“Laasaga 1: Ia tautino atu, o i tatou lava, ua leai se malosiaga e faatoilalo ai o tatou vaisu ma ua le mafai ona pulea o tatou olaga,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 1,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 1: Ia tautino atu, o i tatou lava, e leai se malosiaga e faatoilalo ai o tatou vaisu ma ua le mafai ona pulea o tatou olaga.

5:32

Mataupu Faavae Autu: Faamaoni

O le toatele o i matou na amata tagofia mea ua fai ma vaisu ona o le fia iloa. O nisi o i matou na aafia ona o ni mafuaaga tauamiotonuina mo ni fualaau o talavai po o se amioga o le faatautee ma le iloa lelei. O nisi o i matou na amata o se taumafaiga e sola ese ai mai tiga. O le toatele o i matou na amata i lenei ala i le taimi faatoa matutua teisi atu. Pe o le a lava o matou faamoemoega ma pe o a foi o matou tulaga, sa vave ona matou iloa o mea ua fai ma vaisu na sili atu nai lo na o se toomaga mai tiga faaletino. Na faaitiitia ai le lotopopole pe faagase ai o matou lagona. Na fesoasoani ia i matou e aloese ai mai o matou faafitauli—pe pei ona sa matou mafaufau i ai. Mo sina taimi, sa matou lagona ai le saoloto mai le fefe, popole, tuua toatasi, lotovaivai, tautu’i ma le musua. Ae ona o le olaga e tumu i tulaga e faaosofia ai nei ituaiga lagona, na atili ai ona matou mapu ane i mea ua fai ma a matou vaisu. O vaisu na avea ma se tasi o auala autu sa matou taumafai ai e taulima o matou manaoga ma lagona. E malamalama le Faaola o Iesu Keriso i lenei tauiviga. Na saunoa Peresitene Spencer W. Kimball, “Na vaai Iesu i le agasala o se mea sese ae na mafai foi ona ia vaai i le agasala o oso mai i manaoga loloto ma le le faataunuuina e le tagata agasala” (“Iesu: O Le Taitai Atoatoa,” Liahona, Aok. 1979, 5).

Ae, e toatele i matou na le iloaina pe ioeina ua aveesea lo matou atamai e tetee ma aloese ai i matou lava. I lo matou tulaga aupito maualalo, o le toatele o i matou na lagonaina e itiiti ni a matou filifiliga. E pei ona matauina e Peresitene Russell M. Nelson: “O le taofia o vaisu e mulimuli mai ai le saolotoga e filifili ai. E ala i vailaau, e mafai moni lava ona motusia ai se tasi mai lona lava loto” (“Addiction or Freedom,” Ensign, Nov. 1988, 7).

Sa matou mananao e taofi ae ua leai se faamoemoe. I le faatumulia ai i le fefe ma le faanoanoa, na mafaufau ai nisi o i matou o le faamuta o lo matou ola ua na o le pau lea o le isi auala. Ae na matou iloaina e le o le ala lenei sa finagalo le Tama Faalelagi matou te uia.

Sa faigata ona ta’utino atu a matou amioga ua fai ma vaisu. Sa matou faafitia le matuia o lo matou tulaga ma sa taumafai ai e aloese mai le faaalia ma taunuuga o a matou filifiliga e ala i le tuuitiitia po o le nanāina o a matou amioga. Matou te lei iloa o le faaseseina o isi ma i matou lava, na matou see loloto ifo ai i mea ua fai ma a matou vaisu. Matou te lei iloa o le olegia o isi ma i matou lava, na atili ai lo matou seesee atu i mea ua fai ma vaisu. Ua atili ai ona matou totofu ifo i le faaesea sili atu, ma tuueseese ai i matou lava mai isi—aemaise lava le Atua.

Pe a matou sisi‘o i pepelo ma mea faalilolilo, ma le faamoemoe matou te ‘alo i ai pe tuuaia ai isi, sa faavaivaia i matou faaleagaga. O faatinoga taitasi o le pepelo ma le nanaina o a matou vaisu, na matou fusia ai i matou lava i “maea vavae” lea na vave ona malolosi e pei o filifili malolosi (2 Nifae 26:22). Ona oo mai lea o se taimi na aumaia ai i matou e fesagai ma le mea moni. Sa le toe mafai ona matou toe ufiufia mea ua fai ma vaisu i le faia o isi pepelo po o le fai atu, “E leai a se leaga tele!”

