Laasaga 12: O le mauaina o se fagua faaleagaga e ala i le Togiola a Iesu Keriso o se taunuuga o le faia o nei laasaga, tatou te faasoa atu ai lenei savali i isi ma faatino nei mataupu faavae i mea uma tatou te faia.

O le manao e auauna atu o se taunuuga masani lea o le faagasologa o lo tatou faamalologa e ala mai i le Alii. E ala i lo tatou toe faaleleia, ua tatou oo ai i se suiga tele o le loto ia i tatou lava ma isi (tagai Alema 5:14). Na aoao mai Peresitene Russell M. Nelson: “[Tatou] te saili moni ia ola i poloaiga sili muamua ma le lona lua. A tatou alolofa i le Atua ma o tatou loto atoa, Na te liliu atu o tatou loto i le tulaga manuia o isi i se taamilosaga matagofie, ma mama” (“O le Poloaiga Lona Lua ma le Sili,” Liahona, Nov. 2019, 97).

Peitai, e le faigofie i taimi uma le auauna atu. E ui atonu tatou te mananao ai, ae e le mafai ona tatou auauna atu i tagata uma e manaomia le fesoasoani. O le a faaauau pea ona tatou manaomia le taitaiga ma le mana mai le Alii e auauna atu ai i isi. E mafai ona tatou tatalo mo se fesoasoani e matau ai ma faailoa mai auala e finagalo o Ia tatou te auauna atu ai. E mafai ona tatou fesili atu ia i latou o siomia i tatou e uiga i avanoa ma manaoga. Atonu tatou te ofo i le tele o avanoa o loo faigofie ona tatou maua. O le auauna atu i isi e mafai ona faigofie e pei o se ataata, pe mafai foi ona aofia ai e pei o se galuega faatino tele. E tatau ona tatou faaaogaina le faamasinoga atamai i la tatou auaunaga e aloese ai mai le sili atu nai lo tatou malosi po o gafatia.

O se tasi o auala sili e mafai ona tatou auauna atu ai o le faasoa atu lea o a tatou tala o le toe faaleleia. E mafai ona faaauau pea ona tatou auai i sauniga o le toe faaleleia ma molimau atu i le alofa tunoa ma le mana faamalolo o Iesu Keriso. A o avea i matou ma tagata fou, sa matou maua le faamoemoe mai ia i latou o e na galulue i laasaga ma maua le toe faaleleia muamua atu ia i matou. Ua tatou maua nei le avanoa e faasoa atu ai le savali o le toe faaleleia e ala i le faamatala atu o a tatou tala. Tatou te faasoa atu foi la tatou molimau i le mana o le Faaola pe a tatou i ai i le lotu ma o tatou aiga ma uo.

O se tasi o auala anoa ma le mamana e mafai ona tatou auauna atu ai o le galuega o le malumalu ma talafaasolopito o aiga. O lenei auaunaga e faamanuiaina ai e le gata ia i latou ua maliliu, ae e faamanuiaina ai foi i tatou. Na faamanatu mai ia i tatou e Peresitene Russel M. Nelson: “A o i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. E i ai sona uunaiga faamamaina ia i latou o e o loo auai i ai” (“O Tupulaga e Fesootai i le Alofa,” Liahona, Me 2010, 93). Mo le toatele o i tatou, o le galuega o le malumalu ma talafaasolopito o aiga o se vaega taua lea o lo tatou toe faaleleia.

O nisi o i tatou atonu e le o lagonaina le saunia e auauna atu i le malumalu. Atonu tatou te le lagonaina le faaosofia pe iloa foi le mea e amata ai le galuega o talafaasolopito o aiga. Ae e mafai ona tatou filifili e amata. E mafai ona tatou talanoa i o tatou epikopo po o peresitene o paranesi e uiga i o tatou manaoga e auauna atu. O lo tatou manao e fai le finagalo o le Alii ma faaauau pea i lo tatou toe faaleleia e mafai ona uunaia ai i tatou. Atonu e manaomia ona tatou faia ni suiga i o tatou olaga e ulufale atu ai i le malumalu. Atonu tatou te le iloa foi le auala e fai ai galuega o talafaasolopito o aiga, ae e mafai ona tatou ole atu mo se fesoasoani. E mafai ona fesoasoani peresitene o le Aualofa ma korama a toeaina ia i tatou ia iloa le mea e amata ai. O loo i ai foi punaoa i le initoneti e fesoasoani ia i tatou i le FamilySearch.org ma le ChurchofJesusChrist.org.

