Ko ha Meʻaʻofa ʻo e Malava ke Mamatá maʻá e Fānau Ako ʻi Pāpua Niu Kiní

Ko e fānau ako ko ia ʻoku nau faingataʻaʻia ke sio ki he ngaahi foʻi lea ʻi ha tohí te nau faingataʻaʻia ai pē ke ako. Ka koeʻuhí ko ha tokoni fakapaʻanga mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻe aʻu ki ha fānau ako ʻe lauafe ʻi Pāpua Niu Kini te nau maʻu ha ngaahi matasioʻata laukonga mei he kautaha ʻiloa ko e Laila Foundation.

ʻOku fua ʻe he kautaha ko e Laila Foundation ʻa e ngaahi matasioʻata laukongá ki he fānau ako ʻoku ʻikai ke lelei ʻenau sió he taimi laukongá. ʻOku ʻomi e ngaahi matasioʻatá ʻe he kautaha ʻoku ʻikai ke fakatupu paʻanga ko e Charity Vision, ʻa ia ʻokú ne tokangaʻi e naunau ki he sió ki ha fonua ʻe 35.

ʻOku totongi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo fakafou ʻi hono potungāue ko e Kautaha Tokoni ʻOfa Fakaetangatá, ʻa e fakamole ki he matasioʻatá mo hono tufotufa atu kinautolú. Ko e palani taimi lōloa ki he fānau ʻi he feituʻu kotoa pē ʻo Pāpua Niu Kiní ke nau sivi mata taʻe totongi, ʻa ia ʻoku fakafuofua ki he fānauako ʻe toko 2500 ki he 5000 mo ʻamanaki ʻe maʻu ʻenau fuofua matasioʻata laukongá ʻi he ʻuluaki taʻú pē.

Naʻe fakahoko e polokalamá ʻi he ʻaho 9 ʻo ʻOkatopa 2025 ʻi he ʻApiako Māʻolunga Kōtoní ʻi he kolomuʻa ʻo e fonuá ʻa ia ko Pooti Molesipei pea naʻe tuku atu ia ʻe he kautaha ongoongo fakalotofonuá. 

Naʻe lava ke siviʻi e mata ʻo e fānau akó lolotonga e polokalamá, pea kapau naʻe fiemaʻu, ʻe maʻu ai pē hanau ngaahi matasioʻata kuo tomuʻa ngaohi ʻo fakatatau ki he ngaahi tūkunga ʻenau vakaí.

ʻOku toe hanga foki ʻe he Siasí ʻi he māhina ʻe ono ka hokó ʻo ʻomai ha meʻangāue ʻoku lava pē ke fetuku holo ke ne siviʻi e matá ʻi he ngaahi feituʻu kotoa ʻo e fonuá ʻoku fuʻu mamaʻó.

Naʻe tokoni e Minisitā Moʻui ʻo Pāpua Niu Kiní ko Honorable ʻIlaiasi Kapavole ki hono tufaki atu ʻo e ngaahi matasioʻatá ki he fānau ako ʻi he ʻApiako Māʻolunga Kōtoní mo fakamālō ki he Siasi ʻo Sīsū Kalaisí ʻi he tokoní.

“ʻOku ʻikai ke u maʻu ha lea feʻunga ki he mahuʻinga ʻo e tokoni ko ʻení ki homau kakai kei talavou ʻi Pāpua Niu Kiní. Makatuʻunga mei he ngāue ko ʻení ʻe malava ai ke aʻusia ʻe ha toʻutangata ʻo ha fānau ako ʻa honau tūkunga lelei tahá pea kaunga lelei mo ha tāpuaki ki he kakai kotoa ʻo Pāpua Niu Kiní. ʻOku ʻi ai ʻemau fuʻu fakamālō lahi ki he Siais ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi heʻenau tokoni ʻofa ke fakahoko moʻoni ai e polokalama ko ʻení.”

Ko e taha ʻo e fānau ako ʻoku kaunga lelei ki ai e polokalamá ko ʻAlekisānita Kuiso. ʻOku toe pē hono taʻu ʻe taha pea ʻosi ʻene akó mei he ʻApiako Māʻolunga Kōtoní, ka ʻi heʻene moʻuí kotoa naʻá ne faingataʻaʻia ke laukonga mei he palakipoé ʻi muʻa ʻi heʻene kalasí. ʻOkú ne pehē naʻe fuʻu faingataʻa moʻoni ʻa e ʻikai ke lelei ʻene vakaí ʻi he taimi naʻe kei siʻisiʻi ange aí ʻo faʻa tala ʻe he kau faiakó ia ʻoku ʻikai ke ne fuʻu tokanga ki he akó.

ʻI heʻene maʻu hono matasioʻatá, ʻokú ne pehē ai “ʻOku ou fiefia ʻoku hoko ʻeni ki he kakai kei talavou he feituʻu kotoa pē ʻi Pāpua Niu Kini. Te ne ʻomi ha faingamālie ki he taha kotoa pē ke fiefia he akó, he ʻoku fuʻu mahuʻinga ʻaupito ia.”