“Laasaga 10: Faaauau pea le faia o lau lava suesuega, ma afai ua tatou sese, ta’utino loa lava,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 10,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 10: Faaauau pea le faia o lau lava suesuega, ma afai ua tatou sese, ta’utino loa lava.

4:45

Mataupu Faavae Autu: Tali Atu i Aso Taitasi

O le laasaga 10 e fesoasoani ia i tatou e agai ai i luma i lo tatou olaga fou, ma le mafaufau faaleagaga. E faatatau i le faamasinoina o i tatou lava i aso uma e ala i le iloiloga faaletagata lava ia, taliaina o mea ua tatou maua, ma salamo loa lava. Tatou te le atoatoa ma o le a faaauau pea ona faia mea sese i o tatou olaga faapea foi ma lo tatou toe faaleleia. Atonu e popole nisi o i tatou e le mafai ona tatou agai i luma i lo tatou toe faaleleia sei vagana ua tatou faamaeaina atoatoa laasaga taitasi pe ola e aunoa ma ni mea sese. O le laasaga 10 e puipuia ai i tatou mai le mamafatu o le ia ola atoatoa. Ua faamanatu mai ia i tatou tatou te faaauau pea ona manaomia le Alii a o tatou agai i luma i lo tatou toe faaleleia.

I le Tusi a Mamona, na aoao mai ai Alema e faapea, o se suiga tele o le loto e manaomia ai le faatuatua i le Togiola ma le Toetu o Keriso (tagai Alema 5:14–15). I le faaaogaina o le vaaiga faataitai o le Aso Faamasino ma le tuuina atu o faataitaiga e tele o fesili e mafai ona tatou fesili ifo ai ia i tatou lava, na faamamafa mai ai e Alema le matafaioi autu o le iloiloga faamaoni o le tagata lava ia i le taliaina e i tatou lava i le mana togiola o Keriso. E mafai ona tatou faaaogaina lenei mataupu faavae i le faia o fesili sailiili lea na fautuaina mai e Alema e uiga i o tatou lagona, mafaufauga, faamoemoega ma amioga. O le iloiloga patino i aso taitasi ma le fesoasoani togiola a le Alii e mafai ona taofia ai i tatou mai le see atu i le faafitia, faamalieina, ma le toe oo mai.

O le faagasologa ofoofogia o le toe faaleleia e faatatau i le faatagaina o le Alii e suia o tatou mafaufauga, lagona, ma loto. O le taunuuga, o le a suia a tatou amioga. O i latou na muamua atu ia i tatou na uunaia i tatou ia vaavaai mo le faamaualuga i ona ituaiga uma ma ia avatu ma le lotomaualalo o tatou vaivaiga i le Tama Faalelagi. O le tali atu i aso taitasi e fesoasoani ia i tatou e iloa ai le taimi tatou te manaomia ai le fesoasoani ma taofia ai i tatou mai le toe foi atu i mausa tuai.

O le mea masani lava le i ai o mafaufauga ma lagona lē lelei. Pe a tatou popole pe lagona le alofa ia i tatou lava, atuatuvale, ita, tuinanau, po o le fefe, e mafai ona tatou liliu vave atu i le Tama ma ole atu ia te Ia e faamanuia i tatou i le filemu ma le vaaiga taulai. Atonu fo’i tatou te iloa o loo tatou pipiimau pea i talitonuga lē lelei. E mafai ona tatou ole atu i lo tatou Tama oi le Lagi e fesoasoani mai ia i tatou e faia se taumafaiga faamaoni e sui. I le galueaiina o le laasaga 10, tatou te le o toe lagonaina le manaomia ona tauamiotonuina, fetuunai, po o le tuuaia. O la tatou sini o le tatalaina pea o o tatou loto ma taulai atu o tatou mafaufau i le Faaola ma Lona alofa tunoa.

Tatou te galueaiina le laasaga 10 i le faia o se suesuega po o se iloiloga i aso taitasi. A o tatou fuafuaina lo tatou aso, tatou te iloiloina ma le agaga tatalo a tatou faatinoga ma faamoemoega e ono i ai: Pe ua tele naua mea ua tatou faia pe itiiti foi? O tatou tausia o tatou manaoga autu faaleagaga, faalelagona, ma faaletino? O tatou auauna atu i isi? Pe i ai ni tulaga i o tatou aso e faigata pe lofituina? Pe tatou te manaomia le fesoasoani mai isi e taulima ai nei mea faigata? Pe o tatou vaaia ni amioga tuai po o ni mamanu o mafaufauga? O nei ituaiga o fesili e fesoasoani ia i tatou e ola ai ma le loto i ai, faamalosia ai lo tatou toe faaleleia, ma uunaia ai i tatou ia latalata atili atu ia Iesu Keriso.

