“Ngaohi ke Mahuʻingamālie Ange Hoʻo Toetuʻú ʻaki e Ngāue Tokoní mo e Feilaulaú,” Liahona, Fēpueli 2026.
Ngaohi ke Mahuʻingamālie Ange Hoʻo Toetuʻú ʻaki e Ngāue Tokoní mo e Feilaulaú
ʻI hono fakamanatua e Toetuʻú ʻo laka hake ʻi ha uike ʻe taha pe ko ha fakaʻosinga ʻo e uiké, ʻe lava ke hoko ia ko hano fakalōloa atu ia hono vahevahe ʻo e maama ʻa Kalaisí mo e fiefia ʻi hono tokoniʻi ʻo e niʻihi kehé.
Naʻá Ne Fakamoʻui ʻa Kinautolu Kotoa, tā ʻa Michael Malm, ʻikai lava ʻo hiki hano tatau
ʻE lava ʻe hono ngaohi ke mahuʻingamālie ange ʻetau fakamanatua e Toetuʻú ʻo ʻomi ha fiefia lahi ange mo tokoni ke tau ofi ange ai kia Sīsū Kalaisi. Naʻe pehē ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kuo tapou mai ke tau hiki ki ha founga māʻolunga mo māʻoniʻoni ange ʻo e Toetuʻú.”
ʻI he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku fekauʻi ke tau ʻoatu ha “loto-mafesifesi mo e laumālie fakatomala” ko ha feilaulau (3 Nīfai 9:20) pea feinga ke fakatomala, muimui ʻia Sīsū Kalaisi, mo fakafenāpasi ʻetau moʻuí ki Heʻene ngaahi fekaú. ʻE lava ke tokoniʻi kitautolu ʻe he feilaulaú mo hono tokoniʻi e niʻihi kehé ke tau fakamanatua lelei ange ai ʻa e Fakamoʻuí lolotonga e faʻahitaʻu Toetuʻú.
Ngaahi Founga ʻe Niʻihi ki he Ngāué mo e Foakí
Fakakaukau ki he ngaahi fokotuʻu ko ʻení ke fakalahi ʻa e ivi tākiekina ʻo Kalaisí ʻi hoʻo moʻuí mo ʻai ke mahuʻingamālie ange e faʻahitaʻu Toetuʻú, pe faʻu pē haʻo palani.
-
Tuku ha taimi mo ha ivi ke ngāue ʻi ho uiuiʻí. “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17).
-
Tuku ʻa e lāungá. “Fai ʻa e ngaahi meʻa kotoa pē taʻe-lāunga mo e taʻefakakikihi” (Filipai 2:14).
-
Foaki ha paʻanga ki ha ngāue lelei. “Pea ko e meʻa ʻi hoʻomou foaki mei hoʻomou ngaahi koloá ki he masivá, ko hoʻomou fai ia [ki he ʻEikí]” (Tokāteline mo e Ngaahi Fuakava 42:31).
-
Foaki ha meʻakai ki ha taha ʻoku faingataʻaʻia. “He naʻá ku fiekaia, pea naʻa mou foaki ʻa e meʻakai kiate au” (Mātiu 25:35).
-
Fakaʻaongaʻi e fono ʻo e ʻaukaí ʻi he ʻaukai mo e lotu pea fai ha foaki ʻaukai maʻanautolu ʻoku faingataʻaʻiá. Te ke toe ofi ange ai ki he ʻEiki ko Sīsū Kalaisí. “ʻE fakatatau ki hoʻomou fai ʻení ʻa hoʻomou maʻu ʻa e mahu ʻo māmaní” (Tokāteline mo e Ngaahi Fuakava 59:16).
-
Fili ha taha ke ke tokoniʻi. “Kae fetauhiʻaki ʻa kimoutolu ʻi he ʻofa” (Kalētia 5:13).
-
Faʻu ha lisi ʻo e hiva māʻoniʻoní pea vahevahe ia mo e niʻihi kehé. “Fakafonu ʻa kimoutolu ʻi he Laumālié; ʻo fealēleaʻaki ʻakimoutolu ʻi he ngaahi sāmé mo e himí mo e hiva fakalaumālié” (ʻEfesō 5:18–19).
-
Faʻa moihū lahi ange ʻi he temipalé. “He te u fokotuʻu hake kiate au ha kakai haohaoa, ʻa ia te nau tauhi kiate au ʻi he māʻoniʻoni” (Tokāteline mo e Ngaahi Fuakava 100:16).
-
Ngāue ke fakatupulaki ha ʻulungaanga faka-Kalaisi foʻou ʻiate koe (ʻofa faka-Kalaisí, ʻofá, mahinó, faʻa kātakí, kātaki fuoloá, angaʻofá, manavaʻofá). “Toʻo ʻeku haʻamongá kiate kimoutolu, pea mou ako ʻiate au; he ʻoku ou angavaivai mo angamalū: pea te mou ʻilo ai ʻa e fiemālie ki homou laumālié” (Mātiu 11:29).
-
Fakamolemoleʻi ha taha. “Mou fakamolemole, pea ʻe fakamolemolea ʻa kimoutolu” (Luke 6:37).
-
Ngāue tokoni ʻi he ngaahi kautaha meʻatokoni fakalotofonuá pe ngaahi kulupu fakakoló. Vakai ki he JustServe.org ki ha ngaahi faingamālie. “Tau failelei ki he kakai kotoa pē” (Kalētia 6:10).
-
Aʻu vave ki he lotú ke teuteu ki he sākalamēnití. “Fai ia ʻaki ʻa e mata ʻoku hanga taha pē ki hoku fakalāngilangiʻí—ʻo manatuʻi ʻa hoku sinó ki he Tamaí ʻa ia naʻe tuku hifo maʻamoutolú, pea mo hoku totó ʻa ia naʻe lilingi koeʻuhí ke fakamolemoleʻi ai ʻa hoʻomou ngaahi angahalá” (Tokāteline mo e Ngaahi Fuakava 27:2).
-
Ako ʻo kau ki he Toetuʻú. “Ko ʻeni, ʻoku ʻi ai ha mate ʻoku ui ko ha mate fakasinó, pea ʻe vete ʻe he pekia ʻa Kalaisí ʻa e ngaahi haʻi ʻo e mate fakasino ko ʻení, koeʻuhi ke fokotuʻu hake ʻa e kakai fulipē mei he mate fakasinó ni” (ʻAlamā 11:42).
Kuó Ne Toetuʻu, tā fakatātaaʻi ʻe Dan Wilson, ʻikai ngofua ke hiki hano tatau
Ko Ia ʻa e Fiefiaʻangá
Kapau te tau muimui ʻi he sīpinga ʻa Sīsū Kalaisi ʻo e feilaulaú mo hono fakamafola ʻa e māmá, te tau ofi ange ai kiate Ia mo fiefia ange. Naʻe pehē ʻe Palesiteni Lāsolo M. Nalesoni, “ʻOku haʻu e fiefiá meiate Ia [koeʻuhí ko Ia].” “Ko Ia e tupuʻanga ʻo e fiefia kotoa pē.”