“Thomas: Etetal ilo Ial in Tōmak,” Liaona, Maaj 2026
Rekar Jeļā kōn Rilo̧mo̧o̧r
Thomas: Etetal ilo Ial in Tōmak
Bwebwenato eo an Thomas ej kwaļo̧k n̄an kōj bwe kajjitōk ko, kijenmej, im bōk juon kam̧ool rej m̧ōttan wōt eddōk eo ad ilo tōmak im kam̧ool.
Kōmeļeļe jān Laura Serra, jab maron̄ kapeiki
Ta eo ej itok n̄an ļōmņak n̄e kwoj ron̄ etan rikaļoor eo an Rilo̧mo̧o̧r Thomas? Emakijkij ad liin̄ etan ippān “ripere ro” ak “pere.”
Ak ewōr juon men eļapļo̧k n̄an Thomas. Ilo Gospel Jon, jej loe iaļen tōmak eo an Thomas eo me emaron̄ in kūlaaje eo ad make: Tōmak emaron̄ in kajoorļo̧k jen iien n̄an iien ilo ad tōmak im m̧akūtkūt n̄an kōļapļo̧k tōmak eo ad.
Ej EMMAN wōt n̄an Kōm̧m̧an Kajjitōk ko
Jisōs Kraist ekar ņaetan Thomas n̄an erom̧ juon iaan Rijilōk ro Jon̄oulruo, im Thomas ekar ļoore Rilo̧mo̧o̧r ilo aolepān iiō in jerbal ko An jilu. Ekar wōr juon an wūjlepļo̧k in iakwe n̄an Rilo̧mo̧o̧r. Ke Thomas ekar mijak kōn mour eo an Irooj, ekar rōjan̄ Rijilōk ro jet, “Barāinwōt kōjean̄ jen ilọk, bwe jen mej Ippān” (Jon 11:16).
Ilo wūjlepļo̧k in an, ekar kajjitōk wōt kajjitōk ko. Mokta Gethsemane, Jisōs ekar katakin bwe Enaaj etal ettoļo̧k. Thomas asked, “Irooj, kōm jaje ijo kwoj ilo̧k ie ļo̧k; im ekōjkan am jeļā iaļ eo?”
Jisōs ekar uwaak, “N̄a ij ial, m̧ool eo, im mour: ejjeļo̧k armej maron̄ itok n̄an Jema, elan̄n̄e jab kōn eō” (Jon 14:5–6).
Āinwōt Thomas, jemaron̄ jab meļeļe aolep katak ko an Anij ak aolep jekjek in karōk in lo̧mo̧o̧r eo. Ak kajjitōk eo ewāppen emaron̄ kwaļo̧k m̧ool eo jān Irooj. Ej menin aikuj n̄an kaddōkļo̧k tōmak eo am.
Būreejtōn Russell M. Nelson ekar katakin:
“Eļan̄n̄e ewōr ami kajjitōk ko—im ij kōjatdikdik bwe kom̧ij—kappukot uwaak ko kōn ikdeleel ko rejjab jokwōd n̄an tōmak. …
“… Kajjitōk ko ami rem̧ool, kajjitōk ilo tōmak, renaaj aolep iien tōlļo̧k n̄an tōmak eo eļapļo̧k im eļapļo̧k jeļāļo̧kjeņ.”
Tōmak Ņae Mijak
Ke Rijilōk ro rekar ron̄ bwe Jisōs em̧ōj an jerkak jān ro remej, ekar “waḷọk ñan er āinwōt naan waan, im re jab tōmak er.” (Luk 24:11). Iien pere eo an Thomas emaron̄ kar aitok jān ro jet kōnke ekar jāb pād ke Irooj eo em̧ōj an jerkakpeje ekar waļo̧k kein kajuon n̄an er (lale Jon 20:24).
Ālkin aer jiron̄ Thomas ke rekar loe Rilo̧mo̧o̧r, ekar uwaak, “Eḷaññe I jab lo ilo pein kōnjan dila ko, im likūt addiō ilo kōnjan dila, im karun̄ḷọk peiū ilo katin, I jāmin tōmak” (Jon 20:25).
Ālkin ralitōk raan ko, Irooj ekar bar waļo̧k im iakweiki Thomas n̄an en̄jake kinej ko An. N̄an uwaak, Thomas ekar kwaļo̧k, “Kwe aō Irooj im aō Anij” (Jon 20:28). Innām Rilo̧mo̧o̧r ekar katakin juon aorōk em̧ool: “E ṃōṇōṇō ro raar jab lo, im rej tōmak” (Jon 20:29).
Uwaak ko rej itok. Elder David A. Bednar jān Doulul eo an Jon̄oulruo Rijilōk ro ekar katakin, “Aolep jar em̧ool ej ron̄ im uwaak jān Jemādwōj Ilan̄, ak uwaak ko jej būki remaron̄ jab erom̧ ta eo jej kōtmāne ak itok n̄an kōj n̄e jej kōņaan ak ilo wāween eo jej ļōmņake.”
Kam̧ool Eo Me Etto An Pād
N̄e jej bōk uwaak ko jen niknik, jar, im revelesōn, jej barāinwōt bar bōk juon kam̧ool—juon naan in kam̧ool. Eļan̄n̄e jej wōnm̧aanļo̧k wōt im naajdik tōmak eo ad, bwe naan in kam̧ool eo emaron̄ pād wōt ippād aolepān ad mour. Āinwōt Būreejtōn Nelson ekar katakin: “Ilo ami kijenmej kautiej karōkan iien ko an Anij, kom̧ naaj bōk jeļāļo̧kjeņ eo im meļeļe eo kom̧ij pukote. Aolep kōjeraam̧m̧an ewōr ippān Irooj n̄an kom̧—barāinwōt kabwilōn̄lōn̄—naaj ļoori. En̄in ej ta revelesōn eo an juon make naaj kōm̧m̧ane n̄an kom̧”
En̄jake eo an Thomas ej kwaļo̧k n̄an kōj bwe tōmak ejjab juon mejān kajjik ak juon jerbal. Anij ej kautiej jerbal in im kōjeraam̧m̧an kōj ilo ad pād wōt leļo̧k ad n̄an unin tōl eo An im kappukot kam̧ool eo me ej kōnono aenōm̧m̧an n̄an būruwōd (lale Katak im Bujen Ko 88:63).