Kaiapha te tahu’a rahi

Nā Katie Lambert

Te mau ve’a a te ’Ēkālēsia

Ma te ha’amatapōhia e te mau ha’ape’ape’ara’a o te ao nei, ’e noa atu te mau rāve’a e rave rahi, ’aita i ti’a iāna ’ia ’ite maita’i i te Mesia.

fa’ahōho’ara’a nō Kaiapha te tahu’a rahi

I muri a’e i te fa’ati’ara’ahia mai Lazaro mai te pohe mai, ’ua fa’atupu te feiā fa’atere mana a’e o te mau ’āti Iuda i te hō’ē ’āpo’ora’a nō te fa’aoti e nāhea ’ia fa’aoti nō Iesu. ’Ua mata’u rātou i tōna ro’o maita’i i rotopū i te nūna’a, nō mea ’ua rave ’oia e rave rahi temeio. (Hi’o Ioane 11:47.)

’Ua arata’i Kaiapha i teie ’āpo’ora’a ’ei tahu’a rahi peresideni ’e ’ei fa’atere rahi o te Sunederi, te tino fa’aterera’a o te mau ’āti Iuda i te tau fa’aterera’a a tō Roma. ’Ei tahu’a rahi, e hi’opo’a ’oia i te mau ’ōro’a hiero ’o tei fa’ata’ahia ’ei fa’a’itera’a i te Mesia.

I te taera’a mai rā te Mesia, ’aita roa ’oia i ta’a maita’i o te Fa’aora teie. ’Ino roa atu, ’ua ’ōpua huna ’oia e ha’apohe iāna [Iesu]. ’O te hō’ē teie o te mau ha’ama’aura’a tei pāpa’ihia i roto i te Faufa’a ’Āpī.

Te mau parau tohu

Noa atu tōna ti’ara’a teitei, mea iti roa te mau parau nō ni’a ia Kaiapha. E iva noa taime tōna [Kaiapha] fa’ahitira’ahia i roto i te Faufa’a ’Āpī. E araivavao ’oia i rotopū i te mau ’āti Iuda ’e te feiā nō Roma. E Sadukea ’oia, hō’ē ha’apa’ora’a ’āti Iuda i te tau o te Mesia ’o te ’ore e ti’aturi nei i te ti’afa’ahoura’a (hi’o Te mau ’Ohipa 23:8).

’Ua paraparau Kaiapha i te ’āpo’ora’a i muri a’e i tō te Mesia fa’ati’ara’a ia Lazaro mai te pohe mai, hō’ē temeio ’o tei fa’ahoruhoru i tōna ’ā’au ’e tō te tahi atu mau Sadukea, i mua i tō rātou mau ti’aturira’a.

’Ua pe’ape’a te ’āpo’ora’a ē, mai te peu e’ita rātou e pāhono i mua i teie temeio tuiro’o, e ti’aturi te nūna’a ē, ’o Iesu te Mesia, te Ari’i o te mau ’āti Iuda, « ’e e tae mai ho’i tō Roma e rave i tō tātou nei vāhi ’e te fenua ato’a ho’i » (Ioane 11:48).

Pāhono atu ra Kaiapha : « ’Aore ho’i ’outou i mana’o ē e mea maita’i ia tātou ’ia pohe atu te ta’ata hō’ē ’ia ora te ta’ata ato’a nei, ’eiaha ho’i ’ia pohe te fenua ato’a » (Ioane 11:49–50).

’Ua pāpa’i te ’āpōsetolo Ioane ē, « e ’ere rā i tāna [Kaiapha] iho taua parau ra, ’oia rā te tahu’a rahi i te reira ’anotau, ’e ’ua fa’a’ite ātea mai ra ’oia ē, e pohe Iesu nō te reira fenua ;

« ’E ’ere rā i tō te reira fenua ana’e ra, ’ia ha’aputuputu rā ’oia i te vahi hō’ē i te tamari’i a te Atua i pūrara ’ē ra » (Ioane 11:51–52).

Te fa’autu’ara’a

’Ua fā fa’ahou mai te i’oa o Kaiapha i roto i te Faufa’a ’Āpī, i tō te Mesia uiuira’ahia hou tōna fa’asātaurora’ahia.

