Te Pāsa ’e pāsa
’A hi’o nāhea te mau tuha’a o te Pāsa e nehenehe ai e fa’atoro ia tātou i ni’a i te tusia tāra’ehara a Iesu Mesia ’e tā tātou mau fafaura’a ’e te Atua.
Tē fa’ahanahana nei te Pāsa i te fa’aorara’a te Fatu i te nūna’a o ’Īserā’ela nā roto mai i te ma’i hope’a o te ha’amoura’a o ’Aiphiti. Nā roto ia Mose, ’ua parau te Fatu ia rātou ’ia rave i te mau ’ohipa ta’a ’ē, ’ia ti’a i te melahi ha’amou ’ia nā ni’a a’e ia rātou ’e ’ia fa’aherehere i tā rātou matahiapo. I muri iho, ’ua fa’aora te Fatu ia rātou i te fa’atītīra’a ’e ’ua arata’i atu ia rātou i te fenua i parauhia ra. (Hi’o Exodo 12.)
Tē fa’ata’a nei te mau tuha’a rau o te Pāsa i te tusia tāra’ehara a Iesu Mesia nō tā tātou mau hara, tae noa atu tā tātou mau fafaura’a ’e te Atua.
’Ārenio
Hō’ē ’ārenio oni hō’ē matahiti ma te ma’au ’ore.
E tūpa’ihia te reira ’e i muri iho e tunupa’ahia i ni’a i te auahi—’aita te mau ivi i fatifati ’e te upo’o, te mau ’āvae ’e te mau tuha’a maita’i ato’a tei tā’amu’amuhia. E ti’a ’ia ’amuhia te reira i te pō Pāsa, ’eiaha te hō’ē mea e toe mai i te po’ipo’i a’e. Mai te mea e toe mai te hō’ē mea, e tītauhia ’ia tānina i te auahi.
Te aura’a e ti’a : Iesu Mesia ’ei tusia hara ’ore nō te mau hara ; te marū nō te haerera’a mai iāna ra ma te fa’afāura mai i te maramara o te hara ; te itoito pūai a te Mesia i tāna misiōni ; te itoito e tītauhia o te feiā tei rave i te mau fafaura’a ’e te Atua.
Te toto i ni’a i te te’a ’e te mau pou
Te hītopa (hō’ē ’aihere tei fa’a’ohipahia i muri iho i roto i te tāmāra’a) e utuhihia i roto i te ’āu’a toto o te ’ārenio, ’e i muri iho e tu’uhia te toto i ni’a i te te’a ’e te pou o te ’ūputa.
Te aura’a e ti’a : Hō’ē tāpa’o e fa’a’ite ra i te nūna’a o te fafaura’a a te Atua ; te tāmāra’a nā roto i te toto o Iesu Mesia, ’o tei ha’amani’ihia nō te tāra’e i tā tātou mau hara.
Te faraoa hōpue ’ore
Te faraoa tei hāmanihia i te hōpue ’ore ’aore rā te tahi atu huru hōpue, penei a’e i te sitona tāpiahia, te pāere, ’aore rā te teheni tōura i ’Aiphiti tahito ra. E ha’amarū maita’i te hōpue i te faraoa terā rā e mea ’ōhie ato’a te reira i te ’ino. ’Oia ato’a, e tītauhia te taime nō te ha’amara’a i te faraoa, nō reira e maoro atu ā tōna fa’aineinera’a.
E ’amuhia te reira e hitu mahana te maoro. Te hōpue (tei fa’atū’atihia i te ’ino) e ti’a ’ia tātarahia nā roto mai i te mau fare ato’a i te roara’a o taua taime ra (hi’o Exodo 12:19).
Te aura’a e ti’a : Te vi’ivi’i-’ore ; te rū i te horo ’ē i te fa’atītīra’a ; te Mesia mai te pāne ora (hi’o 1 Korinetia 5:7).
Te mau rā’au ri’i maramara
’Oia ho’i te pātoa vai, te rātī, te ’enetive, te pota torota, ’e ’oia ato’a te tahi atu mau ’aihere maramara.
E ’amuhia te reira ’e te ’ārenio.
Te aura’a e ti’a : Te maramara o te tītīra’a ’e te fa’atītīra’a i Aiphiti ; te maramara o te tītīra’a o te hara ; te maramara o te māuiui o te Mesia nō tā tātou mau hara.
Te tauupu i tātuahia, ’ō’omohia i te tāma’a, te turuto’oto’o i te rima, e tāmā’a ti’a noa.
Te aura’a e ti’a : Te ineinera’a nō te horo ’ē ’oi’oi i te fa’atītīra’a ; te hina’aro ’ia fa’ati’amāhia i te hara.