Sa ta’u mai ia i matou e se tagata e pele, se fomai, se faamasino, po o se taitai faalelotu le mea moni e le mafai ona matou toe faafitia: o mea ua fai ma vaisu ua faatamaiaina ai o matou olaga. Ina ua matou toe vaai ma le faamaoni i aso ua tuanai, matou te ioeina e leai ma se mea sa matou taumafaia e i matou lava na aoga. Sa matou talitonu ua atili leaga mea na fai ma vaisu. Na matou iloa o mea ua fai ma vaisu ua matuai faatama’ia ai a matou sootaga ma ua aveesea ai mai ia i matou lo matou taua. I le taimi lea, sa matou faia ai le laasaga muamua agai i le saolotoga ma le toe faaleleia e ala i le mauaina o le lototele e tautino atu ai o lenei mea sa sili atu nai lo na o se faafitauli po o se mausa leaga.

Na iu ina matou ioeina le mea moni e faapea, o o matou olaga sa oo ina le gafataulimaina ma sa matou manaomia le fesoasoani e faatoilalo ai le tagofia o mea ua fai ma vaisu. Sa matou faailoa atu e le mafai ona matou faamaloloina i matou lava ma tautino atu sa le mafai ona matou tumau i le mafaufau lelei a o faatinoina a matou vaisu i soo se ituaiga. Sa matou iloaina sa matou manaomia le fesoasoani mai le Atua ma isi ina ia matou faamaoni ai ia i matou lava. O le mea ofoofogia i lenei iloaina faamaoni o le toilalo ma lo matou faamatuu atu e sosoo ai, sa iu ina amata ai le toe faaleleia.

O le faamaoni o le faavae lea o isi laasaga uma ma fesoasoani tatou te iloa ai lo tatou manaomia o le Faaola. Na aoao mai Peresitene Dieter F. Uchtdorf, i le taimi o i ai i le Au Peresitene Sili: “O le mafai ona vaai manino ia i tatou lava e taua i lo tatou tuputupu ae faaleagaga ma le soifua manuia. Afai e tumau pea ona lilofia o tatou faaletonu ma vaivaiga i le ātaata, ona le mafai lea e le mana togiola o le Faaola ona faamaloloina i latou ma avea ma malosiaga [tagai Eteru 12:27]” (“Le Alii e, Pe o A’u ea?,” Liahona, Nov. 2014, 58).

Ina ua matou nopia’i i o matou vaisu, sa matou pepelo ia i matou lava ma isi, ae sa le mafai ona matou faavaleaina moni i matou lava. Sa matou faafoliga o loo manuia i matou, ma tumu i le toa ma ‘alofaga. Ae i se mea i totonu, sa matou iloa ai o le nopia’i i o matou vaisu o le a taitai atu ai i le faanoanoa sili atu. Sa faamanatu mai pea ia i matou e le Malamalama o Keriso. O le faafitia o lenei upumoni sa o se mea e vaivai ai; o se mapusaga i le i’u ina tautino atu sa i ai so matou faafitauli. O le mea mulimuli, sa matou faatagaina sina avanoa itiiti mo le faamoemoe e faase’e ai i totonu. Ina ua matou filifili e ioe atu sa i ai ni o matou faafitauli ma sa matou naunau e saili le lagolago, sa matou tuuina atu i lena faamoemoe se avanoa e tupu ae ai.

Laasaga o le Faatinoga

O le polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o “laasaga galue.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e manaomia e fai ai le isi laasaga i lo tatou toe faaleleia.

