“Laasaga 2: Ia talitonu e mafai e le mana o le Atua ona toefuatai mai i tatou i le soifua maloloina atoatoa faaleagaga,” Faamalologa e ala i le Faaola: O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia (2023)

“Laasaga 2,” O Le Polokalama o le Toe Faaleleia Mai Mea ua Fai ma Vaisu Taiala e 12-Laasaga o le Toe Faaleleia

Laasaga 2: Ia e talitonu o le mana o le Atua e mafai ona toefuatai ai oe i le malosi atoatoa faaleagaga.

3:42

Mataupu Faavae Autu: Faamoemoe

Ina ua matou iloaina le leai o so matou malosi e faatoilalo ai mea ua avea ma vaisu, e toatele nisi o matou na lagona le aveesea mai o le faamoemoe. Sa tele taimi na matou taumafai ai e togi le solo. O nisi o i matou sa tatalo i le Atua i le tele o taimi. Sa matou faatoese atu mo a matou amioga ma folafola atu e sui. Ae i le mavae ai o le toilalo pea lava pea, sa amata ona matou mafaufau sa le fiafia le Atua ia i matou ma o le a le fesoasoani mai ia i matou. O i matou ia na tutupu ae ma le leai o se manatu i le Atua, sa matou mautinoa ua leai so matou avanoa mo se fesoasoani. Po o le a lava le itu, o le laasaga 2 na tuuina mai ai ia i matou se tali a lē o le lafoaia pe le mafaufauina foi—ia maua le faamoemoe ia Iesu Keriso ma le mana o Lana Togiola.

Ina ua iu ina faamaulaloina i matou, sa matou ole atu mo se fesoasoani. I le mulimuli ai i le mea sa pei o sina ‘ave itiiti o le faamoemoe, sa amata ona matou auai i fonotaga o le toe faaleleia ma galulue faatasi ma tagata lagolago. Sa faatumulia i matou i le masalosalo ma le fefe, i le taimi muamua na matou faatasi atu ai i fonotaga mo le toe faaleleia. Sa matou fefevavale, lēlavava, atonu foi na i ai lagona faaletonu, ae o le mea sili na matou o mai.

I fonotaga mo le toe faaleleia, sa faamatala mai ma le faamaoni e tagata ituaiga olaga sa o latou i ai, o le mea na tupu na suia ai i latou, ma le tulaga na i ai le ola i le toe faaleleia. Sa matou iloa o le toatele o tagata sa matou feiloai i nei fonotaga, sa i ai foi taimi na latou lagona ai le leai o se faamoemoe e pei ona sa matou lagonaina. Ae a o faaauau pea ona matou auai, sa matou vaaia le toatele o i latou o talie moni, talanoa, ataata, ma lagona le faamoemoe e uiga i le lumanai. Sa matou vaaia le toatele o e na oo i se suiga mamana i o latou olaga, o se suiga sa matou mananao foi i ai.

Sa faasolosolo malie lava ona aoga ia i matou ia mataupu faavae sa latou fefaasoaai ma faataitaia. Sa faaauau ona matou o mai pea, sa amata ona matou lagona se mea matou te lei lagonaina i le tele o tausaga—o le faamoemoe. Afai sa i ai le faamoemoe mo isi o e sa toetoe a oo atu i le faatamaiaga, atonu foi la sa i ai le faamoemoe mo i matou uma. Sa amata ona matou talitonu faapea, afai matou te liliu atu ia Iesu Keriso, o le a “leai ni mausa, leai ni vaisu, leai se tetee, leai se solitulafono, leai se agasala e tuusaunoa mai le folafolaga o le faamagaloina atoatoa” (Boyd K. Packer, “The Brilliant Morning of Forgiveness,” Ensign, Nov. 1995, 19).

