Toma : Te haerera’a nā te ’ē’a o te fa’aro’o

Nā Michelle Dennis Christensen

Te mau ve’a a te ’Ēkālesia

Tē fa’a’ite nei te ’ā’amu o Toma ia tātou i teie mau uiuira’a, te fa’a’oroma’i ’e te roa’ara’a i te hō’ē ’itera’a pāpū, e tuha’a tā’āto’a ïa o te fa’ananeara’a i tō tātou fa’aro’o ’e tō tātou ti’aturira’a.

E aha te mea e tae mai i te ferurira’a ’ia fa’aro’o ana’e ’outou i te i’oa o Toma te pipi a te Fa’aora ? Pinepine tātou i te tū’ati i tōna i’oa i te « fea’a » ’aore rā i te « fē’a’ara’a. »

Tera rā, e rave rahi atu ā parau tō Toma. I roto i te ’Evanelia a Ioane, tē ’ite nei tātou i te haere’a fa’aro’o o Toma ’o te nehenehe e fa’ahi’o i tō tātou iho : E nehenehe te fa’aro’o e ha’apūaihia i te roara’a o te tau, ’a ti’aturi ai tātou ’e ’a ’ohipa ai nō te fa’arahi i tō tātou fa’aro’o.

’Aita e fifi te mau uira’a

’Ua pi’i Iesu Mesia ia Toma ’ia riro ’ei hō’ē o tāna nā ’ahuru ma piti ’āpōsetolo, ’e ’ua pe’e Toma i te Fa’aora i te roara’a o tāna tāvinira’a e toru matahiti. E here rahi tōna [Toma] nō te Fa’aora. I tō Toma mata’ura’a nō te ora o te Fatu, ’ua ti’aoro atu ’oia i te tahi atu mau ’āpōsetolo, « mai haere ato’a tātou ’ia pohe ato’a atu » (Ioane 11:16).

I roto i tōna paieti, ’ua tāmau ’oia i te ui i te mau uira’a. Hou i Gētesemane, ’ua ha’api’i Iesu i tāna mau pipi ē e haere ’ē atu ’oia. Ui atu ra Toma, « e te Fatu, ’aita mātou i ’ite i tēna na vāhi tā ’oe e haere nā ; e aha ho’i mātou e ’ite ai i te ’ē’a ? »

Pāhono atu ra Iesu, « ’O vau te ’ē’a ’e te parau mau ’e te ora : ’aore roa e ta’ata e tae i te Metua ra, maori rā ’ei iā’u » (Ioane 14:5–6).

Mai ia Toma, e’ita paha tātou e māramarama i te mau ha’api’ira’a ato’a a te Atua, ’aita ato’a i te huru ato’a o te fa’anahora’a nō te fa’aorara’a. Te uira’a rā i te mau uira’a tano e nehenehe e heheu mai i te parau mau nā roto mai i te Fatu. E mea tītauhia ’ia fa’arahi i tō tātou fa’aro’o.

’Ua ha’api’i te peresideni Russell M. Nelson :

« Mai te mea e uira’a tā ’outou—’e tē ti’aturi nei au ē, tē vai nei tā ’outou—’a ’imi i te mau pāhonora’a ma te hia’ai tu’utu’u ’ore ’ia ti’aturi. …

« … Tā ’outou mau uira’a ’ā’au tae, ’ia uihia ma te fa’aro’o, e arata’i tāmau noa ïa i te hō’ē fa’aro’o rahi a’e ’e i te ’ite maita’i a’e ».

Te fa’aro’o i mua i te mata’u

’A fa’aro’o ai te mau ’āpōsetolo ē ’ua ti’afa’ahou Iesu mai te pohe mai, e au ra « mai te parau vavi noa ra ’ia parau ia rātou » (Luka 24:11). E mea maoro a’e te tau fē’a’ara’a o Toma i tō te tahi atu, nō te mea ’aita ’oia i reira i te taime ’a fā mātāmua mai ai te Fatu tei ti’afa’ahou ia rātou (hi’o Ioane 20:24).

I muri a’e i tō rātou paraura’a ia Toma ē, ’ua ’ite mata rātou i te Fa’aora, ’ua pāhono mai ’oia : « I ’ore au i ’ite i te puta ’auri i tāna rima ra, ’e ’aore i tu’u i tā’u rima i taua puta ’auri ra, ’e ’aore ho’i tā’u rima i tu’u i tāna ’ao’ao ra, e ’ore roa ïa vau e fa’aro’o » (Ioane 20:25).

Va’u mahana i muri mai, fā fa’ahou mai ra te Fatu ’e ’ua ani ia Toma ’ia fāfā i tōna mau puta. ’Ei pāhonora’a, nā ’ō atu a’era Toma : « E tā’u Fatu, e tā’u Atua » (Ioane 20:28). I muri iho ’ua ha’api’i atu te Fa’aora i te hō’ē parau mau faufa’a roa : « E ao tō te feiā ’aore i ’ite iā’u ’a fa’aro’o mai ai » (Ioane 20:29).

E tae mai iho ā te mau pāhonora’a. ’Ua ha’api’i Elder David A. Bednar nō te pupu nō te Tino ’Ahuru ma Piti ’āpōsetolo : « E fa’aro’ohia ’e e pāhonohia te mau pure o te ’ā’au tae ato’a e tō tātou Metua i te ao ra, terā rā te mau pāhonora’a ’o tā tātou e fa’ari’i e’ita noa ’o terā ’o tā tātou e tīa’i nei, ’aita ato’a terā o te tae mai i te taime ’aore rā ma te rāve’a ’o tā tātou i mana’o. »

Te ti’aturira’a e vai maoro

’Ia fa’ari’i ana’e tātou i te mau pāhonora’a nā roto i te fa’a’oroma’i, te pure ’e te heheura’a, e nehenehe ato’a e roa’a ia tātou te hō’ē ti’aturira’a—te hō’ē ’itera’a pāpū. Mai te mea e tāmau tātou i te fa’a’amu i tō tātou fa’aro’o, e nehenehe teie ’itera’a pāpū e ’āpe’e mai ia tātou i te roara’a o tō tātou orara’a. Mai tā te peresideni Nelson i ha’api’i : « ’A fa’atura ai ’outou ma te fa’a’oroma’i i te tārena a te Fatu, e hōro’ahia ia ’outou te ’ite ’e te hāro’aro’ara’a tā ’outou e ’imi nei. Te mau ha’amaita’ira’a ato’a a te Fatu nō ’outou—mai te mau temeio—e ’āpe’e mai te reira. Terā tā te heheura’a nō te ta’ata iho e rave nō ’outou »

Te ’ohipa i tupu nō Toma tē fa’a’ite nei ia tātou ē, e ’ere te fa’aro’o i te hō’ē vāhi tāpaera’a ’o te hō’ē rā haere’a. Tē fa’atura nei te Atua i teie haere’a ’e e ha’amaita’i ia tātou mai te mea e vai matara noa tātou o tāna arata’ira’a ’e e ’imi i te ’itera’a pāpū ’o te ’āfa’i mai i te hau i tō tātou ’ā’au (hi’o Te Ha’api’ira’a Tumu ’e te mau Fafaura’a 88:63).