Juon Unin Tōl An Kallim̧ur M̧okta n̄an Bōk Kadkad Ekwojarjar

Ilo Jino in Kar Naan eo, jān Eva Timothy, maron̄ kapeik n̄an kōjerbale wōt ilo Kabun̄ in

Imaron̄ riab eļan̄n̄e iar jiron̄ eok bwe ijjan̄in kar kajjitōk kōj eddo eo aō ilo karōk eo an Anij.

Ekōjkan aō maron̄—āinwōt aō jab wānōk—emaron̄ jetjet n̄an karōk weppān eo An? Ekōjkan aō maron̄ erreo n̄an bōk bar iien em̧m̧an kein karuo Jemedwōj Ilan̄ ej letok n̄an eō iien n̄an iien? Ekōjkan maron̄ lōke eō n̄an kwaļok iakwe eo An ippān ro jet n̄e jet iien ij kakkōt n̄an en̄jake kōn n̄a make?

Eļan̄n̄e ļōmņak ko renana rej āinwōt jeļā kaki, kwojjab make iaam̧.

Juon iaan aujiid ko reļļap tata an rikapo eo ej n̄an luko̧rko̧re meļeļe eo ad kōn kadkad kwojarjar. Elder Brian K. Taylor jān Jiljilimjuonn̄oul eo ekar katak, “Tariņae in eļap kōn kadkad eo ekwojarjar ej wōnm̧aanļo̧k wōt ilo an lukkuun kajoor kōbo̧uwe ilo an Setan kajieon̄ kakkure tōmak im jeļāļo̧kjeņ eo ad kōn jem̧doon eo ad ippān Anij.”

Jeraam̧m̧an, Jemādwōj Ilan̄ ekar katakin—im ej wōnm̧aanļo̧k wōt n̄an katakin—ajri ro Nejin kōn aorōk eo aer. Jān kar jino in tata, armej ro ilo jeje ko rekwojarjar remaron̄ kar kakkōt n̄an meļeļe jet iaan ejja kajjitōk ko wōt ewōr ippam̧ im n̄a rainin

Ilo am̧ ekkatak Kallim̧ur M̧okta iiō in, kwomaron̄ katak kōn kadkad kwojarjar eo am̧ make kōn kōjerbal en̄jake ko an armej ro ilo jeje ko n̄an mour eo am̧ make. Im bōlen kwonaaj lo uwaak ko n̄an juon kajjitōk aorōk ilo am̧ katak:

Wōn n̄a?

Adam im Iv kar kakōļļeik ijjino eo m̧oktata an aikuj eo an armej n̄an meļeļe kadkad kwojarjar eo: Jemādwōj Ilan̄ ekar kōm̧anm̧an er ilo Nememeen Make, kar leļo̧k n̄an er bōk eddo in eo ioon laļ im aolep mennin kōm̧anm̧an ko ioon, im kar jiron̄ er n̄an tūm̧oņ im orļo̧k im koobrak laļ (lale Moses 2:26–28).

Āinwōt juon bwijjin Adam im Iv, kwomaron̄ kōjerbal ejja pedped in katak kein wōt an kadkad eo n̄an kwe make. Kwoj lukkuun juon ajri in jetōb nejin Anij kōn eddo kwojarjar n̄an jerbal āinwōt juon ribōk eddo in elo̧ļe im kalōk juon baam̧le indeeo.

Ke Adam im Iv raar m̧ōn̄ā jān leen wōjke in jeļā em̧m̧an im nana eo, kar kadiwōjļo̧k er jān Jikin Kallib Eden. Men̄e raar jepeļļo̧k jān m̧aan mejān Jemādwōj Ilan̄, jim̧or ilo kanniōk im jetōb, E ekar leļo̧k juon Rilo̧mo̧o̧r n̄an jipan̄ er anjo̧ ioon jim̧or mej in kanniōk im jetōb kōn Pinmuur eo an Jisōs Kraist.

Āinwōt Adam im Iv, aorōk eo am̧ “ekanooj ļap ilo mejān Anij” (Katak im Bujen Ko 18:10).

Bwebwenato eo an Ebream ej lukkuun ekkejel n̄an kadkad kwojarjar. Irooj ekar kōm̧m̧ane juon kallim̧ur in tōprak indeeo n̄an Ebream.

“Inaaj kōjeraam̧m̧an juon aelōn̄ eļap jān kwe, im Inaaj kōjeraam̧m̧an eok, im kōm̧m̧an etam̧ bwe en ļap; im kwōnaaj men in kajeraam̧m̧an:

“Im Inaaj kajeraam̧m̧an ro rej kajeraam̧m̧an eok, im Inaaj ko̧o̧le eo ej ko̧o̧le eok im kōn kwe nukun otemjej i laļ renaaj jeraam̧m̧an” (Jenesis 12:2–3).

Ālkin elōn̄ iiō kko in kōttar ilo tōmak, Ebream im Sara raar jeraam̧m̧an kōn ļotak eo an ļeo nejierro, Aisek. Innām Anij ekar jiron̄ Ebream n̄an katok kōn Aisak āinwōt “kakōļļen Anij im eo Nejin Eaar Keotak” (Jekab 4:5). Ke Ebream ekar kwaļo̧k kar m̧ōņōņō eo an n̄an kōm̧m̧ane kain katok in, kar kabōjrake jān juon enjeļ in Irooj.