E mafai ona tatou iloiloina i tatou lava i soo se taimi e ala i le faaaluina o se taimi e mafaufau ai, mafaufau loloto ai, ma faaaoga laasaga ua tatou aoaoina. Pe a tatou oo i se taimi o faalavelave, e mafai ona tatou fesili ifo ia i tatou lava ma le Atua, “O le a le vaivaiga faaletagata o loo faaosofia ia te au? O le a se mea na ou faia ua tulai mai ai lenei faafitauli? E i ai se mea e mafai ona ou ta’u atu pe faia, e aunoa ma le faafoliga, o le a taitai atu ai i se vaifofo faaaloalogia mo a’u ma le isi tagata?” E mafai ona tatou faamanatu ia i tatou lava, “Ua i ai i le Alii le mana uma. O le a ou tuuina atu lenei mea ia te Ia ma faatuatuaina o Ia.”

Soo se taimi lava tatou te faia ai se gaoioiga le lelei i se isi tagata, e mafai ona tatou faia ni suiga i le vave e mafai ai. E taua le tiai ese o le faamaualuga, ma ia manatua o le fai atu ma le faamaoni, “O a’u na sese” e masani ona tutusa le taua i le faamaloloina o se mafutaga e pei o le fai atu “Ou te alofa ia te oe.”

I le faaiuga o le aso, tatou te iloiloina pe na faapefea le aluga o mea uma. Na faapefea lo tatou aso? Pe o manaomia pea ona tatou talanoa ma le Alii e uiga i soo se amioga, mafaufauga, po o lagona lē lelei? E mafai foi ona tatou talanoa i se tagata o le aiga, uo, lagolago, po o se faufautua faatuatuaina e fesoasoani ia i tatou ia vaai manino atili i mea.

Ioe, o le a faaauau pea ona tatou faia mea sese e ui lava i a tatou taumafaiga sili. Ae o le tali atu i aso taitasi o se tautinoga lea e talia le tiutetauave mo nei mea sese. A o tatou iloiloina o tatou mafaufauga ma faatinoga i aso taitasi, foia, ma salamo e ala i le Faaola, o le a mou ese atu mafaufauga ma lagona lē lelei.

“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso [tagai 2 Nifae 9:23]” (Russell M. Nelson, “E Mafai ona Tatou Faia e Sili Atu ma Ia Sili Atu,” Liahona, Me 2019, 67).

O le tali atu i aso taitasi, po o le salamo i aso taitasi, e fesoasoani tatou te maua ai le olioli ma le saolotoga ua ofoina mai e le Faaola ia i tatou. Tatou te le o toe ola faaesea mai le Alii po o isi. E mafai ona tatou maua le malosi ma le faatuatua e feagai ai ma faigata ma manumalo ai. E mafai ona tatou olioli i lo tatou alualu i luma ma talitonu o le faia soo ma le onosai, o le a mautinoa ai le faaauau pea o le toe faaleleia.

Laasaga o Faatinoga

O se polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o le “galueaiina o laasaga.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e manaomia e fai ai le isi laasaga i lo tatou toe faaleleia.

Sauniuniga faaleagaga mo aso taitasi

O se vaega taua o le tali atu i aso taitasi o le fuafua lea o lo tatou aso, tulitatao a tatou fuafuaga, ona toe iloilo lea o le auala na faia ai mea i le faaiuga o le aso. Pe a tatou faia ma le loto i ai lenei mea, e puipuia i tatou mai le toe tosina atu i mausa tuai.

Ua fautuaina i tatou e Elder David A. Bednar ina ia saunia o tatou aso faatasi ma le Alii i le taeao: “O le tatalo anoa i le taeao o se elemene taua lea i le foafoaga faaleagaga o aso taitasi—ma e muamua atu i le foafoaga faaletino po o le faatinoga moni o le aso” (“Tatalo e le Aunoa,” Liahona, Nov. 2008, 41).

