« Te purūmu nō Emausa : E tere o te heheura’a ’e te ’ā’au mēhara », Liahona, Māti 2026.
’Ua mātau rātou i te Fa’aora
Nā pipi i ni’a i te purūmu nō Emausa : E tere nō te heheura’a ’e nō te ’itera’a
Hō’ē ā mai te ’ohipa i tupu i teie nā pipi, e nehenehe tō tātou ’ā’au e ’ama ’ōroto ia tātou ’a fa’a’ite pāpū ai tātou nō te tāra’ehara ’e te ti’afa’ahoura’a o te Fa’aora.
Fa’ahōho’ara’a nā Laura Serra, ’eiaha e tāhōho’a
I te sābati, i te avatea o te ti’afa’ahoura’a, tē haere ra nā pipi e piti i nā 13 kilometera mai Ierusalema ē tae atu i Emausa. ’Ua riro te reira ’ei mahana ’āehuehu—ma’a mahana ri’i ’āehuehu.
ʼUa teimaha roa tō rāua ʼāʼau. ’Ua ti’arepuhia tō rāua ferurira’a i te māere ’e te ’oto. Tē paraparau ra rāua nō Iesu nō Nazareta—tōna pohe, te mau ’āruriruri ro’o o tōna ti’afa’ahoura’a, ’e te ’oto pāpū ’ore ’o tē vai nei i roto ia rāua nō te aura’a o te reira mau mea ato’a.
’A haere noa ai rāua, ’ua tomo mai te hō’ē ta’ata ’e’ē i roto i tā rāua ’āparaura’a. ’O Iesu ïa, noa atu ā ’aita rāua i ’ite atu ’o ’ōna. ’Ua tāpo’ihia tō rāua mata ’e ’ua ha’apōirihia tō rāua hāro’aro’ara’a. ’Ua ui mai te ta’ata ’e’ē ra ia rāua, « e aha tenā nā parau tā ’ōrua i paraparau noa nā ma te mata huru ’oto ? » (Luka 24:17).
’Ua pāhono mai te hō’ē o nā pipi, ’o Keleopa, ma te ti’aturi ’ore ē e ti’a i te hō’ē ta’ata ’ia ’ite ’ore ho’i, e ’ore ho’i e putapū i te mau ’ohipa ’ino rahi tei tupu ’o tei fa’a’āueue ia Ierusalema i taua hope’a hepetoma ra. « ’O ’oe ana’e nā paha te ta’ata ’ē i Ierusalema nei ’aore i ’ite i te mau mea i tupu i reira i teie nei pu’e mahana ? »
« E aha ïa mau mea ? » Ui a’e ra Iesu.
’Ua riro tā rāua pāhonora’a e mea ’ā’au tae ’e te ’oi’oi : « Ia Iesu i Nazareta ra, e peropheta mana ïa i te parau ’e te rāve’a, i mua i te aro o te Atua ’e te ta’ata ato’a ho’i » (Luka 24:18–19). ’Ua parau rāua ē, ’ua ti’aturi rāua ē e fa’aora Iesu ia ’Īserā’ela, e nō reira teie te toru o te mahana mai tōna pohera’a. ’E noa atu vetahi mau vahine ’ua fa’a’ite mai i te fāra’a mai te mau melahi ma te parau mai ē, ’ua ora ’oia, ’aita te mau ’āpōsetolo tei haere atu e hi’o i ’ite mata iāna.
I muri iho, ’ua parau Iesu—’eiaha mai te hō’ē ta’ata ’e’ē, mai te hō’ē ’orometua rā. « ’Āue ïa pu’e ta’ata mana’o ’ore ē, ’e te fa’aro’o tai’atā i tei hope i te parauhia mai e te mau peropheta ra » (Luka 24:25). ’Ua fa’ata’a atu ’oia ia rāua i te mau pāpa’ira’a mo’a, mai ia Mose e tae roa mai i te mau peropheta ato’a, ma tē heheu mai i te mau mea nō ni’a iāna iho. ’A feruri na i te haerera’a e rave rahi hora ’e te Tamaiti a te Atua, te Fatu o te ora, te fa’aro’ora’a i tāna tātarara’a i te mau parau tohu a te Mesia. ’Ua ha’amata tō rāua ’oto i te mārū, monohia e te fa’ahiahia ’e te itoito ’ōroto.