Tuu ese le faamaualuga ae saili le faamaulalo

O le faamaualuga ma le faamaoni e le mafai ona o faatasi. O le faamaualuga o se manatu faivavale ma o se elemene taua o mea uma ua fai ma vaisu. O le faamaualuga na te faasese le moni o mea e pei ona i ai, e pei ona sa i ai, ma e pei ona o le a i ai. O se faafitauli tele i lo tatou toe faaleleia. Na saunoa mai Peresitene Ezra Taft Benson:

“O le faamaualuga e matuai faatautava lona natura. Tatou te tuu o tatou loto ia faafeagai ma le finagalo o le Atua. A faatūtū atu lo tatou faamaualuga i le Atua, ua faia i le agaga o le ‘ia fai lo’u loto ae le o lou finagalo.’ …

“O le faatautava atu o o tatou loto i le finagalo o le Atua, o le a faatagaina ai le le puleaina lelei o naunauga, manaoga, ma tuinanau.

“E le mafai ona talia e le tagata faamaualuga le pule a le Atua e tuuina atu le taitaiga i o latou olaga. Latou te faatu o latou vaaiga i le upumoni e faasaga i le malamalama tele o le Atua, o o latou tomai e faasaga i le mana o le perisitua a le Atua, o mea ua latou ausia e faasaga i Ana galuega mamana” (Aoaoga a Peresitene o le Ekalesia: Ezra Taft Benson [2014], 232).

E i ai se taimi, na tatau ai ona matou filifili e lafoai lo matou faamaualuga ma ia faamaoni e uiga i o matou vaisu. E le faigofie ona lotomaualalo, galue i tausaga o le taufaasese o le tagata lava ia, ma iu ai ina filifili le faamaoni, ae i le aluga o taimi, e avea ma se faamanuiaga sili.

O se suiga tele lea mo i matou ina ua iu ina matou lafoaia lo matou faamaualuga ma avea ma tagata lotomaualalo. O le toatele o i matou sa lei faamaualaloina i matou lava ae sa “faamalolosia ia lotomaualalalo” (Alema 32:13). Po o le a lava le itu, na oo mai ia i matou taunuuga o o matou vaisu, ma na leiloloa ai mea sa pele ia i matou—o o matou fale, a matou galuega, o matou aiga, ma e oo lava i lo matou saolotoga. Sa matou le toe maua le faatuatuaga o aiga ma uo. Sa leai so matou faaaloalo ia i matou lava ma lo matou talitonuga e fetaiai ma luitau o le olaga. Sa matou oo i lo matou tulaga aupito maualalo, ma e ui lava o le lotomaualalo sa tiga, ae o le amataga lea o lo matou toe manuia.

E le faigofie le toe faaleleia mai vaisu; e manaomia ai le galue malosi. Ae na iu lava ina matou iloaina o le tau na matou totogiina ina ia tumau ai i o matou vaisu sa sili atu nai lo le tau o le toe faaleleia. A o matou lafoaia le faamaualuga, sa matou saunia e amata i le ala agai i le saoloto mai vaisu.

Ia faamaoni ma talanoa i se tasi

O se faatinoga taua e fesoasoani ia i tatou ia faamaoni e uiga i o tatou vaisu o le talanoa lea i se tasi e uiga i ai. Talu ai o o tatou vaisu ua taitai atu ai i tatou e tauamiotonuina, fetuuna’i, ma pepelo i isi, e aofia ai ma i tatou lava, o le toatele o i tatou o ni tagata tomai faapitoa i le taufaasese. O lenei taufaasese e mafai ai ona tatou tulitulimatagauina o tatou vaisu, ma e faigata ia i tatou ona vaai ma le faamaoni i mea. A o tatou faaitiitia ma tauamiotonuina a tatou amioga, tatou te manatu sese lava o loo tatou puleaina pea. Ae peitai, a tatou talanoa ma se isi tagata, e mafai e lena tagata ona fesoasoani ia i tatou ia iloa le mea moni ma faatoilalo le taufaasese.

