’Ia tāvini te mau melahi i te mau melahi 

E ha’amata vau i hea i te parau nō ni’a i tō’u metua vahine, ’o Beryl Soane ? I te 100ra’a o tōna matahiti, ’ua riro ’oia ’ei hi’ora’a nō te fa’aro’o māmū ’o tei putapū i te mau ta’ata ati a’e iāna. Fānauhia i Sutton, Surrey, Fenua Beretāne, ’e ’ua tāvini i roto i te Tama’i Rahi Piti o te ao nei, ’ua fāriu ’ē roa te tere pae vārua o Mā i te hō’ē mahana ve’ave’a nō te tau ve’ave’a i te matahiti 1958 i ’Āfirika Apato’a, ’a pātōtō ai nā misiōnare to’opiti nō te Fenua Canada mai i tōna ’ōpani.

I terā tau tē tai’o ra ’oia i te hō’ē buka nō ’ō mai i te vaira’a buka ’o tei fa’ahiti i te parau nō te pāpa’a parau ’auro i te Fenua Marite tahito, nō reira i parau ai teie nā tāne ’āpī nō ni’a i te hō’ē pāpa’a parau ’auro ’e te Buka a Moromona, ’ua tupu te hō’ē mea i roto iāna. ’Ua pure Mā ma te ’ā’au tae mau nō te ’ite e parau mau ānei tā rāua poro’i, ’e ’ua tae ’oi’oi roa mai te pāhonora’a ma te pūai. ’Ua turu taua ha’apāpūra’a iāna nō ’ō mai i te Vārua Maita’i nō te mau matahiti e 67 i ma’iri a’era ’ei melo itoito nō te ’Ēkālesia a Iesu Mesia i te Feiā Mo’a i te mau Mahana Hope’a nei

Noa atu te pāto’ira’a nā tō tō’u metua tāne ’utuāfare, ’ua tāmau noa Mā i roto i tōna fa’aro’o ’āpī. ’Ua ha’apa’ari ’oia e piti tamari’i ma te ’evanelia ’e ’ua tāvini i roto i te mau pi’ira’a e rave rahi, ’a noho ai ’oia i ’Āfirika Apato’a, te Fenua Beretāne, ’e i te hope’a te Fenua ’Auterāria. Tāna mau pi’ira’a au roa a’e, ’o te ha’api’i atu ïa, i te Sōtaiete Tauturu, Paraimere, Te Ha’api’ira’a Tumu o te ’Evanelia, ’aore rā e rave rahi mau ha’api’ira’a nō te ha’apa’ari i te mau ’orometua. Ē tae roa atu i teie mahana, e fa’ari’i au i te mau poro’i nā te ao ato’a nei, nā te mau ta’ata ’o tāna i ha’amaita’i i te orara’a, nā roto i tōna hi’ora’a ’e te here nō te Metua i te ra’i ’e nō Iesu Mesia.

Piti ’ahuru ma va’u matahiti i muri a’e i tōna bāpetizora’ahia, ’ua pāhonohia tā Mā mau pure ’ia ’āmui tō’u metua tāne herehia i te ’Ēkālesia. I te matahiti 1986, ’ua tā’atihia rāua i roto i te hiero nō Johannesburg ’Āfirika Apato’a—e hō’ē taime o te ’oa’oa ateate ’o tei fa’ahei i tō rāua fa’aipoipora’a nō 61 matahiti.

’Ei tāparau rahi, ’ua vaiiho Mā e rave rahi ’āfata o te mau pāpa’a parau, te mau poro’i, te mau rata, ’e e piti buka nō tō mātou ’utuāfare—te hō’ē nō ni’a ïa i tōna fa’afāriura’ahia, ’ua ’ī te tahi atu i te mau ’ā’amu iti nō tōna orara’a, ’ia ’ite tāna huā’ai ’o vai mau ’oia.

Nā tōna huru aroha ’e te fa’ahoa, ’ua ’atu’atu ’oia e rave rahi hoara’a nā te ao ato’a nei, nā roto i te mau rata ’e te mau tāniuniura’a ē tae roa atu e’ita ’oia e nehenehe.

’Ia fa’a’ino a’era te ruhiruhiāra’a iāna, ’ua tāpe’ahia Mā i roto i te hō’e pārahira’a tūra’i i roto i te hō’ē fare utuutu i ni’a i te mou’a nō Tamborine i Queensland. Nō te mea ’aita ’oia i nehenehe i haere i te purera’a, tē fa’ari’i tāhepetoma ra ’oia i te ’ōro’a mo’a nā te mau melo aupuru nō tāna pāroisa. Noa atu ’ua parau ’oia ma te hia’ai nō ni’a i tōna mau taime i roto i te hiero, ’ua fa’ari’i ’oia ē e mea ātea roa te hiero nō Brisbane ’Auterāria—hau atu e hō’ē hora te maoro.

I muri a’era ’ua tae mai ra te hō’ē ha’amaita’ira’a nā roto ia Mikaela Hulands, e vahine ’āpī, ’e e misiōnare tei ho’i mai ’o tē ’ohipa ra i roto i te fare utuutu. ’Ia ha’api’i mai Mikaela ē e melo Beryl nō te ’Ēkālesia, ’ua tupu te hō’ē mea i roto iāna. Noa atu tā vetahi ’ē mana’o pe’ape’a ē e mea fa’arohirohi roa te tere maoro i te hō’ē ta’ata 99 matahiti, ’ua itoito noa ra Mikaela.

