E 20 mana’o nō tā ’outou pu’e tau Pāsa

’A hāmani i te hō’ē fifi ’api parau ma te mau pāpa’ira’a mo’a ’aore rā te mau fa’ahitira’a parau tei fa’atumuhia i ni’a i te Mesia, ’e ’a feruri hōhonu i ni’a i te hō’ē ’īrava i te po’ipo’i tāta’itahi i te roara’a o te ’āva’e hou te Pāsa.

E nehenehe te mau tao’a e tāpa’ohia e rave rau huru o te mau tupura’a ’ohipa o te Pāsa i roto i te mau pāpa’ira’a mo’a. ’Ei hi’ora’a, e ha’ape’e te tahi mau ta’ata i te mau pāuma ’ū rau nō te fa’aha’amana’o i te ti’afa’ahoura’a o te Mesia nā te mēnema mai. ’A ’imi mai i te mau tao’a ’o tē fa’aha’amana’o ia ’outou i te Fa’aora i te pu’e tau o te ’ōro’a.

’A hāmani i te mau tāreta nō Pāsa e rāve’a tumu te reira nō te fa’a’ite i te māramarama o Iesu. ’A feruri i te hōro’a teie mau hāmanira’a nā te mau hoa ’aore rā te feiā tā ’outou e aupuru nei.

’Ua fa’a’ohipa te mau pipi a te Mesia i te mau rā’au no’ano’a nō te fa’ahanahana iāna i tōna tu’ura’ahia i roto i te mēnema (hi’o Ioane 19:39–40). E nehenehe te fa’a’ohipara’a i te mau rā’au no’ano’a i roto i tā ’outou mā’a nō Pāsa, e arata’i atu ia ’outou ’ia ha’amana’o i taua taime mo’a ra.

’Ua ora te Mesia ma te tāvini ia vetahi ’ē, ’e e nehenehe tātou e ha’amana’o iāna i teie Pāsa ma te nā reira-ato’a-ra’a. ’Ia mā’iti te melo tāta’itahi o te ’utuāfare i te hō’ē i’oa ’e i taua hepetoma mo’a ra ’ia tāvini ’ōmo’e ’oia i taua ta’ata ra.

Tē fa’a’ohipa nei te tahi mau ta’ata i te mau ’āma’a ’ōlive ’e te hinu ’ōlive ’ei tāpa’o nō te hau ’e nō te tusia tāra’ehara a te Mesia. E nehenehe te mau melo o te ’Ēkālesia e feruri i te fa’aō atu i teie mau mea i roto i te fa’a’una’unara’a ’aore rā i te mā’a, nō te fa’aho’a i te hau tā te Fa’aora e pūpū nei.

E mea hanahana roa vetahi mau tumu parau o te Pāsa, ’e te ravera’a i te taime i te roara’a o te hepetoma mo’a nō te fa’atupua ’e nō te feruri hōhonu, e rāve’a te reira nō te ha’amana’o i teie mau tāpa’o ta’a ’ē.

E fa’ahanahanara’a te Pāsa nō te ha’amāuruuru i te mau mea ato’a tā Iesu Mesia i rave nō tātou. ’A rave i te taime i te roara’a o te reira pu’e tau, nō te fa’a’ī i te hō’ē patu ’aore rā i te hō’ē parau pia i te mau fa’a’itera’a o tō ’outou māuruuru nō te Fa’aora.

I roto i te tahi mau tuha’a o te ao nei, e fa’ahanahanahia te Pāsa i te hō’ē pu’e tau o te orara’a ’āpī, ma te fa’ariro i te reira pu’e tau ’ei ha’amana’ora’a ’ite-mata-hia nō te ti’afa’ahoura’a o te Mesia. ’A rave i te taime nō te ori-haere-ra’a nā roto i te nātura ’e ’ia fa’ahiahi’a i te reira taipe.

Te māmoe e mā’a matarohia nō te Pāsa, e fa’ahōho’ara’a nō Iesu Mesia te ’Ārenio a te Atua, i te fa’atupura’a i te tohu o te fa’aorara’a nā roto i te tusia i te pu’e tau nō Pāsa (hi’o Exodo 12 ; Ioane 1:29). Te ’amura’a i te māmo’e e hō’ē rāve’a nō te mau ’utuāfare ’ia ha’amana’o i te ti’ara’a o te Fa’aora, i roto i tō tātou fa’aorara’ahia i te hara nā roto i tāna tāra’ehara.