« ’Ua parau mai ra te tahu’a rahi ra iāna ’e nā ’ō atu ra, tē fa’atapu atu nei au ia ’oe i te Atua ora ra ’e e fa’a’ite mai ’oe ia mātou ē ’o ’oe ānei te Mesia, te Tamaiti a te Atua » (Mataio 26:63).

Ha’apāpū atu ra Iesu ē ’o ’oia iho : « ’Oia mau tā ’oe e parau ra, ’e e fa’a’ite atu ā ho’i au ia ’outou, e ’ite ’outou a muri atu i te Tamaiti a te ta’ata i te pārahira’a i te rima ’atau o te Atua mana, ’e te haerera’a mai nā roto i te ata o te ra’i ra » (Mataio 26:64). ’Ei pāhonora’a i te reira, ’ua pāto’i fa’ahou Kaiapha i te Fa’aora. « Ua hāhae ihora te tahu’a rahi ra i tāna ’ahu, nā ’ō atu ra, ’ua fa’ainaina ’oia i te Atua » (Mataio 26:65).

Noa atu tei mua ’oia i te aro o te Fa’aora o te ao nei, ’oia ’o tei fa’atōro’a-ātea-hia nō te tāra’e i te mau hara a te mau ta’ata ato’a ’e ’ia mamae i te mau mauiui ato’a, te mau ’oto ’e te mau ’ati, ’aita Kaiapha i ta’a maita’i ē, Iesu ’o te Mesia ïa, ’e ’ua fa’autu’a ihora iāna [Iesu].

Tē ora nei te Tamaiti a te Atua

’Ua fa’ahiti-fa’ahou-hia Kaiapha i roto i te Bibilia i roto Te mau ’Ohipa 4. Tē fa’ati’a nei te parau pāpa’i e mea nāhea tō te ’āpōsetolo Petero fa’aorara’a i te hō’ē piri’o’i mai te fānaura’ahia mai ā (hi’o Te mau ’Ohipa 3:1–8). I muri iho, ’a poro ai Petero ’e ’o Ioane i te ti’afa’ahoura’a o te Mesia, ’ua haruhia rāua i raro a’e i te ha’amanara’a a te Sunederi. ’Ua tāpe’ahia rāua i te pō ’e ’ua arata’ihia i mua i te hō’ē ’āpo’ora’a tei roto ’o Kaiapha ’e tōna metua ho’ovai tāne, ’o Ana, te tahu’a rahi pa’ari. (Hi’o Te mau ’Ohipa 4:1–6 ; hi’o ato’a Ioane 18:13.)

I te uira’ahia nō ni’a i te ha’amanara’a tō rāua fa’aorara’a i te ta’ata, ’ua pāhono atu Petero : « Ia ’ite mai ’outou ato’a ’e te ta’ata ato’a o ’Īserā’ela nei ē, nō te i’oa o Iesu Mesia o Nazareta, tā ’outou i fa’asātauro iho nei, ’o tei fa’ati’ahia e tō Atua mai te pohe mai ra, nōna i ti’a atu ai teie nei ta’ata i mua i tō ’outou aro » (Te mau ’Ohipa 4:10).

Teie te rāve’a hope’a tei pāpa’ihia, i reira Kaiapha i fa’ari’i ai i te Mesia. ’Ātirē, ’ua ha’amata’u te ’āpo’ora’a ia Petero ’e ia Ioane. ’Aita rā tā rātou mau ha’amata’ura’a i taui noa a’e i te parau mau ē, tē ora nei te Mesia. (Hi’o Te mau ’Ohipa 4:13–22.)

Nā roto i te mana ’e te ha’amanara’a o Iesu Mesia, ’ua fa’aora Petero i te ta’ata hāpepa. ’Oia ato’a, e nehenehe te mau temeio e tupu i teie mahana, nā roto i te autahu’ara’a tei fa’aho’ihia mai o te Mesia ’e nā roto i te fa’aro’o i tōna i’oa. Te ha’api’ira’a tā tātou e nehenehe e ’apo mai nā roto ia Kaiapha e mea ’ōhie ïa. ’Aita ’oia i fa’ari’i ia Iesu mai te Mesia, te Tamaiti a te Atua, e nehenehe rā tātou. ’Ia ti’aturi ana’e tātou iāna, e tupu mai te mau tāpa’o, te mau mea māere ’e te mau temeio (hi’o Mareko 16:17–18).