I le faagasologa o le aso, tatou te teuina pea se tatalo i o tatou loto mo se fesoasoaniga ma se tomatauga faifai pea. O nisi taimi e le lelei mea uma e pei ona tatou fuafuaina, ma e manaomia ona tatou fetuutuunai ma saili pea le fesoasoani a le Tama Faalelagi.

Na toe fautua mai foi Elder Bednar ia i tatou: “I le faaiuga o le aso, tatou te toe tootutuli ai foi ma toe lipoti atu i lo tatou Tama. Tatou te iloiloina mea na tutupu i le aso” (“Tatalo e le Aunoa,” 42). A o tatou tulitataoina ma le Alii ma toe iloilo lo tatou aso, e mafai ona tatou faamanatuina o tatou faamanuiaga ma iloa le mea atonu na tatou le atoatoa ai. Tatou te talanoama le Alii e uiga i mea e tatau ona tatou faia e salamo ai pe faia ai ni faaleleiga ma le auala e mafai ona tatou faia ai ni mea e sili atu i le isi taimi.

Salamo i aso taitasi

“Tasi le aso i le taimi” o se fasifuaitau masani o lona uiga o le ola i le taimi e tasi. O le faaauau pea ona mafaufau i o tatou mafaufauga, lagona, ma amioga, tatou te maua ai se avanoa e salamo ai ma latalata atili atu ai i lo tatou Tama oi le Lagi. A o tatou salamo, tatou te iloa ai le upumoni e faapea o le salamo e le o se tulaga faanoanoa, ma le faatapulaaina ae o se aafiaga fiafia ma le faasaolotoina lea tatou te tulimatai atu i ai e taliaina.

A o tatou salamo i aso taitasi, atonu tatou te iloaina ni faaletonu faaopoopo pe manatua foi ni amioga ua tuanai e manaomia ai le gauai atu i ai ma, i nisi o tulaga, toe faaleleia. E mafai ona avea ma se vaega o lo tatou salamo i aso taitasi le toe taulai atu i laasaga na muamua atu ua fuafuaina e aveese ai o tatou vaivaiga pe faia ai foi ni faaleleiga. O le toe iloiloina faatasi ma a tatou tagata lagolago o mea ua tatou aoaoina mai a tatou taumafaiga ia salamo i aso taitasi e mafai ona faamanino ai isi mea e ono manaomia ona tatou faia e salamo atoatoa ai. Atonu foi e manaomia ona tatou ta’uta’u atu i le pule tatau o le perisitua.

Ua uunaia i tatou e Peresitene Russell M. Nelson ina ia “tofo i le mana faamalosia o le salamo i aso taitasi—o le faia ma le lelei teisi i aso taitasi” (“E Mafai Ona Tatou Faia Mea Sili Atu ma Ia Lelei Atu,” Liahona, Me 2019, 67). A o tatou faalotomaualalo i tatou lava ma taumafai mo le faamaoni i aso taitasi, tatou te latalata atili atu ai i le Faaola. Na aoao e le Faaola Ona soo, “A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au” (Luka 9:23). O le salamo ma le aveina o lo tatou satauro e mulimuli ai i le Faaola i aso taitasi e saunia ai i tatou mo le laasaga 11.

Suesue ma Malamalama

O mau o loo mulimuli mai ma saunoaga mai taitai o le Ekalesia e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. E tatau ona tatou manatua ia faamaoni ma patino a tatou tusitusiga ina ia tele se aoga mo i tatou.

Leoleo ou manatu, upu, ma galuega

“Afai tou te le vaavaaia ia te outou lava, ma o outou mafaufauga, ma a outou upu, ma a outou galuega, ma tausi i poloaiga a le Atua, ma tutumau i le faatuatua i mea ua outou faalogoina e uiga i le afio mai o lo tatou Alii, e oo lava i le iuga o outou olaga, e fano lava outou. O lenei foi, le tagata e, ia manatua, ina ia e le fano” (Mosaea 4:30).

Atonu e mata’utia pe tau faamata’u pe afai sa tatou le ano i mea sa tatou faia a o aveina se taavale. Tusi e uiga i lou nofouta ia te oe lava.

E faapefea ona fesoasoani le faia o se iloiloga faaletagata lava ia ou te aloese ai mai le toe pau atu i mea ua fai ma a’u vaisu (ma fano ai)?

