« Iosepha i Arimataio : Te mau hina’aro parauti’a ’e te mau temeio a te Atua », Liahona, Māti 2026.
’Ua mātau rātou i te Fa’aora
Iosepha i Arimataio : Te mau hina’aro parauti’a ’e te mau temeio a te Atua
’O vai ’o Iosepha i Arimataio, ’e e aha tā tātou e nehenehe e ha’api’i mai nā roto mai i tōna ti’ara’a i roto i te ’ā’amu nō Pāsa ?
Fa’ahōho’ara’a nā Laura Serra, ’eiaha e tāhōho’a
E ti’ara’a faufa’a roa tō Iosepha i Arimataio i roto i te ’ā’amu nō Pāsa, i te tauturura’a i te Fatu ’ia rave fa’a’oti i te rē rahi roa a’e i roto i te ’ā’amu o te ta’ata. I te fa’asātaurora’ahia Iesu Mesia, « e haere atu ra [Iosepha] ia Pilato ra ma te mata’u ’ore, ’e ’ua ani atu ra i te tino o Iesu » (Mareko 15:43). ’A fa’aru’e ai e rave rahi atu ā ta’ata i te Fatu i te taime o tōna ahoaho, e aha te mea tei arata’i ia Iosepha ’ia fa’aea mai ’e ’ia rave i te hō’ē tuha’a faufa’a roa i roto i te fa’atusiara’a o te Fa’aora ?
E riro tōna ha’apa’o maita’i i te fa’ahapa i tōna ti’ara’a ’ei tauturu tao’a rahi i roto te Sunederi, te ’āmuira’a ’āti Iuda tē vai ra i te mau pharisea ’e te mau sadukea ’o tei fa’autu’a i te Mesia ’ia pohe (hi’o Mataio 27:1, 57). Hau atu ā, ’ua tāpe’a huna Iosepha i tōna ti’ara’a pipi nā te Mesia, nō tōna « mata’u i te mau ’āti Iuda » (Ioane 19:38).
Teie rā, i te pae hope’a, ’ua ’ana’ana tōna paieti. ’Aita roa ’oia « i fa’ati’a i te parau a te tahi pae ’e tā rātou i rave ra » ’o tei ’imi i te pohe o te Fa’aora (hi’o Luka 23:50–51). ’E i muri a’e i te pohera’a o te Fa’aora, viri iho ra Iosepha i te tino o te Fatu i roto i te ’ahu ’e tu’u atu ra i roto i tōna iho mēnema ’āpī (hi’o Mataio 27:59–60 ; Luka 23:52–53). Ti’a maita’i atu ra te parau tohu ē, tei te ta’ata tao’a te mēnema o te Mesia (hi’o Isaia 53:9).
’Ua ti’afa’ahou ’oia
Ma te hōro’ara’a i tōna mēnema nō te hunara’a i te Fa’aora, ’ua turu Iosepha i Arimataio i te fa’atupura’a i te parau tohu ’e ’ua fa’aineine i te ’ē’a nō te ’itera’a pāpū temeio o te ti’afa’ahoura’a o Iesu Mesia. I te toru o te mahana i muri a’e i te fa’asātaurora’a, ’ua ’ite a’era te mau pipi a te Mesia i te mēnema ta’ata ’ore, ’e te reo o te hō’ē melahi i te paraura’a ē : « ’Aore ’oia i’ō nei, ’ua ti’afa’ahou a’enei ïa » (Mataio 28:6).
’Ua ha’api’i Elder D. Todd Christofferson, nō te Pupu nō te Tino ’Ahuru ma Piti ’āpōsetolo ē : « Tē fa’a’ite pāpū nei te ti’afa’ahoura’a o Iesu Mesia nō tōna hanahana ’e ’ua upo’oti’a ’oia i ni’a i te mau mea ato’a ». « Tē fa’a’ite pāpū nei tōna ti’afa’ahoura’a ē, nātihia iāna nā roto i te fafaura’a, e nehenehe ato’a tā tātou e upo’oti’a i ni’a i te mau mea ato’a ’e ’ia riro ’ei hō’ē. Tē fa’a’ite pāpū nei tōna ti’afa’ahoura’a ē nā roto iāna, e riro ai te tāhuti ’ore ’e te ora mure ’ore ’ei mea mau ».
’Aita paha Iosepha i ’ite i te mea tāna i hōro’a i taua Pāsa mātāmua ra, pīha’i atu i tōna hina’aro ’ia ha’amori ia Iesu Mesia. ’Ua fa’a’ohipa rā te Fatu i te mau hina’aro parauti’a o Iosepha ’ei tuha’a nō tāna temeio hope’a ’ia riro « ’ei hotu mātāmua nō te feiā i ta’oto ra » (1 Korinetia 15:20), te mātāmua ’ia ti’a mai mai te pohe mai.
Mai ia Iosepha tei mau i te hō’ē ti’ara’a faufa’a roa, e nehenehe tātou tāta’itahi e riro ’ei mauiha’a i roto i te rima o te Metua i te ao ra. Tāna fa’anahora’a nō te ta’ata ato’a, ’e e fa’a’ohipa ’oia i tō tātou ’aravihi, te mau ’ohipa i tupu ia tātou ’e tō tātou huru orara’a nō te fa’ahaere i mua tāna ’ohipa. I teie Pāsa, e nehenehe tātou e ha’amana’o i teie parau poro’i ’e ’ia ’imi ia Iesu Mesia, ma te hōro’a ’ei tusia i te mea tā tātou e nehenehe nō te tauturu i te patu i tōna bāsileia ’e ’ia vaiiho i tāna mau temeio ’ia tupu i roto i tō tātou orara’a.