Lagolago i le Toe Faaleleia

O le lagolago mai isi e taua e fesoasoani ia i tatou ia maua le toe faaleleia ma le faamalologa. O le i ai o se tasi e mafai ona tatou liliu atu i ai i taimi o vaivaiga e tele ona faamaonia le taua. O le faafiti ma le faaesea o ni faailoga ia o amioga faamalosia ma le fai ma vaisu. E faigofie lava ona toe pau atu i nei amioga e aunoa ma le lagolago ma le vaaiga a isi. E taua mo i tatou le maua o le lagolago i le vave e mafai ai i lo tatou toe faaleleia.

O le fesootai ma isi e le gata ina tuuina mai ai le faamalosiauga tatou te ono manaomia ae e fesoasoani foi ia i tatou e manatua ai tatou te agavaa mo le alofa o ni fanau a le Atua. A o tatou aapa atu i isi mo le lagolagosua, ua faamanuiaina i tatou, ma o i latou e lagolagoina i tatou e faamanuiaina foi. A o tatou faaaogaina laasaga e 12 ma saili le lagolago mai isi, e mafai ona tatou manuia mai punavai nei o le lagolagosua:

• O le Tama Faalelagi, Iesu Keriso, ma le Agaga Paia O le Tama Faalelagi, Iesu Keriso, ma le Agaga Paia o punavai silisili o le lagolago. O suiga ua mafai ona o Iesu Keriso ma Lana Togiola. I le Tusi a Mamona, o loo faasoa mai ai e Alema e faapea, o Keriso “o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale; e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:12). O le a tatou lagonaina le fesoasoani ma le faafaileleina pe a tatou o atu ma le lotomaualalo i lo tatou Tama Faalelagi ma Lona Alo, o Iesu Keriso.

  E taua le aua nei faagaloina le fesoasoani a le Faaola e ala i le Togiola. Sa Ia aoao mai, “O a’u nei le ala, ma le upu moni, ma le ola” (Ioane 14:6). E mafai ona aumaia e le Agaga Paia ia i tatou le mafanafana, filemu, ma le malosi faaleagaga e agai ai pea i luma.

• O tagata o le aiga. E mafai ona avea tagata o le aiga ma se punavai o le lagolago e ala i le ofoina atu o le alofa ma le taliaina. Atonu e mafai ona latou faateleina lo latou tomai e lagolago ai e ala i le faaaogaina o mataupu faavae o le talalelei o loo aoaoina i le Taiala Lagolago mo Taitoalua ma Aiga o i Latou ua Toe Faaleleia. E ui e le o tagata uma o le aiga o le a i ai i se tulaga faalelagona e tuuina atu le faamafanafanaga, ae o i latou e mafai e masani o punavai sili ia ona mamana o le lagolagosua.

• Uo. E mafai e uo ona tuuina atu le alofa ma le lagolago pe a tatou talanoa ma i latou e uiga i a tatou tauiviga, pe tatou te tau atu pe leai ia i latou e uiga i faamatalaga. Pe a maua e uo le lototele e faailoa atu ai amioga e tatau ona tatou taofia, pe a latou uunaia i tatou e saili le fesoasoani, e mafai ona tatou agai i luma i lo tatou alualu i luma i le toe faaleleia. A o tatou lagonaina le alofa ma le lagolago mai uo, e mafai ona faamanatu mai ai ia i tatou lo tatou taua ma le tau.

• Taitai faalelotu. E mafai e taitai faalelotu ona tuuina atu le lagolago taua i le faagasologa o suiga. E mafai ona fesoasoani nei taitai ia i tatou ia lagonaina le alofa o le Faaola ma faia se matafaioi autu i le fesoasoani ia i tatou ia salamo ma ia mama faaleagaga mai amioga malolosi soona fai ma avea ma vaisu.