Faamaulalo ma le pulea o le tagata o ia lava

“Amuia i latou o e latou te faalotomaualalaloina i latou lava e aunoa ma le faamalosia ia lotomaualalalo” (Alema 32:16).

O le naunau e faateaese manatu le lelei a o lei mapuna ae o ni amioga faatiga o se ala o le faamaulaloina o oe lava e aunoa ma le tau faamalosia. Ia tusi e uiga i lou naunau e faamaualaloina oe lava. Faataitai mo se aso le faateaese o manatu le lelei.

O a ni faamanuiaga e oo mai ia te a’u?

Ola ai i le taimi nei.

“O le tele lava o le malamalama o se tagata, o le tele foi lena o lona sailia o le meaalofa o le salamo, ma o le malosi foi lea o lona taumafai e faasaoloto mai o ia lava mai agasala pe a faafia lava ona le atoatoa i le finagalo paia. E faapea, o agasala a tagata e matatau i le Atua, ma e amiotonu e faaauau pea ona faamagaloina aua e fou i aso uma ma itula uma ona latou salamo ma sailia le Alii” (Bruce R. McConkie, Doctrinal New Testament Commentary [1973], 3:342–43).

O se tasi o aafiaga sili ona aoga—faalemafaufau, faalelagona ma faaleagaga—o le ola i mataupu faavae o loo faamatalaina i nei laasaga, o lo tatou aoao lea e ola i le taimi nei.

E faapefea ona fesoasoani le laasaga 10 ia te a’u i le taulimaina o le olaga i se faiga auauai o le tasi le itula i le taimi pe a tatau ai?
E faapefea ona fesoasoani ia te a’u le iloa e tau lava o lo’u ola i nei mataupu faavae i se faiga e faasolosolo malie e tasi le aso i le taimi?

Faaauau le salamo ma le faamagaloga

“Ae o soo se taimi sa latousalamo ai ma saili le faamagaloga, ma le faamoemoe faamaoni, sa faamagaloina i latou” (Moronae 6:8).

O le iloa e naunau le Alii e faamagalo i tatou i taimi uma tatou te salamo ai ma le manatu tonu i ai, tatou te maua ai le lototele e toe taumafai i taimi uma tatou te toilalo ai.

O le a le uiga ia te a’u o le sailia le faamagaloga ma le “faamoemoe faamaoni”?

Ia onosai

“Ma o lenei ou te manao ina ia outou lotomaualalalo, ma ia augofie ma le agamalu; e faigofie ona faaoleoleina; tumu i le onosai ma le talitiga; ma faautauta i mea uma” (Alema 7:23).

O ai lava na faia le faaupuga tuai, “O le faataitai soo e faaatoatoaina ai” na te lei taua pe o le a le tele o le onosai e manaomia e faataitai ai pea. A o tatou onosai ma faaauau pea ona faia ni suiga i aso taitasi ma faia ni suesuega i aso taitasi, o le a tatou agai i luma i lo tatou ala i le toe faaleleia.

E faapefea e le taliaina o le tagata lava ia ma le faia o suiga i aso taitasi ona faamautinoa ai o le a faaauau pea lo’u lotomaualalo ma le atinaega faaleagaga?
E faapefea e le faia o se suesuega i le faaiuga o aso taitasi ona fesoasoani ia te au e faatoilalo ai le faanaunauga e pipiimau i le ita po o isi lagona tiga?

Alualu i luma i le olaga atoa

“O loo ou lagonaina lava e faamalosi atu i le Au Paia o Aso e Gata Ai le manaomia o se faaaogaina maumaututu o mataupu faavae o le Talalelei i o tatou olaga, amioga, ma upu ma mea uma tatou te faia; ma e manaomia ai le tagata atoa, le olaga atoa ia tuuto atu i le faaalualuina i luma ina ia mafai ai ona maua se malamalama i le upu moni e pei ona i ai ia Iesu Keriso” (Discourses of Brigham Young, sel. John A. Widtsoe [1954], 11).

O le uia o nei laasaga e mafai ona faamatalaina moni o se “faaaogaina maumaututu” o mataupu faavae o le talalelei.

E faapefea e le naunautai e iloiloina a’u lava i aso taitasi i vaega uma(faatinoga, upu, manatu, lagona, ma talitonuga) ona fesoasoani ia te a’u e tuuto ai a’u lava ia faaleleia atili i le olaga atoa?