupu Faavae ma Feagaiga 123:17: “O lea, … ia tatou faia ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai.”

E tuuina mai e le Atua ia i tatou le toafilemu pe a tatou faalagolago i Lona gafatia e fesoasoani mai ia i tatou. Tatou te talia e ui ina le mafai ona tatou pulea filifiliga ma faatinoga a isi, e mafai ona tatou filifili pe faapefea ona tatou tali atu i tulaga taitasi tatou te feagai. Tatou te filifili ma le lototele e faatuatua i lo tatou Tama oi le Lagi ma faatino ai e tusa ma Lona finagalo. Tatou te tuuina atu o tatou loto ma ola i Lana tausiga. Tatou te filifili e usiusitai ia te Ia ma tausi Ana poloaiga.

I lo matou toe faaleleia, na matou iloa ai e tatau ona matou faataita’ia soo le laasaga 3. O nisi taimi e foliga mai e manaomia ona matou toe tautino atu i taimi taitasi po o aso taitasi. E le afaina pe faafia ona matou faia. O taimi uma lava matou te faia ai, matou te lagonaina ai le fesoasoani a le Atua ma Lona alofa, ma e faamalolosia ai i matou i lo matou toe faaleleia. Sa faamanatu mai ia i matou: “O le gauai atu faaleagaga e le ausia i se minute, ae e faasolosolo malie le faaleleia, ma le laa atu mai lea faasitepu i lea faasitepu. O faasitepu e tatau ona taitasi e laasia i le taimi. … E iu o o tatou loto e mafai ona “faaumatia o tatou loto i le finagalo o le Tama” ma ua tatou “fia usitai … e pei lava ona gauai le tamaitiiti i lona tama” (tagai i le Mosaea 15:7; 3:19)” (“Consecrate Thy Performance,” Ensign, May 2002, 36).

Toe faamanatu ma toefaafou feagaiga ma le Atua

O le faatuatuaina o le Atua i mea uma e pei lava o le faaaogaina o ni matatioata fou ma le vaaia manino o mea uma. A tatou filifili e liliu atu o tatou loto i le Atua, o le a amata ona tatou maua le lagolelei ma le olioli lea e oo mai i le sailia ma le faia o le finagalo o le Tama Faalelagi. O se tasi o auala tatou te faaalia ai lo tatou naunautai e faatuatuaina le Atua o le saunia lea e taumamafa ma le agavaa i le faamanatuga.

Talanoa i lou epikopo po o le peresitene o le paranesi e uiga i mea ua fai ma vaisu ma lau filifiliga ia mulimuli i le finagalo o le Atua. Ia e faia le mea sili e auai atu i sauniga faamanatuga i vaiaso taitasi. A e tapuai, faalogologo totoa i tatalo o le faamanatuga ma mafaufau i meaalofa o loo ofoina atu mo oe e le Tama Faalelagi. Ona faafou lea o lau tautinoga e talia ma mulimuli i Lona finagalo ma lou olaga i le ‘ai ma inu i le faamanatuga pe afai e faataga oe e lou epikopo po o le peresitene o le paranesi.

A o e agai i luma le toe faaleleia o lou olaga, o le a faateleina lou manao ia faatasi ma e e faamamalu i le taulaga a le Faaola. O le a amata ona e iloa le mea moni e faapea “aua e leai lava se mea e tasi e le mafaia e le Atua” (Luka 1:37).

Suesue ma Malamalama

O mau o loo mulimuli mai ma saunoaga mai taitai o le Ekalesia e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. O lo tatou natura o le sailia lea o le filifiliga sili ona faigofie ma mālū mo le toe faaleleia. Ae ua tatou iloa nei o le faamaoni ma le patino e sili atu ona fesoasoani. A o tatou iloiloina a tatou tali i fesili nei faatasi ma a tatou tagata lagolago ma isi, tatou te vaaia manino a tatou vaaiga ma faamoemoega.

Saili ia ogatasi ma le finagalo o le Atua

“Ina faalelei ia outou ma le finagalo o le Atua, ae le o le loto o le tiapolo ma le tino, ma ia manatua pe a lelei outou ma le Atua, ua na o le alofa tunoa o le Atua e faaolaina ai outou” (2 Nifae 10:24).

O le a le uiga o le upu faalelei ?
O le a le uiga o le ola o lo’u olaga ia ogatasi ma le finagalo o le Atua?
E mafai faapefea ona ou lagonaina le mana gafatia o le Atua i lo’u olaga a o ou liliu atu ia te Ia?
O a ni o’u lagona i le faatagaina o le Atua e taitaia lo’u olaga?
O le a se mea o taofia a’u mai lo’u faatagaina o Ia e taitaia lo’u olaga?

Gauai atu i le finagalo o le Atua

“Ua oo ina faamamasagia avega na faaeeina ia Alema ma ona uso; ioe, na faamalolosia i latou e le Atua ina ia faigofie ona latou tauave a latou avega, ma sa latou gauai atu ma le loto fiafia ma le onosai i le finagalo atoa o le Alii” (Mosaea 24:15).

Semanu e mafai lava e le Atua ona aveesea avega a Alema ma lona nuu. Ae nai lo lena, sa Ia faamalosia i latou “e tauave ma le faigofie a latou avega.” Ia matau latou te lei faitio ae gauai atu ma le fiafia ma le onosai i le finagalo o le Atua. Mafaufau i le lotomaualalo e manaomia e naunau ai e faamama faasolosolo malie ai se avega nai lo le taimi lava lena.

O le a le uiga o le gauai atu i le Atua?
E faapefea ona ou gauai atu?
O le a so’u lagona e uiga i le gauai atu ma le naunautai ma le onosai i le taimi faatulagaina a le Atua?
E mafai faapefea ona ou maua le lototele e taumafai ai pea e mulimuli i Lona finagalo?