Jej riit:

“Iar kallim̧ur kōn Eō make, Jeova ej ba, bwe kōn am̧ kōm̧m̧an men in im jab dāpij nejim̧, eo ej make wōt nejim̧:

“Ilo jeraam̧m̧an Inaaj kajeraam̧m̧an eok, im ilo orļo̧k Inaaj korļo̧k ineōm̧ āinwōt iju ko ilan̄, im āinwōt bok i perijet; im ineōm̧ enaaj bōk kōjām an ro rej kōjdate;

“Im ilo ineōm̧ ri aelōn̄ otemjej i laļ renaaj jeraam̧m̧an, bwe kwaar pokake ainikiō” (Jenesis 22:16–18).

Bwebwenato in ekajoor ej katakin bwe aolep ro me rej kōm̧m̧an im kōjparok bujen ko ippān Jemādwōj Ilan̄ maron̄ bōk kōjeraam̧m̧an ko kar kallim̧ur kaki an ro ineen Ebream. Āinwōt juon ajri in bujen eo, kwomaron̄ bōk kōjeraam̧m̧an ko kar kallim̧ur kaki an bujen eo an Ebream kōn dāpdep wōt n̄an kallim̧ur ko kwōj kōm̧m̧ani ippān Irooj kōn peptaij ak bujen ko an tampeļ.

Hegar—rijerbal eo an Sera im jinen Ismael—ej katakin maron̄ eo ad ekabwilōn̄lōn̄ kōn kajoor. Ālkin ļotak eo an Aisak, Ebream im ļeo nejin Sera, Hegar im Ismael raar diwōjļo̧k n̄an āne jem̧aden (lale Jenesis 21:9–14).

Lo an liin inepata im m̧ool in akweļap kōn mour eo an Ismael, Irooj ekar jilkinļo̧k juon enjeļ n̄an kaenōm̧m̧an liini: “Kwōn jab mijak, bwe Anij ear ron̄ ainikien ļadik eo ijo ej pād ie. Kwōn jutak, im bōk ļadik eo im dāpije kōn peim̧, bwe Inaaj kōm̧m̧ane juon aelōn̄ eļap jān e” (Jenesis 21:17–18).

Jekdo̧o̧n n̄e Hegar ekar lukkuun en̄jake an makeļo̧k ilo āne jem̧ade, Jemādwōj Ilan̄ ekar jab kōjerwawaik e. Liin kar kōjparoke im kōjeraam̧m̧ane kōn tōmak im niknik eo an.

Āinwōt Hegar, kwomaron̄ en̄jake āinwōt kwōj jōbwābwe ilo juon āne jem̧aden kwe wōt iaam̧. Bōtaab eļap am̧ aorōk n̄an Jemam̧ Ilan̄. Kwomaron̄ jōbwābwe ilo āne jem̧aden ium̧win juon iien, bōtaab E ejjan̄in meļo̧kļo̧k eok. E ej kōpooj eok n̄an kōm̧m̧ani men ko reļļap n̄an kakōk aelōn̄ in kiin̄ eo An.

Moses kar kūr jān Jemādwōj Ilan̄ n̄an kōjo̧o̧r RiIsrael ro jān kōm̧akoko ilo Ijipt. Ekar kōm̧m̧ane juon kōro̧ro in mennin bwilōn̄ ko rekajoor me kar tōlļo̧k n̄an ko eo aer āliktata (lale Exodus 7; 14).

Men̄e ekar wejepedik ilo kūr eo an, Moses ekaar jab aolep iien lōke ilo maron̄ eo an n̄an kōm̧m̧ane āinwōt an Jemādwōj Ilan̄ kar kajjitōk ippān. Ke Moses ekar kwaļo̧k en̄jake in likjab ko an, Irooj ekar uwaak, “E m̧ool Inaaj pād ippam̧; im men in enaaj kakōļļe n̄an kwe bwe Iar jilkinļo̧k eok: N̄e em̧ōj am̧ ān̄intok armej raņ jān Ijipt, kom̧naaj karijer n̄an Anij ilo toļ in” (Exodus 3:12).

Moses ekar kautiej kadkad eo an āinwōt juon ajri nejin Anij im kar bōk kajoor eo an Jemādwōj Ilan̄ n̄an kōm̧m̧ani mennin bwilōn̄ ko An. Āinwōt Moses, kwomaron̄ bōk kajoor eo n̄an kōm̧m̧ane jerbal eo an Anij ilo am̧ kautiej jemjerā eo am̧ indeeo ippān Jemādwōj Ilan̄.

Kōn menin, wōn kwe?

Kiiō ej iien n̄an kwe n̄an pukot uwaak eo kōn kwe make.

Lin̄ūri jeje ko rekwojarjar n̄an uwaak ko n̄an kajjitōk ko am̧, im kwonaaj loi Jemādwōj Ilan̄ ej kōņaan bwe kwon lukkuun meļeļe wōn kwe bwe kwon maron̄ iakwe eok make āinwōt An iakwe eok.

Jeļā eo kōn kadkad eo am̧ indeeo, ekwojarjar ejjab ettoļo̧k—kōn menin ta eo kwoj kōttare?