« Te mata nō te hi’o i te maita’i », Liahona, Māti 2026.
Te reo o te feiā mo’a i te mau mahana hope’a nei
Te mata nō te hi’o i te maita’i
I te ha’amatara’a te mata o tā’u vahine i te roroma, ’ua fāriu māua i ni’a i te tāra’ehara a Iesu Mesia nō te tāmarūra’a.
Fa’ahōho’ara’a nā Briana Kranz
I te ’āva’e Tēnuare 2025, ’ua ha’amata tā’u vahine ’o Kayla i te fa’ari’i te fifi nō tōna mata. Tē autā nei ’oia i te māuiui upo’o tāmau ’e te māuiui i te mata ’aui. ’Aita ’oia e ’ite maita’i ra, ’e ’ua ha’amata māua i te ha’ape’ape’a.
I tō māua fārereira’a i te hō’ē taote mata, ’ua ’ite atu ’oia te hō’ē nē’ira’a pūai i tōna mata ’aui. ’Ua arata’i atu ’oia ia māua i te hō’ē taote mata nō te hi’opo’a ē tē māuiui ra ānei ’oia i te ma’i a’auira mata. Tē fifi rahi nei te mata o Kayla. ’Ua pi’i māua e rave rahi taote, terā rā e rave rahi piha tōro’a tei ’ōpani nō te mau mahana fa’afa’aeara’a. Te mea noa tā māua e nehenehe e rave ’o tē tīa’ira’a ïa.
’Ua pe’ape’a roa māua. ’Ua fāriu atu māua i ni’a i te Metua i te ao ra i roto i te pure nō te tauturu, i te tāparura’a ’ia tupu te mau mea ato’a mai te au i tāna fa’anahora’a. ’Ua hina’aro māua i te pāturura’a, ’e ’ua putapū māua i tōna here. ’Ua ’ite māua e maita’i te mau mea ato’a.
I te pae hope’a, ’ua fa’ari’i māua i te hō’ē fārereira’a e maha noa mahana i muri mai ’e te hō’ē taote ’aravihi, e tāpura tīa’ira’a tāna nō e rave rahi ’āva’e te maoro. ’Ua ’ite atu te taote mata ē ’ua marū mai te nē’ira’a o te mata o Kayla. ’Ua fa’ata’a mai ’oia i te tahi mau topatara’a mata, ’e ’ua ho’i atu māua i te fare.
’Aita hō’ē noa a’e fifi i tupu mai i ni’a i te mata o tā’u vahine, ’ua ha’api’i mai rā māua ’ia hi’o i te pae maita’i ma te fāriura’a i ni’a i te tāra’ehara a Iesu Mesia. Tē tauturu nei te Fa’aora ia tātou ’ia feruri noa i te pae maita’i ’e ’ia ’oa’oa noa atu te mau tāmatara’a. ’Ua ’ite māua ē e fa’aora ’oia ia tātou i tōna iho taime ’e nā roto i tāna iho rāve’a.
’Aita Iesu Mesia i ’aufau noa i tā tātou mau hara—’ua mamae ato’a ’oia i tō tātou mau « māuiui ’e te mau ’ati … huru rau ato’a ; … ’ia fa’a’īhia tōna ra ’ā’au i te aroha, mai te au i te tino, ’e ’ia ’ite ’oia nā roto i te tino i te rāve’a nō te fa’aora’i i tōna mau ta’ata ’ia au i tō rātou paruparu » (Alama 7:11–12).
’Ua putapū māua i te tāmāhanahanara’a nō te mea ’ua ’ite māua ē ’ua māramarama Iesu Mesia i tō māua ’oto. Nō te mea ’ua tā’amuhia māua iho iāna, ’ua ’itehia ia māua « te ora i tō [māua] vārua » (hi’o Mataio 11:28–30).
’Ua ha’api’i te peresideni rahi Camille N. Johnson, Peresideni rahi nō te Sōtaiete Tauturu :
« E nehenehe Iesu Mesia e ha’amāmā i tā tātou hōpoi’a.
« E nehenehe Iesu Mesia e amo i tā tātou mau hōpoi’a. …