O galuega o malumalu ma talafaasolopito o aiga e maua ai le mana ma le malosi mo lo tatou toe faaleleia. O le a e maua e le gata i le puipuiga mai faaosoosoga ma maagao o le lalolagi, ae o le a e maua foi le mana patino—le mana e suia ai, mana e salamo ai, mana e aoao ai, mana e faapaiaina ai, ma le mana e liliu atu ai loto o tagata o lou aiga i le tasi ma le isi, ma faamalolo ai mea e manaomia le faamalologa” (Dale G. Renlund, “Talafaasolopito o Aiga ma Faamanuiaga o le Malumalu,” Liahona, Fep. 2017, 39). O mataupu faavae o loo i lenei taiala e taitai atu ai i tatou e mulimuli i le Faaola ma olioli i faamanuiaga uma ua ia te Ia mo i tatou, aemaise lava o faamanuiaga o loo maua i le malumalu.

“O le liua moni e sili atu nai lo le mauaina o se malamalama i mataupu faavae o le talalelei ma ua sili atu foi nai lo le mauaina o se molimau i na mataupu faavae. … O le liua moni o lona uiga ua tatou galulue i luga o mea ua tatou talitonu i ai ma faatagaina ai e fatuina ‘se suiga tele ia i tatou, po o o tatou loto,’ [Mosaea 5:2]. … [O le liua] e manaomia ai le taimi, taumafaiga, ma le galue” (Bonnie L. Oscarson, “Ia Liua Outou,” Liahona, Nov. 2013, 76–77).

A o suia e le Alii o tatou loto e ala i le liua ma le toe faaleleia, o le a avea i tatou ma punavai o le malosi i isi o e faatoa amata i lenei ala. Na ta’u atu e le Faaola ia Peteru, “Pe a liua mai oe, ona e faamalosi ai lea i ou uso” (Luka 22:32).

• E faapefea ona faatatau le faauigaga a Sister Oscarson o le liua i lo’u aafiaga i le toe faaleleia?

  Fatu se Faamatalaga

• O a ni o’u lagona e faatatau i le faamalosia o isi ao latou toe faaleleia mai amioga ua fai ma vaisu?

  Fatu se Faamatalaga

“Aua nei loto vaivai i le faia o mea lelei, aua o loo oulua faataatia le faavae o le galuega tele. Ma o mea iti e tutupu mai ai mea tetele” (Mataupu Faavae ma Feagaiga 64:33).

• O a ni o’u lagona pe a ou mafaufau e ola i nei mataupu faavae i vaega uma o lo’u olaga?

  Fatu se Faamatalaga

• E faapefea ona fesoasoani ia te au le iloa o mea tetele e faia i laasaga iti?

  Fatu se Faamatalaga

“O lo’u mitamitaga lenei, atonu ia mafai ona avea a’u o se meafaigaluega i aao o le Atua e aumai ai se agaga i le salamo; ma o lo’u olioli lea.

“Faauta foi, pe a ou iloa o’u uso e toatele ua salamo faamaoni, ma ua o mai i le Alii lo latou Atua, ona tumu ai lea o lo’u agaga i le olioli; ona ou manatua ai lea o mea ua faia e le Atua mo a’u, ioe, ua ia faafofogaina la’u tatalo; ioe, ona ou manatua ai lea o lona aao alofa na ia faaloaloa mai ia te a’u” (Alema 29:9–10).

Ua matou a’oa’oina le taua loloto i le toe faaleleia o le naunau e faasoa atu a matou molimau e uiga i nei mataupu faavae.

• E faapefea ona fesoasoani le faasoa atu o o’u aafiaga ou te tumau malosi ai i lo’u toe faaleleia?

