E arata’ira’a a te Faufa’a Tahito nō te tauahi i te ihota’ata hanahana

I vai na te Logo i te matamua ra, nā Eva Timothy, ’e fa’ati’ahia e tāhōho’a nō te fa’a’ohipara’a i roto ana’e i te ’Ēkālēsia

E ha’avare ’ia parau noātu vau ē, ’aita vau i uiui na e aha tō’u ti’ara’a i roto i te ’ōpuara’a a te Atua.

Nāhea vau—i roto i tō’u huru rirerire ’ore—e ō ai i roto i Tāna ’ōpuara’a rirerire ? Nāhea vau ’ia fa’ari’i ti’amā i te mau pea tāpiti fa’ahou tei hōhia mai e tō tātou Metua i te Ao ra nō’u i terā taime ’e i terā taime ? Nāhea vau ’ia ti’aturihia i te fa’a’ite i tōna here ia vetahi ’ē, ’a ’ore ho’i te reira e iho nei i roto iā’u iho ?

Mai te mea ’ua mātau ’outou i teie tapineva ’āureure, e’ita ïa ’outou e mo’emo’e.

Hō’ē o te mau rāmā rahi a te ’enemi,’o te ’arora’a ïa i tō tātou hāro’aro’ara’a i tō tātou iho nātura hanahana. ’Ua ha’api’i ’o Elder Brian K. Taylor, nō te Hitu ’Ahuru : « Tē ’ū’ana nei teie tama’i nō ni’a i te nātura hanahana, i te mea ē, tē ha’aparare nei Sātane i te mau mauha’a tama’i nō te ha’amou i tō ’outou ti’aturira’a ’e tō ’outou ’ite i tō tātou aura’a e te Atua. »

’Aua’e rā, ’ua ha’api’i tō tātou Metua i te Ao ra—’e tē ha’api’i noa nei ā—i Tāna mau tamari’i nō ni’a i tō rātou faufa’a. I te ha’amatara’a mai ā, ’ua fa’aruru na paha te mau ta’ata i roto i te mau pāpa’ira’a mo’a i te tahi o te mau uira’a tā ’outou e nehenehe e ui i teie mahana.

’A tuatāpapa ai ’outou i te Faufa’a Tahito i teie matahiti, e nehenehe ’outou e ha’api’i i tō ’outou iho nātura hanahana nā roto i te fa’a’ohipara’a i te mau ’itera’a o te ta’ata i roto i te mau pāpa’ira’a mo’a i roto i tō ’outou iho orara’a. ’E ’ite paha ’outou i te mau pāhonora’a i te hō’ē uira’a faufa’a roa :

’O vai au ?

’Ua tāpa’o ’o Adamu ’e ’o Eva nō te ’ōmuara’a roa o te hina’aro o te ta’ata ’ia hāro’aro’a i te ihota’ata hanahana. ’Ua hāmani tō tātou Metua i te Ao ra ia rāua ’ia au i Tōna iho hōho’a, ’ua hōro’a ’oia nā rāua e ti’a’au i te fenua ’e i te mau hāmanira’a ato’a i ni’a iho, ’e ’ua fa’aue ia rāua ’ia fa’arahi ’e ’ia fa’a’ī i te fenua (hi’o Mose 2:26–28).

’Ei hua’ai nō Adamu ’e ’o Eva, e nehenehe ’outou e fa’a’ohipa i teie ā mau parau tumu nō te ihota’ata i ni’a ia ’outou iho. E tamari’i vārua mau ’outou nā te Atua ma te hōpoi’a hanahana ’ia fa’atere ’ei ti’a’au pa’ari ’e ’ia patu i te hō’ē ’utuāfare mure ’ore.

I te ’amura’a ’o Adamu ’e ’o Eva i te hotu o te rā’au nō te ’ite i te maita’i ’e te ’ino, ’ua ti’avaruhia rāua i rāpae i te ’ō Edene. Noātu ē, ’ua tāpū-’ē-hia rāua i te aro o tō tātou Metua i te Ao ra, i te pae tino ’e i te pae vārua, ’ua hōro’a mai ’Oia i te hō’ē Fa’aora nō te tauturu ia rāua ’ia upo’oti’a i ni’a i te pohe tāhuti ’e i te pohe vārua nā roto i te tāra’ehara a Iesu Mesia.

Mai ia Adamu ’e ’o Eva, « ’e faufa’a rahi tō te mau vārua ta’ata i mua i te aro o te Atua. » (Te Ha’api’ira’a Tumu ’e te mau Fafaura’a 18:10).

’Ua tā’amu-ti’a-hia te ’ā’amu ’o Aberahama i ni’a i te ihota’ata hanahana. ’Ua parauhia e te Fatu te hō’ē hope’ara’a mure ’ore ia Aberahama :

« E fa’ariro ho’i au ia ’oe ’ei nūna’a rahi, ’e e ha’amaita’i au ia ’oe, ’e e fa’arahi atu vau i tō ’oe i’oa ; ’e e riro ’oe ’ei maita’i :

« ’E ’o tei ha’amaita’i ia ’oe ra, ’o tā’u ïa e ha’amaita’i ; ’e ’o tei fa’a’ino ia ’oe ra, ’o tā’u ïa e fa’a’ino : ’e ’ei ia ’oe e maita’i ai te mau fēti’i ato’a o te ao nei » (Genese 12:2–3).

I muri a’e e rave rahi matahiti tīa’ira’a ma te fa’aro’o, ’ua ha’amaita’ihia ’o Aberahama ’e ’o Sara nā roto i te fānaura’ahia mai tā rāua tamaiti, ’o Isaaka. I muri iho, ’ua fa’aue te Atua ia Aberahama ’ia hōro’a ia Isaaka ’ei tūsia « te hō’ē taipe ïa nō te Atua ’e tāna ra Tamaiti fānau tahi » (Iakoba 4:5). I tō Aberahama fa’a’itera’a ē, ’ua tae roa tōna mana’o i te rave i te reira tūsia, ’ua tāpe’ahia ’oia e te hō’ē melahi a te Fatu.

