Lo, N̄a E

Irooj ekar kallim̧ur kōn juon ine eļap ineen Ebream im Sara. Kōjeraam̧m̧an jab in ekar to an itok, ak, ijello̧kin, ekar itak tok ilo iien eo an Irooj. Ijo ke, Irooj ekar idajon̄jon̄e tōmak eo an Ebream ke E ekar kajjitōk ippān n̄an katok kōn ļaddik eo nejin, Aisek, eo ekar kōjeraam̧m̧an eo me raar jar kake im kar kōttar ilo juon iien aitok. Jemaron̄ in kar riiti bwebwento in ilo jeje ko rekwojarjar elōn̄ alen, bōtaab ewi emakijkij in ad likūt kōj make ilo jekej ko an Ebream?

Epen n̄an ļōmņake ļo̧k en̄jake eo em̧m̧an an jemān m̧okta jān kain karōk in. Ijoke, kijejeto eo an Ebream ilo jokāālet n̄an pokake ejjan̄in bōjrak an kabwilōn̄ eō ke ekar kōppopo n̄an etal n̄an juon toļ ilo Moriah im ajeļo̧k katok eo kar kajjitōke. Ilo juon kakōļļe in m̧ōņōņō im ajeļo̧k n̄an ankilaan Jemād Ilan̄, uwaak eo an ekar kakeememej, “Lo, N̄a e.” (Lale Jenesis 22:1–2.)

Ilo ukōtļo̧k kōn pokake eo an, kar kōjeraam̧m̧an e kōn dāpij mour eo an Aisek, barāinwōt kōn kōjeraam̧m̧an ko raiboojoj im indeeo n̄an e, n̄an Sara, im n̄an ro ineer Jenesis 22:15–18).

Ajeļo̧k eo an Rilo̧mo̧o̧r

Ilo ejjeļo̧k pere, waanjon̄ak eo eļap tata an pokake im ajeļo̧k n̄an Jemedwōj Ilan̄ ej pedped ioon Rilo̧mo̧o̧r, Jisōs Kraist. E ear kwaļo̧k An m̧ōņōņō in pokake ilo An itok n̄an laļ in; ilo an kar peptaij, ilo an kar erreo im weeppān; im ilo an kar letok mour eo An āinwōt juon katok im bōk Ioon metak ko, en̄taan, m̧ōjņo̧ ko, jerawiwi ko, im mej an armej ro An, bwe E en maron̄ jeļā ekōjkan jipan̄ kōj ilo kanniōk Alma 7:11–13).

En̄jake eo ekar lukkuun kanooj jon̄an, ium̧win jidik iien, ekar kōm̧m̧an An kajjitōk eļan̄n̄e ewōr jabdewōt wāween n̄an an kab eo emeo̧ jako. Innām em̧ōkaj An kar ba, “A en jab ankil Aō, a Am̧ wōt” (Luk 22:42)—ilo naan ko jet, “Lo, N̄a e”—āinwōt juon uwaak ej kwaļo̧k An m̧ōņōņō in kōm̧anm̧an ankilaan Jemā.

Ekōjkan ad maron̄ jerbale m̧ōņōņō jab in n̄an leļo̧k juon “Lo, N̄a e” n̄an uwaake aolep kajjitōk ko me Jemādwōj Ilan̄ ej kōm̧m̧an bwe jen āinwōt membōr in Kabun̄ in, ak jet iien ilo jekjek eo an juon make?

Paul ekar katakin armej in Rom ro, “Yokwe e men in kajejjet kein” (Rom 13:10). Eļan̄n̄e ikōņaan pukot juon naan me āinwōt n̄an bōk jikin naan eo “kakūrm̧ool kien eo,” Ij ļōmņak naan eo pokake naaj kar m̧ōkaj an itok n̄an ļōmņak. Kōn menin, jemaron̄ ba bwe iakwe ej pokake. Im kōn menin ennaan eo an Rilo̧mo̧o̧r “Eļan̄n̄e kom̧ij yokwe Eō, kom̧ naaj kōjparok kien ko Aō” (Jon 14:15) elukkuun meļeļe.

