N̄e Enjeļ Ro Rej Jerbal N̄an Enjeļ Ro

Ia eo in ijjino ie n̄e kōnono kōn jinō Beryl Soane? Ilo iiō eo an kein 100, liin ekar juon jon̄an in tiljek ilo tōreen an mour me ekar un̄ur aolep ro ipeļaakin. Ļotak ilo Sutton, Surrey England, im jerbal ilo Pata An Laļ In Kein Karuo, iaļ in jetōb eo an jinō ekar bōk juon oktak eo em̧wilaļ ilo 1958 eo ilo juon raan in jōm̧ar ebwil ilo South Africa, ke ruo mijenede in Canada raar kaļlaļaļ ilo kōjām eo an.

Liin ekar riiti juon bok in ļaibrāre me ekar kōnono kōn piliej gold ko ilo Amedka eo etto, kōn menin ke likao rein raar kōnono kōn piliej gold ko im Bok in Mormon, juon men ekar im̧we e. Jinō ekar m̧ool in jar n̄an jeļā eļan̄n̄e ennaan eo aer ekar m̧ool, im ukwaake eo ekar itok ilo iien eo em̧ōkaj im kajoor. Kapene in jetōb jab in ekar rie liin ium̧win iiō ko 67 āinwōt juon membōr euwijlepļo̧k an Kabun̄ eo an Jisōs Kraist im Armej ro Rekwojarjar ilo Raan Ko Ālitata.

Kōjekdo̧o̧n jum̧ae jān baam̧le eo an jema, jinō ekar pād wōt ilo an dim ilo tōmak eo an ekāāl. Liin ekar karūttoļo̧k jilu ajri ro ilo gospel eo im jerbal tiljek ilo elōn̄ kūr ko, ilo an kar jokwe ilo South Africa, ilo UK, im āliktata ilo Australia. Kūr ko an iaan aolep kūr ko an eļap an iakwe ej katakin, men̄e ilo Doulul eo an Kōrā ro, Būraimere, Gospel Doctrine ak elōn̄ kūlaaj an Teacher Development. N̄an rainin ikab de ebbōk ennaan ko jen aolepān laļ in jān ro me ekar im̧we mour ko aer ilo juon wāween em̧m̧an, kōn waanjon̄ak eo an im iakwe eo an Jemādwōj Ilan̄ im Jisōs Kraist.

Rōn̄oul-ruwalitōk iiō ko ālkin peptaij eo an, jar ko an jinō raar uwaak ke eo jema aorōk ekar kobatok ilo Kabun̄ in. Ilo 1986 eo, raar liāp ilo Joannesburge South Africa Tampeļ—juon iien lan̄lōn̄ erreo me ekar kōpālpele 61 iiō in m̧are eo aer.

Āinwōt juon rijeje ekūttare, jinō ekar likūt bo̧o̧k in jōnōļ ko , kakeememej ko, leta ko im ruo bok n̄an baam̧le eo am—juon kōn oktak eo an, ko jet raar obrak kōn enaan ko kōn mour eo an, bwe ro ineen ren maron̄ jeļā wōn kar lukkuun e.

Kōn okmāāņāņ eo an, m̧wil kam̧ōņōņō eo an, liin ekar dāpij jemjerā ko an aolepān laļ in, kōn leta ko im talboon kūr ko to in wōt an maron̄ kar kōm̧m̧ani.

Ke ekar rūttoļo̧k, jinō ekar lo an make lokjak n̄an juon wiiljea ilo juon im̧ōn lale rūtto ilo Tamborine Mountain ilo Queensland. Jab maron̄ etal n̄an jar, liin ekar bōk kwokwoj eo wiik otemjej jān membōr ro an ward eo rej kea. Men̄e liin ekar kōnono ilo wāween būrom̧ōj kōn en̄jake ko an tampeļ, liin ekar bōk bwe Brisbane Australia Tampeļ—eļapļo̧k jān juon awa ettoļo̧k—ekar pen an tōpare.

Innām ekar itok juon kōjeraam̧m̧an ilo juon wāween an Mikaela Hulands, juon jiron̄ ekar jerbal āinwōt juon mijenede, ekar jerbal ilo im̧ōn lale rūtto ro. Ke Mikaela ekar jeļā bwe Beryl ekar juon membōr in Kabun̄ in, juon me ekar un̄ur būruōn liin. Kōjekdo̧o̧n n̄ūrbōkta ko an ro jet kōn iaļ eo aitok elukkuun kam̧ōkm̧ōk n̄an juon 99 iiō dettan, Mikaela ekar jab ebbweer.