• O E Lagolagoina. O lagolago o tagata na mauaina le toe faaleleia e ala i le uia o laasaga e 12. Ona o lo latou aafiaga, ua latou iloa ai le auala e fesoasoani ai ia i tatou e galulue ma faaaoga laasaga. E masani lava ona latou iloaina le le faamaoni ma malamalama i isi faigata tusa lava pe tatou te le o iloaina.

• Fonotaga mo le Toe Faaleleia. O fonotaga o le toe faaleleia o se nofoaga saogalemu lea e mafai ona tatou maua ai le taliaina, alofa, ma le lagolago. I nei fonotaga matou te faasoa atu ai o matou aafiaga faapea foi lo matou faatuatua ma le faamoemoe mo le toe faaleleia e ala i le Faaola o Iesu Keriso ma le faaaogaina o laasaga e 12 i o matou olaga. O le faasoaina o o matou aafiaga e mafai ona fesoasoani ia i matou e galulue agai atu ai i suiga e manaomia ma maua ai le faamoemoe e mafai ona maua le toe faaleleia ma le faamalologa.

• Soifua maloloina faalemafaufau ma tagata tomai faapitoa faafomai. E mafai ona tele ina tuuina mai e tagata tomai faapitoa o le soifua maloloina faalemafaufau ma faafoma’i, se malamalamaaga ma ni tomai tulaga ese e manaomia e toe faaleleia ai ma faamaloloina ai mai amioga soonafai ua fai ma vaisu. Afai o loo tatou tauivi pea ma amioga faamalosi ma le fai ma vaisu e tusa lava pe tatou te auai i le Polokalama o le Toe Faaleleia Mai Mea ua Fai ma Vaisu, e tatau ona tatou mafaufau e saili se fesoasoani faapolofesa mai se soifua maloloina faalemafaufau po o se polofesa faafomai. Pe a sailia se fesoasoani faapolofesa, e tatau i tagata o le Ekalesia ona filifili se tasi e lagolagoina mataupu faavae o le talalelei.

I le Polokalama o le Toe Faaleleia Mai Mea ua Fai ma Vaisu, e le o tofia atu ia te oe se e lagolagoina po o se polokalama lagolago. O le filifilia po o afea pe o ai o le a e talosaga i ai mo le lagolago o le faaiuga faaletagata lava ia. Ia mafaufau ma le agaga tatalo ia i latou o siomiaina oe ua sili ona e toafimalie ai e talosaga atu mo se fesoasoani, po o ai o le a sili ona fesoasoani ia te oe. O le mea e masani ai, o le tele o tagata o loo ia te oe o se lagolago, o le lelei foi lena o lou avanoa i le ausiaina o le toe faaleleia. O le taimi lava e te iloa ai i latou e te manao i ai i lau polokalama lagolago, e mafai ona faalotomaualaloina ma taufaafefe le fesili atu mo la latou fesoasoani. Peitai, a e faia, e te ono faate’ia ai i le tele o le alofa ma le taliaina e te lagonaina. O le tele o lou fesootai atu i isi, o le tele foi lea o avanoa o le a e maua e maua ai le alofa.

Ia mautinoa ua e filifilia ni tagata e matua faatuatuaina lava e lagolagoina oe. O nisi o tagata sili ona mataalia e lagolagoina oe o i latou o loo i ai se sootaga i le taimi nei ia te oe (e pei o matua, toalua, aiga, taitai o le Ekalesia), e mananao ia e manuia, o loo toaaga atoatoa i le Ekalesia, ma malamalama pe o i ai se manao ia malamalama i le natura tonu o le luitau o loo e feagai ai. O se tasi ua faatoilaloina ona lava luitau, e masani ona i ai se alofa sili atu mo luitau e oo i ai isi. O i latou e i ai luitau talitutusa ma oe, e masani ona i ai se tomai sili atu e malamalama ai i au tauiviga.

A o e amataina le faagasologa o le suiga, atonu o le a e vaivai faaletino, faalelagona, ma faaleagaga. Ia faaeteete ia aua nei atiina ae se sootaga le talafeagai ma soo se tasi e lagolagoina oe.