Kōjeraam̧m̧an Aolep Baam̧le ko an Laļ in

Elder Bruce C. Hafen, kar juon membōr in Jiljilimjuonn̄oul, juon iien ekar bōk juon kūr ilo talboon jān editor eo an juon national news magazine. Editor eo ekar kōņaan kōnono kōn juon bok kāāl me ekar etale bwebwenato in tōmak ko kōn lan̄ ippān elōn̄ kabun̄ ko.

“Rijeje ro raar lo bwe armej rej en̄jake juon eajeeded in kwōle kōn lan̄—im baam̧le ko ilo lan̄,” Elder Hafen ekar je. Ak ilo elōn̄ wōt armej ro rekar tōmak ilo mour ālkin mej, iakwe indeeo, im koba ko an baam̧le ilo lan̄, “elōn̄ wōt kabun̄ an Rikirijin ro rej letok jidik wōt uwaak n̄an kwōle itulowa”—ijello̧kin juon: Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Ilo Kabun̄ eo an Rilo̧mo̧o̧r kōjepļaaktok, ewōr ad tampeļ ko rekwojarjar. Ewōr ad m̧are indeeo, kōn mālim in liāp eo me ej kōjeraam̧man eļļāļo̧k jān mej an kanniōk. Ewōr ippād kallim̧ur eo kōn jekļan indeeo ippān ro rejitōnbōro ilo im̧aan mejān Jemān im Nejin. Kōn aolep men kein, rijeje ro raar kōjem̧ļo̧k bwe katak eo kōn lan̄ an Armej ro Rekwojarjar ilo Raan Ko Āliktata ej eo edipio tata—im, ikōnaan kakkobaba ke ej eo ekam̧ōņōņō tata.

“Juon men eļap!” Elder Hafen ear kile. Elōn̄ wōt armej rainin rej jan̄uwade kōn baam̧le ko indeeo, im [gospel eo an Jisōs Kraist em̧ōj an jepļaaktok] ej kakurm̧ool ikdeelel in jān bar ļōmņak ko jet jeļā kaki [ak tōmak ko an kabun̄]. Ikōņaan bwe aolepān laļ in marn̄ ron̄jake al eo an ajri ro [nejid] al kōn ennaan eo em̧m̧an: ‘Baam̧le ko remaron̄ pād ippān doon n̄an indeeo.’”

Baam̧le ko rejjab bajjōk karōk in iiaio ko. Rej jon̄ak eo an lan̄ indeeo. Rej “ioļapļapen karōk eo Rikōm̧anm̧an eo n̄an ijo ajri ro Nejin rej jibadōk ļo̧k indeeo.” Āinwōt an Būreejtōn Russell M. Nelson kar katakin kōj: “[Irooj] ekar kōm̧anm̧an laļ in [bwe] jen maron̄ bōk ānbwin ko an kanniōk im ejaaki baam̧le ko. E ekar ejaake Kabun̄ eo An n̄an kemour baam̧le ko ijo eutiej tata. E ej letok tampeļ ko bwe baam̧le ko ren maron̄ pād ippān doon indeeo.”

Bōtaab itok limo eo ad ilo baam̧le ko rekajoor ejjab baj wōt kōn mejānkajjik ko indeeo. Baam̧le ej kōm̧m̧ane juon jerbal elukkuun aorōk ilo m̧ōņōņō eo ad ilo mour barāinwōt. Jemādwōj Ilan̄, eo eweeppān an jeļā ta ej bōktok m̧ōņōņō kiiō im indeeo, ej jilkintok ajri ro Nejin n̄an baam̧le ko—jab wānōk ilo aer maron̄ erom—im kūr kōj n̄an kalōk im kōkaajririk baam̧le ko rekajoor. Aaet, “m̧ōjņo̧ in ānbwin, mej, ak jōkjōk ko jet maron̄ aikuji n̄an oktak ko kajjojo.” Bōtaab ejjeļo̧k men emaron̄ bōk jikin aorōk eo, kwojarjar eo an eddo ko kar kappeik an ļeo im lio pālele, baba im m̧am̧a.

