“Aō Būrom̧ōj Ekar Oktak n̄an Lan̄lōn̄,” Liaona, M̧aaj. 2026.
Ainikien Armej ro Rekwojarjar ilo Raan Ko Āliktata
Aō Būrom̧ōj Ekar Oktak n̄an Lan̄lōn̄
Juon kōļmenļo̧kjeņ ekāāl kōn Pinmuur eo an Jisōs Kraist ekar jipan̄ eō bun̄ m̧aanļo̧k kōn tōmak im kōjatdikdik.
Kōmeļeļe jān Briana Kranz
Ke ekar 18 iiō detta, jim̧m̧a ilo rejet eo an jinō ekar mej. Tōrein ilo mour eo aō, ejjan̄in kar wōr en epaake eō ekar jako. Ikar jeļā enaaj kar waļo̧k juon raan, bōtaab ikar jab kōtmene enaaj kar kanooj m̧ōkaj an waļo̧k.
Jim̧m̧a ekar em̧m̧an an mour, bōtaab ilo ejjeļo̧k kakkōl, ekar stroke. Būbū ekar m̧ōkaj an bōke n̄an aujpitōļ, bōtaab ekar mej emen raan tokālik.
An mej juon ilo jon̄an m̧ōkaj in ej kab kein kajuon ekar kōmmetak. Ekar juon en̄jake eoktak ilo an kar jim̧m̧a pād ilo aolep iien ko raorōk ilo mour eo aō innām kiiō jako.
Ālkin ilomej eo, ikar lo juon wāween n̄an kautiej ememeļo̧kjeņ eo kōn jim̧m̧a im iien eo am̧ro ippān doon. Ekar em̧m̧an ippān jerbale tūrak eo waan im kōm̧m̧ani būroojāāk ko jet. Ilo m̧ool, ke ekar stroke, ekar pād ilo garage eo an jibwe juon kein jaļjaļ ilo juon iaan pā ko pein rekurbalōklōk, jerbal āinwōt an kōn jerbal.
Ikar jokāālet inaaj barāinwōt kōm̧m̧ani wa ko. Kōm̧m̧ane aindein ejipan̄ eō en̄jake aō epaake. Ikar barāinwōt jar im riiti jeje ko rekwojarjar, ijo ikar lo aenōm̧m̧an n̄an bun̄ m̧aanļo̧k kōn tōmak im kōjatdikdik ilo an jako.
“A ewōr jerkakpeje,” rikanaan Abinadai ekar kakeememej eō, “kōn menin lōb ejjeļo̧k an anjo̧, im kein ire an mej ej oran̄ļo̧k ilo Kraist” (Mosaia16:8).
Mej eo an jim̧m̧a ekar jipan̄ eō bōk juon kōļmenļo̧kjeņ ekāāl kōn Pinmuur eo an Jisōs Kraist em̧ool eļapļo̧k meļeļein ilo mour eo aō. Ejja wōt aō kar kautiej jim̧m̧a kōn kōm̧m̧ani wa ko, ikar kile jej kautiej Jisōs Kraist—im maron̄ en̄jake ad epaake E—ilo ad kajjion̄ mour āinwōt An kar mour, ekkatak naan ko An, kwaļo̧k gospel eo An, im kōm̧m̧ani “jerbal ko an [Jemān]” (Jon 10:37). Kōm̧m̧ane āindein ej letok meļeļe eo em̧wilaļļo̧k kōn Pinmuur eo an Rilo̧mo̧o̧r im kōļapļo̧k lōke eo ad ilo E.
“N̄e jej jan̄ ilo būrom̧ōj ak lan̄lōn̄, Jisōs Kraist ekanooj in meļeļe,” Elder Gerrit W. Gong jān Doulul eo an Jon̄oulruo Rijilōk ro ekar katakin. “E emaron̄ pād ilo iien ko n̄e jej lukkuun in aikuji mennin letok ko reļļap: Pinmuur eo an Jisōs Kraist, Jerkakpeje, jepļaaktok eo.”
Jisōs Kraist ekar ukōt būrom̧ōj eo aō n̄an lan̄lōn̄. Kōn E im Pinmuur eo An, ijeļā inaaj bar lo jim̧m̧a.