I roto i tāna ’ohipa

Fa’ahōho’ara’a nā Briana Kranz

Mai te mea te ’ohipa māuiui roa a’e nō te ta’ata nei ’o te fa’a’oroma’ira’a nō te mo’era’a ri’ari’a ’e te mana’o-’ore-hia o te hō’ē tei herehia, tē mana’o nei au ē te piti o te ’ohipa fifi roa a’e ’o terā tā te hō’ē hōturu [secouriste] ma te hi’o i roto i te mata o te hō’ē metua vahine ’e te hō’ē metua tāne ’e ’ia parau atu ia rāua ē ’ua pohe tā rāua tamari’i.

I te hō’ē po’ipo’i ’ua tonohia vau nō te fa’aara atu i te hō’ē ’utuāfare ē, ’ua pohe tā rāua tamāhine ’āpī i roto i te hō’ē ’ati purūmu, ’a ho’i ai ’oia i te fare nā te fare ha’api’ira’a tuatoru mai. ’Ua vare’ahia ’oia i te ta’oto ’a fa’ahoro ai i tōna pere’o’o, ’e ’ua pohe roa ’oia ’a fa’aru’e ai tōna pere’o’o i te purūmu ’e ’a ū ’ū’ana atu ai i te hō’ē patu. E Pāsa te reira po’ipo’i.

’Ua mata’u vau i te māuiui tā’u e fa’atupu atu i teie ’utuāfare. I te tahi atu pae, fātata e au ra iā’u ’o vau te tumu nō tō rātou māuiui ma te fa’aarara’a atu ia rātou i teie parau ’āpī.

’Ua pātē atu vau i te oē o te ’ōpani fare, ’e ’ua ha’afātata mai te hō’ē ta’ata. ’Ua fārerei tō māua nā mata nā roto i te ha’amāramarama o te ’ūputa. ’Ua to’eto’e ’oia, ma te hepohepo ’ia hi’ohia i ni’a i tōna hōho’a mata. ’Ua ’ite ’oia ē tē fa’ata’a nei tō’u vaira’a i reira nō te mo’era’a tāna tamāhine. I reira iho, ’ua fa’ari’i au i te hō’ē fa’aurura’a pae vārua :

« Jason, ’a ha’amo’e ia ’oe iho. Tei roto ’oe i tā’u ’ohipa ’e e ti’ara’a tō ’oe ’ia fa’ari’i i tō’u mana. ’A fa’a’ohipa i te reira. ’A ti’aturi i te reira. E arata’i te Vārua Maita’i ia ’oe nō te hōpoi atu i te hāro’aro’ara’a ’e te tāmaruūra’a i te feiā i roto i te hepohepo ’aore rā te ta’a ’ore ».

’Ua ’īriti mai te ta’ata i te ’ōpani ma te rūrū. ’Ua mono te ti’aturira’a pae vārua i tō’u ’ōtohera’a ’a fa’a’ite ai au iā’u iho ’e te anira’a ’ia tomo atu. Noa atu ’ua ha’apūaihia e te Vārua, ’ua māuiui hōhonu roa tō’u ’ā’au nōna. ’Ua hina’aro vau e ’āmui atu i tōna māuiui, e ’oto nā muri iāna ’e e tāmahanahana iāna (hi’o Mosia 18:8–9), ma te ’itera’a e nehenehe te reira e tāmarū i tōna māuiui.

’Ua haere atu māua nā roto i te hō’ē aroā poto ’e ’ua tomo atu i roto te hō’ē piha, tei reira tāna vahine ’e tāna mau tamari’i i te putuputura’a. Ha’apūaihia e te Vārua Maita’i, ’ua putapū vau i te ti’aturira’a ’e te māramarama rahi o te ferurira’a. ’Ua pāhono atu vau i tā rātou mau uira’a ’e i muri iho ’ua fa’a’ite au i tō’u ’itera’a pāpū ē, maoti Iesu Mesia, tāna tusia ’e tōna ti’afa’ahoura’a, e ’ite fa’ahou rāua i tā rāua tamāhine.

Nā roto i teie ’ohipa i tupu, ’ua tauihia tō’u fa’aro’o i te Fatu ’ei ti’aturira’a. ’Ua ti’aturi au ē tō rātou ato’a.

’Ua ha’api’i Elder Paul B. Pieper nō te Hitu ’Ahuru ē : « I te tahi taime, te rāve’a maita’i roa a’e nō te ha’api’i mai ’ia ti’aturi i te Atua, e mea nā roto noa ïa i te ti’aturira’a iāna ».

’Ua tauturu te ti’aturira’a i te Fatu iā’u ’ia roa’a te pūai nō te tauturu ia vetahi ’ē. ’Ua ha’apūai ato’a te reira i tō’u ’itera’a pāpū ’e ’ua ’īriti e rave rahi atu ā rāve’a nō te tāvini ia vetahi ’ē nōna.