Jemaron̄ uwaake kōn “Lo, N̄ā E” ak, ilo naan ko an Nipai “Inaaj ilo̧k im kōm̧m̧ani” (1 Nipai 3:7). Ilo kajin eo ad raan kein, “Aaet, im̧ōņōņō in kōm̧m̧ane ta eo Jemād Ilan̄ ej jiron̄, jekdo̧o̧n ta jekjek ko.”

Kōn menin, ta eo ikōņaan kōmejajaik, ej iakwe-pokake kadkad eo, meļeļe in bwe jej pokake Jemād kōnke jej iakwe E. Ij tōmak bwe kāālet n̄an pokake ej jun iaan wāween ko rem̧m̧an tata n̄an lukkuun kwaļo̧k iakwe eo ad n̄an E. “Tōmak ejjeļo̧k jerbal emej” (Jemes 2:26), im n̄a make ijjab tōmak juon armej ej ba ej iakwe Jemād Ilan̄ im Jisōs Kraist eļan̄n̄e ejjab pokake Er.

Ekōjkan ad kōļapļo̧k ad iakwe n̄an E im ad pokake n̄an E? Rilo̧mo̧o̧r ekar ba: “Bwe men in ej mour indeeo, bwe ren jeļā Kwe juon wōt Anij e m̧ool, im Jisōs Kraist, eo Kwaar jilkintok” (Jon 17:3). Jeļā Jisōs Kraist—im, kōn E, Jemān—ej kōmaron̄ kōj n̄an jeļā kōn iakwe eo me ewōr Ippāer n̄an kōj im kōn men ko pen kōmeļeļeik me Er raar kōm̧m̧ane im n̄an kiiō naaj kōm̧m̧ani n̄an kōj, ekoba ilo iien ko reppen me jej en̄jaki ilo mour in. Jeļā kōn Er ej ukōt būruōd, kōm̧m̧an bwe jen ikdeelel n̄an ļoor waanjon̄ak ko Aer ilo jerbal ko ad im n̄an m̧ōņōņō n̄an ba, ilo naan im kōm̧m̧an, “Lo, N̄a E.” M̧ōņōņō in ej waļo̧k ilo juon ikdeelel n̄an riiti jeje ko rekwojarjar ak ilo kōnono n̄an Jemād ilo jar.

“Lo, N̄a e” emaron̄ in juon uwaak n̄an juon kūr n̄an jerbale juon mijen ak n̄an kōļapļo̧k kōkkwojarjar ilo pokake kein ko āinwōt kōkkwojarjar Jabōt, kautij jinōm̧ im jemam̧ ak kappukot n̄an mour juon mour erreo. “Lo, N̄a e” ej juon kakōļļe me ejjab jokod an itok ippān rikaļoor ro an Kraist, jekdo̧o̧n n̄e katok eo kar kajjitōk kake ej jelet ta eo me jej ikdeelel kake eļap tata ak eo jaar kōļļāik juon wōņāān eo eļap.

M̧ōņōņō in n̄an pokake el lukkuun aorōk, eļap tata kōn kautiej n̄an bujen ko me jaar kōm̧m̧ani ke jaar peptaij ak kar deļo̧n̄e tampeļ. Kwomaron̄ ke pijaikļo̧k ta eo mour ko ad renaaj kar eļan̄n̄e ejjab jokod ad ļōmņak, “Lo, N̄a e” n̄e bōk iood etan Kraist ak n̄an maron̄ kakeememej E aolep iien im kōjparok kien ko An. Bōk m̧ōttan kwojkwoj eo ej karuwaineneik kōj n̄an bar kōkāāl kallim̧ur jab in, eo ej aikuj in waļo̧k ilo jerbal ko ad ilowaan wiik eo. Ejja in wōt ej jerbal n̄e jej etal n̄an tampeļ ilo ad kōm̧m̧an ak keememej bujen ko me jej kōm̧m̧ani ijo.