O le tagata atonu tatou te mananao e talanoa muamua i ai o lo tatou Tama Faalelagi. E mafai ona tatou tatalo ma ole atu ia te Ia e fesoasoani mai ia i tatou ia faamaoni, vaai manino atili i mea, ma maua le lototele e talia ai le upumoni. Ona mafai lea ona tatou mafaufau ma le agaga tatalo e uiga i se isi tagata e talanoa i ai, o se tasi e malamalama i le talalelei a Iesu Keriso ma le ala i le toe faaleleia. Filifili se tasi e te faatuatuaina. E mafai e se toalua, matua, tagata o le aiga, taitai o le Ekalesia, uo, tagata faigaluega, fomai, lagolago, faifeautalai, po o se tagata e faafoeina se fonotaga o le toe faaleleia. A uma ona filifili se tasi, o le isi laasaga o le faasoa atu lea ia i latou o auala o loo tatou tauivi ai. E tatau ona tatou tatalo mo le lototele ina ia faamaoni i le mea tatou te mafaia e uiga i o tatou vaisu. (Tagai i le pepa o faamatalaga “Lagolago i le Toe Faaleleia.”)

Auai i fonotaga

O fonotaga mo le toe faaleleia o ni punavai mamana ia o le faamoemoe ma le lagolago. Po o fea lava tatou te i ai, e mafai ona tatou auai totino i fonotaga po o le initoneti. O nei fonotaga o se nofoaga e potopoto ai ma i latou o sailia le toe faaleleia ma latou o e ua uma ona uia lenei ogaala ma o se faamaoniga ola o lona aoga. I fonotaga mo le toe faaleleia, tatou te maua ai isi o e ua i ai le poto masani i le faaaogaina o laasaga ma le sailia o le toe faaleleia ma o e naunau e fesoasoani ia i tatou i la tatou lava malaga. O fonotaga mo le toe faaleleia o se nofoaga o le malamalama, faamoemoe, ma le lagolago.

I nei fonotaga, tatou te suesue ai i mataupu faavae patino o le talalelei e mafai ona fesoasoani e suia ai amioga. Na aoao mai Peresitene Boyd K. Packer: “O le suesuega o aoaoga faavae o le talalelei o le a vave ona faaleleia ai amio nai lo se suesuega o le amio. O le mafaufau lofia i amioga le talafeagai e taitai atu ai i amioga le talafeagai. O le ala lea tatou te faamamafa malosi ai le suesueina o aoaoga faavae o le talalelei” (“Fanau Iti,” Ensign,Nov. 1986, 17). E leai se totogi o fonotaga ma e le faalauaiteleina. Alu i le AddictionRecovery.ChurchofJesusChrist.org e sue se fonotaga e latalata ane ia te oe.

Suesue ma Malamalama

O le suesue i mau ma saunoaga a taitai o le Ekalesia o le a fesoasoani ia i tatou i lo tatou faaleleia. O lenei suesuega e faateleina ai lo tatou malamalama ma fesoasoani tatou te aoao ai. Tatou te faaaogaina mau nei, faamatalaga, ma fesili mo suesuega faaletagata lava ia ma le agaga tatalo, tusitusi, ma talanoaga faalevaega.

Atonu e lofituina oe i le manatu i le tusitusi, a o le tusitusi o se mea faigaluega mamana mo le toe faaleleia. O le tusitusi e aumaia ai ia i tatou se taimi e tomanatu ai, fesoasoani ia i tatou e taulai atu ai o tatou mafaufauga, ma fesoasoani ia i tatou e vaai ma malamalama ai i faafitauli, mafaufauga, ma amioga o loo siomia ai o tatou vaisu. A tatou tusitusi, o le a tatou maua ai foi se faamaumauga o o tatou mafaufauga. A o tatou agai i luma i laasaga, e mafai ona tatou vaaia lo tatou alualu i luma. Mo le taimi nei, tau lava o lou faamaoni ma ia e loto i ai ao e tusitusia ou mafaufauga, lagona ma uunaiga.

Pe ua e talitonu ua leai sou malosiaga e pulea ai lou vaisu?

“O le vaisu e i ai le gafatia e motusia ai le loto o le tagata ma faaleaogaina ai le faitalia tatau. E mafai ona aveesea ai le mana o se tasi e filifili ai” (Boyd K. Packer, “Revelation in a Changing World,” Ensign, Nov. 1989, 14).

O a faailoga ua leai so’u malosiaga e pulea ai la’u amio ua fai ma vaisu?
Ua faapefea ona aafia au i la’u vaisu?
O a mealilo ua ou natia mai isi?
O le a le tele ua ou o’o i ai, ina ia mafai ai ona ou punoua’i i a’u amioga ua fai ma vaisu?
O a ni amioga mama po o ni tulaga faatonuina ua ou solia?
Na faapefea ona ou fetunuuna’ia nei filifiliga?

