“Rijerbal ro Rejim̧we—Rikaļoor ro an Jisōs Kraist,” Liaona, M̧aaj 2026.
Kōrā in Bujen ro
Rijerbal ro Rejim̧we—Rikaļoor ro an Jisōs Kraist
Būrabōļ ko jilu rej katakin kōn bōk eddo in im kwaļo̧k ekōjkan kam̧wilaļļo̧k kaļoor eo ad n̄an Jisōs Kraist.
Virgin ro Jon̄o̧ul, jān Jorge Cocco
Kōtļo̧k bwe meram eo an Jisōs Kraist en romaak ilo kaļoor eo ad ej jekjek eo āliktata an bar kōkāāl kajoor—kajoor eo ej itok jān wūnjen kajoor eo ejjab jokod an bar kanne. Kōn bōktok deor eo an Kraist im meram eo n̄an ro jet, jej lo deor eo ad make ilo E.
Kōn menin erom juon rikōm̧m̧an aenōm̧m̧an ilo m̧weo im̧ōm̧ make im jukjuk in pād eo im ilo am̧ pād ilo online. Jipan̄ joļo̧k en̄taan ilo peļaak eo am̧ make.
Jibadbad eo an Setan ej bwe jen kipel n̄an kōm̧m̧an. Ilo jekjek eo juon, karōk in m̧ōņōņō eo an Jemād ej letok n̄an kōj iien em̧m̧an n̄an kōm̧m̧an, n̄an rijerbal ro rem̧m̧an, kōn aenōm̧m̧an, kōn kōjatdikdik.
Jemaron̄ jipan̄ armej kōn meļeļe ko m̧ool eo kōn kwaļo̧k meļeļe ko rej ļōn̄aj, kōjaktdikdik, im jim̧we, kōn erom rijojomar ro an m̧ool eo ijello̧kin ruia kake meļeļe ko. Jemaron̄ uwaaki nana ko kōn koobrak laļ in kōn meram eo im ennaan eo em̧m̧an an gospel eo an Jisōs Kraist.
Āinwōt an rikanaan eo ad ejitōnbōro, Būreejtōn Russell M. Nelson, kar kōmeļeļeiki, uwaak eo ej aolep iien Jisōs Kraist: “Whatever questions or problems you have, the answer is always found in the life and teachings of Jesus ChrJekdo̧o̧n ta kajjitōk ko ak būrabļōm ko ewōr ippāmi, uwaak eo ej aolep iien loi ilo mour im katak ko an Jisōs Kraist.”
Būreejtōn Nelson ekar kajjitōk ippād n̄an kōm̧m̧an bwe kaļoor eo ad ilo E en “jibadbad eo ad aorōktata.” Jej kam̧wilaļļo̧k kaļoor eo ad n̄e jej katak jān im kōn Jisōs Kraist. Kōn menin, jen lūn̄ūri katak ko an Rilo̧mo̧o̧r.
Virgin ro Jōn̄oul
Matu 25 epād ie būrabōļ kein jilu. Eo m̧okta, būrabōļ eo kōn virgin ro jon̄oul (lale eoon 1–13). Ļalem raar māletlet im ļalem raar bwebwe. Aolep ro jon̄oul raar pād ilo jikin eo ejim̧we, kōttar ļeo pālele,, im kajjojo raar itok kōn juon ļaam̧.
Ke ļeo pālele—ej jutak kōn Rilo̧mo̧o̧r eo—ekar itok ilo awa eo lukwōn bon̄ kar jab kōtmene, ļalem iaan virgin ro ekar jab bwe oil n̄an ļaam̧ ko aer. Bōlen raar ļōmņak bōk eļapļo̧k oil ekar jab menin aikuj. Ak remaron̄ kar jab rijerbal ro remeletlet kōn oil ekar wōr ippaer. Bōlen kar m̧ad, raar likjab n̄an kabwe n̄an kōm̧m̧an bwe ļaam̧ ko aer ren ebbōl.
Im kōn menin, n̄an uwaake kajjitōk eo aer n̄an deļo̧n̄ ilo kwojkwoj in pālele eo, ļeo pālele ekar uwaak, “Ijaje kom̧” (Josep Smith Ukook, Matu 25:11 [ilo Matu 25:12, footnote a]). Ilo jekjek eo juon, menin ej kwaļo̧k bwe ilo m̧aanjabpopo eo aer im jerbal eo aer emeletlet, virgin ro ļalem raar jeļā E.
Oil eo aorōk maron̄ loe āinwōt oktak eo aer make. Ekar kōtļo̧k bwe virgin ro remāletlet n̄an kōjo ļaam̧ ko aer im deļo̧n̄e kwojkwoj in pālele eo ippān ļeo pālele. Oil eo kar jab ajije ippān ro m̧ōttaer kōnke oktak an juon make ej—an juon make. Jemaron̄ im aikuj kotak lōn̄ļo̧k meram in ļaam̧ ko ad im kōkajoorļo̧k im jeaļe ro jet n̄an Jisōs Kraist, bōtaab kajjojo iaad ej juon ribōk eddo in oktak eo ad make.
Āinwōt an kar Rilo̧mo̧o̧r ba, “Kom̧in niknik, jar iien otemjej, lale bwe Lamb ko ami ren pojak im urur, im oil eo ippemi, bwe kom̧in maron̄ pojak ilo iien itok eo an Ļeo Pālele” (Katak im Bujen Ko 33:17; naan eo kar kobaitok).