’A parahi mai ia māua ra
’A fātata atu ai rātou ia Emausa, ’ua rave Iesu mai te huru ra i te haere ātea atu ā. Terā rā ’ua fa’atina atu rāua iāna « e fa’aea nā tātou, ’ua huru ahiahi ho’i, ’ua mure te mahana » (Luka 24:29). ’Ua fa’aea atu ’oia ia rāua ra, ’ua pārahi ’e ’ua vavahi i te faraoa.
Nō ni’a i te ’ohipa i tupu i muri iho, ’ua pāpa’i Elder James E. Talmage (1862–1933) nō te Pupu nō te Tino ’Ahuru ma Piti ’āpōsetolo : « E riro paha te ’ana’anatae o te ha’amaita’ira’a, ’aore rā i te huru o te vavahira’a ’e te ’ōperera’a i te faraoa, i te fa’a’ama mai i te mau ha’amana’ora’a i nā mua a’e nei ; ’aore rā, penei a’e ’ua ’ite atu rāua i te mau rima puta ; terā rā noa atu te tumu ’oi’oi, ’ua hi’o tūtonu atu rāua i tō rātou Manihini ‘’e tu’ua ihora te ’ite i tō rāua mata , ’ite atu ra rāua iāna, mo’e roa atu rā ’oia’ [Luka 24:31] ».
Te taime i muri mai, ’ua fāriu rāua i ni’a i te tahi ’e te tahi ma te parau ē : « E ’ere e hoa i ’ana’anatae tō tāua ’ā’au iāna i paraparau mai ia tāua i te arati’a ra, ’a fa’a’ite mai ai ia tāua i te aura’a i te mau parau i pāpa’ihia ra ? » (Luka 24:32). E ’ere teie ’amara’a i te ’āhuehue ’aore rā i te mata’u—’o te ’ā’au mēhara ra. ’Ua ha’api’i Elder Bruce R. McConkie (1915–85) no te Pupu nā te Tino ’Ahuru ma Piti ’āpōsetolo, « te nīno’a mana’o mai tei fa’ata’ahia mai e fa’a’ite pāpū ra ma te rāve’a pū’ohu i te tū’atira’a hanahana ».
Tō tātou iho purūmu nō Emausa
« E aha tāna e parau atu ia ’outou mai te mea e nehenehe ’outou e haere ’e e paraparau iāna ? » tē ui nei Elder Patricio M. Giuffra nō te Hitu ’Ahuru.
Mai nā pipi, e’ita paha tātou e ’ite ē, tē haere ra te Fa’aora nā muri iho ia tātou, ’ua parau ’oia. « E’ita tātou paha tātou e ’ite mai te aha te huru ’oia ’ia vai mai ia tātou ra, e ’aro nā muri ia tātou, ’ia ’ohipa i pīha’i iho ia tātou ’e ’ia ta’i nā muri ia tātou. » Te mau fa’anevanevara’a o te orara’a—e mau tāmatara’a ānei ’aore rā e mau upo’oti’ara’a—e nehenehe te reira e ha’apōuri i tōna aro.
Tē haere nei tātou tāta’itahi i tō tātou iho purūmu i Emausa. I ni’a i teie purūmu, e fa’aruru tātou i te ma’i, te paruparu, te mau fifi i te pae faufa’a, ’oia ato’a te te’ote’o ’o te ’āpe’e i te manuia. Teie rā, ’aita tātou i anihia ’ia haere ’ōtahi noa tātou », ’ua parau Elder Giuffra. « E nehenehe tātou e ani i te Fa’aora ’ia vai mai ia tātou ra ».
’A ha’api’i mai ai tātou nō te Mesia, ’a ha’apa’o ai i tāna mau fa’auera’a, ’a pure ai, ’a ’imi māite ai i te mau pāpa’ira’a mo’a, ’a pe’e ai i te mau peropheta ora, ’e ’a ani manihini ai ’ia pārahi mai ia tātou ra, e ha’amata tātou i te ’ite i tāna fa’aurura’a. Te tāparura’a a te nā pipi—« e fa’aea nā tātou »—’ia riro tō tātou iho, ’ua parau Elder Giuffra. ’E ’ia riro mai te reira iho, tō tātou ’ā’au, e ’ama ato’a te reira.