E nehenehe ānei te hō’ē Fa’aora parauti’a e ta’a i te aura’a ’ia ’aro ?

’Ua mana’o vau tei ni’a vau i te fāito teitei o tā’u misiōni—tē ha’api’ipi’i ra vau i te hō’ē misiōnare ’āpī, te fa’aineinera’a i te hō’ē bāpetizora’a ’e te mau-maita’i-ra’a i te tā’āto’ara’a o te ’ohipa misiōnare. ’Ua ’oa’oa roa vau.

’Aita rā vau i ’ite i te urupu’upu’u ’e te ahoaho e rahi noa ra i roto iā’u.

I te hō’ē pō ’a tārava noa ai au nō te ta’oto, ’ua ha’amata vau i te topa i roto i te ri’ari’a fēto’ito’i nō te piti o te taime i roto i tō’u orara’a tā’āto’a—te mātāmua, ’ua tupu ’a iva matahiti i teienei. E iva matahiti !

Nō te aha, i muri mai i te hō’ē tau poto hepohepo i tō’u tamari’ira’a, ’ua tupu tā’ue fa’ahou mai te reira i teienei ?

’A tāmata onoono ai au i te rave i tā’u misiōni ma te au, te mana’ora’a ē e nehenehe au e tātā’i i tō’u iho mau fifi.

’A ’aro noa ai au i tō’u mau fifi nō te ea i te pae ferurira’a, ’ua parau mai te tahi ta’ata iā’u i te hō’ē mana’o o tā rātou i fa’ari’i ’a tai’o ai rātou i te ’ohipa i tupu nō te Fa’aora i Getesemane.

’Ua parau Iesu, « ’ua ’ati roa tā’u vārua i te māuiui rahi pohe ». ’E i muri iho ’ua pure te Fa’aora, « e tā’u Metua ē, ’ia ti’a rā, e hōpoi ’ē atu i teie nei au’a, ’ia tupu rā tō ’oe hina’aro, ’eiaha tō’u » (Mataio 26:38-39).

’Ua putapū a’ena ānei ’outou i te teiaha o tō ’outou iho ’oto ? ’Ua ui a’ena ānei ’outou i te Atua, « tē vai ra ānei te tahi atu rāve’a ? »

I roto i te hina’aro parauti’a, te ha’apa’o parauti’a ’e te here parauti’a, ’ua fa’ari’i tō tātou Fa’aora i te hina’aro o te Metua. E mea parauti’a ’oia nō te mea ’aita tāna e hara, ’ua putapū ato’a tā ’oia i te māuiui, te ’oto ’e te ’ōtahira’a.

Inaha ho’i, ’ua pou ’oia i raro a’e i te mau mea ato’a—’ia ti’a iāna ’ia fa’ateitei ia tātou i ni’a.

’Ua ha’api’i te peresideni Jeffrey R. Holland, te peresideni nō te pupu nō te Tino ’Ahuru ma Piti ’āpōsetolo : « Iesu ‘e ta’ata mātaro i te ’oto’ [Isaia 53:3], ’ua parau te mau pāpa’ira’a mo’a. ’Ua ora ’oia i te ’oto, te rohirohi, te ’aupari ’e te ’ōtahira’a fa’a’oroma’i ’ore. I roto i taua taime ra ’e i te mau taime ato’a, ’aita roa te here o Iesu i mou, nā reira ato’a tō tōna Metua ».

Te ’itera’a ē ’ua fa’aruru te Mesia i te mau tāmatara’a fifi, ’ua fa’aha’amana’o mai iā’u ē, tē hāro’aro’a nei ’oia i te ’oto, te ’aravī, te rohirohi, te hepohepo, te ahoaho ’e te ’ōtahira’a hau atu i te tahi atu ta’ata.

’O ’oia tei ’oto i te pohera’a Lazaro (hi’o Ioane 11:33–36). ’E ’o ’oia tei ani, ’a fātata ai ’oia i te pohe i ni’a i te sātauro : « E tā’u Atua, e tā’u Atua, e aha ’oe i fa’aru’e mai ai iā’u ? » (Mareko 15:34)

’Ua ’ite ato’a rā Iesu Mesia i te ’oa’oa, te here, te aroha, te hāmani maita’i ’e te hau hau atu i te tahi atu ta’ata. Nō tōna parauti’a. Nō reira, ’ua ’ite maita’i roa ’oia e aha tā tātou e putapū nei.

’Ua fa’a’ite pāpū te peresideni Holland : « Te hō’ē o te mau tāmāhanahanara’a rahi nō teie tau Pāsa, teie ïa, nō te mea ’ua haere Iesu nā ni’a i te hō’ē ’ē’a roa, te ’aro’aro ’e ’ōna ana’e, e’ita ïa tātou e tītauhia ’ia nā reira ato’a. ’Ua hōro’a mai tōna tere rahi ’aro’aro i te hō’ē ’āpitira’a rahi nō tā tātou iho fa’a’ohipara’a i teie ’ē’a—te aupurura’a hāmani maita’i a tō tātou Metua i te ao ra, te auhoara’a hahi ’ore a teie Tamaiti Herehia, te hōro’a rirerire a te Varua Maita’i ».

Te ’itera’a ē, tē hāro’aro’a maita’i nei Iesu Mesia i te mea tā’u e putapū nei, ’a ’aro noa ai au i te ahoaho, i te hōpe’a ’ua fa’ati’a vau iāna ’ia tauturu iā’u ’ia amo i tā’u mau hōpoi’a.

’Aita tō’u ahoaho i mo’e ’oi’oi. ’Ua fa’ari’i fa’ahou ā vau i te mau mahana fifi. Tē vai fātatara’a rā i te Mesia, ’ua hōro’a mai iā’u i te hō’ē ’oa’oa māoro, nō te mea ’ua ’ite au tei reira ’oia i pīha’i iho iā’u, i te paraura’a iā’u, « ’ua ’ite au. « ’Ua ’ite maita’i roa vau i te mea tā ’oe e putapū nei ».

I te roara’a o teie ’ohipa i tupu, ’ua riro te Mesia ’ei tō’u hō tari’a piri roa a’e.

Tē mana’o nei au ē i te tahi mau taime tē mana’o nei paha tātou ē, te parauti’a o te Mesia te aura’a e mea ātea roa ’oia ’e e’ita roa e roa’ahia, ē tāna mau ’ohipa rahi ’e tōna ora tēmeio, ’ua fa’ariro iāna e mea ātea roa ia tātou, te ta’ata nei, te parauti’a ’ore ’e te te’ote’o. Terā rā, ’aita roa atu ’oia i fātata roa ia tātou nei, maori rā i te taime ’a fa’aruru ai tātou i tō tātou mau ’arora’a fifi roa a’e, tō tātou ’oto rahi roa a’e ’e tā tātou mau ’arora’a ri’ari’a roa a’e.

I teie tau Pāsa, e nehenehe tātou e ha’amana’o ē, ’ua ’ite maita’i roa Iesu Mesia i te aura’a ’ia ’aro nō te mea e mea parauti’a ’oia—’o te ta’ata ana’e ’o tē nehenehe e putapū i tō tātou māuiui ’e e amo i tā tātou mau hōpoi’a.

Nō reira, ’ia ’aro ana’e ’outou, ’a fāriu atu i ni’a iāna. Tē hāro’aro’a maita’i roa nei ’oia.