Anapogi ma tatalo

“Sa latou anapogi ma tatalo soo, ma ua tauau ina faamaulalo atili ai i latou ma ua tauau ina mausali atili i le faatuatua ia Keriso, e oo i le faatumuina o latou loto i le olioli, ma ua faamafanafanaina, ioe, e oo i le faamamaina ma le faapaiaina o latou loto; ua oo mai lea faapaiaina ona ua latou tuuina atu o latou loto i le Atua” (Helamana 3:35).

Ua faamatala i lenei fuaiupu se nuu na faamatuu atu o latou loto i le Atua. E mafai faapefea e le anapogi ona faamalosia a’u e faamatuu atu lo’u loto i le Atua ma aluese ai mai mea ua fai ma vaisu?
Pe o le a ou tautino atu ea e tatalo i le taimi o faaosoosoga mo le lotomaualalo ma le faatuatua ia Keriso? Aisea pe aisea foi e leai ai?
O le a le malosi o lo’u naunautaiga e faamatuu atu lo’u loto i le Atua nai lo le faia o vaisu?

Ia faalotomaualaloina i tatou lava i luma o le Atua.

“Ae faauta, na ia laveai ia te i latou, ina ua faamaulaloina i latou e i latou lava i ona luma; aua foi na latou tagi malosi ia te ia, na ia laveaiina ai i latou ai le nofopologa; ma ua faapea ona galue le Atua ma lona mana i mea uma i le fanauga a tagata, o loo faaloaloa atu le aao o le alofa ia te i latou uma o e faalagolago ia te ia” (Mosaea 29:20).

O le faalotomaualaloina o i tatou lava o se faaiuga. Atonu e tofotofoina i tatou e talitonu faapea, e ui lava ina sa fesoasoani le Atua i isi, o le a Ia le fesoasoani ia te oe ona ua e loto vaivai ma leai sou faamoemoe. E mafai ona tatou iloa lelei lea ituaiga o pepelo. O le mea moni, o i tatou o fanau a le Atua.

E faapefea ona fesoasoani lenei malamalama ia te au e faamaualalo ai au lava ma saili le fesoasoani a le Atua?
O a isi manatu ma talitonuga sese e uiga i le Atua ma e uiga ia te au ua taofia ai au mai le tagi malosi atu i le Atua mo le laveaiga mai le pologa?

Filifili e faalagolago i le Atua

“O lou manao ia outou faamaulalo, ma ia gauai ma le agamalu ia ganagofie, ia tumau i le onosai ma le faapalepale, ia faatatau mea uma, ia filifili e le aunoa i le tausiga o poloaiga a le Atua, ia faatoga atu foi i mea uma ua matitiva ai outou i le faaleagaga atoa ma le faaletino, ma ia avatu le faafetai e le aunoa i le Atua i mea uma ua outou maua” (Alema 7:23).

O le faatuatuaina o le Atua o se filifiliga. E tupu le toe faaleleia e ala i le mana o le Atua, ae seiloga e uma ona e filifili e gauai atu i Lona finagalo. O la tatou faaiuga la e tatalaina ai avanoa mo Lona mana e tafe mai i o tatou olaga. O loo faamatala mai i lenei mau uiga maualuga e manaomia ona tatou faamatuu atu o tatou ola ma loto i le tausiga a le Atua.

O le fea o nei uiga e le o ia te au?
O ai e mafai ona fesoasoani ia te au e atiina ae uiga lelei ou te le o maua?
O le fea uiga lelei e mafai ona ou galue ai nei?
O le a se mea e mafai ona ou faia nei e amata ai ona atiina ae nei uiga lelei?

Avea o se tamaitiiti

“Aua o le tagata o le lalolagi o le ita i le Atua, ma ua faapea talu le pau o Atamu, e faapea foi e oo i le faavavau faavavau lava. Ae afai e gauai o ia i galuega alofa a le Agaga Paia, ma ua tuu ese le tagata o le agasala, ma ua avea o ia ma tagata amiotonu ona o le Togiola a Keriso le Alii; ma ua avea foi o ia e pei o le tamaitiiti, ua fia usiusitai, ma agamalu, ma faamaulalo, ma onosai, ma ua tumu i le alofa ma le fia gauai i mea uma ua silafia e le Atua e tatau ona faatiga ai o ia, e pei lava ona gauai le tamaitiiti i lona tama” (Mosaea 3:19).

E toatele i tatou na i ai aafiaga i faiga faalealofa mai matua po o e sa vaaia, ma o le avea la “faapei o se tamaitiiti” e faigata, atonu foi e tau faamatau.

Pe o le tulaga ea lea mo a’u? Pe o i ai ni o’u faafitauli e le’i foiaina ma se matua?
O le a se mea e mafai ona ou faia e tuueseese ai o’u lagona e uiga i o’u matua mai o’u lagona e uiga i le Atua?

Talanoa ma le Atua

“Ona tootuli ai lea o [Iesu] ua tatalo, ua faapea atu, Lou Tama e, a e finagalo i ai, ia e aveese lenei ipu ia te au: ae aua le faia lo’u loto, a o lou finagalo” (Luka 22:41–42).

I lenei tatalo, sa faaalia e le Faaola Lona finagalo naunau e gauai atoa atu i le Tama. Sa la faaali atu Ona manaoga ona Ia faia lea o le finagalo o Lona Tama. O se faamanuiaga le mafai ona ta’u atu i le Atua o o tatou lagona.

E faapefea e le iloaina e malamalama le Tama Faalelagi i lo’u fefe, tiga, po o soo se mea lava ou te lagonaina ona fesoasoani ia te au e fai atu ma le faamaoni, “Ia faia lou finagalo”?