Fiaai ma le fiainu

“Amuia e fia aai ma fia inu i le amiotonu: aua e maoona i latou” (Mataio 5:6).

“Sa matelaina lo’u agaga; ona ou tootuli ai lea i luma o Le na faia au, ma ua ou tagi atu ia te ia i le tatalo faatauanau ma le aioi atu mo lo’u lava agaga; na ou tagi atu ia te ia i le aso atoa; ioe ina ua po lava le aso ua ou alaga atu pea i le lagi” (Enosa 1:4).

I nei mau e lua, ua tatou aoao ai e mafai ona fia aai o tatou agaga. Pe ua i ai se taimi na ou lagona ai le gaogao i totonu, e tusa lava pe ou te le o fiaai faaletino? O le a se mafuaaga o lena gaogao ii?
E faapefea ona fesoasoani lo’u fia ‘ai i mea o le Agaga ia faateleina ai lo’u faamaoni?

Faamaoni

“Atonu e manatu isi i uiga lelei o le amio lea ua ta’ua o le faamaoni o se mataupu sili ona taatele. Peitai ou te talitonu i ai o le aano moni lea o le talalelei. A aunoa ma le faamaoni, o le a … masofasofa o tatou olaga … i le amioleaga ma le fenumiai” (Gordon B. Hinckley, “,” ,We Believe in Being Honest,” Ensign, Oct. 1990, 2).

O a ni auala sa ou pepelo ai ma taumafai e nana mea ua fai ma a’u vaisu mai ia te a’u lava ia ma isi. Na faapefea ona faatupuina e lenei amioga le “amioleaga ma le fenumiai”?

Lotomaualalo

“O lenei ona ua faamaulalo toai outou, amuia outou aua o nisi aso; pe a faamaulaloina toai le tagata, e saili e ia le salamo; o lenei foi, e moni, ai se salamo, e maua e ia le alofa; o le foi na te maua le alofa, ma tumau ai e oo i le iuga, e faaolaina lea” (Alema 32:13).

O a tulaga ua faamalosia ai au ia lotomaualalo ma salamo?
O le a se faamoemoe ua ofo mai e Alema ia te au? E mafai faapefea ona ou su’ea pe maua lena faamoemoe?

Siosiomia i tofotofoga

“Ua siosiomia au, ona o faaosoosoga ma agasala ua faigofie ona lavelavea ai au.

“Ma pe a ou fia olioli, e oi loʼu loto ona o aʼu agasala; e ui i lea ua ou iloa lē ua ou faalagolago i ai.

“Sa avea loʼu Atua ma oʼu lagolago; sa ia taitaia aʼu e ala mai i oʼu puapuaga i le vao; ma sa ia faasaoina aʼu i luga o vai o le moana loloto.

“Ua ia faatumuina au i lona alofa, e oo lava ina mu ai lo’u tino” (2 Nifae 4:18–21).

Ina ua lagona e Nifae le lofituina, o ai na ia tuuina i ai lona faatuatuaga?
O le a se mea e mafai ona ou faia ina ia ou faatuatuaina atili ai le Alii?

“Ua ou iloa o le tagata o le mea noa”

“Ma sa oo ina faatoa maua e Mose i le va o itula e tele lona malosi e masani ai e pei o le tagata; ma sa fai ifo o ia ia te ia lava: O lenei, ona o lenei mea ua ou iloa ai o le tagata o se mea noa, o se mea ou te lei mafaufauina lava” (Mose 1:10).

O a ni ala e avea ai a’u ma mea noa pe a le ia te a’u le fesoasoani a le Atua?
O a ni ala e le muta ai lo’u taua?
E mafai faapefea e le iloaina o lo’u manaomia ona faalagolago i le Atua ona aumaia ia te au le tautino atu o lo’u lava “meanoa” ma avea ai e pei o se tamaitiiti laitiiti? (Mosaea 4:5; tagai foi i le Mosaea 3:19).