Te ha’apaera’a mā’a ’e te pure e mau rāve’a pūai nō te tū’ati atu i te Mesia. ’A tārena i te hō’ē ha’apaera’a mā’a pāroita i te hepetoma mo’a nō te hō’ē tumu faufa’a mau nō te rurura’a ta’ata o te fenua.

I te Noela, e au tātou i te ha’uti teata ta’ata ora te fānaura’a o Iesu. Ma te fa’atura, e’ita tātou e ha’uti teata ta’ata ora te mau ’ohipa i tupu i te Pāsa, e nehenehe rā te mau pāroita e fa’atupu i te mau purera’a o te ha’afaufa’a i te mau ha’api’ira’a a te Fa’aora, i te roara’a o te hepetoma mo’a ’e ’ia ’āparau i te aura’a o teie mau ’ohipa o tupu.

Māoti te ti’afa’ahoura’a o te Mesia, ’ua riro te Pāsa ’ei taime nō te fa’a’āpīra’a. ’A fa’anaho i te hō’ē pupu nō te tāmā i te fare ’aore rā i te ’āua o te hō’ē ta’ata, e nehenehe e riro ’ei ha’amana’ora’a maita’i nō teie tumu parau.

I roto i te tahi mau tūha’a fenua nā te ao nei, e fa’a’amahia te mau auahi i te pu’e tau o Pasa, ’ei taipe nō te upo’oti’ara’a te māramarama i ni’a i te pōiri. E nehenehe te fa’a’amara’a i te hō’ē auahi ’aore rā i te hō’ē mōrī hinu e fa’ahōho’a i te Fa’aora, te Māramarama nō te ao nei ’o tei upo’oti’a i ni’a i te pohe ’e te hara.

’Ei tuha’a nō te hō’ē ha’api’ira’a, ’a fa’a’ite i te mau paraparau o te mau hīmene nō Pāsa. ’A ’āparau i te ha’api’ira’a tumu ’e te ’itera’a pāpū o te ’īrava tāta’itahi.

’A ani i te mau melo ’ia fa’a’ite’ite mai i te mau anoihi ’aore rā i te mau hōho’a ’o te fa’aho’a i te tumu parau o Pāsa.

E rave rahi i’oa ’e ti’ara’a tō Iesu, ’e tē heheu tāta’itahi nei i te hō’ē huru ta’a ’ē o tōna iho huru ta’ata. ’A putuputu ’ei pāroita nō te fa’atupu i te hō’ē fa’a’ite’itera’a anoihi nō ni’a i tōna huru ta’ata, e rāve’a maita’i roa nō te fa’atumu i ni’a i te mau huru rau o te Mesia i te Pāsa.

’A feruri i te ha’amau i te hō’ē peu tumu o te ha’amorira’a nā roto i te pehe, ma te fa’a’ohipa i te mau pāpa’ira’a mo’a ’e te mau hīmene nō te feruri hōhonu i te tusia ’e te here o te Fa’aora. E nehenehe te hō’ē pāroita ’aore rā te titi e putuputu nō te ha’api’ipi’i ’e nō te hīmene i te mau hīmene nō Pāsa, ’e e tai’o i te mau tuha’a o te pāpa’ira’a mo’a e tū’ati i te Pāsa.

Nā roto ia Iesu Mesia, e nehenehe te mau ’utuāfare e riro ’ei mea mure ’ore. ’A fa’anaho i te hō’ē ’ātivite nō ni’a i te ’ā’amu ’utuāfare ’aore rā i te hō’ē tere hiero, nō te fa’aha’amana’o i te mau melo i teie parau tumu i te pu’e tau nō Pāsa.

E riro te hōho’a pāpa’i i te pu’a pāpa’i ’ei hō’ē ’ātivite ’ārearea nō te mau fāito matahiti ato’a ’e hō’ē tupura’a ’ohipa ha’apa’ora’a fa’aro’o rau nō te hōho’a pāpa’i i te pu’a pāpa’i nō Pāsa, ’ei rāve’a anoihi nō te fa’a’ite ’e nō te fa’ari’i i te mau ’itera’a pāpū nō te Mesia.