Ij keememej juon iien bwebwenato ikar kōm̧m̧ane ippān juon rim̧are kāāl elōn̄ iiō ko ļo̧k ke ikar jerbal āinwōt juon bisop. Juon bon̄, ekar wōr juon aer iien ekōnono aitok ellu, ikkijien kōļļā juon m̧ōttan jon̄oul. Ļeo pālele ekar jelm̧ae juon wiik epen ilo jerbal im kar kōņaan kakoņ jāān eo ekar bōke n̄an jet aikuj ko aer. Ijoke, ij keememej naan ko an lio pālele, ilo m̧aan mejān ļeo pāleen, liin ekar ba, “Bisop, im̧ōņōņō in jab wiāik aikuj ko ak bar bōjrak aō m̧ōn̄ā, n̄e emennin aikuj, ak ikōņaan kōļļā juon m̧ōttan jon̄oul im pokake Irooj.”

Elukkuun kar alikkar bwe “Lo, N̄a e” kar kwaļo̧ke kōn juon naan in kam̧ool jān lio pālele, bwe ļeo pālele im n̄a kar en̄jake kareel eo an jetōb ilo iien bwebwenato eo. Ilo jem̧ļo̧kin, ijjab jeļā eļan̄n̄e ekar jān ikdeelel eo an make ak kōnke ekar kareel jān lio pāleen, bōtaab ļeo pālele ekar kōļļā juon m̧ōttan jon̄oul eo an jem̧ļo̧kin wiik eo.

Jabōt eo tok juon, m̧okta jān kweilo̧k ko, ļeo pālele ekar kajjitōk n̄e emaron̄ kōnono ippān jidik. Kōn juon paotok eo me ekar oktak jān wiik eo im̧aan, ekar jiron̄ eō, “Bisop, kwojeļā bwe wiik eo ļo̧k ikar kōļļāik juon m̧ōttan jon̄oul eo aō, im ikar mijak bwe enaaj kar jabwe jāān n̄an m̧ōn̄ā, bōtaab bar kōņaan bwe kwon jeļā bwe wiik in ruo alen an ļapļo̧k dettan jāān eo ippām n̄an m̧ōn̄ā jān jon̄an eo ekōn pād ippām. Bisop, ekar juon kabwilōn̄lōn̄, im ikōņaan loe kabwilōn̄lōn̄ kein aolep iien ilo mour eo aō.” N̄an n̄a, ekar āinwōt eļan̄n̄e likao in ekar jiron̄ eō, “Bisop, ij m̧ōņōņō in uwaake kōn juon ‘Lo, N̄a e’ n̄an jabdewōt men Anij ej kajjitōk ippa.”

Irooj ekar kajjitōk bwe E ej lokjak n̄e jej kōm̧m̧ane ta eo E ej kajjitōk (lale Katak im Bujen Ko 82:10). Jej ke lukkuun tōmak ilo dim eo an kallim̧ur in?

Bōlen kōjeraam̧m̧an ko rejjab itok ilo iien eo ad ak wāween eo jej kōņaan, bōtaab ij kam̧ool n̄an kom̧ bwe kallim̧ur eo ej lukkuun im m̧ool. Ej kajjitōk iakwe n̄an E, ajeļo̧k, juon ikdeelel n̄an kōm̧anm̧an Ankilaan, im mour āinwōt rikaļoor ro an Kraist. E enaaj jipan̄ kōj im kōjeraam̧m̧an kōj n̄an meļeļe im kōjparok bujen ko ad. Ilo wāween jab in, n̄e E ej kajjitōk ippān n̄an kōm̧anm̧an Ankilaan, jen uwaak kōn juon alikkar eļap “Lo, N̄a E, Irooj!”