I lenei siosiomaga o le faatuatua ma le molimau, na matou maua ai le faamoemoe na faapea ona amata fagua ai i matou i le alofa mutimutivale ma le mana o le Atua. Sa amata ona matou talitonu e mafai ona Ia laveai i matou mai noataga o le tagofia o mea ua fai ma vaisu. Sa matou mulimuli i faataitaiga a a matou uo ua toe faaleleia olaga. Sa amata ona matou galulue i laasaga, maua le lagolago mai isi—e aofia ai ma a matou tagata e lagolagoina matou—ma auai i fonotaga o le toe faaleleia. A o matou tatalo, mafaufau loloto, ma faaaoga tusitusiga paia, i le aluga o taimi sa amata ona matou faafouina lo matou malolosi i le Ekalesia. Na amata ona tutupu a matou lava vavega, ma na matou iloa ai ua faamanuiaina i matou lava i le alofa tunoa o Iesu Keriso e fesoasoani ia i matou e faatumauina lo matou lē toe faaaogaina i lea aso ma lea aso.

A o matou uia le laasaga 2, sa matou naunau e suia le faatuatuaina o i matou lava ma o matou vaisu, i le faatuatua i le alofa ma le mana o Iesu Keriso. Sa matou galulue i lenei laasaga i o matou mafaufau ma loto faatasi ai ma le lagolago a isi, ma sa matou aoaoina ai o le faavae o le toe faaleleia mai vaisu e tatau ona faaleagaga. Ona, a o matou fetaomi atu i luma ma galulue i laasaga taitasi ua fautuaina mai i lenei taiala, sa faamautu soo mai ia i matou le natura faaleagaga o le toe faaleleia.

O lenei polokalama e faaleagaga, ma o se polokalama o faatinoga. Mo i matou ma le anoanoai o isi, o le galuega o le toe faaleleia ua aoga ai taumafaiga uma. A o matou faaaogaina nei mataupu faavae ma faatagaina ia aoga i o matou olaga, e toefuatai i matou i le mafaufau lelei ma le soifua maloloina atoatoa faaleagaga. Ua matou maua se sootaga moni ma i matou lava, ma isi, ma le Faaola o Iesu Keriso.

Mo nisi o i matou, na foliga mai na vave ona oo mai le vavega o le toe manuia; mo isi, o le toe faaleleia na sili ona faifai malie. Po o le a lava le itu, o le mea taua sa matou faaauau pea ona matou faataitai ma talitonu ma le faatuatuaina o le a faia e le Atua mo i matou mea e le mafai ona matou faia mo i matou lava. I le aluga o taimi, na iu lava ina mafai ona matou faapea atu e ala i le “tumau ia Keriso,” ua laveaiina i matou mai vaisu ma olioli ai i se “malamalama atoatoa o le faamoemoe” (2 Nifae 31:20).

O loo faatasi lo tatou Tama Faalelagi alofa ma Lona Alo, o Iesu Keriso, ma i tatou i laasaga uma o le ala. E fesoasoani i La’ua e faafailele ma faalautele ai lo tatou faamoemoe ia Keriso. Na aoao mai Peresitene M. Russell Ballard:

“Mo outou ua faapologaina e soo se ituaiga o mea ua fai ma vaisu, o loo i ai se faamoemoe auā e alofa le Atua i Ana fanau uma lava, ma ona o le Togiola a le Alii o Iesu Keriso ua mafai ai mea uma.

“Ua ou vaaia faamanuiaga ofoofogia o le toe faaleleia, lea e mafai ona faasaolotoina ai se tasi mai filifili o mea leaga ua fai ma vaisū. O le Alii o lo tatou Leoleo Mamoe ma e leai se mea tatou te matitiva ai pe a tatou faalagolago i le mana o [Lona] Togiola. Ou te iloa e mafai e le Alii ma o le a Ia faasaolotoina mai lē ua nofopologa i mea ua fai ma vaisu, aua e pei ona folafola mai e le Aposetolo o Paulo, ‘Ou te mafaia mea uma lava i le faamalosi mai o Keriso ia te au’ (Filipi 4:13)” (“E! O Le Togafiti Poto a Le ua Leaga,” Liahona, Nov. 2010, 110).