“Ikar jerbal ippān Beryl aolep raan,” liin ekar ba. “Ijeļā ta eo liin ekkeke mo̧o̧j ie.”

Mikaela ekar meļeļe bwe ālkin elōn̄ iiō ko in an jinō kar jerbal n̄an ro jet, ekar iien n̄an juon jerbal n̄an liin. Liin ekar kōm̧m̧ane juon iien, ekar jipan̄ kōpooj nuknuk in tampeļ ko an jinō, im kar likūt Sister Carolynne Bax, juon m̧ōttan ejitōnbōro jen ward eo an Beryl me ekar bōk ejja visōn in an liin wōt.

Ilo M̧aaj 23 2024 eo, kōrā rein ruo, jim̧or em̧m̧akūt kōn iakwe, kar lukkuun jipan̄ m̧am̧a n̄an lowaan wa eo waer me ekar erom juon iaan raan ko relōm̧ōņōņō an mour eo an liin āliktata.

Iaļ eo aer n̄an tampeļ eo ilo Brisbane ekar aitok im lukkuun kar karōke. Ilo tampeļ eo, jinō ekar ioon patron ro jet, ekoba Tampeļ Būreejtōn eo Richard Gordon im lio pāleen, Matron Karen Gordon, ro raar joļo̧k iien bwebwenato ippān. Ekar juon raan aiboojoj im im̧we, im ke ekar jem̧ļo̧k, Mikaela im Carolynne rekar kōro̧o̧l Beryle eo ekar m̧ōk bōtaab m̧ōņōņō im ļōn̄jak n̄an im̧ōn lale rūtto eo jikin.

Jerbal in jipan̄ in edik jān juon jiron̄ ekar lale rūtto ro ekar letok n̄an jinō juon iien n̄an bar ro̧o̧l n̄an im̧weo im̧ōn Irooj āliktata ilo mour in.

Jinō ekar pād ippem bar juon iiō, im kar maron̄ in keememe 100 iiō in ļotak eo an, m̧okta jen an kar jako.

Kiiō, ilo am kejekļo̧kjeņ kōn mour eo an ekabwilōn̄lōn̄, jelet eo an waanjon̄ak tiljek eo an ej wōnm̧aanļo̧k in kōjeraam̧m̧an baam̧le eo am ilo wāween ko liin bōlen eban kar pijaikļo̧k. Ro jatū im n̄a ej errā kōn iakwe im kajoor in kareel eo ewōr an liin ilo kōm im ro jibūn im ro jibūn-jibūn. Kōm kar iakwe men ko raorōk ippān rekajoor, an m̧ool, im kōjak ko an raiboojoj.

Ilo iiō ko an āliktata, jinō ekar m̧ōkoko in būrom̧ōj kōn e make kōjekdo̧o̧n kapan̄pan̄ ko ilo im̧ōn lale rūtto ro. Liin ekar emakijkij an kōnono kōn karōk in lo̧mo̧o̧r eo im ļapļo̧k in iakwe eo an n̄an Jemādwōj Ilan̄ im Jisōs Kraist. Liin ekar kaorōk kapilōk eo an rikanaan eo n̄an “ļōmņak kōn selestial,” eo kōm kōn bajjōk kakūtōtō kake im kakeememej doon kake.

Jinō ekar reim̧aanļo̧k kōn kōjatdikdik n̄an bar koba ippān ro ej iakwe—eļap tata jema, jinen, būratōr eo an, im ļeo nejū Brad, eo ekar maļon̄ ke ekar freediving ke ekar 24 iiō dettan. Tōmak eo an ilo baam̧le ko indeeo ekar rie ilo aolep men ko reppen.

Ilo aolepān 67 iiō ko in an membōr, tiljek eo ejjab ne teeļeļ ekar aitokļo̧k wōt jān baam̧le eo am. Jān jiron̄ eo ekar jerbal juon jerbal in mijenede eo ekar en̄jake im̧we n̄an jerbal in karejar n̄an liin, n̄an ro m̧ōttan rellōn̄ aolepān lal ko me rekab de kōnono kōn kareel eo an, n̄an ro uwaan baam̧le eo me rej wōnm̧aanļo̧k wōt in ļoor iaļ eo ekar kōroomakļo̧k—bwebwenato eo an Beryl Soane ej kakeememej kōj bwe juon mour in jerbal in jipan̄ etiljek em̧ool eban jem̧ļo̧k. Iakwe eo jej leļo̧k ej bar ro̧o̧ltok n̄an kōjeraam̧m̧an kōj, emakijkij kōn pā ko pein enjeļ ro jab kōtmene kaki.