Ekkatak eo kōn “kadkad eo kōn lukkuun (biological), kōtaan eo, baam̧le ko ruo jinier im jemāer” ej wōnm̧aanļo̧k in kwaļo̧k bwe baam̧le ej lukkuun aorōk ilo kōjparok “kōtaan ko rem̧wilaļ an iakwe im en̄jake.” Ej “dilep eo em men kein me m̧wil kein rej waļo̧k, jetjet ukukōt, im jeļā in ikitōltōl eo an kajjojo.”

Aaet, ejjab aikuj in kailbōk kōj bwe juon men ekanooj aorōk n̄an karōk eo an Anij naaj jelm̧ae jum̧ae. Setan eban m̧ōņōņō kōn baam̧le, im kijejeto ko an rej n̄an wōt lukkuun libijerjer “bwe e jeļā jidik wōt iien ippān” (Revelesōn 12:12). Āinwōt an Būreejtōn M. Russell Ballard (1928–2023), Ripinej jenkwan Būreejtōn eo an Doulul eo an Jon̄ouluo Rijilōk ro ekar ba, “Setan ejeļā bwe wāween eo em̧ool tata im ewejepedik tata n̄an kabōjrak jerbal eo an Irooj ej n̄an kadikļo̧k aorōk eo an baam̧le im kwojarjar eo an mweo.”

Jeļā ta eo jejeļā kōn baam̧le eo an Anij indeeo, karōk eo An n̄an ro Nejin, im aorōk eo indeeo an kadkad ko an baam̧le, jej aikuj ibwilijin ribōbrae ro an baam̧le reniknik tata ilo laļ in.

Ekōjkan ad kōm̧m̧ane menin?

Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar letok kapilōk in: “Kean̄ eo an baam̧le … ej bar katak eo an Irooj kōn m̧ool ko an gospel eo bwe jej aikuj jurake kōj jān apan̄ ko kiiō n̄an baam̧le.”

Ilo mour ko ad make, jemaron̄ kōm̧m̧ani “men ko reddik im reļam waan” (Alma 37:6) n̄an kōkajoorļo̧k jemdo̧o̧n ko an baam̧le. Menin ekitbuuj pedped in katak kein kōn baam̧le ko im m̧are ko rejeraam̧m̧an im kar kōllaajraki ilo kean̄ eo an baam̧ļe: “tōmak, jar, ukweļo̧k, jeorļok bōd, kautiej, iakwe, jeļā ņae doon, jerbal, im m̧akūtkūt ko rem̧m̧an n̄an kōkm̧anm̧anļok doon.” Jekdo̧o̧n ta jekjek eo kiiō an baam̧le eo ad, jemaron̄ kwaļo̧k kōn jerbal ko ad bwe jemjerā ko an baamle rej aorōk indeeo n̄an kōj.

Āinwōt “ro aer eddo” ilo jukjuk in pād ko ad, jemaron̄ “iuun m̧aanļok kakien ko ļami n̄an kōjparok im kōkajoorļo̧k baam̧le eo.”

Jej armej in bujen ro an Irooj ilo raan ko āliktata. Kōj jej rijolet ro an kallim̧ur ko kar kōm̧m̧an ippān Ebream, Aisek, im Jekab—kallim̧ur ko me rej aolep iookļo̧k baam̧ļe ko. Kallim̧jur ko rej itok kōn kōketak eo kwojarjar n̄an kōjeraam̧m̧an “nukun otemjej i laļ.” Im juon wāween eaorōk jej kōm̧mane ej kōn mour, bōbrae, im kwaļo̧k m̧ool eo indeeo bwe “baam̧le ej kapit in Anij” im bwet “kain̄i ko im bujen ko rekwōjarjar rej kōm̧m̧an ilo tampeļ ko n̄an kapidodo n̄an kajjojo n̄an aer jepļaak n̄an im̧aan mejen Anij im n̄an baam̧le ko n̄an aer koba ippān doon n̄an indeeo.”

Ke Komro Sister Uchtdorf kōmij alooje an ro uwaan baam̧ļe eo am kōm̧m̧ani bujen ko rekwojarjar ippān eo ejitōnbōro, indeeo Jemād Ilan̄, būruōm ej obrak kōn lan̄lōn̄ im kam̧m̧oolol. Jej m̧ōņōņō bwe ejjab baj wōt ilo ajri ro nejim im ajri ro nejier rej barāinwōt ilo ro jinem im jemam̧ im ro jinier im jemāer. Kōmij kejekļo̧kjeņ kōn iakwe em̧wilaļ kōn ekōjkan an bujen ko an gospel eo kobaik kōm ilo epepen ko. Ej juon en̄jake ejjab āinwōt lo “juon kein uwe ej jutak ioon laļ, … jabōn tulōn̄ ej [tōparļo̧k] lan̄: im lo, enjeļ ro an Anij walōn̄ļo̧k im wanlaļtok ioon” (Jenesis 28:12).