Afai tatou te toe faia, tatou te maua le taua tele o le liliu atu i le Atua ma talanoa ma i latou o lagolagoina i tatou. E ono faaosoosoina i tatou e lafoai le faamoemoe uma. Ae o le toe tupu e lē faaumatia ai le alualu i luma ua tatou faia, ma e lē mana’omia ona faaumatia ai lo tatou faamoemoe. O le toe tupu o se faamanatu mamana lea o lo tatou manaomia ona faaauau pea ona o i fonotaga o le toe faaleleia, maua le lagolago a le au lagolago ma isi, gauai atu i le Atua, ma galulue i nei laasaga. A o tatou fetuleni pea i luma, e amata ona tatou lagonaina le mana o Iesu Keriso i o tatou olaga. Ua sili atu ona mafai ona tatou ‘alofia, ma faateleina ai lo tatou faamoemoe.

Na aoao mai e Elder David A. Bednar: “Tatou te ono mafaufau sese foi o na faamanuiaga ma meaalofa ua teuina mo isi tagata e foliga mai e sili atu ona amiotonu, pe auauna atu foi i ni valaauga taualoa o le Ekalesia. Ou te molimau atu o loo avanoa le alofa mutimutivale o le Alii mo i tatou uma, ma o loo naunau foi le Faaola o Isaraelu e faaee mai na meaalofa i o tatou luga” (“O le Alofa Mutimutivale o le Alii,” Liahona, Me 2005, 101). O le a tuuina mai e Iesu Keriso ia i tatou le tele o le alofa mutimutivale i la tatou malaga agai i le toe faaleleia, o se tasi o mea aupito sili ona taua o le faamoemoe lea e mafai e le mana o le Atua ona toefuatai mai i tatou i le soifua maloloina atoatoa faaleagaga.

Laasaga o Faatinoga

O le polokalama lenei o faatinoga. O lo tatou alualu i luma e faalagolago i le faaaogaina pea lava pea o laasaga i o tatou olaga i aso taitasi. Ua taua lenei mea o “galueaiina o laasaga.” O faatinoga nei e fesoasoani ia i tatou e o mai ai ia Keriso ma maua ai le taitaiga ma le mana e tatau ai e fai ai le isi laasaga i lo tatou toe faaleleia.

Atiina ae se malamalamaaga sa’o i uiga o le Atua

O lo tatou maasiasi e tele ina faalavelave i le malamalama i uiga ma le alofa o le Atua mo i tatou. I le faatauasoina ai i o tatou tiga ma vaisu, e tele ona tatou vaai ia te Ia o se tasi e tauimasui, lē fiafia, pe ita ia i tatou. O le faamoemoega o lenei laasaga faatino o le faataatia ese lea o manatu e le sa’o e uiga i le Atua ma atiina ae se malamalamaaga sili atu i Lona alofa, alofa mutimutivale, ma le naunautai ma le manao e faamanuia i tatou.

Muamua, e taua le malamalama o loo i ai le Atua iina e tusa lava pe tatou te le lagonaina Lona faatasi mai. O le iloaina o le Atua o se galuega faigata ma e manaomia ai le onosai. E mafai ona faigata pe a tatou masani i le faamalieina vave, ae i le aluga o taimi e mafai ona tatou amata vaai ma iloa Ona uiga paia. E oo ina sili atu lo tatou iloa lelei o le Atua.

E mafai ona tatou ole atu i le Tama Faalelagi e fesoasoani ia sili atu lo tatou malamalama i Lona natura. E mafai ona tatou vaavaai mo le aao o le Atua i o tatou olaga ma le tele o mea o loo Ia faia mo i tatou. E mafai ona tatou suesue i tusitusiga paia e uiga i le alofa mutimutivale ma le alofa tunoa o le Faaola ona talanoaina lea o nei mau ma o tatou tagata lagolago ma isi o e lagolagoina i tatou.

