Uputomua

Pe o e tauivi ma se vaisu pe iloa se tasi o tauivi, e mafai ona avea lenei taiala o se faamanuiaga i lou olaga. Faatasi ai ma le faatagaga mai le Alcoholics Anonymous, ua fetuunai ai laasaga e 12 e aofia ai aoaoga faavae, mataupu faavae, ma talitonuga o Le Ekalesia a Iesu Keriso o le Au Paia o Aso e Gata Ai. I lenei taiala, o loo tuuina atu ai laasaga i le faasologa lelei faatasi ai ma se mataupu faavae o le talalelei e faatatau i ai. O le a fesoasoani lenei taiala e te aoao ai pe faapefea ona faaaoga nei laasaga. E tusa lava po o a ou tulaga, e mafai ona fesoasoani nei laasaga ia te oe e te sau ai ia Keriso ma maua faamanuiaga o le toe faaleleia ma le faamalologa.

O vaisu e ono aofia ai le faaaogāina o mea e pei o le tapaa, ava malosi, kofe, lauti, ma talavai ma fualaau faasāina. O vaisu e mafai foi ona aofia ai amioga e pei o taaloga faitupe, matamata i ponokalafi, tuinanau, amioga le talafeagai faalefeusuaiga, taaloga vitio, faaaogaina o tekinolosi e le talafeagai, ma le taumafa lē maloloina. E ui e manatu tagata tomai faapitoa i le tausiga o le soifua mālōlōina o le vaisu o se faama’i faaletino, ae o le vaega faaletino ua na o se vaega o le faafitauli. O vaisu e aafia ai le mafaufau, tino, ma le agaga, o lea e tatau ai i le fofō ona talanoaina vaega uma o le faamai.

E le o patino lenei taiala i soo se vaisu faapitoa. E ui lava o loo tauivi tagata ma ituaiga eseese o vaisu, ae o le toatele ua maua se vaifofo masani i le ala o loo otootoina mai i lenei taiala. O se api galuega ma se mau faasino mo soo se tasi e manao e toe faaleleia mai soo se ituaiga o vaisu. O lenei taiala o le anomea autu lea e faitau ai i fonotaga lagolago mo le toe faaleleia mai vaisu e lagolagoina e Le Ekalesia a Iesu Keriso o le Au Paia o Aso e Gata Ai.

O alii ma tamaitai o e na mafatia i aafiaga faataumaoi o vaisu eseese ma oo i le toe faaleleia mo se taimi umi, sa fesoasoani i le atiina ae o lenei taiala ma sa valaaulia e faasoa mai o latou aafiaga i le faaaogaina o laasaga e 12. O o latou manatu (le “matou” i lenei taiala) ua faaaoga e faamatala ai le tiga matuitui o mea ua fai ma vaisu ma le olioli i le faamalologa ma le toe faaleleia. E mafai ona e maua le faamafanafanaga ma le lagolagosua mai nei tagata. Na fesoasoani foi taitai o le Ekalesia ma faufautua faapolofesa i le tusiaina ma le tapenaina o lenei taiala. O le poto ma aafiaga tuufaatasi o le toatele o nei tusitala ua tulai mai nei o se isi molimau i le moni o le Togiola a Iesu Keriso ma le mafai ona toe faaleleia mai vaisu.

Matou te valaaulia outou e o mai i se fonotaga mo le toe faaleleia. (“O i matou” o alii ma tamaitai o e na mafatia i aafiaga faataumaoi o vaisu eseese ma ua oo i le toe manuia mo se taimi umi.) O faatonuga mo le sailia o fonotaga patino, vitio, telefoni, po o fonotaga ua pueina (faatasi ai ma le faatagaga) o loo maua i le uepisaite o le Polokalama o le Toe Faaleleia Mai Mea ua Fai ma Vaisu (AddictionRecovery.ChurchofJesusChrist.org). Aua nei faatagaina lou fefe e taofia oe mai faamanuiaga o le auai i se fonotaga o le toe faaleleia. Faamolemole ia iloa o nei fonotaga o ni nofoaga o le malamalama, faamoemoe, ma le lagolago, lea o le a e iloa ai e le o tuua na o oe ma o le a e iloa ai e mafai ona toe faaleleia. Ua matou iloaina o lenei taiala e sili ona aoga pe a matou galulue i laasaga faatasi ma se tagata e lagolagoina ma lo matou epikopo. O nisi o i matou na aofia ai se faufautua faapolofesa i la matou malaga o le toe faaleleia.

E amata le toe faaleleia pe a tatou faamaoni ma tautino atu o loo tatou tauivi ma vaisu. Mo nisi tagata, o le faailoaina o i latou lava o ni e ua feagai ma vaisu i fonotaga o le toe faaleleia e fesoasoani ia i latou ia faamaoni ma manatua le malosi e mafai ona oo i ai a latou vaisu. Peita’i, e tatau ona tatou faaeteete ina ne’i faatapulaaina ai lo tatou faamoemoe po o le faatuatuaina o le Atua. Afai tatou te faamatalaina i tatou lava o ni tagata ua feagai ma vaisu, atonu tatou te faafitia ma le le manatu i ai le upumoni e faapea, e mafai e Iesu Keriso ona faamaloloina i tatou ma suia o tatou lava natura. I lo tatou toe faaleleia, e tatau ona tatou maua uma se paleni i le va o le faamaoni e uiga i le mana o vaisu ae i le taimi lava e tasi o le faatuatuaina e mafai e Iesu Keriso ona toefuatai mai i tatou i le soifua maloloina atoatoa faaleagaga.

Afai e te lagona atonu e i ai sou vaisu ma e itiiti lava se manao e faasaoloto, pe afai foi e te naunau e atiina ae le manao, matou te valaaulia oe e faatasi ma i matou i le suesueina ma le faaaogaina o mataupu faavae o le talalelei a Iesu Keriso e pei ona otootoina mai i lenei taiala. Afai e te mulimuli ma le faamaoni o le loto i lenei auala, o le a e maua le mana o loo e manaomia e toe faaleleia ai mai mea ua fai ma vaisu.

Na faamalamalama mai e Elder Robert D. Hales: “O vaisu o le manao lea o le tagata natura, ma e le mafai lava ona faamalieina. O se manao e le mafaamalieina” (“Avea ma Tagata e Faautauta i le Faaletino ma le Faaleagaga,” Liahona, Me 2009, 10).

Ona ia faamatalaina lea o le ala e lagona ai e le toatele o tagata o e ua maileia i vaisu: “Ae i le avea ai ma fanau a le Atua, o lo tatou matelaina loloto ma mea e tatau ona tatou sailia o mea ia e na o le Alii lava e mafai ona saunia—o Lona alofa, Lona lagona o le taua, Lona saogalemu, Lona talitonuga, Lona faamoemoe i le lumanai, ma le faamautinoaga o Lona alofa, lea e aumaia ai ia i tatou le olioli e faavavau (“Avea ma Tagata e Faautauta i le Tausia Faaletino ma le Faaleagaga,” 10).

E ui lava o le va o le mea o loo tatou i ai ma le mea tatou te moomoo e i ai atonu e foliga mai e le magafatia, ae o le Polokalama o le Toe Faaleleia Mai Mea ua Fai ma Vaisu ma lenei taiala, ua fesoasoani i le toatele o tagata e malaga ai i le ala mai vaisu i le toe faaleleia, ma e mafai ona fesoasoani ia te oe e faia foi faapea.