  Fatu se Faamatalaga

“[Ma ua outou] loto ina faanoanoa faatasi ma e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma atonu tou te i ai, seia e oo lava i le oti, ina ia mafai ona togiolaina outou e le Atua, ma faitauina faatasi ma i latou o le uluai toetutu, ina ia mafai ona outou maua le ola e faavavau—

“O lenei ou te fai atu ia te outou, afai o le manao lea o o outou loto, se a se mea tou te tetee ai i le papatisoina i le suafa o le Alii, o se molimau i ona luma ua outou ulu atu i se feagaiga faatasi ma ia, o le a outou auauna atu ia te ia ma tausi ana poloaiga, ina ia mafai ona liligi atili tele mai e ia lona agaga i luga o outou?” (Mosaea 18:9–10).

O lou aafiaga i vaisu e fesoasoani ia te oe e malamalama ai ia i latou o loo tauivi ma vaisu; o lou aafiaga i le toe faaleleia e fesoasoani ia te oe e faamafanafana ai i latou.

• Na faapefea ona faateleina lo’u manao e tu o se molimau a le Atua talu ona ou mulimuli i laasaga o le toe faaleleia?

  Fatu se Faamatalaga

“Vagana ai i le tulaga o Lona Alo Pele e Toatasi e atoatoa, na o tagata lē atoatoa lava sa galue ai le Atua” (Jeffrey R. Holland, “Le Alii e, Ua Ou Faatuatua,” Liahona, Me 2013, 94).

“E leai se tasi o i tatou e i ai ni olaga atoatoa po o ni aiga atoatoa; E mautinoa lava ou te le atoatoa. Pe a tatou saili e malamalama i isi o e o loo feagai foi ma luitau ma le lē atoatoa, e mafai ona fesoasoani ia i latou e lagona ai e le o tuua na o i latou i a latou tauiviga. E manaomia etagata uma ona lagonaina o loo latou auai moni lava ma e manaomia i le tino o Keriso” (J. Anette Dennis, “E Avegofie Lana Amo ma o Lana Avega foi e Māmā Ia,” Liahona, Nov. 2022, 81).

O nisi taimi tatou te mafaufau ai pe ua tatou saunia e faasoa atu le toe faaleleia o o tatou olaga i isi ona tatou te le o faataitaia atoatoa lava nei mataupu faavae.

• E faapefea e le iloaina o loo galue le Faaola e ala mai i tagata lē atoatoa ona fesoasoani ia te au ia sili atu lo’u naunau e faasoa atu lo’u aafiaga i le toe faaleleia?

  Fatu se Faamatalaga

“Aua ou te le ma i le talalelei ia Keriso; aua o le mana lava lea o le Atua e ola ai i latou uma o e faatuatua” (Roma 1:16).

• O a o’u mafaufauga ma lagona a o ou toe tepa i tua i lo’u suiga faaleagaga i le faagasologa atoa o le toe faaleleia?

  Fatu se Faamatalaga

• Pe ou te musu ea e faasoa atu lo’u aafiaga i le toe faaleleia? Afai e sa’o, aisea?

  Fatu se Faamatalaga

“Alu i i lou ala i soo se mea Ou te loto i ai, ma o le a tuu atu ia te oe e le Faamafanafana le mea e te faia ma le mea e te alu atu i ai.

“Tatalo e le aunoa, nei e ulu atu i faaosoosoga ma toesea ai lou taui.

“Ia faamaoni e oo i le iuga, ma faauta, ua ou faatasi ma oe. O nei upu ua le ā se tagata pe ā ni tagata, ae ua ā au, o Iesu Keriso lava, lou Togiola, e ala i le finagalo o le Tamā” (Mataupu Faavae ma Feagaiga 31:11–13).

Ua tumu tusitusiga paia i taitaiga e fesoasoani ia i tatou e faatumauina se ala faaleagaga o le olaga e toe taitaiina atu ai i tatou i le Atua.

• O a ni taitaiga patino ou te maua i nei fuaiupu?

  Fatu se Faamatalaga