A o amata ona tatou maua se malamalamaaga sili atu i le alofa ma le alofa mutimutivale o le Atua, e amata ona tatou maua le talitonuga sili atu ma le faamoemoe i le mana o le Atua e laveai ai i tatou. Na molimau mai Peresitene J. Reuben Clark Jr. e uiga i le alofa mutimutivale o lo tatou Tama Faalelagi i le faapea mai: “Ou te talitonu e finagalo lo tatou Tama Faalelagi e laveai ana fanau taitoatasi. … Ou te talitonu o lona faamasinotonu ma le alofa mutimutivale o le a ia tuuina mai ai ia i tatou le taui maualuga mo a tatou faatinoga, tuuina mai ia i tatou mea uma e mafai ona ia tuuina mai, ma i le isi itu, ou te talitonu o le a ia tuuina mai ia i tatou le faasalaga itiiti lea e mafai ona ia faamamafaina” (i le Conference Report, Oct. 1953, 84).

Tatalo ma suesue i tusitusiga paia.

Na ta’ua e Peresitene M. Russell Ballard: “Afai e i ai se tasi ua i ai se mea ua fai ma ana vaisu, ma ua i ai le manao e faatoilalo ai, o loo i ai se auala i le saolotoga faaleagaga—o se auala e sola ese ai mai le nofo pologa—o se auala ua faamaoniaina. E amata i le tatalo—o fesootaiga faamaoni, faatauanau, ma faifai pea ma le Foafoa o o tatou agaga ma tino, lo tatou Tama Faalelagi” (“E, Lena Fuafuaga Faatogafiti a le Tiapolo,” Liahona, Nov. 2010, 110).

A o tatou lafoaia le faamaualuga ma finafinau e fai le mea sili tatou te mafaia i aso taitasi, tatou te mananao e tatalo mo le taialaga ma le taitaiga mai se Tama Faalelagi alofa. O nisi o i matou e lei tatalo moni lava pe mafaufau loloto i tusitusiga paia. O nisi o i matou sa faaosoosoina e taofi le tatalo po o le suesue. Sa matou manatu sese e le aoga nei taumafaiga ona sa matou lei lagonaina le latalata atu i le Atua pe ona sa matou tauivi pea ma vaisu.

Na matou iloa ai o se tasi o ki i le manuia o le faaauau pea ona faaaogaina o nei meafaigaluega faaleagaga. O le tatalo leotele, tatalo i le lotofaafetai faigofie i le aso atoa, ma le tatalo mo isi o ni faiga fou mamana mo le toatele o i matou. O se tasi o auala e faateleina ai le mana o le tatalo o le faailoa atili atu lea ma le faamaoni o a matou tauiviga i le Atua. E oo foi a o matou faasoa atu i le Tama Faalelagi lo matou le naunau e sui, ae sa faamalolosia lo matou naunautaiga. Sa matou oo foi i ni uunaiga faifai pea, filemu, ma laiti mai le Agaga Paia. Sa amata ona matou fesili atu i le Atua po o a ni laasaga laiti e mafai ona matou faia i aso taitasi, nai lo le na ona ole atu ia te Ia e aveese vave o matou luitau ma vaisu.

O le mea mulimuli, o le naunautaiga e fesootai ma le Atua e taitai atu ai i tatou e suesue i upu a perofeta o aso nei ma anamua. O le suesueina ma le agaga tatalo o tusitusiga paia, sailia o tali i a tatou fesili, ma le faamaumauina o uunaiga mai le Agaga e mafai ona fesoasoani i le talitonu e mafai ma o le a fesoasoani le Atua ia i tatou.