Kōjeraam̧m̧an ko Irooj ekar kallim̧ur kaki n̄an Jekab ilo ettōņak eo an raar etal n̄an aolep ajri in bujen ro Nejin—ekoba kwe im n̄a. Ejja wōt an Jekab kar kōm̧m̧an n̄an Jekab, E enaaj uwaake eok “ilo raan in inepata eo [ad]” (Jenesis 35:3) eļan̄n̄e jej kāālet E.

“Lo,” Irooj ekar ba, “Ij pād ippam̧, im Inaaj oņaake eok ijo ko otemjej kwōj ilo̧ ieļo̧k … I jāmin ilo̧k jān eok” (Jenesis 28:15).

Āinwōt Jekab, ewōr juon adwōj āne jem̧aden n̄an kijoone. Jet iien kōjeraam̧m̧an ko kar kallim̧ur kaki āinwōt rettoļo̧k. N̄e jorrāān ko reļļap ak apan̄ ko rej itok, jemaron̄ kajjitikin iakwe eo an Irooj. Em̧ool jemaron̄ en̄jake bwe Anij ekar meļo̧klo̧k kōj. Kōjekdo̧o̧ņ kijejeto ko ad rem̧m̧an tata ilo rikaļoor, jemaron̄ en̄jake jejjab bōk jabdewōt kōjeraam̧m̧an ko jaar kōjatdikdik kaki.

Ro jeiū im jatū, ro m̧ōtta jitōnbōro, iaļ in bujen eo ej juon iaļ elan̄lōn̄, men̄e jān iien n̄an iien men̄e ewōr ippād iaļ in bujen eo ak jenaaj en̄jake wōt būrom̧ōj. Eļan̄n̄e kwoj en̄jake bwe m̧ōttan karōn in m̧ōņōņō ejjab kūrm̧ool ilo mour eo am̧, jouj lōke bwe Irooj ej ļōmņak wōt kōn kwe im enaaj kōjeraam̧m̧an eo ilo iien eo An, ekkar n̄an māletlet eo An.

Tōmak ilo Jisōs Kraist im kallim̧ur ko An rej im̧we kōj n̄an erreim̧anļo̧k, ejjab likļo̧k. Kōn wōt E, ilju im jekļaj eo ad en jab bōbrae jān juon men e ekar waļo̧k etto ak ej pinej mejān jān ad loe kiiō. Aaet, jej aolep, ak jenaaj, kinejnej ilo juon wāween ak bar juon. Bōtaab jej tōmak ilo Rikemour eo Eļap tata. Jej lukkuun in—lōke e, ilo m̧ool, bwe jej lukkuun jibur kallim̧ūr ko An, “reel kake er,” jekdo̧o̧n n̄e rekab de “etoļo̧k” (Hibru 11:13).

“Bōtaab jej aolep keememej bwe, ilo wāween im iien eo an Irooj, ejjeļo̧k kōjeraam̧m̧an ko naaj dāpij jān Rikwojarjar An retiljek,” Būreejtōn Nelson ekar ba. “Irooj enaj ekajet im letok jinikjej n̄an kajjojo ekkar n̄an ikdeelel an bōro im barāinwōt kōm̧m̧an.”

Ij kallim̧ur bwe ilo ad ļoor im kwaļo̧k karōk eo an Jemādwōj Ilan̄ kōn baam̧le ko, E enaaj pād ippād, rejtake kōj, im koba ippān ilo iaļ eo ad. E ejjamin naaj kōmakeik kōj, eļap tata n̄e mālijjon̄ ko rej itok n̄an kōj ak n̄an ro jej iakwe er. E enaaj ineek kōj, kotak lōn̄ļo̧k kōj, im bōktok n̄an kōj n̄an ānen kallim̧ur eo kōn juon tarlep in lan̄lōn̄ Ippān, ippān Nejin, Jisōs Kraist, im ippān baam̧le ko ad—indeeo.