Tōļan ko
Būrabōļ eo kein karuo kōnono kake ilo Matu 25 ej kōn tōļan ko (lale eoon 14–30). Ilo bwebwenato jab in, m̧aajta eo, ilo an kōtmene an ilo̧k ettoļo̧k, ekar leļo̧k n̄an jilu iaan ro rikarejeran m̧weuik ko. Juon “talent” ekar juon kōn jāān. Jemaron̄ barāinwōt ļōmņak kake er āinwōt mennin letok ko, maron̄ ko im kōjeraam̧m̧anko jān Jemādwōj Ilan̄. N̄an juon rikarejeran m̧aanjta eo kar leļo̧k ļalem talent ko, n̄an bar juon ruo talent ko, im n̄an eo kein kajilu ekar leļo̧k juon talent. Innām m̧aajta eo ekar ilo̧k ilo iaļ eo an.
Ke ekar bar jepļaak, ekar lo bwe ro rikarejeran me ekar leļo̧k n̄an e ļalem talent ko im ruo talent ko rekar tiljek im ribōk eddo in ro ewōr aer tōprak im kar kōm̧m̧an em̧man n̄an talent ko, korļo̧k ruo alen aorōk eo aer. Im kar tiljek ioon men eo edik, m̧aajta eo ekar leļo̧k n̄an er eļapļo̧k, ar ba “Em̧m̧an am̧ kōm̧m̧an kwō karijera em̧m̧an im tiljek: Kwaar tiljek kōn men ka re iiet, Inaaj kairooj eok ioon men ko re lōn̄: Kwōn deļo̧n̄ ilo lan̄lōn̄ an am̧ Irooj” (eoon 21).
Ilo jekjek eo juon, eo karejeran kōn juon talent ekar kalbwini—bōlen kōnke ekar m̧ad im karum̧wijļo̧k. Ak bōlen ekar inepata ilo jeļā ekōjkan jinoe ak mijak n̄e enkar likjab. Bōlen eka keidi e make n̄an ro rikarejeran jet, im pere ko an rekar dāpij e jān an kajjion̄. Ekar jab pojak n̄an jepļaak eo an m̧aajta eo, ekar jab en̄jake lan̄lōn̄ eo an ribōk eddo in, im ekar jerwane tōļan eo an.
Būrabōļ eo kōn virgin ro jon̄oul im būrabōļ eo an tōļan ko juon wōt kain aer meļeļe. Erro jim̧or rej kōmejajaik bwe ewōr ad make eddo n̄an oktak eo ad im aikuj kōpooj kōj make n̄an bōk menin letok eo an mour ijo eutiej tata an Irooj—im bwe ewōr ad jerbal im bōk eddo n̄an tōļan ko im mennin letok ko kar litok n̄an kōj.
Sip ko an Seperd Em̧m̧an
Āliktata, Matu 25 ej ba kōn bwebwenato eo kōn ro me ewōr aer “peran im̧aan mejān Anij,” kar kōmeļeļeik āinwōt sip ko an Seperd Em̧m̧an , loe ilo tuanbwijmaron̄ in Pein, lem̧ōņōņō kōn kwojkwoj in pālele eo Ippān, im jeraam̧m̧an n̄an irooj ioon men ko rellōn̄ (lale eoon 31–40). Irooj enaaj ba n̄an er:
“Bwe I ar kwōle, kom̧ ar naajdik eō: I ar maro, im kom̧ ar kaidaak eō: I ar ruwamāejet, im kom̧ ar kadeļo̧n̄ eō:
“Ejjeļo̧k aō nuknuk, im kom̧ ar kanuknuk eō; I ar nan̄in mej, im kom̧ ar itōmlale eō; I ar pād ilo kalbuuj, im kom̧ ar itok n̄an lppa” (Matu 25:35–36).
Āinwōt rikaļoor ro An, jej kōpooj kōj make n̄an Itok eo Kein Karuo An im jej tiljek im niknik jerbal ioon men eo em̧ōj kar kōjeraam̧m̧an kōj kake. Meanwōd, iakwe-em̧ool, wānōk, im tiljek bōk eddo in ej kōkarbōb kōj ejjab wōt n̄an mour Ippān tokālik ak barāinwōt wōr peran im̧aan mejān Anij kiiō. Āinwōt an Mormon kar katakin, bwe ro me rej obrak kōn iakwe-em̧ool—iakwe eo erreo an Kraist—“enaaj em̧m̧an [ippāer]” ilo raan āliktata. Renaaj āinwōt Rilo̧mo̧o̧r eo, loe e āinwōt E ej im obrak kōn kōjatdikdik im erreo em̧ool āinwōt E erreo. (Lale Moronai 7:47–48). Būreejtōn Nelson ear kean̄, “iakwe-em̧ool im ewānōk rej kōpeļļo̧k iaļ eo n̄an bōk peran ilo im̧aan mejān Anij!”
Shepherd—Variation IV, jān Jorge Cocco
Rikaļoor ro an Jisōs Kraist rej lale kōn ro rej aikuj.
Aolepān būrabōļ kein jilu rej katakin kōn bōk eddo in oktak eo ad, kōn mennin letok ko, tōļan ko, im jipan̄ kōn ta eo kar kōjeraam̧m̧an kōj kake; im kōn ro rūturid me rej kwōle, ejjeļo̧k jikier, merak, im m̧ōk.
Rej katakin kōn ekōjkan an rikaļoor ro an Kraist aikuj m̧aanjabpopo n̄an iien ko renana me naaj itok m̧okta jān Itok eo Kein Karuo an Rilo̧mo̧o̧r. Ej iien ko kein jej mour ie! Jej aikuj kabbōli wōt ļaam̧ in oktak eo ad, kōromaak meram eo ad, kōjerbal im kōļapļo̧k tōļan ko ad, im kea kōn ro rej aikuj. Menin em̧ōj bōke kōn iakwe-em̧ool, iakwe eo erreo an Kraist.