Te taiʻo nei tātou :

« Tē parau nei Iehova, ’ua tapu vau ’iā’u iho, nō te mea ’ua nā reira mai ’oe, e ’aita a’enei ’oe i pipiri i tō tamaiti, i tō tamaiti hō’ē roa ra :

« E ha’amaita’i rahi roa vau ia ’oe na, e fa’arahi au i tō hua’ai ; mai te feti’a o te ra’i ra, ’e mai te one i tahatai ra ; ’e e noa’a te ’uputa ’oire o tō rātou mau ’enemi i tō ’oe ra hua’ai ;

« ’E e maita’i te mau fenua ato’a o te ao nei i tō ’oe na hua’ai ; ’o ’oe i fa’aro’o mai i tā’u reo nei » (Genese 22:16–18).

Tē ha’api’i nei teie ’ā’amu pūai ē, ’o rātou ato’a ’o tē rave ’e ’o tē ha’apa’o i te mau fafaura’a i tō tātou Metua i te Ao ra, e nehenehe rātou e fa’ari’i i te mau ha’amaita’ira’a i fafauhia i te hua’ai a Aberahama. ’Ei tamari’i nō te fafaura’a, e nehenehe ’outou e fa’ari’i i te mau ha’amaita’ira’a i parauhia nō te fafaura’a a Aberahama mā te mau-māite-ra’a i tei parauhia i mua i te Fatu i te bāpetizora’a ’e ’aore rā i te mau fafaura’a hiero.

Tē ha’api’i nei ’o Hagara—te tāvini ’o Sara, ’e metua vahine ’o Isemaela—i tō tātou ’aravihi maere nō te tūora. I te fānau-ra’a-hia mai ’o Isaaka, te tamaiti a Aberahama ’e a Sara, ’ua ti’avaruhia ’o Hagara ’e ’o Isemaela i te mēdēbara (hi’o Genese 21:9–14).

I tōna ’itera’a i tōna ’ati ’e tāna mau tāparura’a onoono ’ia ora ’o Isemaela, ’ua tono te Fatu i te hō’ē melahi nō te tāmāhanahana iāna : « ’Eiaha e mata’u ; ’ua fa’aro’o ho’i te Atua i te reo o te tamaiti i reira ra. « A ti’a, e fa’ati’a i te tamaiti i ni’a, e mau iho tō rima iāna ; e fa’ariro ho’i au iāna ’ei fenua rahi ato’a » (Genese 21:17–18).

Noātu te mo’emo’e ’o Hagara i roto i te medebara, ’aita tō tātou Metua i te Ao ra i fa’aru’e iāna. ’Ua pāruruhia ’e ’ua fa’autu’ahia ’oia i te utu’a maita’i nō tōna fa’aro’o ’e te itoito.

Mai ia Hagara, e mana’o paha ’outou ’o ’outou ana’e tē tere nei nā roto i te medebara. Mea faufa’a rā ’outou i te hi’ora’a o tō ’outou Metua i te Ao ra. Noātu e oriori haere ’outou nā te mēdēbara nō te hō’ē tau, ’aita rā ’outou i mo’ehia Iāna. E fa’aineine ’Oia ia ’outou ’ia rave i te mau ’ohipa rarahi nō te fa’ati’a i tōna bāsileia.

’Ua pi’ihia ’o Mose e tō tātou Metua i te Ao ra ’ia fa’aora i te ’āti ’Īserā’ela i te tītīra’a i ’Aiphiti. ’Ua rave ’oia e rave rau temeio mana tei tātara ia rātou i te tītīra’a (hi’o Exodo 7 ; 14).

Noātu tē manuiara’a i roto i tōna pi’ira’a, ’aita ’o Mose i ti’aturi noāna e mara’a iāna tā te Metua i te Ao ra i ani Iāna ’ia rave. I tō Mose fa’a’itera’a i tōna mau paruparu, ’ua pāhono mai te Fatu : « ’Ei pīha’i-ato’a-iho ïa vau ia ’oe. E teie tā ’oe tāpa’o e ’ua tonohia ’oe e au : ’ua oti ana’e te mau ta’ata i te arata’ihia mai e ’oe mai Aiphiti mai, ’ei ni’a mau i teie nei mou’a ’outou e ha’amori ai i te Atua » (Exodo 3:12).

’Ua māuruuru ’o Mose i tōna ihota’ata ’ei tamari’i nā te Atua ’e ’ua tu’uhia te mana o te Metua i te Ao ra i ni’a iāna nō te fa’atupu i tāna mau temeio. Mai ia Mose, e nehenehe e roa’a ia ’outou te mana o te Atua nō te rave i te ’ohipa a te Atua ’a māuruuru ai ’outou i tō ’outou tā’amura’a mure ’ore e te Metua i te Ao ra.

Nō reira, ’O vai ’outou ?

’Ua tae i te taime e ’ite ai ’outou i te pāhonora’a nō ’outou iho.

’A ’imi i te mau fa’ahorora’a nō te pāhono i tā ’outou mau uira’a, ’e e ’itehia ia ’outou. Tē hina’aro nei tō tātou Metua i te Ao ra ’ia hāro’aro’a maite ’outou ’o vai ’outou, ’ia here ’outou ia ’outou iho mai Iāna i aroha ia ’outou.

Te ’itera’a i tō ’outou iho nātura mure ’ore ’e te hanahana, tei te poro aroā noa a’e—e aha ïa tā ’outou e tīa’i nei ?