Te hiero, te ’itera’a pāpū, ’e te tauahira’a nā te metua tāne

’Ua ma’i-’oi’oi-hia tō Taaken Iobi metua tāne. « Tē parau ra vau iāna i te hō’ē pō ’e ’ua maita’i tōna ea ’e tei iāna te pūai », tē parau ra ’oia, « ’e te mahana i muri mai […] ’ua fa’ahuru-’ē-roa-hia ’oia, ’aita ’oia i nehenehe i haere ’e ’aita i nehenehe i parau. »

I muri a’e e piti hepedoma i roto i te fare ma’i, ’aita noa ā te mau taote i nehenehe i fa’ata’a i tā tōna metua tāne hāpepa ’e te ’aravihi ’ore i te parau. E mea fifi a’e teie tupura’a nā Taaken nō te mea tei Hawai’i ’oia nō te ha’api’ira’a mai i noho ai tōna ’utuāfare i te fare i Harora’i (Kiribati). « E mea ātea roa mātou i te tahi ’e i te tahi », tē nā ’ō ra ’oia.

E piti ’ahuru matahiti tō Taaken i ma’ue ai ’oia i Aotearoa (Niu-Tirani) nō te tāvini i te hō’ē misiōni nō te ’Ēkālesia a Iesu Mesia i te Feiā Mo’a i te mau Mahana Hope’a nei. ’O terā te taime mātāmua tāna i tere ’ē atu i Kiribati, ’e ’o ’oia te mātāmua o tāna mau taea’e ’e tāna mau tū’ane i te tere ’ē atu.

’Ua taui-’oi’oi-hia te ’ana’anatae i te hina’aro i te fenua ’āi’a, ’e i te roara’a o tāna tāniuniura’a mātāmua i tōna metua tāne, ’aita ’oia i nehenehe i parau i te hō’ē noa parau—’ua tahe noa tōna roimata. ’Ia ti’a iāna ’ia parau i tōna nā metua ē, tē hina’aro ra ’oia i te ho’i i te fare, ’ua fa’aitoito rāua iāna ’ia fa’aea noa.

’Ua māuruuru roa Taaken nō te mea ’ua fa’aoti ’oia i tāna misiōni. I muri mai i tāna matarara’a i 2022, ’aita ā ’oia i nehenehe i ho’i i te fare. ’Ua tāpe’a te pararera’a TŌVĪ-19 iāna ’ia ma’ue i Harora’i, nō reira tē tere ’āfaro noa ra ’oia i Brigham Young University i Hawai’i ’e ’ua ha’amata ’oia i tāna ha’api’ira’a mai nō ni’a i te fa’ari’ira’a i te mau rātere.

’Ua paraparau Taaken i tōna ’utuāfare i te mau mahana ato’a nā roto i te tāniuniura’a ’e te tāniuniura’a vīdeo. E ’ere te reira i te hō’ē ā huru i te vai-’āmui-ra’a, tē tauturu nei rā te fa’aro’o-tāmaura’a i tō tōna nā metua reo ’ia fa’aiti i te āteara’a.

E vāhi ta’a ’ē i roto i te ’ā’au o Taaken nō tōna metua tāne. « E ta’ata here noa ’’oia […] ’ua here maita’i roa ’oia iā’u ’e i tō’u mau taea’e ’e te mau tu’āne. » E ha’amana’o ’oia i te ahoaho hōhonu tō tōna metua tāne ’ia ma’ihia te hō’ē noa o tāna mau tamari’i. Tē rave ra ’oia i te ’ohipa nō te ho’o mai i te mā’a ’o tei ’ore i ’itea ’ōhie i ni’a i te motu, mai te « ’āpala ! ’Ē’ē », tē ’ata’ata ra Taaken nō te ha’amana’ora’a.

’Ua tupu te mea e’ita ’oia e nehenehe e ha’amo’e i te fare ha’api’ira’a tuarua. ’Ua fa’ari’i Taaken i te hō’ē fa’afāitora’a ha’api’ira’a ’ino ’e ’ua riri a’era ’oia i tai’o ai te ’orometua i te reira iāna, ’ia reva atu Taaken i te piha ha’api’ira’a, ’ua māere ’oia i te ’ite i tōna metua tāne—hō’ē ta’ata ’atu’atu ’oia nō te fare ha’api’ira’a—i te pārahira’a i te ārea iti, i te fa’aro’ora’a i te mea i tupu.