O se nofoaga sili e amata ai au suesuega o le afioga a le Atua o loo i tusitusiga paia ma upusii i le faaiuga o mataupu taitasi i lenei taiala. O mau ma upusii taitasi na filifilia faatasi ma le mafaufau i le toe faaleleia, ma o fesili taitasi ua fesiligia ma le faamoemoe atonu e fesoasoani ia i tatou e faatatau ia mau ma upusii i o tatou olaga. Ua tatou iloaina o le faaaluina o ni nai minute i aso uma e saili ai mea e finagalo le Atua e fesootai mai ia i matou e maua ai ni taui tetele. Matou te tuuina atu la matou molimau i lenei upumoni: “Ioe, ua tatou vaai o soo se tasi e loto i ai e mafai ona taofimau i le afioga a le Atua, lea e vave ma mamana, lea o le a vaevaeina ai le togafiti uma ma mailei ma togafiti a le tiapolo” (Helamana 3:29).

Suesue ma Malamalama

O mau nei ma saunoaga mai taitai o le Ekalesia e mafai ona fesoasoani i lo tatou toe faaleleia. E mafai ona tatou faaaogaina mo le mafaufau loloto, suesue, ma tusitusiga. E tatau ona tatou manatua ia faamaoni ma patino a tatou tusitusiga ina ia sili ona tatou manuia mai ai.

Ia talitonu i le Atua

“Ina faatuatua ia i le Atua; ma ia talitonu o loo soifua o ia, na ia faia foi mea uma ua i le lagi atoa ma le lalolagi; ia talitonu ua ia te ia le poto uma, ma le mana uma, i le lagi ma i le lalolagi; ia talitonu foi ua le iloa e tagata mea uma e mafai ona silafia e le Atua” (Mosaea 4:9).

E toatele molimau i le lagi ma le lalolagi e tautino i le i ai o le Atua. O a ni faamaoniga o le Atua ma Lona alofa ua ou iloaina?

Faateleina le faatuatua ia Iesu Keriso

Na aoao mai Peresitene Russell M. Nelson: “Amata i le asō e faateleina lou faatuatua. E ala i lou faatuatua, o le a faateleina ai e Iesu Keriso lou gafatia e faamei ai mauga i lou olaga” (“Ua Toetu Keriso: O Le Faatuatua ia te Ia o le a Siitia ai Mauga,” Liahona, Me 2021, 101).

E toatele i tatou sa taumafai e toe faalelei mai mea ua fai ma vaisu e ala i o tatou lava loto naunautai po o le i ai o se uo po o se fomai faufautua. E lei leva, ae o matou iloaina o le faatuatua ia i matou lava, po o isi e lei mafai ai e i matou ona faatoilalo atoatoa mea ua fai ma a matou vaisu. O le faatuatua ia Iesu Keriso ma Lona gafatia e faamalolo ai i tatou o le faavae lea o lo tatou toe faaleleia.

O a ni ou lagona i le asō e uiga i le liliu atu i le Faaola i a’u taumafaiga e toe faaleleia?
O le a se mea na fesoasoani ia te au e faamalosia ai lo’u faatuatua ia Iesu Keriso?
O le a se mea ua fautuaina mai e la’u lagolago, taitai o le Ekalesia, ma isi ou te faia e fesoasoani ai ia faateleina lo’u faatuatua?

O le mana ma le malosiaga o le faamoemoe

A i ai le faamoemoe i o tatou loto ma mafaufau, o le a tatou taulai atu i a tatou faatinoga i le lumanai. O le faamoemoe e aumaia ai le malosi mautu ma le mautinoa nai lo le faamoemoe e le tumau. E mafai foi ona avea le faamoemoe ma punavai o le filemu, lē gaoiā, ma le mausali faalelagona a o tatou agai i luma i lo tatou toe faaleleia mai vaisu.

