’Ua riro mai tō’u ’oto ’ei ’oa’oa

Fa’ahōho’ara’a nā Briana Kranz

I te 18ra’a o tō’u matahiti, ’ua pohe tō’u pāpā rū’au nō te pae o tō’u māmā. I taua tau ra o tō’u orara’a, ’aita te hō’ē ta’ata fātata iā’u i pohe a’e nei. ’Ua ’ite au e tupu mai te reira i te hō’ē mahana, ’aita rā vau i mana’o e tupu tā’ue noa mai te reira.

Mea maita’i roa te ea o tō’u pāpā rū’au, terā rā ma te ’ore i poro’i mai, ’ua ro’ohia ’oia i te ma’i uaua upo’o. ’Ua ’āfa’i ’oi’oi tō’u māmā rū’au iāna i te fare ma’i, ’ua fa’aru’e mai rā e maha mahana i muri mai.

E mea māuiui mau ’ia pohe tā’ue ana’e te hō’ē nō te taime mātāmua. E mea huru ’ē roa ’ia ’ite i tō’u pāpā rū’au i roto i te mau tupura’a ’ohipa faufa’a roa o tō’u orara’a ’e i muri iho ’ua mo’e ’ē.

I muri a’e i te hunara’a, ’ua ’itehia mai iā’u te hō’ē rāve’a nō te fa’atura i te ha’amana’ora’a o tō’u pāpā rū’au ’e te mau taime ’a fa’aea ’āmui ai māua. E mea au nāna e ’ohipa i ni’a i tōna pereo’o ’e e rave i te tahi atu mau ’ōpuara’a. Te parau mau, te tupura’ahia ’oia i te ma’i uaua upo’o, tei roto ’oia i tōna vāhi vaira’a pereo’o ma te tāviri farero i tōna rima tehu, i te ’ohipara’a mai tei matauhia.

’Ua fa’aoti au e ’ohipa ato’a i ni’a i te mau pereo’o. E fa’ati’a te reira iā’u ’ia ’ite i te ha’afātarara’a iāna. ’Ua fāriu ato’a atu vau i roto i te pure ’e te mau pāpa’ira’a mo’a, i reira vau i te ’itera’a mai i te hau nō te nu’u i mua ma te fa’aro’o ’e te tīa’ira’a, noa atu ’ua mo’e ’oia.

« Tē vai ra te ti’afa’ahoura’a », ’ua fa’aha’amana’o mai te peropheta Abinadi iā’u, « nō reira ’aita tō te mēnema e rē ; ’e te tara o te pohe, ’ua horomi’ihia ïa i te Mesia ra » (Mosia 16:8).

’Ua fa’ati’a te pohera’a tō’u pāpā rū’au ’ia fa’ari’i i te hō’ē hi’ora’a ātea ’o tei fa’ariro i te tāra’ehara o Iesu Mesia ’ei mea faufa’a a’e i roto i tō’u orara’a. Mai tā’u e fa’atura nei i tō’u pāpā rū’au ma te ’ohipara’a i ni’a i te mau pere’o’o, ’ua hāro’aro’a vau ē e fa’atura tātou ia Iesu Mesia—’e e nehenehe tātou e ’ite i te ha’afātatara’a iāna—ma te tūtavara’a tātou ’ia ora mai tāna i ora, te ’imi-māite-ra’a i tāna parau, te fa’a’itera’a i tāna ’evanelia, ’e te ravera’a « i te mau ’ohipa a [tōna] Metua » (Ioane10:37). E hōro’a mai te reira i te hō’ē aura’a hōhomu a’e nō te tāra’ehara a te Fa’aora ’e ’ia fa’arahi i tō tātou ti’aturi iāna.

’Ua ha’api’i Elder Gerrit W. Gong, nō te pupu nō te Tino ’Ahuru ma Piti ’āpōsetolo, « ’ia ti’aoro ana’e tātou ma te ’oto ’aore rā ma te ’oa’oa, tē hāro’aro’a māite nei Iesu Mesia ». « E nehenehe ’ōna e tae mai i te mau taime e hina’aro roa ai tātou i te mau hōro’a rahi mure ’ore : Te tāra’ehara, te ti’afa’ahoura’a ’e te fa’aho’i-fa’ahou-ra’a mai a Iesu Mesia ».

’Ua fa’ariro Iesu Mesia i tō’u ’oto ’ei ’oa’oa. Maoti ’oia ’e i tāna tāra’ehara, ’ua ’ite au e fārerei fa’ahou ā vau i tō’u pāpā rū’au.