« E ’ohipa vau nō Beryl i te mau mahana ato’a », tē parau ra ’oia. « ’Ua ’ite au i tāna e nehenehe e rave. »

’Ua ta’a ia Mikaela ē i muri mai i nā ’ahuru matahiti i tāvini ai Mā ia vetahi ’ē, ’ua tae te taime ’ia tāvini te hō’ē ta’ata iāna. ’Ua mā’iti ’oia i te hō’ē mahana, ’ua tauturu i te fa’aineinera’a i tō Mā mau ’ahu nō te hiero, ’e ’ua noa’a te tauturu nā Tuahine Carolynne Bax, e hoa herehia nō ’ō mai i tā Beryl pāroisa ’o tei fa’ari’i i tāna ’ōpuara’a.

I te 23 nō Māti 2024, teie nā vahine to’opiti, ’o tei rave i teie ’ohipa nō te aroha, ’ua tauturu rāua i tō’u metua vahine ’ia tomo i roto i tō rāua pere’o’o, ’e ’ua riro teie ’ei mahana ’oa’oa roa a’e nō tōna mau matahiti hope’a.

’Ua fa’anaho-māite-hia te tere i te hiero i Brisbane. I te heiro, ’ua fārerei atu Mā i te tahi atu mau ta’ata tei haere i reira, tei rotopū ia rātou te peresideni nō te hiero ’o Richard Gordon ’e tāna vahine, te peresideni vahine ’o Karen Gordon, ’o tei paraparau iāna. E mahana māere ’e te fa’aitoito ïa, ’e i te hope’a, ’ua ho’i Mikaela ’e ’o Carolynne i te hō’ē Beryl rohirohi ’e te ’oa’oa ’e te fa’ateiteihia ho’i i tōna fare utuutu.

’Ua fa’aō ia Mā teie hō’ē noa ’ohipa aupuru nā te utuutu ’āpī i te tahi fa’ahou taime mo’a ’ia ho’i i te fare o te Fatu i teie nei orara’a.

’Ua ora noa Mā e hō’ē matahiti, ’e ’ua ti’a iāna ’ia fa’a’oa’oa i tōna 100 matahiti, hou ’oia i fa’aru’e mai ai.

I teienei, ’ia feruri ana’e mātou nō ni’a i tōna orara’a māere, e ha’amaita’i noa tōna hi’ora’a maita’i i tō mātou ’utuāfare nā te mau rāve’a a’ita paha ’oia i mana’o. ’Ua ’āmuihia tō mātou mana’o ē e mea pūai ’e te here tāna fa’aurura’a ia mātou ’e i tōna mau mo’otua ’e tōna mau hina. E mea au roa nā mātou tōna mau viretu, tōna parau noa i te parau mau, tōna huru fa’a’ārearea maita’i.

I tōna nā matahiti hope’a, ’ua pāto’i Mā i te ’oto roa nō tōna iho fifi noa atu te mau ’ati i roto i te fare utuutu. ’Ua parau pinepine ’oia nō ni’a i te fa’anahora’a nō te fa’aorara’a ’e i tōna here tē tupu ra i te rahi nō te Metua i te ra’i ’e nō Iesu Mesia. ’Ua fa’ari’i ’oia i tā te peropheta a’ora’a ’ia « feruri tiretiera », e mea tā mātou i fa’aha’amana’o ma te ’ārearea i te tahi ’e i te tahi.

’Ua ’ana’anatae Mā nō te ’ite fa’ahou i te feiā tāna i here—i tō’u metua tāne, tōna metua vahine, tōna tū’ane, ’e tā’u tamaiti ’o Brad, ’o tei paremo i hopu ai ’oia ma te tauturu ’ore i te 24ra’a o tōna matahiti. ’Ua turu tōna fa’aro’o i te mau ’utuāfare mure ’ore iāna nā roto i te mau ’ati ato’a.

I te roara’a o tōna 67 matahiti o te melora’a, ’ua hāmani tō Mā fa’aro’o fāriu ’ē atu ’ore i te mau tō’ahe’ahera’a tei tae ātea a’e i tō mātou ’utuāfare ana’e. Mai te misiōnare ’āpī tei ho’i ’o tei fa’auruhia i te tāvini iāna, ē tae atu i te mau hoa e rave rahi nō te tahi mau fenua ra’ituāta’a mai ’o tē parau noa nei nō ni’a i tōna fa’aurura’a, ē atu atu i te mau melo nō tōna ’utuāfare ’o tē pe’e noa nei i te ’ē’a tāna i ha’amāramarama — tē fa’aha’amana’o nei tō Beryl Soane ’aepau ē ’aita e hope’a mau nō te hō’ē orara’a fa’aro’o. E ho’i mai te here tā tātou e hōro’a atu nō te ha’amaita’i, e tupu pinepine te reira nā roto i te rima o te mau melahi i tīa’i-’ore-hia.