E tusa ai ma lenei mataupu faavae, na saunoa ai Peresitene Russell M. Nelson, “O le faamoemoe e sili atu nai lo se moomooga faivavale. O le faamoemoe, e faamalosia e ala i le faatuatua ma le alofa mama, e fausia ai se malosiaga malosi e pei o le uamea. O le faamoemoe o se taula i le agaga. … Afai o le a tatou pipiimau i le taula o le faamoemoe, o le a avea ma o tatou puipuiga e faavavau” (“A More Excellent Hope” [faigalotu a le Iunivesite o Polika Iaga, 8 Ian., 1995], 3, speeches.byu.edu).

O anafea na ou lagonaina ai le mana ma le talitonuga mautinoa ona o le faamoemoe ia Keriso?
O a ni faiga ma ni faatinoga faaleagaga i aso taitasi sa ou faia i lena taimi?
Na faapefea ona aafia lo’u mafaufau, lagona, ma le agaga i le faamoemoe? Na faapefea ona aafia ai au sini ma fuafuaga i le lumanai?
Na faapefea ona aafia ai a’u sootaga ma fegalegaleaiga ma tagata e alolofa ma popole ia te a’u?

Lisi o le lotofaafetai

O se tasi o auala e vaai ai i le Atua i o tatou olaga o le mafaufau loloto soo lea ma tusitusi e uiga i o tatou faamanuiaga. E mafai ona tatou malamalama lelei i le alofa o le Tama Faalelagi mo i tatou e ala i le vaavaai mo faamaoniga o Lona alofa ma le mana i o tatou olaga.

O le a se mea ou te faafetai ai?
O a ni mea lelei ua tutupu i lo’u olaga?
O faapefea ona ou vaaia le aao o le Atua i lo’u olaga?

Piimau i le faamoemoe i le lotolotoi o le toe tupu mai

Na aoao mai Elder Dale G. Renlund: “‘O se tagata paia o se tagata agasala e taumafai pea.’ … “E popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai. E manatu mai o Ia ia tatou taumafai pea” (“Le Au Paia o Aso e Gata Ai, Taumafai Pea,” Liahona, Me 2015, 56). Tatou te oo uma lava i lagona o le leai o se faamoemoe mai lea taimi i lea taimi a o tatou taumafai mo le toe faaleleia. E faapitoa lava le moni o lenei mea pe afai po o le taimi tatou te toe faia ai. Ae o lo tatou faamoemoe ma le toe faaleleia e sili atu ona mauaa i le alualu i luma nai lo le atoatoa. O se toe tupu mai e le aveesea ai a tatou taumafaiga muamua po o le saoasaoa e liliu atu ai ia Iesu Keriso. E mafai ona tatou aoao e faatumau lo tatou faamoemoe ia Keriso e tusa lava pe tatou te toe faia.

O a ni auala o loo ou taumafai ai e sui, ia lelei atili, ma alualu i luma?
O a nisi o manumalo po o faamanuiaga na ou maua talu ai nei i lo’u olaga?
O le a se tala a la’u lagolago, taitai o le Ekalesia, tagata o le aiga, ma uo e uiga i a’u taumafaiga ma le alualu i luma?

E mafai ona Ia laveaiina i tatou mai le pologa

“Ae afai tou te liliu atu i le Alii ma le faamoemoe atoa o le loto, ma tuu atu lo outou faalagolago ia te ia, ma auauna atu ia te ia ma le filiga atoa o le mafaufau, afai tou te faia lena mea, o le a laveaiina outou e ia e tusa ma lona lava loto ma lona finagalo, mai le pologa” (Mosaea 7:33).

O le a se mea e fesoasoani ia te au ia ou maua ai le faatuatua sili atu i le folafolaga o le a laveaiina au e Iesu Keriso?
E mafai faapefea ona ou liliu atili atu ia Iesu Keriso, tuu lo’u faalagolago ia te Ia, ma auauna atu ia te Ia ma le filiga atoa o le mafaufau? O a ni mea patino e mafai ona ou faaleleia atili ai?
O le a le uiga ia te au o le faatalitali ia Iesu Keriso e laveai au “e tusa ma lona lava loto ma lona finagalo?”