Tampeļ, Naan in Kam̧ool im Atbo̧kwōj an juon Jemān

Jemān Taaken Iobi ekar m̧ōkaj an lukkuun do̧o̧lol. “Ikar kōnono n̄an e juon bon̄ im ekar kanooj in ājmour im kajoor,” liin ej ba, “Innām raan eo tok juon . . . ekar erom juon armej eo elukkuun oktak, āinwōt ejjab maron̄ m̧akūtkūt im jab maron̄ kōnono.”

Ālkin ruo wiik ko ilo aujpitōļ eo, taktō ro rekar jab maron̄ kōmeļeļeik nan̄inmej eo ekabwilōn̄lōn̄ an jema im an jab maron̄ kōnono. Jekjek eo ekar lukkuun pen n̄an Taaken kōnke liin ekar pād ilo Hawaii ikijeen jikuuļ ilo an baam̧le eo an kar pād ilo kapijuknen ilo Kiribait. “Kōm kar lukkuun ettoļo̧k jān doon,” liin ej ba.

Taaken ekar 20 iiō dettan ke ekar keļo̧k n̄an New Zealand n̄an jerbale juon mijen n̄an Kabun̄ eo an Jisōs Kriast im Armej ro Rekwojarjar ilo Raan Ko Āliktata. Ej kab kar kein kajuon in an liin etal ettoļo̧k jen Kiribati, im liin ekar kein kajuon iaan aolep ro jatin n̄an etaļ.

Itok limo eo ekar m̧ōkaj an oktak n̄an oon̄, im ilo talboon eo an kein kejuon n̄an jemān, liin ekar jab maron̄ ba juon naan—liin ekar jan̄. Āliktata ke liin ekar jiron̄ jinen im jemān bwe ekar kōņaan ro̧o̧l n̄an kapijuknen, raar kōketak e n̄an pād wot.

Taaken ej lukkuun in kam̧m̧oolol bwe ekar kadedeļo̧k mijen eo an. Ālkin an liin kar release ilo 2022 eo, liin ekar jab maron̄ ro̧o̧l n̄an kapijuknen. Ajeeded in COVID-19 eo ekar bōbrae an kelo̧k n̄an Kiribati, kōn menin, liin ekar kajju n̄an Brigham Young University Hawaii Campus eo im jino ekkatak ko an n̄an degree eo an ilo hospitality.

Taaken ekar kōnono n̄an baam̧le eo an aolep ilo ainikien im video chat. Ejjab āinwōt n̄e koba ippān doon, bōtaab ron̄ ainikien jinen im jemān kajjojo raan ejipan̄ kepaake er.

Jemān liin ej pād ilo juon jikin aorōk ilo būruōn Taaken. “Ļein ej juon armej em̧m̧an. . .ļein eļap an iakwe eō im ro jatū.” Liin ej keememej an jemān kajoor inepata n̄e juon iaan ajri ro nejin rej nan̄inmej. E ekōn kōm̧m̧an jabdewōt n̄an an wia kijier m̧ōn̄ā men̄e ekar pen n̄an elolo ilo āne eo, āinwōt, “apple ko! O aaet,” Taaken ej ettōn̄ dikdik kōn ememļo̧kjeņ eo.

Juon tōre Taaken eban meļo̧kļo̧k ke ekar high school. Taaken ekar bōk juon riboot enana ilo jikuuļ im ekar inepata ke rūkaki eo an ekar riiti n̄an e, bōtaab ke Taaken ekar etal jān kūlaajruum̧ eo, liin ekar ilbōk n̄an lo jemān—juon rijerbal ilo jikuuļ eo—ej jijet ilo hall e, im ron̄jake.

Ilo iien eo wōt jemān ekar lo lio nejin ej jan̄, ekar bar jan̄. “Kōm kar jan̄ ippān doon,” Taaken ej ettōn̄. “Ikar bar jan̄ ke iaar reilo̧k n̄an e, ekar reitok n̄an n̄a im bar jan̄.” Ilo aolepān kōmejaaļaļ ko an make, jemān ekar jipan̄ n̄an kōmerāik an Taaken burom̧ōj.

Iiō ko tokālik, taujin m̧aiļ ettoļo̧k, ennaan eo kōn nan̄inmej eo an jemān liin ekar ļap an im̧we Taaken. Liin ekar jab maron̄ em̧m̧an an katak ilo jikuuļ ak jerbal eo an, im men eo de eo liin emaron̄ kar lōmņake ej jemān ilo kapijuknen, an jab maron̄ m̧akūtkūt ak kōnono. “Kōmejaaļaļ ko raar [wōtlo̧k] jen meja kōnke men eo de eo [me ej] pād ilo aō ļōmņak ej jema . . . im bwe elukkuun pen,” liin ej ba.

Ilo iien in, Taaken ekar jokwe epaakeļo̧k Lāʻie Hawaii Temple, bōtaab liin ekar jab emakijkij an etal. Liin ekar en̄jake juon im̧we n̄an bar ro̧o̧lļo̧k, bōtaab liin ekar barāinwōt ajļo̧k. “Ikar jab jeļā eļan̄n̄e Jemād Ilan̄ emaron̄ ron̄ jar eo aō kōnke ikar kowaan E ilo jidik iien,” liin ej kwaļo̧k.

Bōtaab kōjekdo̧o̧n bōd eo an, liin ekar jeļā Anij ekar E wōt emaron̄ kar kaenōm̧m̧an e. Liin ekar jokāālet n̄an jerbal ilo tōmak im kar jino etal n̄an tampeļ raan otemjej n̄an jar kōn ājmour an jemān.

Innām juon kabwilōn̄lōn̄ ekar waļo̧k. Jemān ekar jino em̧m̧anļo̧k an pād. Ājmourļo̧k eo ekar jab m̧ōkaj bōtaab ilo jem̧ļo̧kin, ļein ekar maron̄ bar kōnono. “Enaaj bōk iien n̄an lukkuun ājmour,” Taaken ej ba, “bōtaab ij lukkuun en̄jake āinwōt Jemādwōj Ilan̄ ekar jipan̄ eō n̄an jipan̄ an em̧m̧anļo̧k an jema mour.”

Enan̄in juon iiō m̧okta jen nan̄inmej eo an jemān, emān iiō ko ālkin em̧m̧akūt jen kapijuknen, Taaken ekar maron̄ āliktata ro̧o̧lļo̧k n̄an Kiribati. Liin ekar kōņaan kailbōk baam̧le eo an, im ke liin ekar jorjorļo̧k ilo kōjām eo, jemān ekar kalimjōk e ium̧win ruo minit ko ilo an jab ba juon naan.

“Innām men eo de eo imaron̄ lo ekar kōmejaaļaļ ilo mejān,” Taaken ej keememej. Jemān ekar kajjitōk, “Etke kwar jab ba n̄an kōm kwoj ro̧o̧ltok?” Innām raar jan̄ ippān doon. “Ekar iien eo em̧m̧an tata,” liin ej ba.

Rainin, ājmour eo an jemān liin ej em̧m̧anļo̧k wōt. En̄jake in ekar kōkajoorļok naan in kam̧ool eo an Taaken kōn iakwe eo an Jemādwōj Ilan̄, āinwōt an kar waļo̧k ilo iakwe an jemān eo ilaļ.

Liin ekar katak bwe jekdo̧o̧n n̄e jej kōttoļo̧k kōj make jān E, E ej aolep iien pād ijeņ, kōttar kōn pā ko repeļļo̧k; pojak n̄an karuwaineneik kōj n̄an jikid.