’Ia ’ite tōna metua tāne i te ta’ira’a tamāhine ’ua ta’i ato’a ’oia. « ’Ua ta’i ’āmui māua », tē ’ata’ata ra Taaken. « Tē ta’i ra vau i te hi’ora’a iāna, ’e tē hi’o noa ra ’oia iā’u ’e tē ta’i ato’a ra ’oia. » Nā roto i tōna iho mau roimata, ’ua tauturu tōna metua tāne i te hōpoi i tō Taaken ’oto.

E rave rahi matahiti i ma’iri a’era, e rave rahi tautini kilomētera te maoro, ’ua fa’a’āueue roa te parau ’āpī o tā tōna metua tāne ma’i iāna. ’Aita ’oia i nehenehe i ha’apa’o i tāna ’ohipa ha’api’ira’a ’aore rā tāna ’ohipa, ’e tē ha’amana’o noa ra ’oia i tōna metua tāne i tōna fenua ’āi’a, ’aita ’oia i nehenehe i haere ’aore rā i parau. « E tahe te mau roimata mai tō’u mata atu i te tahi mau taime nō te mea ’o tō’u metua tāne te hō’ē noa mea i roto i tō’u ferurira’a […] ’e e mea fifi mau », tē parau ra ’oia.

I taua taime ra, tē noho ra Taaken fātata i te hiero nō Lā’ie Hawai’i, ’aita rā ’oia i haere pinepine. ’Ua fa’ari’i ’oia i te muhumuhura’a nō ’ō mai i te Vārua Maita’i ’ia ho’i i reira, ’ua tupu ato’a rā tōna mana’o hapa. « ’Aita vau i pāpū ē tē fa’aro’o ānei ra te Metua i te ra’i i tā’u pure nō te mea e mea maoro tō’u fa’ahāhara’a iāna », tē fā’i mai ra ’oia.

Noa atu tōna mana’o hapa, ’ua ’ite ’oia ’o te Atua ana’e ’o tei nehenehe i tāmāhanahana iāna. ’Ua ’ōpua ’oia ’ia fa’a’ohipa i te fa’aro’o ’e ’ua ha’amata ’oia i te haere tāmahana i te hiero nō te pure nō te ea o tōna metua tāne.

I muri a’era, ’ua tupu te hō’ē semeio. ’Ua ha’amata tōna metua tāne i te fa’aorahia. E ’ere ïa i te mea ’oi’oi roa, i te hope’a rā, ’ua ti’a fa’ahou iāna ’ia parau atu. « E tītauhia te tau nō te fa’aorara’ahia tā’ātoa », tē parau ra Taaken, « tē mana’o nei rā vau ē ’ua tauturu te Metua i te ra’i iā’u nā roto i te fa’aorara’a i tō’u metua tāne. »

Fātata i te hō’ē matahiti i mua i tā tōna metua tāne ma’i, maha matahiti i muri mai i tōna reva ’ē atu i te fare, ’ua ti’a fa’ahou ia Taaken ’ia ma’ue i Harora’i. ’Ua mā’iti ’oia ’ia ha’amāere i tōna ’utuāfare, ’e i tōna haerera’a nā roto i te ’ōpani, e piti minuti tā tōna metua tāne i hi’omata iāna ma te parau ’ore.

« I muri ihora te hō’ē noa mea tā’u i ’ite, ’o te mau roimata i roto i tōna nā mata », tē ha’amana’o ra Taaken. ’Ua ani tōna metua tāne iāna, « nō te aha ’aita ’oe i parau mai e ho’i mai ’oe ? » ’E i muri ihora ’ua ta’i ’āmui rāua. « ’O te taime ’oa’oa roa a’e ïa », tē parau mai ra ’oia.

I teie mahana, tē ha’amaita’i-noa-hia nei tō tōna metua tāne ea. ’Ua ha’apūai teie tupura’a i tō Taaken ’itera’a pāpū nō ni’a i te here o te Metua i te ra’i, mai te here tā tōna metua i te fenua nei i fa’a’ite.

’Ua ha’api’i mai ’oia ē mai te peu e fa’aātea tātou ia tātou iho iāna, e ti’a noa rā ’oia, ma te rima fa’atorohia, ineine nō te fa’ari’i ia tātou i te fare.