Te parau ’āpī ’oa’oa

Fa’ahōho’ara’a nā Briana Kranz

’Ei ta’ata tupu, ’ua fārerei māua Maritza i tō māua ’āpīra’a. Noa atu e ma’a matahiti pa’ari a’e ’oia iā’u, ’ua riro mai māua ’ei mau hoa rahi ’e te fātata roa.

I te 19ra’a o tō’u matahiti ’e e hina’aro ta’a ’ē tō’u ’ia arata’ihia, ’ua fa’a’ite mai ’oia iā’u i te ’evanelia i fa’aho’i-fa’ahou-hia mai a Iesu Mesia, nā roto i te mau misiōnare rave tāmau. ’Ua ’ite ri’i a’ena vau nō Te ’Ēkālesia ’a Iesu Mesia i te Feiā Mo‘a i te mau Mahana Hope’a nei maoti tō’u metua tāne fēti’i ’e tō’u māmā rū’au. E mau pionie rāua nō te ’Ēkālesia i roto i tō’u ’utuāfare.

’Ua ’āpiti mai Maritza iā’u i te roara’a o tō’u fa’afāriura’a, ’ua tauturu iā’u ’ia fa’ananea i tō’u ’itera’a pāpū nō te Fa’aora ’e nō tāna ’evanelia, ’e ’ua pāturu iā’u i te mau taime ato’a e hina’aro ai au iāna.

’Ua ha’api’i mai au nā roto mai iāna i te ’oa’oa nō te orara’a i te ’evanelia ma te ’ōhie ’e te hina’aro mau. ’Ua fa’ahiahia vau i tōna fa’ari’i ’ōhie, tāna rāve’a ’ia tāhō’ē i te ’utuāfare ’e te mau hoa, ’e tōna tāpe’a-māite-ra’a i roto i te fa’atupura’a i te mau fā pae tino ’e pae vārua. ’Ua ha’api’i mai au nā roto mai iāna ē ’ia fārerei ana’e tātou i te parau mau, e ti’a ia tātou e fa’a’ohipa i te mea tā tātou i ha’api’i mai, ma te ha’apa’ora’a i te mau fa’auera’a ’e te fa’a’ohipara’a i te mau ha’api’ira’a o te ’evanelia i roto i tō tātou orara’a ’e te ’utuāfare. Nō te vai ha’apa’o maita’i noa, e ti’a ia tātou ’ia vai itoito noa i roto i tō tātou ’itera’a pāpū ’e ’ia tūtava i te tāpe’a māite i tō tātou fa’aro’o, noa atu te ’ati.

I te matahiti 2010, ’ua pohe Maritza i roto i te hō’ē ’ati purūmu. E taime ’oto nō’u te reira, ’ua ’ite rā vau ē nā roto i te fa’anahora’a nō te fa’aorara’a ’e te tāra’ehara a Iesu Mesia, e ’ite fa’ahou ā vau iāna. ’Ua ’ite au tē tāmau noa nei ’oia i te vāhi tei reira ’oia i teienei, ma te hō’ē ā huru ’oa’oa ’e te hō’ē ā ’ana’anatae ’o te fa’a’ite nei iāna i ni’a i te fenua nei.

’Ua ’ite au ē e ’ere teie « huru tāmatara’a » (Alama 12:24) ana’e. ’Ua ’ite au e ’ite fa’ahou ā tātou i tō tātou ’utuāfare ’e tō tātou mau hoa i terā pae mai o te pāruru. E ’ite fa’ahou ā tātou ia rātou, e aroha ia rātou, ’e e ’āmui fa’ahou ’e ’o rātou. E ora tātou i te hō’ē ā mau nīno’a mana’o nō te here ’o tā tātou i fa’ari’i nā nō te tahi ’e te tahi i ni’a i te fenua nei (hi’o Te Ha’api’ira’a Tumu ’e te mau Fafaura’a 130:2). Tei reira te mau melo o tō’u ’utuāfare. ’Ua ’ite au tei reira ato’a Maritza.

’Ua paraparau Maritza ma te ’oa’oa i te ’evanelia i te mau ta’ata ato’a i’ōnei i ni’a i te fenua nei. ’Ua pāpū iā’u ē tē rave nei ’oia i te hō’ē ā ’ohipa i roto i te ao vārua (hi’o Te Ha’api’ira’a Tumu ’e te mau Fafaura’a 138:57). Tē ha’api’i nei ’oia i te Tāra’ehara mure ’ore a te Fa’aora ’e te parau ’āpī ’oa’oa ē, maoti ’oia [Iesu Mesia] ’e nā roto i te mau ’ōro’a o te hiero, e nehenehe tātou e ho’i i mua i tōna ’e i tō te Metua aro nō te ora ’ei ’utuāfare e a muri noa atu.