Te ihota’ata hanahana : Te parau mau o te ’evanelia tei taui i tō’u orara’a

Hō’ē parau mau o te ’evanelia a Iesu Mesia ’o te taui i te orara’a ’oia ho’i e mau tamari’i tātou nā nā metua i te ra’i.

’Ua ha’api’i Elder Patrick Kearon, nō te Tino ’Ahuru ma Piti ’āpōsetolo nō ni’a i te « hō’ē ō motunene nō te parau mau mure ’ore e turu nei i tō tātou ’aravihi, ’ia fa’ari’i i te tā’āto’ara’a o te mau mea tā te Metua e hina’aro e hō mai nō tātou—hō’ē ō faufa’a roa nō te ’ite ē, ’ia fa’ari’i-mau-ana’e-hia ’e ’ia fa’ari’ihia ma te hōhonura’a o te vairua, e hōro’a mai i te hō’ē aura’a o te mau ’oa’oa ’e te mau fifi o te orara’a ’e i tā tātou mau uira’a pāhono-’ore-hia : ’Oia ho’i E mau tamari’i mau tātou nā te Atua ».

Mai te taime ’a tupu ai teie ’ohipa ’e tō’u pi’ira’a misiōni, ’ua putapū vau i te parau mau o teie mau parau. ’Aita roa i mo’ehia iā’u e nāhea vau i te ha’apāpūhia ’e i te ha’apūaihia ’a ’ite mau ai au ē, ’ua ’ite maita’i te Atua iā’u ’e ’ua here iā’u.

Ta’a ’ē noa atu teie parau mau, ’aita te ao ’ati a’e iā’u e fa’aha’amana’o mai nei iā’u i tō’u mau a’a hanahana. ’Ua ’ite a’era vau ē, e ti’a iā’u e rave i te hō’ē tauto’ora’a pāpū mau nō te ha’amana’o i tō’u ihota’ata hanahana ’e te mana e tahe mai nā roto mai i te reira.

Nō’u nei, tei roto i te reira te mau mea mai te feruri-hōhonu-ra’a i te temeio o tō’u tino ’e e aha te mea e fa’ati’a iā’u ’ia rave ’e ’ia ora i te mau mahana ato’a.

Tē ’ite ato’a nei au ’ua natihia vau i tei Hāmani iā’u ’ia vai ana’e au i roto i te hau o te nātura. Te hi’ora’a i te nehenehe o te mau mou’a ’aore rā te tahara’a o te mahana, e ha’amana’o vau ē ’aita te Atua i fa’atinahia ’ia fa’anehenehe i te fenua. ’Ua nā reira rā ’oia ’e ’o Iesu Mesia nō tātou nō te mea tē hina’aro nei rāua ’ia ’oa’oa tātou i te mau mea māere o teie nei ao ’e ’ia ha’amana’o tātou i tō rāua here (hi’o Mose 6:63).

’E te purera’a i tō tātou Metua i te ao ra i te mau mahana ato’a—i te fa’a’itera’a iāna i tō’u mau nīno’a mana’o ’e ’ia hāro’aro’a ē, tē hina’aro nei ’oia e fa’aro’o ’e e paraparau iā’u—e tauturu te reira ’ia fa’ahōhonu i tō’u natira’a hanahana ’e ’ōna. Tē fa’aha’amana’o nei te pure iā’u ē, ’aita vau e vai ’ōtahi nei ’e tē arata’i nei ’oia iā’u, noa atu ’aita te mau mea tā’u e hia’ai nei e tupu i teienei. Tē ti’aturi nei au ē, hō’ē Metua here, ’ua ’ite i te taime tano e ō mai ai te tahi mau ha’amaita’ira’a i roto i tō’u orara’a.

’Aita tā’u misiōni i riro i te mea ’o tā’u i mana’o, ’ua ora rā vau i te mau ’itera’a ’o tei tauturu iā’u ’ia hāro’aro’a, nō te aha te Metua i te ao ra i hina’aro ai ’ia tāvini au i roto i tō’ū fenua. Te fa’a’itera’a i te parau mau o te ihota’ata hanahana i te feiā ’o tei ’ore ā i ’ite i te reira, ’ua fa’a’ī te reira iā’u i te ’oa’oa.

’Aita e nehenehe iā’u e feruri i te orara’a ma te ’ite ’ore ’o vai mau vau—e ’ite au i te māoaoa ’e te mo’e.

’Ia feruri ana’e au i te tumu o tō’u orara’a, e hōro’a mai te reira iā’u te tīa’ira’a rahi ’ia ’ite ē, te tāhuti nei e tūha’a iti ha’iha’i noa nō te fa’anahora’a a te Metua i te ao ra nō’u. Maoti te hōro’a hanahana o te ora ’o tāna i hō mai nō’u ’ei tamari’i nāna, e nehenehe au e rave, e ha’api’i mai ’e e riro mai hau atu ā i tā’u e riro nei i teienei. ’Ua māuruuru roa vau i te mea ē, ’ua pūpū ’oia i tāna Tamaiti here ’ei Fa’aora nō’u ’e ’ua fa’ati’a ’oia iā’u ’ia mā’iti i te tomo i roto i te tāhuti nei, nō te riro mai iāna te huru ’e ’ia ho’i atu i te fare.

Noa atu te mea tā te ao nei i fa’aherehere nō ’outou, tē ti’aturi nei au e ha’amana’o tāmau noa ’outou ’o vai mau ’outou. E hōro’a mai teie parau mau ia ’outou te mana nō te fa’aruru i te mau mea ato’a e tupu mai i ni’a i tō ’outou ’ē’a.

Mai tā te Atua i fa’aro’o iā’u i roto i tō’u mau taime hepohepo, ’ua ’ite au e fa’aro’o tāmau ’oia ’e ’ua here ato’a ia ’outou.